Te Pogai e Manakogina ei ne Tatou te Atua

E fai mai a tino ‵poto o te mafaufau me e manakogina ke fakama‵lie ne tino olotou manakoga faka-te-agaga ko te mea ke fia‵fia tonu latou. E lavea ne tatou i ei a te manatu tonu me e ma‵nako a tino ki se mea telā e aoga ki a latou io me ke tavini atu latou ki se tino io me se mea telā e sili atu i a latou. Ke fakamalie aka te manakoga tenei, e tuku kātoa atu eiloa ne nisi tino olotou taimi ki mea ne faite, te ‵lomiga o ata, pese, mo nisi mea aka foki penā. Kae e se maua eiloa ne te tokoukega o latou a te fiafia lasi io me ko te tumau i vaegā taumafaiga penā.

E se ‵poi a tino fai‵tau ki te Tusi Tapu ki te manatu tonu me e maua ne tino i loto i a latou a te manakoga mō mea faka-te-agaga. A mataupu muamua o te Kenese e fakaasi mai i ei me mai tua o te faitega ne te Atua o te tauavaga muamua, ne faipati atu faeloa a ia ki a lāua, mai te tuku atu o te avanoaga ke ati aka ne lāua se fesokotakiga faka-te-agaga mo ia. (Kenese 3:8-10) Ne seki faite ne te Atua a tino ke ‵tu tokotasi mai i a ia; e maua ne latou te manakoga ke fesokotaki atu ki te Tino ne faite ne ia latou. E fakasino atu faeloa a te Tusi Tapu ki te manakoga tenei.

E pelā mo Iesu, ne fai mai penei: “E fia‵fia a latou kolā e iloa ‵lei ne latou olotou manakoga faka-te-agaga.” (Mataio 5:3) Mai pati konā, e mafai o fakaiku aka ne tatou me i te mea e tasi e manakogina ke maua ei se olaga fakafiafia kae fakalotomalie ko te fakamaliega o ‵tou manakoga faka-te-agaga. E mafai pefea o fai ne tatou te mea tenā? Ne fakasino atu a Iesu ki te tali i te taimi ne fai mai ei a ia: “E se ko meakai fua e ola ei te tino, kae ko pati katoa kolā e ‵to mai i te gutu o Ieova.” (Mataio 4:4) Ne a auala e fai ei ne pati a te Atua, telā ko mafaufauga mo akoakoga a te Atua i te Tusi Tapu, ke faigofie o maua ne tatou se olaga fiafia kae aoga? Ke mafau‵fau tatou ki auala fakavae konei e tolu.

E Ma‵nako Tatou ki Takitakiga ‵Lei

I aso nei, e uke ‵ki eiloa a tino ‵poto mo tino ata‵mai kolā ko toka o tuku mai a manatu fesoasoani i te faiga o fesokotakiga, alofa, te olaga faka-te-kāiga, te faka‵leiga o kinauga, te fiafia, kae ke oko foki eiloa ki te aoga o te olaga. Kae ko oi eiloa te ‵toe tino ‵lei, i tafa o Ieova te Atua, telā ne faite ne ia a tino, e mafai o tuku mai ne ia a takitakiga aoga kae paleni i feitu katoa konei?

Ke fai se fakatusaga: Kafai e ‵togi ne koe se masini, e pelā me se mea pei ata io me se komupiuta, e fakamoemoe eiloa ke aumai tasi mo se tusi fakatonutonu io me se tamā tusi telā e fakamatala mai i ei a te ‵toe auala ‵lei kae fakafiafia ke fakaaoga ei tau mea ne ‵togi. E fai eiloa te Tusi Tapu e pelā mo te tamā tusi tenā. Se tusi fakatonutonu mō te olaga o tino telā ne fakatoka ne te Atua, te tino telā ne faite ne ia tatou, ke mafai o fakaaoga ne tatou. A te “tusi fakatonutonu” tenei e fakamatala mai i ei a mea e mafai o fai ne te masini mo te auala e ‵tau ei o fakaaoga ke maua mai i ei a toe ikuga ‵lei.

E pelā eiloa mo so se tusi fakatonutonu ‵lei, e fai ne te Tusi Tapu ke matapula‵pula a tino fai‵tau ki faifaiga kolā e mafai ei o fakamataku ki te tokagamalie mo te fakatalitonugina o te “mea ne ‵togi”​—ko ‵tou ola. E mafai o tuku mai ne nisi tino a fakatakitakiga kolā e ‵tagi ‵lei io me tai faigofie atu ke tau‵tali ki ei, kae e mata, e sē se mea tonu ke mafaufau me ka maua eiloa ne tatou a toe ikuga ‵lei kae mu‵tana foki a fakalavelave māfai e tau‵tali atu tatou ki takitakiga a te Tino ne faite ne ia tatou?

E tiga eiloa e tuku mai ne Ieova te Atua a takitakiga mo fakatonutonuga, e se faimālō mai a ia ke talia ne tatou. I lō te fai penā, e pela me se Tino alofa kae fia fesoasoani mai, e faipati mai eiloa a ia mo te alofa ki a tatou penei: “Au ko [Ieova] te otou Atua, telā e manako o akoako koutou ke ‵lei koutou kae fakatonutonu foki koutou i te auala e ‵tau o olo koutou i ei. Moi ne faka‵logo mai eiloa koutou ki aku fakatonuga, e penei a fakamanuiaga mō koutou e ‵tafe eiloa pelā me se vaitafe telā e se mafai o ‵masa pakupaku! E penei e maua ne koutou te manumalo pelā mo galu kolā e ‵fati ki luga i te tafatai.” (Isaia 48:17, 18) Ke fakatoetoe aka te manatu tāua i ei, kafai e faka‵logo tatou ki te takitakiga a te Atua, ka ola ‵lei eiloa tatou. I nisi tugapati, ke ola ‵lei kae fia‵fia tatou, e manakogina ne tatou te Atua.

E Fia Iloa ne Tatou a Tali ki Fakalavelave o te Olaga

E mafau‵fau a nisi tino me e se manakogina ne latou te Atua ona ko te mea e uke a fakalavelave fakafi‵ta i te olaga kolā e fe‵paki mo latou ona ko te talitonu ki se Atua alofa. E pelā mo te mea e tasi, e mafai o fesili mai latou: ‘Kaia e logo‵mae ei a tino ‵lei?’ ‘Kaia e se katoatoa ei a nisi pepe kolā e seai ne agasala?’ ‘Kaia e ‵fonu ei te olaga i faifaiga sē fakamaoni?’ E tāua eiloa a fesili konā, kae ko te mauaga o tali fakamalie loto ki ei e mafai o lasi ‵ki te fakamalosiga ki ‵tou olaga. Kae i lō te ‵losi fakavave atu ki te Atua mo vaegā fakalavelave penā, ke onoono aka tatou me e fakaasi mai pefea i te Muna a te Atua, ko te Tusi Tapu a te mainaga tonu e uiga ki te mataupu tenei.

I te mataupu e tolu o Kenese, e maua atu i ei a te tala o Satani, telā ne fakafoliga atu me ko te gata, ne taumafai o fai a te tauavaga muamua ke ‵teke atu ki te fakatonuga a Ieova te Atua ke se ‵kai mai i te lakau o te iloaga o te ‵lei mo te masei. “A koulua e se ‵mate,” ko pati a Satani ki a Eva. “A te Atu ne fai atu penā, me e iloa ne ia me kafai e ‵kai koulua ki fuaga o te lakau tenā, ko koulua ka ‵pau mo te Atua, ka iloa foki ei ne koulua te mea ‵lei mo te mea masei.”​—Kenese 2:16, 17; 3:4, 5.

Mai i pati konā, e seki fai atu fua a Satani me i te Atua se tino loi kae ne fakauiga foki a ia me e se fakamaoni a te Atua i te auala e pule atu ei a ia. Ne kinau atu eiloa a te Tiapolo me kafai e faka‵logo atu a tino ki a ia, ka sili atu i te ‵lei olotou olaga. Ne mafai pefea o faka‵lei aka a fakalavelave konā? Ne filifili aka ne Ieova ke talia se vaitaimi ke ‵tupu a mea konei ko te mea ke mafai o lavea ne tino katoa me e ‵tonu io me ‵se a ‵losiga ne fai e uiga ki a ia. A te ‵tonuga loa, ne tuku atu ne te Atua ki a Satani mo tino kolā ne ‵kau atu ki a ia a te avanoaga ke lavea ne latou me e mafai o ola ‵lei a tino e aunoa mo te Atua.

Se a tau faka‵tau e uiga ki te tali e ‵tau o tuku atu ki fakamatalaga a Satani? E mata, e mafai o ola ‵lei kae pule atu a tino ki a latou eiloa mo te manuia e aunoa mo te Atua? A logo‵maega, faifaiga sē fakamaoni, masaki, mo te mate e pelā foki mo amioga solitulafono, amioga ma‵sei, taua, tamatega i va o itukāiga, mo nisi fakatau tamatega kolā ne fakalogo‵mae atu ki tino i te fia o senitenali ko ‵teka, ne fakamaoniga mautinoa me ne seki iku manuia a taumafaiga a te tino ke pule atu ki a ia eiloa e aunoa mo te Atua. I lō te fai atu me e māfua mai i te Atua a fakalavelave, e fakasino atu te Tusi Tapu ki te pogai tonu e ‵tupu i ei a mea konā me: “E ‵nofo puapuaga i te pulega a tino ma‵luga.”​—Failauga 8:9.

E ‵tusa mo te mainaga tenei, e a, e se manino ‵lei i ei me e se ‵tau fua o ‵fuli atu tatou ki te Atua ke maua a tali ki fesili faiga‵ta kolā e fe‵paki mo tino kae mō te faka‵leiga foki? Ne a mea ka fai ne te Atua?

E Ma‵nako Tatou ki te Fesoasoani o te Atua

Ko leva ne ma‵nako a tino ki te saolotoga mai i masaki, olaga matua, mo te mate. Ko oti eiloa ne fakamāumāu ne latou a taimi, taumafaiga, mo kope e uke i te kausaki atu ki ei, kae e foliki fua io me e seai eiloa se fesoasoani e maua mai i ei. Ne fakamoe‵moe a nisi tino ke maua a te vaegā saolotoga penā e auala i vaiao, fakamalosilosiga o te foitino, mo faifaiga faivailakau. Kae ne fakafanoa‵noa ‵ki a ikuga o moemiti katoa konei.

E manako a te Atua ke ola ‵lei kae fia‵fia a tino. Tenā eiloa tena fuafuaga muamua i te faitega ne ia o tino, kae e seki puli eiloa i a ia. (Kenese 1:27, 28; Isaia 45:18) E maua eiloa ne tatou a te fakatalitonuga a Ieova te Atua me ka se mafai eiloa o se taunu so se mea e mafaufau a ia o fai. (Isaia 55:10, 11) E fai mai te Tusi Tapu e uiga ki te folafolaga a te Atua ke toe fakafoki mai a te olaga i te Palataiso telā ne galo atu i te tauavaga muamua. I te ‵toe tusi i te Tusi Tapu, e maua ne tatou a pati konei: “Ka ‵solo ne ia [Ieova te Atua] a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.” (Fakaasiga 21:4) Ka toe fakafoki mai pefea ne te Atua a fakanofonofoga ‵gali katoa konei, kae ka maua pefea ne tatou a mea aoga mai i te folafolaga tenei?

A te Tama a te Atua, ko Iesu Keliso, ne akoako ne ia ana soko ke ‵talo atu ke fai te loto o te Atua. E masani a tino e tokouke io me e fakafokifoki atu faeloa ne latou a te ‵talo tenā, telā e taku ne nisi tino ki te ‵Talo a te Aliki. E fai penei: “Te motou Tamana telā i te lagi, ke tapu tou igoa. Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mataio 6:9, 10) Ao, a te Malo o te Atua ko te auala ka fakaseai atu ei ne Ieova te Atua a ikuga matagā katoa o te pulega a tino kae toe fakafoki mai a te lalolagi fou kae amiotonu telā ne folafola mai ne ia.a (Tanielu 2:44; 2 Petelu 3:13) Ne a mea e ‵tau o fai ne tatou ke maua a mea aoga mai i te folafolaga a te Atua?

E fakasino atu a Iesu Keliso ki mea faigofie e ‵tau o fai ne tatou: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, penā foki loa mo te tino telā ne uga mai ne koe, ko Iesu Keliso.” (Ioane 17:3) Ao, fakatasi mo te fesoasoani o te Atua, e mafai eiloa o maua ne tatou a te ola se-gata-mai i te lalolagi fou telā ko oti ne folafola mai. E mafai eiloa o fakatalitonu atu ne te fakamoemoega tenā a te suā pogai e ‵tau ei o tali atu tatou ao ki te fesili, E mata, e manakogina ne tatou te Atua?

Te Taimi ke ‵Sala Atu ki te Atua

I te lua afe tausaga ko ‵teka, i te Aleopako, io me ko Mars Hill, i Atenai, ne fai atu ne te apositolo ko Paulo a te mea tenei e uiga ki te Atua ki tino Atenai kolā ne mafaufau faka‵lei ki mea: “Ko ia telā e tuku atu ne ia ki tino katoa a te ola mo te mānava e pelā foki mo mea katoa. E auala i a ia ko maua ei ne tatou a te ola, e gasue‵sue, kae e isi foki tatou, e pelā eiloa mo pati a nisi tino ‵fatu kupu mai i a koutou kolā ne fai mai, ‘Me i a tatou foki ko ana fanau.’”—Galuega 17:25, 28.

A mea kolā ne fai atu ne Paulo ki te kau Atenai ko oko eiloa i te ‵tonu. E tuku mai ne te ‵tou Mafuaga a te ea e ma‵nava tatou ki ei, mea‵kai e ‵kai tatou ki ei, te vai e inu ei tatou. E se mafai eiloa o ola tatou e aunoa mo mea ‵lei ko oti ne tuku mai ne Ieova mō tou ōla. Kae kaia ne tumau ei te Atua i te tukumaiga o mea konā ki tino katoa, faitalia me e mafau‵fau latou ki a ia io me ikai? Ne fai mai a Paulo “ko te mea ke ‵sala atu latou ki te Atua, me kafai e ‵sala malosi latou ki a ia kae ka maua eiloa ne latou a ia, me i a ia e se ‵mao mai i a tatou taki tokotasi.”—Galuega 17:27.

E mata, e fia iloa ‵lei ne koe te Atua, ko tena uiga, ke tauloto ki mea e uke atu e uiga ki ana fuafuaga mo ana fakatakitakiga ki te ola ‵lei nei, penā foki loa ki te se-gata-mai? Kafai e penā loa, e fakamalosi atu matou ke faipati atu ki te tino ne avatu ne ia te mekesini tenei ki a koe io me e fesokotaki atu ki te kau ‵lomi tusi o te mekesini. Ka fia‵fia eiloa latou ke fesoasoani atu ki a koe.