E Mata, e ‵Tau o Kau Koe ki se Lotu?
‘E SE ‵tau o kau io me fano faeloa au ki se lotu ko te mea ke talitonu ei au ki te Atua!’ Tenā loa te lagonaga e oko ki tino e tokouke kolā e ‵kau atu ki se lotu io me se fakapotopotoga a lotu. Kae e fai mai a nisi tino me e ‵pili atu latou ki te Atua māfai e kilo‵kilo atu ki ana mea ne faite i lō te kau atu ki se tapuakiga i te falesa. I aso nei, se talitonuga masani me e se manakogina ke ‵kau atu ki se lotu ko te mea ke talitonu ei ki te Atua.
Kae e ‵kese eiloa a lagonaga o nisi tino. E lotoma‵lie latou me e tāua ‵ki ke kau atu ki se lotu māfai e fia maua ne se tino te taliaga a te Atua. Tela la, a te ‵kau atu o tatou ki se lotu me ikai se mea tāua ‵ki kae e se ko te mauaga fua o fakamatalaga mō tino kolā e sukesuke ki mea tau lotu. Ona ko te mea e aofia i ei te va o tatou mo te Atua, e mata, e se se mea ‵tau ke ‵sala atu tatou ki te kilokiloga a te Atua e uiga ki te mea tenā? Ne a mea e tauloto ne tatou mai tena Muna ko te Tusi Tapu e uiga ki te mataupu tenei?
Faifaiga a te Atua ki Tino i Aso Mua
Ne poko se lolo lasi i te lalolagi kātoa i tausaga toeitiiti ko katoa te 4,400 ko ‵teka. E se fakapuligofie se vaegā fakalavelave penei, kae e isi ne tala a tino i te lalolagi kātoa e uiga ki ei. E tiga eiloa e kese‵kese a fakamatalaga likiliki e uiga ki ei, kae e uke a mea e ‵pau i ei me ne ‵sao a nāi tino mo manu i ei.
E mata, ne ‵sao amate fua a tino konei? E fai mai te tala i te Tusi Tapu me e se penā loa. Se mea tāua me ne seki fakailoa atu ne te Atua ki tino taki tokotasi a te oko mai o te lolo. I lo te fai penā, ne faipati atu a ia ki a Noa, kae ne fakaoko atu ne Noa te fekau e uiga ki te Lolo telā ka oko mai ki tino i aso konā.—Kenese 6:13-16; 2 Petelu 2:5.
Ne fakalagolago eiloa a te faka‵saoga ki te kau atu ki te potukau tenei kae ke loto fiafia o talia a fakatonuga a te Atua kolā ne tuku ki a Noa. Ke oko foki loa ki manu kolā ne ‵sao i te Lolo, ne seki mafai o ‵sao latou moi ne seki aofia latou i te potukau e tasi tenei. Ne tuku atu a fakatonuga mautinoa ki a Noa ke fai a fakatokaga kolā e faka‵sao ei a manu.—Kenese 6:17–7:8.
I te fia o senitenali mai tua ifo i ei, ne puke fakapagota a tino i te gafa o Noa mai i a Semu i Aikupito. Ne fuafua ne te Atua ke faka‵sao latou kae ke avatu ki te fenua telā ne folafola ne ia ki te lotou tupuga ko Apelaamo. Ne seki fakaasi atu foki te mea tenā ki tino taki tokotasi kae ne fakaasi muamua atu ki tino kolā ne filifili aka ke fai mo olotou takitaki—ko Mose mo tena taina ko Alona. (Esoto 3:7-10; 4:27-31) Mai tua o te faka‵saoga e pelā me se potukau e tasi a tino kolā ne ‵nofo fakapagota i Aikupito, ne tuku atu ki a latou a Tulafono a te Atua i te Mauga ko Sinai kae ne fai i ei e pelā me se fenua e tasi o tino Isalaelu.—Esoto 19:1-6.
Ne mafai o ‵sao a tino Isalaelu taki tokotasi i ei me ne ‵kau fakatasi atu latou ki te potukau telā ne fakatu ne te Atua kae ne tau‵tali foki i fakatonuga a takitaki kolā ko oti ne filifili aka. Ne fai foki a fakatokaga mō tino Aikupito taki tokotasi kolā ne ‵kau atu ki te potukau telā ne talia ne te Atua. I te taimi ne tiakina ei ne te kau Isalaelu a Aikupito, ne olo atu eiloa a tino konei fakatasi mo latou, kae ne maua ei ne latou a fakamanuiaga a te Atua.—Esoto 12:37, 38.
Kae, i te senitenali muamua, ne kamata ei te galuega talai a Iesu ke fakamaopoopo mai a tino mo fai ana soko. Ne saga atu a ia ki a latou e pelā me se potukau e tasi, kae ne saga atu foki mo te alofa ki tino taki tokotasi e ‵tusa mo olotou manakoga. Ana muna ki apositolo e toko 11: “Ne ‵kau fakatasi foki koutou mo au i oku tofotofoga. E pelā eiloa mo te tukumaiga ne toku Tamana te pule ki a au, e pelā foki taku feagaiga ki a koutou.” (Luka 22:28, 29) Fakamuli ifo, ne ‵ligi atu te agaga tapu o te Atua ki ana soko e pelā me se potukau.—Galuega 2:1-4.
E fakaasi mai i fakaakoakoga konei me ne saga atu faeloa a te Atua ki ana tino e pelā me se potukau i aso mua. Kae ko nāi tino fua kolā ne fesokotaki ‵tonu atu ki ei a te Atua—Noa, Mose, Iesu mo nisi tino—ne fakaaogā eiloa ne ia a tino konā ke fesokotaki atu ki olotou kāiga e pelā me ne potukau. E seai eiloa se pogai e ‵tau ei o tali‵tonu tatou me ka ‵kese a faifaiga a te Atua ki ana tavini i aso nei. E tonu, e sae aka i konei te suā fesili: E mata, e ‵lei fua ma kau atu ki so se lotu? Ka sau‵tala tatou ki te fesili tāua tenei i te suā mataupu.
[Ata i te itulau e 4]
Ko leva ne saga atu a te Atua ki ana tino e pelā me se potukau