“Ke Oko Mai Tou Malo”—Mafea la?

1, 2. (a) Se a te pogai e mafai ei o sē lavea tonu ne tatou se mea? (e) Se a te mea e iloa tonu ne tatou e uiga ki te Malo o te Atua?

E PELĀ mo te mea e iloa ne koe, e masani o kese‵kese a fakamatalaga e mafai o masaua ne tino kolā ne ‵kilo olotou mata ki se mea ne tupu. I se auala tai ‵pau, e faigata o masaua ne se tino me ne a pati ne fai atu ne te tokitā ki a ia mai tua o tena āsiga. Io me se tino e se maua gofie ne ia ana ki io me ko mata kilasi faitalia me tuku atu fua i ana mua. Kāti e fakamāfua aka a mea katoa konei ne te vaegā ‵kivi telā e fai‵pati ki ei a tāgata ‵poto​—e se lavea se mea, io me puli se mea, ona ko te mafaufau e fakalavelave i se mea fakaa‵tea. E fai pelā i te mea tenei se vaega o te auala e ga‵lue ei ‵tou faiai.

² E maua ne tino e tokouke i aso nei a te vaegā “‵kivi” tenā ki mea ‵tupu i te lalolagi. Kāti ka fai mai latou me ko oko eiloa te lasi o te ‵fuliga i te lalolagi talu mai te 1914, kae e se malamalama latou i te  uiga tonu o mea ‵tupu konei. E pelā me ne tino a‵koga i te Tusi Tapu, e iloa ne tatou me ne oko mai te Malo o te Atua i te 1914 i te taimi ne fakasopo aka ei a Iesu mo fai te Tupu i te lagi. Kae iloa ne tatou me e uke atu a mea e aofia i te tali atu ki te ‵talo “Ke oko mai tou Malo. Ke fai te mea e loto koe ki ei i te lalolagi nei e pelā mo te faiga i te lagi.” (Mata. 6:10) E manino ‵lei me e aofia i te mea tenā a te gataga o te olaga masei tenei. Kafai fua ko tupu a te mea tenā ko mafai ei o fai a te loto o te Atua i te lalolagi nei e pelā mo te faiga i te lagi.

3. Ne a mea aoga ne maua ne tatou mai te sukesuke ki te Muna a te Atua?

³ Ona ko te suke‵suke faeloa o tatou ki te Muna a te Atua, ko matea i ei ne tatou me ko oti ne fakataunu a te valoaga tenā i te taimi nei. E ‵kese ‵ki eiloa mo te tokoukega o tino! Ko oko eiloa i te fakalave‵lave o latou i mea e kausaki ki ei i olotou olaga ko ala ei o sē matea ne latou a fakamaoniga manino i a Keliso ko oti ne pule mai talu mai te 1914 kae ko pili o fakaoko mai ne ia te fakamasinoga a te Atua. Tela la, ke ‵sili ifo ki a koe eiloa: Kafai koe ne tavini atu ki te Atua i tausaga e uke, e mata, koi ‵pau tou saga tonu kae manavase e uiga ki te tāua o ‵tou taimi mo tausaga ko ‵teka? Kafai foki koe ne fatoa fai mo fai se Molimau, se a te mea e tuku tonu ki ei tou mafaufau? Faitalia me se a ‵tou tali, ke toe onoono tatou ki pogai tāua e tolu e mafai ei tatou o tali‵tonu me ko pili o gasuesue malosi a te Tupu fakaekegina a te Atua o fai ke fakataunu katoatoa te loto o te Atua i te lalolagi.

KO OTI NE OKO MAI A TĀGATA E ‵TELE I SOLOFANUA

4, 5. (a) Ne a mea ne fai ne Iesu talu mai te 1914? (Ke onoono ki te ata i te kamataga.) (e) Se a te mea e fakaata mai ne tāgata tokotolu e ‵tele i solofanua, kae se a te auala ne fakataunu aka ei a mea konei?

⁴ I te 1914, ne tuku atu ki a Iesu Keliso​—telā ne fakaata mai pelā me tele i te solofanua ‵kena​—a te foualiki i te lagi. Ne fanatu fakavave a ia o fakaoti a tena manumalo i te lalolagi masei a Satani. (Faitau te Fakaasiga 6:1, 2.) Ne tuku mai i te valoaga i te Fakaasiga mataupu e 6 te pogai ke fakamoe‵moe tatou me mai tua o te fakatūga o te Malo o te Atua, se mea vave eiloa o fanaifo ki lalo a te tulaga o te lalolagi​—taua, oge mea‵kai, mala, mo nisi mea kolā e māfua mai i ei te mate. Ne fakaata mai a fakalavelave konei ne tāgata e tokotolu e ‵tele i solofanua o tau‵tali fakapilipili atu i tua o Iesu Keliso.​—Faka. 6:3-8.

⁵ E pelā mo te mea ne ‵valo mai, i te filemu ne ‘ave kea‵tea mai te lalolagi,’ faitalia a tautoga a tāgata ke ga‵lue fakatasi ke maua te filemu. E mafai o ‵kilo atu tatou ki te Taua Muamua a te Lalolagi e pelā me ko te kamataga fua o taua, e pelā mo te mea e fakatalitonu mai ne fakalavelave ‵tupu o te lalolagi fakamuli nei. Kae faitalia te uke o tupe mo te oloakaga o poto fakasaienisi talu mai 1914, ne tumau eiloa te fakalavelave atu o te sē lava o mea‵kai ki te tokagamalie o te lalolagi. E se gata i ei, ko oi e fakafiti ne ia a te ‵mate faeloa o te fia miliona o tino i tausaga takitasi ona ko vaegā mala, fakalavelave o te natula, mo nisi “famai fakama‵taku”? A te mafai o ‵tupu, te ‵tupu faeloa, mo te fakama‵taku o mea ‵tupu konei, ne mea kolā ne seki ‵tupu aka loa i tala fakasolopito o tino. E mata, e malamalama koe i te uiga o te mea tenā?

6. Ko oi ne fakatali‵tali ki te fakataunuga o te valoaga i te Tusi Tapu, kae se a te mea ne fai ne latou i te taimi ne fakataunu ei te valoaga?

⁶ E tokouke a tino ne seki ‵saga tonu ona ko te kamataga o te Taua Muamua a te Lalolagi mo te fulū faka-Sepania. E ui i ei, a te kau fakaekegina ne fakatali‵tali eiloa mo te loto finafinau ki te 1914 e pelā me ko te gataga o Taimi o Fenua Fakaa‵tea, io me ko “taimi ne fuafuagina mō fenua fakaa‵tea.” (Luka 21:24) Ne seki iloa tonu ne latou me ne a mea ka ‵tupu. Kae ne iloa ne latou me ka tupu se mea i te 1914 e uiga ki te pulega mai te Atua. I te taimi eiloa ne malama‵lama ei latou i te fakataunuga o te valoaga i te Tusi Tapu, ne folafola atu ei ne latou mo te loto ‵toa ki nisi tino me ko oti ne kamata te pulega a te Atua. A olotou taumafaiga ke folafola atu te Malo ne iku atu ki fakasauāga mataga. A te tupu o fakasauāga penā i atufenua e uke se fakataunuga o te valoaga. I tausaga e uke fakamuli ifo, ne fai ne fili o te Malo a “fakalavelave i te igoa o te tulafono.” Ne fakaaoga foki ne latou a fakasauāga faka-te-foitino, ‵pei ki falepuipui, ke oko foki ki te nōua, fanafana, io me ‵kati a ua o ‵tou taina.​—Sala. 94:20; Faka. 12:15.

7. Kaia ne seki malama‵lama ei a te tokoukega o tino i te uiga tonu o mea ‵tupu i te lalolagi?

⁷ Ona ko te uke o fakamaoniga i te Malo o te Atua ko leva ne fakatu aka i te lagi, kaia e se talia ei ne te tokoukega o tino a te mea tenei? Kaia e se mafai ei o malama‵lama latou i tulaga o mea ‵tupu i te lalolagi mo valoaga i te Tusi Tapu kolā ko leva ne folafola ne tino o te Atua? E mata, e fai penā ona ko tino e ‵saga atu fua ki mea kolā e lavea ne latou ki olotou mata? (2 Koli. 5:7) E mata, ko tō manava‵se latou ki mea o te olaga ko ala ei o faka‵kivi olotou mata ki mea e fai ne te Atua? (Mata. 24:37-39) E mata, e fakalave‵lave a nisi o latou ne manatu mo fakamoemoega o te lalolagi a Satani? (2 Koli. 4:4) E manakogina ne tatou a te fakatuanaki mo te atamai faka-te-agaga ke malama‵lama tatou i mea kolā e ‵tupu i te koga o agaga. Ko oko eiloa i te fia‵fia o tatou me ne seki faka‵kivi ‵tou mata ki mea kolā e ‵tupu nei!

AMIOGA MA‵SEI KO GASOLO AKA MAI TE MASEI O NA MA‵SEI ATU

8-10. (a) Ne fakataunu aka pefea a te 2 Timoteo 3:1-5? (e) Kaia e mafai ei tatou o fai atu i amioga ma‵sei ko gasolo aka eiloa mai te masei o na ma‵sei atu?

⁸ A te lua o pogai e iloa ei ne tatou me ko pili o pule mai te Malo o te Atua ki te lalolagi, e tenei: Amioga ma‵sei kolā e fai ne tino e gasolo mai te masei o na ma‵sei atu. Ko tai kātoa te senitenali kae ko mea kolā ne ‵valo mai i te 2 Timoteo 3:1-5 e ‵tonu eiloa. Ne gasolo aka faeloa o uke a mea e ‵tupu, te vaitaimi e ‵tupu ei, kae ‵tupu faeloa. E mata, e se lavea ne koutou i te fakataunuga o te valoaga tenei ko gasolo aka eiloa o salalau malosi? Ke mafau‵fau tatou ki nisi fakaakoakoga kolā e fakamatala faka‵lei mai i ei a te mea tenei.​—Faitau te 2 Timoteo 3:1, 13.

⁹ Ke mafau‵fau ki te ‵kese o mea kolā ne fai pelā me e ma‵sei ‵ki i te 1940 io me ko te 1950 o fano ki mua mo mea kolā ko fai i aso nei i koga ga‵lue, i fakafiafiaga, i tafaoga, mo vaegā olaga e ola i ei. A fakasauāga mataga mo amioga sē ‵tau ko fai nei pelā me ne mea masani o te olaga. E taumafai a tino ke lauiloa latou e pelā me e sauā malosi, fakama‵taku, io me fakamaua‵luga atu i lō so se tino aka. A mea kolā ne fai pelā me ma‵sei te onoono ki ei i televise talu mai te 1950 o fano ki mua, ko fai nei pelā me ne mea ‵lei ke onoono ki ei a kāiga. Kae matea ne tino e tokouke a te ma‵losi o fakamalosiga a tāgata e fia‵fai ki tāgata mo fāfine e fia‵fai ki fāfine i fakafiafiaga mo vaegā teuga, e fakamaluga aka ei a te vaegā olaga o latou i mua o tino. Ko oko eiloa i te fakafetai o tatou me e iloa ne tatou a te kilokiloga a te Atua ki ei!​—Faitau te Iuta 14, 15.

¹⁰ E mafai foki o mafaufau se Kelisiano ki te ‵kese o uiga kolā ne fai pelā me ne uiga ‵teke o talavou i te 1950 o fano ki mua mo mea kolā e fai i aso nei. Ne masani o manava‵se a mātua i olotou tamaliki ma ‵pusi, inu kava, io me ‵saka i se auala sē ‵tau. I aso nei, e lagona faeloa ne tatou a li‵poti sē ‵lei, penei: Ne fanafana ne se tamaliki akoga ko 15 ana tausaga a tena vasega, e tokolua ne ‵mate kae toko 13 ne pa‵kia. Ne tamate fakamasei ne se potukau o talavou ko‵na se tamaliki fafine ko 9 ana tausaga kae ta a tena tamana mo tena fakatuagane. E fai pelā i te āfa o amioga solitulafono ne fai i se fenua e tasi i Asia i te sefulu tausaga mai mua atu ne ‵losi ki talavou. E mata, e isi se tino e fakafiti ne ia me ko gasolo aka eiloa o ma‵sei atu a mea ‵tupu?

11. Kaia e se lavea ei ne te tokoukega o tino a te gasolo aka o ma‵sei a mea ‵tupu?

¹¹ Ne fai ‵tonu mai te apositolo ko Petelu: “I aso fakaoti ka o‵mai a tino fakatauemu mo olotou pati fakatauemu, e ‵tusa eiloa mo olotou manakoga kae fai mai: ‘Ne folafola mai i a ia ka toe fakatasi mai, tefea nei la a ia? Mai te taimi ne ‵moe ei a ‵tou tupuga i te mate, e seai eiloa se ‵fuliga ne lavea atu ki mea katoa talu mai te taimi ne kamata ei o faite a mea.’” (2 Pe. 3:3, 4) Kaia e fai ei penei a kilokiloga a nisi tino? E foliga mai me ko te masani malosi o tino mo se mea, ko te sē ‵saga tonu o latou ki ei. A te gasolo malielie ifo ki lalo a te tulaga o amioga ‵lei a tino e mafai o sē fakapoi malosi mai ki a tatou e pelā mo te ‵fuli fakavave o amioga a se taugasoa pili. E tigā te feitu tenā, a te fakamaseiga malielie tenei o amioga ‵lei e fakamataku ‵ki eiloa.

12, 13. (a) Kaia e se ‵tau ei mo tatou o loto vāi‵vai ona ko tulaga o mea e fai i te lalolagi? (e) Ne a mea ka fesoasoani mai ke fakafesagai atu tatou ki tulaga kolā e “faiga‵ta” ke fakatakavale?

¹² Ne fakailoa mai te apositolo ko Paulo ki a tatou me “i aso fakaoti,” ka oko mai a “toe taimi faiga‵ta” ki tulaga o mea e fai. (2 Timo. 3:1) Kae e se faiga‵ta ke fakafesagai ki ei, tela la, e se ‵tau mo tatou o ‵muni mai te mea tonu. Mai te fesoasoani o Ieova, tena agaga, mo te fakapotopotoga Kelisiano, e mafai eiloa o fakatakavale ne tatou so se tulaga fakafanoanoa io me fakalotolotolua e oko mai ki a tatou. E mafai o tumau tatou i te fakamaoni ki a ia. “A te malosi telā e sili atu i te malosi masani” e maua mai i te Atua, kae e se ko ‵tou malosi totino.​—2 Koli. 4:7-10.

¹³ Se mea ‵lei me ne kamata ne Paulo a te valoaga e uiga ki aso fakaoti ki te tugāpati “ke iloa ne koe te mea tenei.” E fakatalitonu mai i pati konā i mea kolā e faipati ki ei te valoaga ka ‵tupu eiloa. E seai se fakalotolotolua i tino sē amioatua ka gasolo eiloa mai te masei o na ma‵sei atu ke oko ki te taimi ko fakaseai ei ne Ieova. Ne fakailoa mai ne tino tusitala me ko oti ne pa‵ku a nisi tino io me ko atufenua i te lalolagi ona ko te lasi o te fanaifo ki lalo te tulaga o amioga ‵lei. I tala fakasolopito mai mua, ne seki oko aka eiloa a te tulaga o amioga ‵lei i te lalolagi kātoa ki te malalo tenei ko oko ki ei i te taimi nei. Kāti e ‵teke a tino e tokouke ki te uiga o te mea tenei, kae ko mea ‵tupu konei talu mai te 1914 e fakaasi manino mai i ei ke tali‵tonu tatou me ko pili o gasuesue malosi a te Malo o te Atua.

KA SE PALELE ATU TE KAUTAMA TENEI

14-16. Se a te tolu o pogai e tali‵tonu ei tatou me ko pili o “oko mai” te Malo o te Atua?

¹⁴ E isi se tolu o pogai e maua ei ne tatou te loto talitonu. A mea kolā ne fai ne tino o te Atua e fakasino atu ki te pili mai o te gataga. Pelā me se fakaakoakoga, a koi tuai o fakatu te Malo o te Atua i te lagi, ne tavini atu eiloa mo te loto finafinau se potukau o tino fakaekegina ki te Atua. I te taimi ne seki taunu ei a nisi mea kolā ne fakamoe‵moe latou me ka ‵tupu i te 1914, ne a mea ne fai ne latou? Ne fakatalitonu mai ne te tokoukega o latou a te lotou fakamaoni mai lalo i tofotofoga mo fakasauāga kae tumau eiloa i te taviniga ki a Ieova. I tausaga e uke, a te tokoukega​—māfai e se ko tino katoa​—o te kau fakaekegina ne tumau eiloa i te fakamaoni i olotou olaga kātoa ke oko ki te ‵mate o latou.

¹⁵ I tena valoaga e uiga ki te gataga o te olaga masei tenei, ne fai mai a Iesu: “Ka se palele atu te kautama tenei seiloga ke fakataunu a mea katoa konei.” (Faitau te Mataio 24:33-35.) I te faimaiga a Iesu “te kautama tenei,” e malama‵lama tatou me ne fakasino atu a ia ki potukau e lua o Kelisiano fakaekegina. A te potukau muamua ko latou kolā ne maua aka i te 1914, kae ne malama‵lama i te fakailoga o te fakatasi mai o Keliso i te tausaga tenā. A latou kolā ne aofia i te potukau tenei ne seki ola fua i te 1914, kae ko latou ne fakaekegina ki te agaga tapu e pelā me ne tama a te Atua i te tausaga tenā io me mai mua atu.​—Loma 8:14-17.

¹⁶ A te lua o potukau telā e aofia i te “kautama tenei” ko taugasoa fakaekegina o te potukau muamua. Ne seki ola fua latou i te taimi koi ola ei a tino o te potukau muamua, kae ne fakaekegina latou ki te agaga tapu i te taimi koi ola ei a tino o te potukau muamua i te lalolagi. Tela la, e se ko tino fakaekegina katoa i aso nei e aofia i te “kautama tenei” telā ne faipati a Iesu ki ei. I aso nei, a tino i te lua o potukau ko gasolo aka eiloa o ma‵tua. Kae e tali‵tonu tatou mai i pati a Iesu i te Mataio 24:34 me ka “se palele atu” a nisi tino o te “kautama tenei” a koi tuai o lavea ne latou a te kamataga o te fakalavelave lasi. E ‵tau o fakamalosi aka a ‵tou loto tali‵tonu ne te mea tenei me ko toetoe fua te taimi koi ‵toe a koi tuai o gasue a te Tupu o te Malo o te Atua o fakaseai a tino amio ma‵sei kae aumai se lalolagi fou kae amiotonu.​—2 Pe. 3:13.

KO PILI FUA O FAKAOTI NE KELISO A TENA MANUMALOGA

17. Se a te fakaikuga e maua ne tatou mai i fakamaoniga e tolu kolā ne sau‵tala tatou ki ei?

¹⁷ Ne a fakaikuga e mafai o maua ne tatou mai i fakamaoniga e tolu kolā ne sau‵tala tatou ki ei? Ne faka‵pula mai ne Iesu me e se iloa ne tatou a te aso io me ko te itula tonu. (Mata. 24:36; 25:13) Kae e iloa ne tatou a te “taimi,” e pelā mo te mea ne taku mai ne Paulo. (Faitau te Loma 13:11.) E ola nei tatou i te taimi tenā, ko aso fakaoti. Kafai e tuku tonu ‵tou mafaufau ki valoaga i te Tusi Tapu mo mea e fai ne Ieova te Atua mo Iesu Keliso, e lavea eiloa ne tatou a fakamaoniga fakamalosi loto me ko pili ‵ki mai te gataga o te olaga masei tenei.

18. Se a te mea e faka‵tali mai ki a latou kolā e ita ma talia te Malo o te Atua?

¹⁸ A latou kolā e ita ma talia ne latou te pulega fakaofoofogia telā ne tuku atu ki a Iesu Keliso, te Tino telā e sopo i te solofanua ‵kena mo te manumalo, ko pili o fai mālō ke taku tonu atu olotou mea ‵se. Ka sē iloa ne latou te auala e ‵sao ei latou. I te taimi tenā, e tokouke a tino ka ‵tagi paka‵laga i te ma‵taku: “Ko oi la te tino e mafai o sao atu i ei?” (Faka. 6:15-17) E maua eiloa te ‵tali i te suā mataupu o te Fakaasiga. I te aso tenā, ka “sao” atu a te kau fakaekegina mo latou kolā e fakamoe‵moe ke ola i te lalolagi mai te taliaga a te Atua. I te taimi tenā, ka ‵sao atu “se vaitino e tokouke” o nisi mamoe konā i te fakalavelave lasi.​—Faka. 7:9, 13-15.

19. Se a te mea e fakamoemoe koe ki ei, e pelā me se tino telā e iloa, e talia, kae saga atu ki fakamaoniga manino me ko pili o oti atu aso fakaoti?

¹⁹ Kafai e tuku tonu ‵tou mafaufau ki valoaga i te Tusi Tapu kolā ko fakataunu i ‵tou taimi nei, ka sē faka‵se tatou ne te lalolagi a Satani; io me faka‵kivi aka i ei a ‵tou mata ki te uiga tonu o mea e ‵tupu i te lalolagi. Ko pili a Keliso o fakaoti a tena manumaloga i tino sē amioatua mai te taua atu i tena toe taua amiotonu. (Faka. 19:11, 19-21) Ke mafau‵fau me e fakafiafia mai pefea ki a tatou a te mea telā e fai mai te Tusi Tapu!​—Faka. 20:1-3, 6; 21:3, 4.