E Uke Atu a Fakamanuiaga a Ieova ki Tino Kolā e Tuku Atu Olotou Mea mo te Loto Fiafia
E ĀVA eiloa te ‵tou Mafuaga ki tino mai te tukumaiga ne ia te meaalofa tāua ko te saolotoga. E se gata i ei, e fakamanuia ne ia a latou kolā e lotoma‵lie o fakaaoga olotou saolotoga ke gasolo ki mua te tapuakiga tonu kae fai olotou tusaga i te faka‵maluga o tena igoa tapu kae ‵lago atu ki tena fuafuaga sili. E se manako a Ieova ke fakalogo ona ko te mataku i se fakasalaga io me faimālōgina. I lō te fai penā, e fakatāua malosi ne ia a te tapuakiga telā e fakamalosi ne te alofa tonu mo te loto fiafia.
E pelā me se fakaakoakoga, i te taimi ne ‵nofo atu ei te kau Isalaelu i te koga lavaki i Sinai, ne fakatonu atu a Ieova ke faite ne latou se koga tapuaki. Ne fai atu a ia: ‘Fai ne otou meaalofa ki a Ieova. Ke aumai ne so se tino se meaalofa ki a Ieova mo te loto fiafia.’ (Eso. 35:5) Ne ‵tau o tuku atu ne se tino Isalaelu se mea telā e mafai ne ia o tuku atu, kae faitalia me se a io me pefea te lasi o te meaalofa, e mafai eiloa o fakaaoga i se auala ‵tau ke fakagalue ei te fuafuaga a te Atua. Ne ‵saga atu pefea ki ei?
“Ka ko latou kolā ne ma‵nako o fai taulaga” ne avatu olotou meaalofa mo te “loto malie.” Ne loto fia‵fia a fāfine mo tāgata o tuku atu so se meaalofa mō te galuega a Ieova pelā mo pine fakagaligali, ligi taliga, mama, aulo, siliva, palasi, vulu ‵lanu usi, lanu kula‵kula mo ‵lanu ‵kula, laugatu lino ‵lei, laugatu ne fai ki fulufulu o kouti, pa‵kili mamoe kolā ko oti ne faka‵lanu ke ‵kula, pa‵kili o manu malosi, lakau ko akasia, fatu kaneli, mea ma‵nogi mo sinu. E tonu, “a mea katoa konei ko oti ne aumai ko silia valevale.”—Eso. 35:21-24, 27-29; 36:7.
A te mea telā e fakafiafia malosi atu ki a Ieova ko te loto fia‵fia o tino kolā e ‵lago atu ki te tapuakiga ‵ma, kae e se ko meaalofa kolā e tuku atu ne latou. Ne fia‵fia foki latou o fakaaoga olotou taimi mo malosi. E fai mai te tala me ne ‘faite ne fafine ‵poto a filo ki olotou lima.’ Ao, ‘ne loto fia‵fia a fafine ‵poto o faite a filo mai fulufulu o kouti.’ E se gata i ei, ne tuku ne Ieova ki a Pesaleli a te “poto, mo te malamalama mo te apo i te faiga o so se ata e fai ei te galuega.” A te tonuga loa, ne tuku ne te Atua ki a Pesaleli mo Oliapo a te atamai telā ne manakogina ke fai a galuega katoa kolā ne fakatonu atu ke fai ne lāua.—Eso. 35:25, 26, 30-35.
I te taimi ne ‵kami ei ne Ieova a tino Isalaelu ke fai a meaalofa, ne talitonu katoatoa a ia me ka ‵lago katoa a tino ki te tapuakiga tonu mo te ‘loto fiafia.’ E fesoasoani kae tuku atu ne ia te fiafia lasi ki tino kolā e tuku atu olotou mea mo te loto fia‵fia. Tela la, e fakaasi atu ne Ieova a te mea tenā māfai e fakamanuia ne ia ana tavini kolā e loto fia‵fia o tuku atu olotou mea, kae ka fakamautinoa ne ia me ka se mafai o ma‵tiva latou i se mea kae ka maua ne latou te poto ke fakataunu ei tena loto. (Sala. 34:9) I te taimi e tavini atu koe ki a Ieova mo te loto fiafia, e mautinoa eiloa me ka fakamanuia ne ia koe.