Ke Fakatāua Tou Tauliaga o Ga‵lue Fakatasi mo Ieova!

1. E pefea a lagonaga o Ieova e uiga ki galuega, kae se a te mea ne fai ne ia?

A IEOVA se tino galue telā e fiafia ki ana galuega e fai. (Sala. 135:6; Ioa. 5:17) Ke mafai ne ana mea ola katoa o maua se lagonaga fiafia kae fakamalie loto, ne tuku atu ei ne Ieova ke fai ne latou a galuega fakafiafia. E pelā me se fakaakoakoga, ne aofia ne ia Tena Tama telā ko te uluaki i te faitega o mea. (Faitau te Kolose 1:15, 16.) E fai mai te Tusi Tapu me koi tuai o vau a Iesu ki te lalolagi, ne nofo atu a ia i tafa o te Atua i te lagi e pelā “me se tagata poto i te fakatutu.”— Faata. 8:30.

2. Ne a mea e fakaasi mai me e isi faeloa ne galuega tāua kae fakamalie loto e fai ne tama faka-te-agaga?

² E aofia i te kamataga ki te fakaotiga o te Tusi Tapu a fakaakoakoga e fakaasi mai ei me e tuku faeloa ne Ieova a galuega ki ana tama faka-te-agaga. I te taimi ne agasala ei Atamu mo Eva kae ‵tuli keatea mai te fatoaga Palataiso, ne tuku atu ne te Atua “a kelupi i te feitu ki te saegala o te fatoaga, mo te pelu afi telā e fulifuli faeloa ki feitu katoa. A te mea tenā e leoleo ei a te lakau o te ola ke mo a se tino e fakapilipili ki ei.” (Kene. 3:24) Kae e fakaasi mai i te Fakaasiga 22:6 me i a Ieova “ne uga atu ne ia tena agelu o fakaasi atu ki ana tavini a te mea ka tupu fakavave mai mua nei.”

KAE PEFEA A TINO?

3. I tena nofoga i te lalolagi, ne fakaakoako atu pefea a Iesu ki tena Tamana?

³ I tena nofoga i te lalolagi e pelā me se tagata ‵lei katoatoa, ne fiafia eiloa Iesu o fai te galuega ne tuku atu ne Ieova ki a ia. Mai te tautali i te fakaakoakoga a tena Tamana, ne tuku atu foki ne Iesu se galuega tāua ke fai ne ana soko. Mai te fakamalosi atu ke fakamoemoe latou ki mea e mafai ne latou o fakataunu, ne fai atu a ia: “Au e fai ‵tonu atu ki a koutou, a te tino telā e fakatuanaki mai ki a au, e fai foki ne ia a galuega konei e fai ne au; kae e sili atu i te tāua o galuega ka fai ne ia i lō mea konei, me i a au ka fano ki te Tamana.” (Ioa. 14:12) Ke faka‵mafa atu a te tāua o vaegā galuega penā, ne fakamatala mai Iesu penei: “E ‵tau o fai ne tatou a galuega a te tino telā ne uga mai ne ia au a koi ao; me kafai ko oko mai te po e seai se tino e mafai o galue.”—Ioa. 9:4.

4-6. (a) Kaia e mafai o loto fakafetai tatou me ne fakataunu ne Noa mo Mose a lā tofiga mai i a Ieova? (e) Se a te mea e tasi e maua mai i tofiga katoa kolā ne tuku mai ne te Atua ke fai ne tino?

⁴ Ke oko foki ki te taimi mai mua o Iesu, ne tuku atu ki tino a galuega kolā e manakogina ke fai. E tiga eiloa ne seki mafai ne Atamu mo Eva o fai te galuega ne tuku atu ki a lāua, ne fai eiloa ne nisi tino a fakatonuga a te Atua. (Kene. 1:28) Ne tuku atu ki a Noa a fakatonuga manino ki te auala ke faite te vaka ke faka‵sao ei a ola o tino i te Lolo. Ne fai eiloa ne ia a mea ne fakatonu atu ne Ieova ke fai ne ia. E fakafetai tatou me ona ko tena galue fakamaoni, ko ola mai tatou i aso nei!—Kene. 6:14-16, 22; 2 Pe. 2:5.

⁵ Ne tuku atu a fakatonuga ma‵nino ki a Mose mō te faitega o te faleie mo te fakatokaga o galuega fakafaitaulaga, kae ne fai eiloa ne ia fakatonuga konā. (Eso. 39:32; 40:12-16) Ke oko foki loa ki aso nei, e maua ne tatou a mea aoga mai tena fakamaoni o fakataunu te galuega tenā. E pefea la? Ne fakamatala mai te apositolo ko Paulo me i vaega konā o te Tulafono se fakatusa fua o “mea ‵lei kolā ka oko mai.”—Epe. 9:1-5, 9; 10:1.

⁶ E tuku atu ne te Atua a galuega kese‵kese ki ana tavini i taimi takitasi e ‵tusa mo te fakataunuga o tena fuafuaga. Kae ne faka‵malu atu faeloa ki a Ieova a galuega e fai ne latou kae aoga ki tino tali‵tonu. E fakasino tonu atu eiloa te mea tenei ki mea ne fai ne Iesu, i tena nofoga i te lagi mo te taimi ne nofo ei a ia i te lalolagi. I se auala tai ‵pau, a te galuega telā ne tuku mai ki a tatou i aso nei e faka‵malu ei a Ieova. (Mata. 5:16; faitau te 1 Kolinito 15:58.) Kaia e ‵tau ei o fai penā?

KE FAKATUMAU SE KILOKILOGA TONU E UIGA KI TOFIGA

7, 8. (a) Fakamatala mai te galuega telā e taulia malosi ei a Kelisiano o fai i aso nei. (e) E ‵tau o pefea ‵tou kilokiloga ki te takitakiga a Ieova?

⁷ Se mea gali ke iloa ne koe me e ‵kami ne Ieova a tino sē ‵lei katoatoa ke fai pelā me ne tino e ga‵lue fakatasi mo ia. (1 Koli. 3:9) A latou kolā ne ga‵lue i te faitega o Assembly Halls, Kingdom Halls, mo nisi ofisa lagolago e aofia i polokalame o galuega fakatutu, e pelā mo Noa mo Mose. Faitalia me galue koe o fakafou se Kingdom Hall io me galue i te faitega o te ‵tou laumua i Warwick, New York, ke fakatāua tou tauliaga ke tavini atu i te auala tenei. (Ke onoono ki te ata i te kamataga.) A te mea tenei se taviniga tapu. Kae e ‵kami eiloa a Kelisiano ke aofia i te ‵toe vaega tāua o te polokalame fakatutu i te feitu faka-te-agaga. Ne fakatoka foki te mea tenei ke faka‵malu ei Ieova kae ke aoga ki tino faka‵logo katoa. (Galu. 13:47-49) E tuku mai ne te fakapotopotoga saukātoa a te Atua a fakatakitakiga ‵lei ke fai ei te galuega tenei. E mafai o fakauiga a te mea tenei i nisi taimi ki te tukumaiga o tofiga fou.

⁸ E ma‵nako faeloa a tavini fakamaoni a Ieova o faka‵logo ki takitakiga a te Atua. (Faitau te Epelu 13:7, 17.) Kāti e se mafai o malamalama katoatoa tatou i pogai e fai ei ‵tou galuega i te taimi muamua. Kae e iloa ‵lei ne tatou te aoga o te ga‵lue fakatasi mo Ieova i so se fakamafuliga e lavea ne ia e ‵tau o fai.

9. Se a te fakaakoakoga e tuku mai ne toeaina mō te fakapotopotoga e uiga ki te faiga o galuega?

⁹ E lavea atu te ma‵nako malosi o toeaina ke fakataunu te loto o te Atua i te auala e fai ei ne latou te takitakiga i te fakapotopotoga. (2 Koli. 1:24; 1 Tesa. 5:12, 13) E fakaasi mai ne latou te loto fiafia o ga‵lue malosi kae fai a fakamafulifuliga. E ma‵nako latou ki auala ‵fou e fai ei ‵tou galuega talai e uiga ki te Malo o te Atua telā ko oti ne fakatu aka. E tiga eiloa e fakalotolotolua nisi tino i te taimi muamua o fai a fakatokaga e uiga ki te talai i luga telefoni, i taulaga vaka, io me i koga e nofo ei a tino tokouke, ne lavea fakamuli ne latou a ikuga ‵lei mai i ei. E pelā me se fakaakoakoga, ne fakaiku aka ne paenia tokofa i Siamani ke talai latou i koga fai pisinisi kolā seki talai aka loa latou i ei. E lipoti mai a Michael: “Ne seki aofia eiloa matou i te vaegā talaiga tenei mō se fia tausaga, tela la ne manava‵se matou o fai te galuega. Kāti ne iloa ne Ieova te mea tenei, me ne fui fakapuli ne matou te gali o te motou galuega talai i taeao. Ko oko eiloa te motou fia‵fia me ne tau‵tali matou i fakatakitakiga kolā ne tuku mai i te ‵Tou Galuega Talai kae fakalagolago ki te fesoasoani o Ieova!” E mata, e manako koe o tofotofo aka a auala ‵fou o te galuega talai i tou koga talai?

10. Ne a fakama‵fuliga ko oti ne fai fakamuli nei i te fakapotopotoga saukātoa?

¹⁰ I nisi taimi, e manakogina ke fai a fakamafulifuliga i te fakapotopotoga saukātoa. I tausaga fakamuli nei, ko oti ne tuku fakatasi se aofaki o ofisa lagolago ki se koga e tasi. Faitalia me e manakogina ke fai ne taina mo tuagane i ofisa lagolago konei a fakamafulifuliga ona ko ‵fuliga konei, ka aoga fakamuli a ‵fuliga konei ki a latou katoa e aofia i ei. (Fai. 7:8) Se mea fakafiafia me e aofia a tino ga‵lue loto fiafia penā i te tala fakasolopito o tino o Ieova!

11-13. Ne a mea faiga‵ta e fakafesagai mo nisi tino ona ko fakama‵fuliga e fai i te fakapotopotoga saukātoa?

¹¹ E mafai o tauloto ne tatou a akoakoga tāua mai tino kolā e ga‵lue i ofisa lagolago kolā ko oti ne tuku fakatasi. Kāti ne ga‵lue eiloa a nisi tavini tumau i te Peteli i olotou fenua mō se fia sefulu tausaga. Ne fakamolemole atu ki se tauavaga kolā ne ga‵lue i se vaega foliki o te Peteli i Amelika ki te kogāloto ke olo atu o ga‵lue i te Peteli i Mexico telā toeitiiti ko 30 taimi te lasi. “Se mea faigata ke tiakina atu a kāiga mo taugasoa,” ko pati a Rogelio. E fai mai a Juan, se taina e tokotasi telā ne manakogina ke fanatu ki Mexico, penei: “E pelā loa me i au ko toe fanau mai, me e ‵tau o ‵sala atu au ki taugasoa ‵fou. E manakogina ke fakamasani ki tuu mo faifaiga fou.”

¹² A tino ga‵lue i te Peteli mai nisi fenua i Eulopa kolā ne manakogina ke ga‵sue atu ki te ofisa lagolago i Siamani, ne fakafesagai foki mo tulaga faiga‵ta. E ‵tau o iloa ne so se tino telā e fiafia o nofo i koga maugā a te faigata ki te kau Switzerland ke tiaki ne latou te gali o koga maugā kolā e ola ei a pulalakau. Kae kāti ka sē sologa tino mai Austria māfai e mafaufau ki te olaga gali telā ne fia‵fia latou ki ei.

¹³ E fakauiga eiloa a te olo atu o latou ki se isi fenua ki te taumafai o fakamasani atu ki koga ‵nofo fou, te ga‵lue mo taina mo tuagane kolā e se masani mo latou, mo te mafai o tauloto ki se vaegā galuega tai ‵kese. E fakauiga foki ki te fakamasani atu ki se fakapotopotoga fou mo te talai atu i se koga talai fou, kāti i se ‵gana fakaa‵tea. E mafai o faigata a te faiga o ‵fuliga konā. Kae ne talia eiloa ne tino ga‵lue e tokouke i te Peteli a mea faiga‵ta konei. Kaia ne talia ei ne latou?

14, 15. (a) Ne fakaasi mai pefea ne te tokoukega me e fakatāua ne latou te tauliaga o ga‵lue fakatasi mo Ieova i so se galuega? (e) I auala fea e fai ei latou e pelā me ne fakaakoakoga ‵lei ki a tatou katoa?

¹⁴ E fai mai a Grethel, penei: “Ne talia ne au te ‵kamiga me ko te auala eiloa tenei e fakaasi atu ne au ki a Ieova me e sili atu toku alofa ki a ia i lō toku alofa ki se fenua, se fale, io me se tauliaga mautinoa.” “I te taimi ne masaua ne au me i te ‵kamiga i a Ieova, ne talia ei ne au mo te fiafia,” ko pati a Dayska. E fai mai a Andre mo Gabriela: “Ko mafai o matea atu ne māua se avanoaga ke tavini atu ki a Ieova mai te fakatafa kea‵tea ne māua a mā manakoga totino. Ne fai atu māua penei, ‘Kafai e fai ne Ieova a ‵fuliga, se mea ‵lei ke tautali i ei i lō te ati aka o manatu fakalotolotolua.’”

¹⁵ Ona ko te tuku fakatasiga o ofisa lagolago, ne toe ‵tofi aka a nisi tino ga‵lue i te Peteli ke tavini pelā me ne paenia. Tenei eiloa te mea ne fai ki nisi tino ga‵lue i te Peteli i te taimi ne tuku fakatasi ei a ofisa lagolago i Denmark, Norway mo Sweden ko te mea ke tasi te ofisa lagolago i Scandinavia. E aofia i a latou konā, ko Florian mo Anja kolā ne fai mai: “Ne ‵kilo atu māua ki te mā tofiga fou e pelā me se mea fakafiafia. Se mea gali ke fakaaoga māua ne Ieova i so se koga e tavini atu māua i ei. E mafai o fai ‵tonu atu māua me ko oti ne fakamanuiagina māua!” E tiga eiloa e seki fai ne te tokoukega o tatou a vaegā fakama‵fuliga penā, e mata, e se mafai loa o fakaakoako tatou ki te loto finafinau o taina mo tuagane konei ke fakamuamua a manakoga o te Malo? (Isa. 6:8) E fakamanuia faeloa ne Ieova a latou kolā e fakatāua te lotou tauliaga ke ga‵lue fakatasi mo ia i so se koga.

KE TUMAU TE FIAFIA KI TOU TAULIAGA O GA‵LUE FAKATASI MO IEOVA!

16. (a) Se a te mea e fakaasi mai i te Kalatia 6:4 ke fai ne tatou? (e) Se a te ‵toe tauliaga sili e mafai o maua ne so se tino?

¹⁶ E masani o fai ne tino sē ‵lei katoatoa a fakatusa‵tusaga ki se mea. Kae e fai mai te Muna a te Atua ke ‵saga tonu atu fua tatou o fai a mea kolā e mafai ne tatou o fai. (Faitau te Kalatia 6:4.) E se maua ne te tokoukega o tatou se tulaga pule i te fakapotopotoga saukātoa. E se mafai foki ne tatou katoa o fai pelā me ne paenia io me ne misionale io me ga‵lue i te Peteli. A mea konei ne tauliaga ‵gali eiloa! Kae e se ‵tau o puli i a tatou a te ‵toe tauliaga sili e mafai o maua ne tatou katoa. Ko te fai pelā me se tino e ga‵lue fakatasi mo Ieova i te galuega talai faka-Kelisiano. A te tauliaga tenei e ‵tau o fakatāua ne tatou!

17. Se a te mea ka tumau o pokotia ei tatou i te lalolagi tenei a Satani, kae kaia e se ‵tau o loto vāivāi tatou i te mea tenei?

¹⁷ A koi ‵nofo atu tatou i te lalolagi a Satani, e mafai o se uke a mea e fai ne tatou i te taviniga ki a Ieova. E se mafai o pule faka‵lei atu tatou ki ‵tou tiute i te kāiga, te ola ‵lei, io me ko nisi fakanofonofoga aka. Kae e se ‵tau o loto vāivāi tatou i ei. Ke mo a e manatu māmā ki au taumafaiga ke ga‵lue fakatasi mo te Atua mai te molimau katoatoa atu ki tena igoa kae fakasalalau atu tena Malo i so se avanoaga. A ko te ‵toe mea tāua ko te galue fakatasi mo ia ki te mea e mafai ne koe o fai kae ‵talo atu mō tena fakamanuiaga ki luga i ou taina kolā e mafai o uke atu olotou mea e fai. Masaua, me ko tino katoa kolā e ‵viki atu ki te igoa o Ieova e tāua i tena kilokiloga!

18. Se a te mea e ‵tau o loto fia‵fia tatou o taofi aka, kae kaia?

¹⁸ Faitalia ‵tou vāivāiga mo te tulaga sē ‵lei katoatoa, e fiafia eiloa a Ieova o fakaaoga tatou e pelā me ne tino e ga‵lue fakatasi mo ia. Se mea ‵tau ke fakatāua ne tatou a te tauliaga o ga‵lue fakatasi mo ‵tou Atua i aso fakaoti konei! Tela la, e ‵tau o loto fia‵fia tatou ke taofi aka ‵tou manakoga totino e uke, me e iloa ne tatou me i te lalolagi fou, ka tuku mai ne Ieova ki a tatou a te “ola tonu”—ko te ola se-gata-mai i se fakanofonofoga fiafia kae filemu.—1 Timo. 6:18, 19.

19. Se a te mea ka tuku mai ne Ieova mō tatou i aso mai mua?

¹⁹ I te ‵tu pili atu o tatou ki te auala ki loto i te lalolagi fou, ke mafaufau ki pati a Mose ki te kau Isalaelu a koi tuai o ulu atu latou ki te Fenua o te Folafolaga: “Ka fakamaumea ne te Aliki [Ieova] a koutou i mea katoa a koutou e fai.” (Teu. 30:9) Mai tua o Amaketo, ka ‵nofo eiloa latou kolā ne fakalavelave i te ga‵lue fakatasi mo te Atua i te fenua telā ne folafola mai ne ia. Mai konā, ko ‵saga tonu atu ei tatou ki se galuega fou—ko te faiga o te lalolagi mo fai se palataiso!