Ne fakamalie aka eiloa toku manakoga mō tali ne muna‵tonu i te Tusi Tapu

TOKU OLAGA MUA:

Ne fanau au i Baku, Azerbaijan, e tokolua māua kae ko au ko te tamaliki foliki. Toku tamana se Musilimu, kae ko toku mātua se Isalaelu. Ne lasi ‵ki te alofa i te va o oku mātua kae ne talia ne lāua lā talitonuga kese‵kese. Ne ‵lago atu toku Mami ki toku Teti i te taimi ne fakalikiliki ei tou tagata i te vaitaimi e taku ki te Ramadan, kae ne ‵lago atu a Teti ki a Mami i te taimi ne fakamanatu ei ne tou fafine a te Paseka. E maua atu eiloa i te motou fale a te Kulani, te Torah, mo te Tusi Tapu.

Ne mafaufau au me i a au se Musilimu. E tiga eiloa e seki fakafesili ne au me e ola tonu te Atua, e isi eiloa ne mea kolā ne ‵numi ei au. Ne mafaufau au penei, ‘Kaia ne faite ei ne te Atua a tino, kae se a te aoga o te olaga māfai e logo‵mae se tino i tena olaga kātoa, kae oti aka ko fakapuapuaga ei ki te se-gata-mai i te afi i seoli?’ Ona ko te mea e fai mai a tino me i mea katoa e ‵tupu ko te loto o te Atua, ne mafaufau au, ‘E mata, e māfua mai i te Atua a logo‵maega o tino kae fiafia eiloa a ia ke kilokilo mai ki te logo‵mae o latou?’

I te taimi ko 12 ei oku tausaga, ne kamata o ‵talo atu au i te namaz, ko ‵talo e lima a te kau Musilimu i te aso. I te taimi tenā, ne uga atu ne toku Tamana a māua mo toku taina ki te akoga a te kau Isalaelu. I tafa o nisi mataupu, ne akoako foki matou ki tuu i te Torah mo te ‵gana Epelu. Mai mua o akoga i faleakoga i aso katoa, e ‵tau o ‵talo atu matou e ‵tusa mo tuu a te kau Iutaia. Tela la, i te taeao, ne ‵talo atu au i te namaz i te fale, kae fakamuli ifo, ko kau atu au ki ‵talo a te kau Isalaelu i te akoga.

Ne kamata o manako malosi au ki tali ‵tonu ki aku fesili. Ne fesili ‵soko atu au ki te kau lapi i te akoga: “Kaia ne faite ei ne te Atua a tino? Se a te kilokiloga a te Atua ki toku tamana Musilimu? A ia se tagata ‵lei, tela la, kaia e ‵kilo atu ki ei e pelā me se tino sē ‵ma? Kaia ne faite ei ne te Atua a ia?” Ko oko eiloa i te fakavalevale mo te sē fakatalitonugina o nai tali ne maua ne au.

TE AUALA NE ‵FULI EI TOKU OLAGA NE TE TUSI TAPU:

Ne tu atu eiloa toku fakatuanaki i se tulaga masei i te 2002. Ne fatoa olo atu matou ki Siamani, kae mai tua ifo o se vaiaso e tasi, ne maua ne toku tamana a te masaki ko te ‵mate feitu tasi kae ne galo atu ei tena mafaufau. Ne ‵talo atu au i se fia tausaga mō te ola ‵lei o toku kāiga. Ona ko toku loto talitonu me e maua ne te Atua Malosi Katoatoa a te ‵mana ki te ola mo te mate, ne fakamolemole atu au i aso katoa mō te ola o toku teti. Ne mafaufau au, ‘Ko tō foliki katoa ki te Atua ke fakataunu ne ia se manakoga tonu o se tamā tamaliki.’ Ne mautinoa eiloa i a au me ka fai eiloa ne ia taku fakamolemole. Kae ne mate eiloa toku tamana.

Ona ko toku poi me ne foliga pelā me ne kilo fatauva mai te Atua, ne mafatia malosi au. Ne mafaufau au penei, ‘Kāti e ‵se te auala ne ‵talo atu ei au, io me e se ola tonu te Atua.’ Ne ofo masei au kae ne seki toe mafai ne au o ‵talo atu i te namaz. Ne seki ‵lei a fakamatalaga a nisi lotu ki a au, telā ne fakaiku aka ne au me e seai se Atua.

I se ono masina mai tua ifo, ne āsi mai a Molimau a Ieova ki te motou fale. E tiga eiloa ne seki fakatāua malosi ne matou a Lotu Kelisiano, ne ma‵nako eiloa māua mo toku taina ke fakaasi atu mo te āva ki a lāua me e ‵se a lāua. Ne fesili atu māua ki a lāua: “E mafai pefea o tapuaki atu a Kelisiano ki a Iesu, te koluse, Malia, mo nisi tupua māfai e ‵teke atu ki Tulafono e Sefulu?” Mai te Tusi Tapu, ne fakaasi mai ne Molimau ki a māua a fakamaoniga ‵tonu me e fakatapu foki a Kelisiano ‵tonu o tapuaki atu ki tupua kae e ‵tau fua o fai atu a ‵talo ki te Atua eiloa. Ne ofo malosi au i te mea tenā.

Ne fesili atu ei māua: “Kae e a te Tolutasi? Kafai a Iesu ko te Atua, ne mafai pefea o nofo mai a ia i te lalolagi kae ke tamate ne tino?” Ne toe tali mai lāua mai te Tusi Tapu kae fakamatala mai me i a Iesu e se ko te Atua kae e se ‵pau foki lāua. Ne fakamatala mai ne Molimau a te mea tenā ona ko te mea e se tali‵tonu latou ki te Tolutasi. Ne ofo malosi au kae mafaufau penei, ‘E ‵kese ‵ki eiloa a Kelisiano konei.’

Kae koi fia iloa ne au a te pogai e ‵mate ei a tino kae talia ne te Atua a logo‵maega. Ne fakaasi mai ne Molimau ki a au a te tusi ko Te Iloaga Telā e Takitaki Atu ei Koe ki te Ola Se-Gata-Mai,a telā ne maua atu i ei a te mataupu kātoa e uiga ki taku fesili. Ne kamata fakavave eiloa ne lāua taku akoga faka-te-Tusi Tapu.

I taimi takitasi ne fai ei a te akoga, ne maua ne au a tali ‵tonu kae fakavae ki te Tusi Tapu ki aku fesili. Ne iloa ei ne au me i te igoa o te Atua ko Ieova. (Salamo 83:18) Tena uiga fakavae ko te alofa sē kaiu. (1 Ioane 4:8) Ne faite ne ia a tino me ne manako a ia ke maua fakatasi ne latou a te meaalofa ko te ola. Ne kamata o malamalama au me e tiga eiloa ne talia ne te Atua a faifaiga sē fakamaoni, e takalialia a ia ki ei kae ko pili o fakaseai atu ne ia ki te se-gata-mai. Ne tauloto ne au me ne fakamasei atu ki tino a te ‵tekeatuga o Atamu mo Eva. (Loma 5:12) E aofia i ikuga fakafanoa‵noa ko te ‵mate o ‵tou tino pele, e pelā mo toku tamana. Kae ka toe faka‵lei aka eiloa ne te Atua a fakalavelave penā i te lalolagi fou telā ko pili mai, kae ka toe faka‵tu mai i ei ki te ola a tino kolā ko ‵mate.—Galuega 24:15.

Ne fakamalie aka eiloa toku manakoga mō tali ne muna‵tonu i te Tusi Tapu. Ne kamata o toe talitonu au ki te Atua. I te taimi ne kamata ei o iloa ‵lei ne au a Molimau a Ieova, ne iloa aka ei ne au me i a latou se kautaina i te lalolagi kātoa. Ne ofo malosi au i te fealofani mo te alofa i va o latou. (Ioane 13:34, 35) Ne fakamalosi aka au ne aku mea ne tauloto e uiga ki a Ieova ke fia tavini atu ki a ia, tela la, ne fakaiku aka ne au ke au fai mo fai se Molimau a Ieova. Ne papatiso au i a Ianuali 8, 2005.

TE AUALA NE MAUA EI NE AU A MEA AOGA:

Ne ‵fuli ne fakamatalaga ‵tonu i te Tusi Tapu taku kilokiloga ki te lalolagi ke tai ‵lei atu e uiga ki te olaga. Ne maua eiloa ne au se lagonaga filemu mai fakamatalaga tafasili i te ‵gali ne maua ne au e auala i te Muna a te Atua. Ne maua ne au a te fiafia sili mo te fakamafanafanaga mai te fakamoemoega ke toe fetaui māua mo toku tamana e auala i te toetuga telā ne folafola mai i te Muna a te Atua.—Ioane 5:28, 29.

Ko oti nei ne avaga au mo te fiafia mō se ono tausaga ki a Ionatana, se tagata telā e mataku ki te Atua. Ne tauloto fakatasi ne māua me i te munatonu e uiga ki te Atua e tonu kae faigofie, kae e fai foki loa mo fai se koloa tāua ‵ki. Tenā eiloa te pogai e fakatāua ei ne māua a te fakaasi atu o te mā fakatuanaki mo te fakamoemoega gali ki nisi tino. I aso nei, ko iloa ne au me i Molimau a Ieova e se ne “tino fai fakaa‵tea” kae ne Kelisiano ‵tonu eiloa.