Ne taua tokotasi atu faeloa au ki faifaiga sē fakamaoni mo amioga fakasaua

TOKU OLAGA MUA: Ne tupu aka au i Rmaysh, e pili ki te tuakoi i te va o Isalaelu mo Lepanona, i se vaitaimi o taua.

Ne masaua ‵lei ne au a taimi ne ‵pa ei a paula kolā e tanu i te laukele mo te ‵galo atu o nisi vaega o foitino o tino masani. Ne faigata te olaga, kae ne salalau atu a amioga solitulafono mo amioga fakasaua.

Ne ‵kau atu te motou kāiga ki te Lotu Maronite, se lotu e tasi o te Lotu Katolika i te Saegala. Ne fakalavelave faeloa te motou Tamana i te tausi mai ki tino e toko 12 o te motou kāiga, kae ne fakamautinoa aka ne te motou mātua me e olo atu matou katoa ki te lotu. E seki leva, kae ne kamata o maua ne au a te lagonaga me ne fakatamala a te lotu, e pelā mo nisi potukau, o fesoasoani atu ki tino vāi‵vai.

I te taimi koi foliki ei au, ne ati aka ne au toku fiafia ki te kalate. Ne aofia malosi au i te fakamasaniga ki te poto tenā kae ne kamata o apo malosi au i te fakaaogaga o te lima mo te vae e pelā foki mo poto valevale i te fakaaogaga o meatau. Ne mafaufau ifo au, ‘E se mafai o taofi ne au te taua, kae kāti e mafai o taofi ne au a tino amio fakasaua.’ I so se taimi ne lavea ne au a tino e tokolua e taua, ne oso fakavave atu au. Ne ita vave sāle au, kae e faigofie fua te faiga ke kaitaua au. Ne ma‵taku a tino katoa i te feitu ki saute o Lepanona i a au, me ne taua tokotasi atu faeloa au ki faifaiga sē fakamaoni mo amioga fakasaua.

I te 1980, ne kau atu au ki se potukau kalate i Beirut. Ne ‵to ifo faeloa a paula, polofana, mo loketi i aso katoa, kae ne fanatu eiloa au o fakaakoako. Ne fakavae eiloa toku olaga ki te kai, moe, kae ola e pelā mo Bruce Lee, se tino Saina-Amelika telā ne aofia sāle i ata vitio kae se toa foki i te kalate. Ne fakaakoako atu au ki te ‵katiga o tena ulu, te auala e sasale atu ei a ia, mo te auala e pakalaga atu ei a ia i te taimi ko kalate ei a ia. Ne seki fakamisikata lele eiloa au.

TE AUALA NE ‵FULI EI TOKU OLAGA NE TE TUSI TAPU: A toku fakamoemoega ke fai au mo fai se tino poto ‵ki i te kalate i Saina.

I te afiafi po e tasi, i te taimi ne fakaakoako malosi ei au i aku fakatokatokaga mō te malaga ki Saina, ne lagona ne au se tino e tukituki i te mataloa. Ne o‵mai fakatasi a toku taugasoa mo Molimau a Ieova e tokolua. Ne faipati atu au ki a latou mo toku togiga lanu uli, mo oku tauta ko ‵sali ifo i toku foitino, “E seai saku mea e iloa i te Tusi Tapu.” E se iloa lele eiloa ne au me mai te taimi tenā, ka ‵fuli eiloa toku olaga.

Ne fakaasi mai ne Molimau ki a au mai te Tusi Tapu a te pogai e se mafai eiloa o manuia a tino i olotou taumafaiga ke fakaseai katoatoa atu a faifaiga sē fakamaoni mo amioga fakasaua. Ne fakamatala mai ne latou me i a Satani te Tiapolo ko te pogai tonu o vaegā fakalavelave penā. (Fakaasiga 12:12) Ne ofo au i te filemu mo te loto talitonu ne lavea atu i mata o Molimau konā. Ne otia toku loto i te taimi ne akoako mai ne lāua me e isi se igoa o te Atua. (Salamo 83:18) Ne fakaasi mai foki ne lāua ki a au a te 1 Timoteo 4:8, telā e faitau penei: “Me i fakamalosiga faka-te-foitino e aoga fua ki nai mea, kae ko te taviniga ki te Atua e aoga ki mea katoa, me e folafola mai i ei a te ola tenei e pelā foki mo te ola telā ka oko mai.” Ne lasi eiloa te fakamalosiga o pati konā ki toku olaga.

Se mea fakafanoanoa, me ne galo atu toku fesokotakiga mo Molimau, me ne fai atu toku kāiga ki a lāua ke se toe ‵foki mai. E tiga eiloa te feitu tenā, ne fakaiku aka ne au ke taofi taku fakaakoako ki te kalate kae ke kamata o sukesuke ki te Tusi Tapu. Ne seki fia‵fia oku taina ki te manatu tenā, kae ne fakaiku aka ne au ke toe ‵sala atu ki Molimau a Ieova ke sukesuke ki te Tusi Tapu fakatasi mo latou.

Ne tumau eiloa toku ‵sala atu ki Molimau kae ne seki mafai o maua ne au latou. I te taimi tenā, ne fanoanoa malosi au i te mate fakapoi o toku tamana, e pelā foki mo nisi fakalavelave i te kāiga. Ko oti ne kamata o galue au i se kamupane fakatūtū, kae i te aso e tasi ne taofi au ne se tino galue e tokotasi, ko Adel, kae fesili mai me kaia e mata fanoanoa malosi ei au. Ne kamata o faipati mai tou tagata ki a au e uiga ki te fakamoemoega o te toetuga. Mō se iva masina, ne fai eiloa mo te kufaki ne te Molimau alofa atafai tenei a taku akoga i te Tusi Tapu.

I te taimi ne gasolo atu ei ki mua te akoga, ne kamata o lavea ne au a te manakoga ke fai a ‵fuliga ‵lasi i oku uiga. Ne seki faigofie te mea tenā. Ne mataitaita faeloa au kae faigofie o kaitaua vave. Mai i te Tusi Tapu, ne fakamasani au ke iloa o pule faka‵lei atu ki toku kaitaua kae ke se saga atu ki mea katoa. E pelā mo pati fakatonutonu a Iesu i te Mataio 5:44: “Ke tumau koutou i te a‵lofa ki otou fili kae ‵talo mō latou kolā e fakasaua atu ki a koutou.” E fakailoa mai foki te Loma 12:19: “Sa taui ma sui. . . . me ne tusi mai penei: ‘I a aku te taui ma sui. Ka toe ‵togi atu ne au, ko muna a Ieova.’” Ne fesoasoani mai a tusi siki penā mo nisi tino ke maua malielie ne au a te lagonaga filemu.

TE AUALA NE MAUA EI NE AU A MEA AOGA: E tiga eiloa ne ‵teke muamua mai toku kāiga ki taku fakaikuga ke sukesuke fakatasi mo Molimau a Ieova, ne kamata o āva latou ki Molimau.

A te ‵tonuga loa, ko ‵kau tasi māua mo toku taina e tokotasi i te tapuakiga ki a Ieova, kae ke oko eiloa ki tena mate, ne ‵pulu faeloa ne te motou Mātua a te ‵tou tapuakiga ki nisi tino.

Ko oti foki ne fakamanuiagina au ki se avaga gali kae alofa fakamaoni, ko Anita, telā ne fai mo fai se ‵pea tāua i te taviniga tumau. Talu mai te tausaga ko te 2000, ne ‵nofo māua mo Anita i Eskilstuna, i Suteni, telā ne fesoasoani atu māua ki te akoakoatuga o te Tusi Tapu ki tino kolā e fai‵pati i te ‵gana Alapi.

Koi alofa malosi eiloa au ki tino kolā ne logo‵mae i amioga fakasaua. Kae ko te iloa atu o te pogai tonu mō mea konā—mo te iloa atu me ko pili o fakagata ne te Atua a mea konā—e tuku mai i ei a te fiafia mo te filemu tonu.—Salamo 37:29.