E Mata, Ka Fai Ne Koe A Mea Mo Te Loto Kātoa Mō Te Malo?

1. Ne a vaegā mea e fai ne tino mo te loto kātoa, kae kaia?

E LOTO fia‵fia a tino o fai a mea katoa kolā e aoga ki a latou. E fakamāumāu ne mātua olotou taimi, tupe, mo malosi ke aoga ki olotou tamaliki. E ui eiloa e ta‵fao olotou taugasoa kae fia‵fia, e fakamāumāu ne talavou ta‵fao kolā e fakamoe‵moe ke sui ne latou olotou atufenua i te Olympics a itula e uke i te aso o fai a fakaakoakoga. Ne fai foki ne Iesu mo te loto kātoa a mea kolā e tāua ki a ia. Ne seki ‵sala atu a ia ki mea ‵togi ‵mafa, kae seai foki ne ana tamaliki totino. I lō te fai o mea konā, ne filifili a ia ke saga atu ki te fakasalalauga o mea o te Malo. (Mata. 4:17; Luka 9:58) E uke foki a mea ne tiakina ne ana soko ke ‵lago atu ki te Malo o te Atua. A te fakasalalauga o te Malo ko te mea telā ne tāua malosi ki a latou, kae ne fai ne latou mo te loto kātoa a mea katoa ke ‵lago katoatoa atu ki te Malo. (Mata. 4:18-22; 19:27) Tela la, ke ‵sili ifo ki a tatou eiloa, ‘Se a te mea tāua i toku olaga?’

2. (a) Ne a mea e fai mo te loto kātoa e tāua ki Kelisiano ‵tonu katoa? (e) Ne a nisi galuega fakaopoopo e mafai o fai ne nisi tino mo te loto kātoa?

² E tāua a mea mautinoa kolā e fai mo te loto kātoa ki Kelisiano ‵tonu katoa kae aoga foki ki te atiakaga mo te fakatumauga ne tatou se fesokotakiga ‵lei mo Ieova. E aofia i mea kolā e fai mo te loto kātoa a te tukuatuga o taimi mo malosi totino ki te faiga o ‵talo, faitauga ki te Tusi Tapu, tapuakiga a te kāiga, ‵kau ki fakatasiga, mo te galuega talai.a (Iosu. 1:8; Mata.28:19, 20; Epe. 10:24, 25) E pelā me ko te ikuga o ‵tou taumafaiga mo te fakamanuiaga a Ieova, ko fakava‵vave a te faiga o te galuega talai, kae koi tumau eiloa te ua‵lolo mai o tino e tokouke ki “te mauga telā e tu i ei te fale o Ieova.” (Isa. 2:2, NW) Ke ‵lago atu ki galuega o te Malo, e fai ne tino e tokouke a mea katoa mo te loto kātoa ke ga‵lue i te Peteli, ke fesoasoani ki te faka‵tuga o Kingdom Halls mo Assembly Halls, ke fakatoka a fono o atufenua, io me fai a galuega fesoasoani māfai e isi ne fakalavelave o te natula. A te galuega fakaopoopo tenei e sē se mea e maua i ei te ola, kae se mea e tāua ke ‵lago atu ki mea o te Malo.

3. (a) E aoga pefea ki a tatou māfai e fai ne tatou a mea katoa mo te loto kātoa mō te Malo? (e) Ne a fesili e ‵tau o mafau‵fau tatou ki ei?

³ Ko lasi atu nei a te manakoga ke ‵lago malosi atu tatou ki te Malo. Se mea fakafiafia ke lavea atu a te tokouke o tino e fai a mea katoa mo te loto kātoa mō Ieova! (Faitau te Salamo 54:6.) E maua ne tatou te fiafia lasi mai i se agaga kaimalie penā a koi fakatali‵tali tatou ki te oko mai o te Malo o te Atua. E ‵tau mo tatou katoa o iloilo faka‵lei a tatou eiloa. E mata, e isi aka ne nisi auala e mafai ei o fai ne tatou ne galuega fakaopoopo mo te loto kātoa mō te Malo? E fakaaoga pefea ne tatou ‵tou taimi, tupe, malosi, mo mea e mafai o fai ne tatou? Ne a mea e ‵tau ke fakaeteete tatou i ei? Ke toe onoono aka tatou ki se fakaakoakoga telā e mafai o fakaakoako tatou ki ei i te faiga o mea katoa mo te loto kātoa, e momea aka ei ‵tou fia‵fia.

TAULAGA KOLĀ NE FAI I ISALAELU MUA

4. Ne aoga pefea ki te kau Isalaelu a te faiga o taulaga?

⁴ A te ofoga o taulaga i Isalaelu mua ko te auala e maua ei a te fakamagaloga o agasala. E ‵tau eiloa o fai a taulaga ko te mea ke maua ne tino a te taliaga a Ieova. A nisi taulaga ne mea loa kolā ne manakogina ke fai; kae ko nisi e fai mo te loto malie. (Levi. 23:37, 38) A taulaga ‵sunu kolā e ofo kātoa e mafai o fai pelā me ne taulaga e fai mo te loto malie, io me ne meaalofa ki a Ieova. A te fakaakoakoga e tasi o te faiga o taulaga ne lavea atu i te fakaulufalega o te faletapu i aso o Solomona.​—2 Nofo. 7:4-6.

5. Se a te fakatokaga ne fai ne Ieova mō tino ma‵tiva?

⁵ E malamalama a Ieova me e se ‵pau a mea e mafai ne tino katoa o tuku atu ki a ia, kae ne manako fua a ia ke tuku atu ne tino taki tokotasi a te mea telā e mafai ne ia o fai. Ne fakatonu mai te tulafono a Ieova me e ‵tau o fakasali te toto o te manu, telā “se ata fua o mea ‵lei ka oko mai” e auala i tena Tama, ko Iesu. (Epe. 10:1-4) Kae ne uiga faigofie a Ieova i te fakagaluegaga o te tulafono tenā. Pelā me se fakaakoakoga, e talia ne te Atua ke ofo atu se avā lupe māfai e se mafai ne se tino o ofo atu se mamoe io me se kouti. Tela la, e mafai foki ne tino ma‵tiva o ofo a taulaga ki a Ieova mo te fiafia. (Levi. 1:3, 10, 14; 5:7) E ui eiloa e kese‵kese a manu e ofo mo fai a taulaga, e lua a mea kolā e manakogina mai i tino taki tokotasi kolā e fai a taulaga mo te loto malie.

6. Se a te mea e manakogina mai i tino taki tokotasi kolā e ofo atu olotou taulaga, kae kaia e tāua ei ke tau‵tali i manakoga konā?

⁶ A te mea muamua, e ‵tau mo te tino o tuku atu a tena toe mea ‵lei. Ne fai atu Ieova ki tino o te fenua i so se taulaga e ofo atu e ‵tau se mea ‵lei ko te mea ke “talia ne te Aliki [Ieova].” (Levi. 22:18-20) Kafai e isi se pona o te manu, e se talia ne Ieova a te taulaga. Te lua o mea, a te tino telā e ofo ne ia te taulaga e ‵tau o ‵ma kae se lailai. Kafai te tino e se ‵ma, e ‵tau o ofo muamua ne ia se taulaga mō agasala ko te mea ke toe ‵lei tena tulaga i mua o Ieova a koi tuai o ofo a tena taulaga mo te loto malie. (Levi. 5:5, 6, 15) A te mea tenei se mea e tāua ‵ki. Ne fakatonu atu a Ieova me kafai se tino sē ‵ma e kai ki se taulaga e fai fakatasi telā e aofia i ei te taulaga ne fai mo te loto malie, a ia e ave kea‵tea mai tino o te Atua. (Levi. 7:20, 21) I te suā feitu, kafai e ‵lei te tulaga o te tino telā e ofo ne ia te taulaga i mua o Ieova kae seai se pona o tena taulaga, ka fiafia kae loto malie a ia.​—Faitau te 1 Nofoaiga Tupu 29:9.

TE FAIGA O MEA MO TE LOTO KĀTOA I ASO NEI

7, 8. (a) Se vaegā fiafia pefea e maua ne tino e tokouke mai te faiga o mea mo te loto kātoa mō te Malo? (e) Ne a ‵tou mea e mafai o tuku atu mai mea kolā e maua ne tatou?

⁷ E tokouke foki i aso nei e loto fia‵fia ke fakaaoga latou i te taviniga a Ieova, kae fiafia a Ieova ki te mea tenei. A te ga‵lue o fesoasoani ki ‵tou taina se mea fakafiafia. E fai mai se taina telā e galue i te faka‵tuga o Kingdom Halls kae fesoasoani ki a latou kolā ne pokotia i fakalavelave o te natula me se mea faigata ke fakamatala a te fiafia telā e maua ne ia mai te taviniga i auala konei. Muna a tou tagata, “A te kilo atu ki te fia‵fia mo te loto fakafetai o taina mo tuagane māfai ko oti te lotou Kingdom Hall ‵fou, io me ko te taimi telā e maua ei ne latou se fesoasoani mai tua o se fakalavelave o te natula, e fakaasi mai i ei a te aoga o galuega mo taumafaiga katoa ne fai.”

⁸ E salasala faeloa te fakapotopotoga a Ieova i aso nei ki avanoaga ke ‵lago atu ki te galuega a Ieova. I te 1904, ne tusi mai a te Taina ko S.T.Lasalo: “Ke mafau‵fau a tino taki tokotasi i a ia ne filifili ne te Aliki mo fai te situati o tena taimi totino, fakamalosiga, tupe, mo nisi mea aka, kae ke fakaaoga ne tino taki tokotasi a taleni konei ki te ‵toe mea e mafai ne ia, e vikia ei te Matai.” Faitalia me maua ne tatou a fakamanuiaga e uke, e ‵tau o tuku atu ne tatou se mea ke fai mo taulaga ki a Ieova. (2 Samu. 24:21-24) E mata, e mafai ne tatou o fakaaoga faka‵lei ‵tou mea e maua?

9. Se a te fakatakitakiga fakavae e maua ne tatou mai i fakatonuga a Iesu i te Luka 10:2-4 e uiga ki te fakaaogaga o ‵tou taimi?

⁹ ‵Tou taimi. E uke a taimi mo taumafaiga e manakogina ke ‵fuli kae ‵lomi ‵tou tusi, ke faite a koga tapuaki, ke fakatoka a fono o atufenua, ke fesoasoani ki tino kolā e pokotia ne fakalavelave o te natula, kae ‵kau foki ki nisi galuega aka e uke kolā e manakogina. E maua fua ne tatou se aofaki tumau o itula i te aso. Ne tuku mai ne Iesu se fakatakitakiga telā e mafai o fesoasoani mai. I te taimi ne uga atu ei ne ia ana soko ke olo o talai, ne fai atu Iesu ki a latou ke sē “fakafeiloai atu ki so se tino i te auala.” (Luka 10:2-4) Kaia ne fai atu ei ne Iesu ne fakatonuga penā? E fai mai se tino akoga ki te Tusi Tapu: “A te fakafeiloai i aso o Iesu, e se fai pelā mo tatou, e ifo malie tou ulu ki lalo io me ‵fola atu tou lima o fakatalofa, kae e uke eiloa a taimi e fakatau ‵sai ei, kae totuli foki o ifo ki lalo i te laukele. E uke ‵ki a taimi e fakamāumāu i te mea tenei.” Ne seki fakamalosi atu Iesu ki ana soko ke sē āva. Ne fesoasoani atu a ia ke lavea ne latou a te toetoe o te lotou taimi koi ‵toe kae e ‵tau o fakaaoga faka‵lei ne latou o fai a mea kolā e sili atu i te tāua. (Efe. 5:16) E mata, e mafai ne tatou o fakaaoga a te fakatakitakiga tenei ko te mea ke uke atu a taimi e maua ne tatou o fesoasoani ki galuega o te Malo?

10, 11. (a) Ne a nisi auala ne fakaaoga ei ‵tou meaalofa ki te galuega i te lalolagi kātoa? (e) Ne a fakatakitakiga fakavae mai te 1 Kolinito 16:1, 2 e mafai o fesoasoani mai ki a tatou?

¹⁰ ‵Tou tupe. E manakogina a tupe e uke ke ‵lago atu ki galuega o te Malo. I tausaga takitasi, e fia sefulu miliona tālā e fakamāumāu o ‵lago atu ki te galuega a ovasia faima‵laga, paenia fakapito, mo misionale. Talu mai te 1999, e silia atu i te 24,500 Kingdom Halls ne faite i fenua kolā e se uke a mea e maua i ei. E ui i ei, e tai kātoa te 6,400 Kingdom Halls koi manakogina ke faite. I masina takitasi, e nofo ki te 100 miliona ‵kopi o Te Faleleoleo Maluga mo te Awake! e ‵lomi. A galuega katoa konei e ‵togigina ki meaalofa kolā e fai mo te loto malie.

¹¹ Ne tuku mai ne te apositolo ko Paulo se fakatakitakiga fakavae ke tau‵tali tatou ki ei e uiga ki te faiga o meaalofa. (Faitau te 1 Kolinito 16:1, 2.) Ne fakamalosi atu tou tagata ki ana taina i Kolinito ke sē faka‵tali ki te fakaotiga o te vaiaso ke onoono aka me ne a mea e ‵toe mai, kae ke tuku fakatafa se aofaki tupe i te kamataga o te vaiaso e ‵tusa mo te mea e mafai ne latou o fai. E pelā mo te senitenali muamua, ko leva ne aofaga a taina mo tuagane i aso nei ke fai olotou meaalofa mo te loto malie e ‵tusa mo olotou fakanofonofoga. (Luka 21:1-4; Galu. 4:32-35) E fakatāua eiloa ne Ieova a te agaga fia tuku atu o ana tino.

12, 13. Kaia e mafau‵fau ei a nisi tino me e se mafai ne latou o tuku atu ki a Ieova olotou malosi mo mea e mafai o fai, kae ka fesoasoani atu pefea a Ieova ki a latou?

¹² ‵Tou malosi mo mea e mafai o fai. E ‵lago mai a Ieova ki ‵tou taumafaiga ke fakaaoga ‵tou malosi mo mea e mafai o fai mō te Malo. E tauto mai a ia me ka fesoasoani mai a ia māfai tatou ko fi‵ta. (Isa. 40:29-31) E mata, e ma‵natu aka tatou me e se lava ‵tou ata‵mai ke fesoasoani atu ki galuega e fai? E mata, e mafaufau tatou me e isi ne tino e ‵lei atu i a tatou? Masaua, me e mafai ne Ieova o tai faka‵lei atu a mea e mafai ne so se tino o fai, e pelā eiloa mo te mea ne fai ne ia ki a Pesaleli mo Oliapo.—Eso. 31:1-6; ke onoono ki te ata i te kamataga.

¹³ E fakamalosi mai a Ieova ki a tatou ke tuku atu a te ‵toe mea e mafai ne tatou kae ke sē taofi. (Faata. 3:27) I te taimi ne toe faite ei te faletapu, ne fai atu Ieova ki te kau Iutaia i Ielusalema ke mafaufau ‵loto ki mea ne fai ne latou ke ‵lago atu ki te galuega. (Haka. 1:2-5) Ko tuku fakaa‵tea olotou mafaufau kae ko sē ‵saga tonu. Se mea ‵lei ke mafau‵fau tatou me e olo tasi a mea kolā e fakatāua ne tatou mo mea kolā e fakatāua ne Ieova. E mata, e mafai o ‘tuku tonu ‵tou loto ki ‵tou olaga’ ko te mea ke uke atu a mea e fai ne tatou i galuega o te Malo i aso fakaoti konei?

TUKU ATU MO TE LOTO KĀTOA E ‵TUSA MO MEA E MAUA NE TATOU

14, 15. (a) Ne a fakamalosiga ne maua ne tatou mai te fakaakoakoga a ‵tou taina kolā e se uke olotou mea e maua? (e) Se a te mea e ma‵nako tatou o fai?

¹⁴ A te tokoukega o tino e ola i kogā koga kolā e faigata i ei te olaga io me lauiloa i ei te mativa. E taumafai eiloa ‵tou fakapotopotoga o “fakapaleni” aka a mea kolā e se maua ne ‵tou taina kolā e ola i atufenua penā. (2 Koli. 8:14) Ke oko foki ki taina kolā e se uke olotou mea e maua, e fakatāua ne latou a te aoga o te tuku atu. Se mea fakafiafia ki a Ieova māfai e tuku atu ne tino ma‵tiva olotou mea mo te loto fia‵fia.​—2 Koli. 9:7.

¹⁵ I te atufenua mativa e tasi i Afelika, ne fakamailoga ne nisi taina i ei se koga foliki i olotou fatoaga kae fakaaoga a tupe kolā e maua mai i mea kolā ne fakatau atu mai i ei ke ‵lago atu ki galuega o te Malo. I te atufenua foki tenā, e isi se galuega e manakogina ke fai ki te fakatuga o se Kingdom Hall. Ne ma‵nako a taina mo tuagane o fesoasoani ki ei. Kae ko te galuega e ‵tau o fai i te kogāloto eiloa o te ‵tau e ‵toki ei olotou fatoaga. Ona ko te ma‵nako o latou o fesoasoani ki te galuega, ne ga‵lue latou i te Kingdom Hall i te ao kae olo ki fatoaga i te afiafi po o ‵toki olotou fatoaga. Se fakaakoakoga eiloa o te fai a mea mo te loto kātoa! E fakamasaua mai a te mea tenei ki a tatou e uiga ki taina i Maketonia i te senetenali muamua. E ui eiloa ne “ma‵tiva malosi” latou, ne fakamolemole atu latou ke mafai o fesoasoani atu latou ki te galuega telā ko fai. (2 Koli. 8:1-4) Ke penā foki tatou taki tokotasi o tuku atu ‵tou mea ‘ke fetaui [io me ‵tusa] mo te fakamanuiaga telā ne tuku mai ne te Aliki [Ieova] ki a tatou.’​—Faitau te Teutelonome 16:17.

16. E mafai pefea o tali‵tonu tatou i mea kolā e fai ne tatou mo te loto kātoa e talia ne Ieova?

¹⁶ E ui i ei, e manakogina ke fakaeteete tatou. E pelā mo tino Isalaelu mua, e ‵tau o fakamautinoa aka ne tatou me e talia ne te Atua a ‵tou taulaga kolā e fai atu mo te loto malie. E ‵tau mo tatou o paleni ko te mea ke tausi atu tatou ki ‵tou tiute tonu kolā ko ‵tou kāiga mo te tapuakiga ki a Ieova. A te tukuatuga o ‵tou taimi mo ‵tou kope ki nisi tino e se fai ei ke sē tausi atu tatou ki te ola ‵lei o ‵tou kāiga i te feitu faka-te-agaga mo te feitu faka-te-foitino. Kafai e fai penā e pelā me tuku atu ne tatou a mea kolā e se maua ne tatou. (Faitau te 2 Kolinito 8:12.) I tafa i ei, e ‵tau foki mo tatou o tumau i te fakama‵losi o ‵tou feitu faka-te-agaga. (1 Koli. 9:26, 27) E tali‵tonu tatou me kafai e ola tatou e ‵tusa mo tulaga o te Tusi Tapu, ka maua eiloa ne tatou a te fiafia mo te loto malie mai mea katoa kolā e fai ne tatou mo te loto kātoa, kae ka “faigofie ke talia” ne Ieova.

E TĀUA ‵KI A MEA KOLĀ E FAI NE TATOU MO TE LOTO KĀTOA

17, 18. E pefea ‵tou lagonaga e uiga ki a latou katoa kolā e fai a mea mo te loto kātoa mō te Malo, kae se a te mea e ‵tau mo tatou katoa o mafau‵fau ki ei?

¹⁷ A te tokoukega o ‵tou taina mo tuagane e ‘‵ligi atu a latou eiloa ki tua e pelā me se taulaga uaina’ e auala i te ga‵lue o latou o ‵lago ki galuega o te Malo. (Fili. 2:17) E fakafetai eiloa tatou ki a latou kolā e fakaasi mai se vaegā lagonaga fiafia penā. E ‵tau foki o fakamālō atu ki avaga mo tamaliki a taina kolā e fai ne latou te takitakiga i galuega o te Malo mō mea e fai ne latou mo te loto kātoa.

¹⁸ E manakogina ‵ki a te ga‵lue malosi o tatou ke ‵lago atu ki mea o te Malo. Ke ‵talo tatou katoa kae mafau‵fau me e mafai pefea o uke atu ‵tou mea e fai. E talitonu koe me e uke a fakamanuiaga ka maua ne koe i te taimi nei kae ka uke malosi atu i te “taimi mai mua.”​—Male. 10:28-30.