Ke Fakamalosi Koe ne te Atua e Auala i Tena “Meaalofa Faivasaga Telā e se Mafai o Fakamatalagina”

1, 2. (a) Se a te “meaalofa faivasaga telā e se mafai o fakamatalagina” telā ne tuku mai ne te Atua? (e) Ne a fesili ka sau‵tala tatou ki ei i te mataupu tenei?

I TE taimi ne uga mai ei ne Ieova tena Tama fagasele e tokotasi ki te lalolagi, ne tuku mai eiloa ne Ia te ‵toe meaalofa tafasili i te tāua e fakaasi mai ei tena alofa! (Ioa. 3:16; 1 Ioa. 4:9, 10) Ne taku ne te apositolo ko Paulo ki te “meaalofa faivasaga telā e se mafai o fakamatalagina.” (2 Koli. 9:15) Kaia ne fakaaoga ei ne ia te tugapati tenā?

² Ne iloa ne Paulo me i folafolaga fakaofoofogia katoa a te Atua ne fakamautinoa aka e auala i te taulaga ‵lei katoatoa a Keliso. (Faitau te 2 Kolinito 1:20.) Tela la, a te “meaalofa faivasaga telā e se mafai o fakamatalagina” ne aofia katoa i ei a te aga‵lei mo te alofa fakamaoni telā ne fakaasi mai ne Ieova e auala i a Iesu. E tonu, ko oko eiloa i te fakaofoofogia o te meaalofa tenā me e se mafai o fakamatala katoatoa atu i pati. E aoga pefea ki a tatou a te mauaga o te meaalofa fakaofoofogia tenā? Kae ne a auala e mafai ei o fakagalue aka ne tatou a te meaalofa tenei i te taimi e fakatoka ei tatou ki te Fakamanatuga o te mate o Keliso i te Aso Tolu, po 23 o Mati, 2016?

TE MEAALOFA FAKAPITO A TE ATUA

3, 4. (a) Ka pefea ou lagonaga māfai e tuku atu ne se tino se meaalofa ki a koe? (e) E mafai pefea ne se meaalofa fakapito o ‵fuli tou olaga?

³ Kafai e maua ne koe se meaalofa, e mautinoa eiloa me ka maua ne koe a lagonaga fia‵fia. Kae e isi eiloa ne meaalofa fakapito kae tāua kolā e mafai o ‵fuli ne ia te olaga o se tino. E pelā me se fakaakoakoga, mafaufau la māfai ko pili o tamate koe ona ko amioga ma‵sei ne fai ne koe. Kae poi aka koe me ko ofo atu ne se tino telā e seiloa lele ne koe ke fakasala a ia kae sao koe. E loto fiafia a ia ke mate a ia i lō a koe! E pokotia pefea koe i te meaalofa tu ‵kese tenā?

⁴ E seai se fakalotolotolua me i te fakaasiga tenā o te alofa kaimalie ka fakamalosi ne ia koe ke toe iloilo ne koe au faifaiga kae ‵fuli foki te auala ne ola ei koe muamua. Ka fakamalosi aka foki ne ia ke fakaasi atu ne koe te uiga kaimalie mo te alofa ki nisi tino kae ke fakamagalo foki so se tino telā e ‵se mai ki a koe. I tou olaga kātoa, ka nofo kaitalafu koe ki te tino telā ne loto fiafia o tuku atu tena ola mō koe.

5. I te auala fea e sili fakafia atu i ei te meaalofa a te Atua ko te togiola i lō nisi meaalofa aka?

⁵ Kae ko te meaalofa telā ne tuku mai ne Ieova ki a tatou e auala i a Keliso e sili fakafia atu tena tāua i lō te meaalofa telā ne fakamatala mai i te fakaakoakoga tenei mai luga. (1 Pe. 3:18) Mafaufau la ki te pogai tenei. Ona ko te agasala, ko maua katoa ne tatou a te mate. (Loma 5:12) Kae ona ko te alofa, ne fakatoka ei ne Ieova a Iesu ke vau ki te lalolagi kae ke “mate mō tino katoa.” (Epe. 2:9) E se faka‵sao fua ne Ieova ‵tou ola i te olaga tenei kae ne faka‵mautakitaki ne ia te fakavae ke fakaseai atu ei a te mate ki te se-gata-mai. (Isa. 25:7, 8; 1 Koli. 15:22, 26) A latou katoa kolā e fakatuanaki ki a Iesu ka maua ne latou te ola se-gata-mai i te filemu mo te fiafia, e pelā me ne tino kolā e ‵nofo mai lalo i te Malo o te Atua e auala i a Keliso io me ko te kau fakaekegina kolā e fai pelā me ne pule lagolago i te Malo tenā. (Loma 6:23; Faka. 5:9, 10) Ne a nisi fakamanuiaga e aofia i te meaalofa tenei mai i a Ieova?

6. (a) E auala i te meaalofa a Ieova, ne a fakamanuiaga ka olioli malosi koe ki ei? (e) Ne a auala e tolu ka fakamalosi aka ei ne te alofa ki te Atua ke fai ne tatou?

⁶ E aofia i te meaalofa tenei a Ieova a te faka‵leiga katoa o ‵tou masaki, te ‵fuliga o te ‵tou lalolagi ki se palataiso, mo te faka‵tuakaga o tino ‵mate. (Isa. 33:24; 35:5, 6; Ioa. 5:28, 29) E a‵lofa tonu eiloa tatou ki a Ieova mo tena Tama pele mō te tukumaiga ki a tatou a te “meaalofa faivasaga telā e se mafai o fakamatalagina.” Kae ko te fesili la, Se a te mea ka fakamalosi aka ne te alofa ki te Atua ke fai ne tatou? Ke na onoono nei tatou ki te auala e fakamalosi aka ei ne te alofa ki te Atua a tatou (1) ke tau‵tali fakapili‵pili atu ki kalafaga o Keliso Iesu, (2) ke fakaasi au te alofa ki ‵tou taina, kae ko te (3) ke fakamagalo atu a nisi tino mai ‵tou loto.

“NE FAKAMALOSI MAI TE ALOFA O KELISO KI A MATOU”

7, 8. E ‵tau o pefea ‵tou lagonaga e uiga ki te alofa ki a Keliso, kae se a te mea e fakamalosi mai i ei ke fai tatou penā?

⁷ Muamua la, e ‵tau o fakamalosi tatou ke ola mō Keliso Iesu. Ne fai mai te apositolo ko Paulo, penei: “Me ne fakamalosi mai te alofa o Keliso ki a matou.” (Faitau te 2 Kolinito 5:14, 15.) Ne iloa aka ne Paulo me e se mafai o talia ne tatou te alofa fakaofoofogia o Keliso e aunoa mo te fakamalosi kae ke ola mō ia. Kafai ko malamalama katoatoa tatou i mea ne fai ne Ieova mō tatou kae otia foki ‵tou loto ona ko tena alofa, ka fakamalosi aka ei tatou ke ola mo ‵tou loto kātoa i te auala telā e talia ne Keliso Iesu. E fakaasi atu pefea ne tatou te manakoga tenā?

⁸ A latou kolā e a‵lofa ki a Ieova ka fakamalosi aka ke fakaakoako ki a Keliso, mai te sa‵sale kae tau‵tali fakapilipili atu i ana kalafaga. (1 Pe. 2:21; 1 Ioa 2:6) E auala i te ‵tou faka‵logo, e fakamaoni atu ei te ‵tou a‵lofa ki te Atua pelā foki mo Keliso. Ne fai mai Iesu: “A te tino telā e nofo mo aku fakatonuga kae fakalogo ki ei, ko ia tenā e alofa mai ki a au. A te tino telā e alofa mai ki a au e alofa foki toku Tamana ki a ia. Ka alofa au ki ei kae ka fakaasi manino atu au ki a ia.”—Ioa. 14:21; 1 Ioa. 5:3.

9. Ne a fakamalosiga mai te lalolagi kolā e fakafesagai atu tatou ki ei?

⁹ I te vaitau o te Fakamanatuga, e ‵tau mo tatou o mafaufau ‵loto ki te auala e ola ei tatou. Fesili ifo ki a koe eiloa, penei: ‘I auala fea ne tautali atu ei au i kalafaga o Keliso Iesu? I auala fea e mafai ei o tai momea aka te ‵lei o te auala e ola ei au?’ E tāua ‵ki ke iloilo ne koe a koe eiloa, ona ko te ma‵losi o fakamalosiga kolā e ofo mai ne te lalolagi tenei. (Loma 12:2) Kafai e se fakaeteete tatou, e mafai eiloa o tau‵tali atu tatou ki tino ‵poto i mea faka-te-lalolagi io me ko tino takutakua i tamunei mo tafaoga. (Ko. 2:8; 1 Ioa. 2:15-17) E mafai pefea o ‵teke atu ne tatou a fakamalosiga konā?

10. Ne a fesili e mafai o ‵sili ifo ne tatou ki a tatou eiloa i te vaitau tenei o te Fakamanatuga, kae se a te mea e mafai o fakamalosi mai ne tali ki fesili konei ke fai ne tatou? (Ke onoono ki te ata i te kamataga.)

¹⁰ E mafai o fakaaoga ne tatou a te vaitau o te Fakamanatuga e pelā me se avanoaga ke fai ne tatou se iloiloga e uiga ki ‵tou gatu, ata vitio, pese fakalogo‵logo, e pelā foki mo mea kolā e tausi i loto i ‵tou komupiuta, telefoni mo tablets. Kafai e onoono koe ki ou gatu, fesili ifo ki a koe eiloa, penei: ‘Kafai ne fanatu au ki se koga e nofo atu ei a Iesu, e mata, e ‵lei oku lagonaga ki gatu e pei ne au?’ (Faitau te 1 Timoteo 2:9, 10.) ‘E mata, e fakaasi atu i oku gatu me i a au se tokotasi o soko o Keliso Iesu?’ E mafai foki o ‵sili ifo ne tatou a fesili konei ki ata mo pese e fakaaoga ne tatou. ‘E mata, e fiafia a Iesu o onoono ki te ata tenei io me fakalogologo ki te pese tenei? Kafai ne puke ne ia taku telefoni io me se tablet, e mata, au ka mā ona ko mea kolā e lavea ne Iesu i loto i ei?’ Kafai e mafaufau koe e uiga ki tafaoga i vitio, fesili ifo ki a koe eiloa: ‘E mata, e faigata ki a au ke fakamatala atu ki a Iesu te pogai e fiafia ei au ki tafaoga i vitio?’ E ‵tau o fakamalosi aka ne te ‵tou a‵lofa ki a Ieova ke ‵pei keatea ne tatou so se mea telā e fai ei ke sē fai tatou pelā me ne soko o Keliso, faitalia te ‵togi ‵mafa o mea konā. (Galu. 19:19, 20) Ko oti ne tauto atu tatou i te taimi ne fai ei ‵tou tukuatuga me ka sē ola tatou mō tatou eiloa, kae ola tatou mō Keliso. Tela la, e se ‵tau o ‵piki ‵mau tatou ki so se mea telā e mafai o taofi ne ia tatou mai te tau‵tali fakapilipili atu ki kalafaga o Keliso.—Mata. 5:29, 30; Fili. 4:8.

11. (a) E fakamalosi aka pefea tatou ne te alofa ki a Ieova mo Iesu i te faiga o te galuega talai? (e) E mafai pefea o fakamalosi aka tatou ne te alofa ke fesoasoani atu ki nisi tino i te fakapotopotoga?

¹¹ A te ‵tou a‵lofa mō Iesu e fakamalosi foki ei tatou ke ga‵lue mo te loto kātoa i te galuega talai mo te faiga o soko. (Mata. 28:19, 20; Luka 4:43) I te vaitau o te Fakamanatuga, ka maua ne tatou te avanoaga ke tavini atu pelā me se paenia lagolago kae ke galue mō se 30 ki te 50 itula i te galuega talai. E mata, e mafai o fakamafuli‵fuli ou fakanofonofoga ke mafai koe o paenia? Ne mafaufau eiloa se taina ko 84 ana tausaga kae ko mate tena avaga me e se mafai o paenia lagolago a ia ona ko te tulaga matua kae fakamasakisaki. E ui i ei, ne fesoasoani atu eiloa a paenia kolā e ‵nofo pili ki tena koga ki tou tagata. Ne fesoasoani atu latou i mea fakatele‵tele kae filifili faka‵lei a koga talai kolā e mafai o galue a ia i ei, ko te mea ke mafai o maua ne ia se 30 itula. E mata, e mafai o kausaki atu koe kae fesoasoani ki se tino i tou fakapotopotoga ko te mea ke mafai o maua foki ne ia a te fiafia ke paenia lagolago i te vaitau o te Fakamanatuga? E tonu, e se ko tino katoa e mafai o paenia lagolago. E se gata i ei, e mafai o fakaaoga ne tatou so se taimi mo te malosi e maua ne tatou ke momea aka ei te uke o taulaga o vikiga e tuku atu ne tatou ki a Ieova. Mai te faiga o te mea tenei, e fakaasi atu ne tatou me e fakamalosigina tatou ne te alofa ki a Keliso, e pelā eiloa mo Paulo. Se a foki te mea ka fakamalosi aka ne te alofa ki te Atua ke fai ne tatou?

SE TIUTE KE ALOFA TE SUĀ NO KI TE SUĀ TINO

12. Se a te mea e fakamalosi aka ne te alofa ki te Atua ke fai ne tatou?

¹² A te lua o auala, a te alofa ki te Atua ka fakamalosi ne ia tatou ke fakaasi atu te alofa ki ‵tou taina. Ne iloa ne te apositolo ko Ioane a te mea tenei, me ne tusi mai a ia penei: “Aku fagasele, ke tumau tatou i te fakatau a‵lofa, me i te alofa e māfua mai i te Atua, kae ko so se tino telā e alofa ko fai mo tama a te Atua kae e iloa foki ne ia te Atua.” (1 Ioa. 4:7-11) E tonu, e se mafai o talia faka‵lei ne tatou te alofa o te Atua māfai e se fai ‵tou tiute ke a‵lofa ki ‵tou taina. (1 Ioa. 3:16) Ne a auala kese‵kese e mafai ei o fakaasi atu ne tatou te alofa?

13. Se a te fakaakoakoga ne tuku mai ne Iesu e uiga ki te alofa ki tino?

¹³ Mafaufau la ki te fakaakoakoga a Iesu. I te taimi ne fai ei tena galuega talai i te lalolagi nei, ne saga tonu atu a ia ki tino loto mau‵lalo. Ne fanatu a ia ki tino ma‵saki—ko tino ‵pili, tino ‵kivi, tino ‵tuli mo tino gū‵gu. (Mata. 11:4, 5) Ne fiafia eiloa a Iesu o akoako atu a tino kolā ne fia‵kai i te feitu faka-te-agaga, kolā ne ‵kilo atu ki ei a takitaki o te lotu Iutaia e pelā me ne “tino malaia.” (Ioa. 7:49) Ne alofa a ia ki tino loto mau‵lalo kae ne galue malosi a ia ke tavini atu ki a latou.—Mata. 20:28.

14. Ne a mea e mafai ne koe o fai ke fakaasi atu tou alofa mō ou taina tali‵tonu?

¹⁴ I te vaitau o te Fakamanatuga, e maua ne tatou te avanoaga ke fakaakoako ki a Iesu mai te fakamāumāu o ‵tou taimi ki taina mo tuagane i ‵tou fakapotopotoga. Kafai e fai koe penā, e mautinoa me ka aoga ki nisi tino a tou alofa. Kāti e isi ne taina mo tuagane ma‵tua kolā e manakogina ne latou se fesoasoani. E mata, e mafai o āsi atu koe ki tino pele konei? E mata, e mafai o avatu ne koe ne mea‵kai, fesoasoani atu ki nisi galuega i te fale, ave ne koe latou ki te fakatasiga, io me ‵kami ne koe latou ke olo fakatasi mo koe i te galuega talai? (Faitau te Luka 14:12-14.) E ‵tau o talia ne tatou te alofa o te Atua ke fakamalosi ne ia tatou ke fakalauefa kae fakaasi atu te ‵tou a‵lofa ki ‵tou taina.

FAKAASI ATU TE ALOFA FAKAMAGALO KI ‵TOU TAINA MO TUAGANE

15. Se a te mea e ‵tau o iloa ne tatou?

¹⁵ A te tolu o auala, e ‵tau o fakamalosi aka ne te alofa ki a Ieova ke fakamagalo ne tatou a ‵tou taina mo tuagane. E pelā me ne fanau a te tagata muamua ko Atamu, ne maua katoa ne tatou te agasala mo te mate. E seai se tino i a tatou e mafai o fai atu, “E se aoga ki a au te togiola.” Ke oko foki loa ki te ‵toe tavini fakamaoni a te Atua, ne fakalagolago katoatoa ki te alofa tauanoa o Ieova e auala i a Keliso. E ‵tau o iloa ne tatou taki tokotasi me ko oti ne fakamagalogina ‵tou kaitalafu lasi. Kaia e tāua ei te mea tenei? E maua ne tatou te tali i se tala fakatusa e tasi a Iesu.

16, 17. (a) Se a te mea e tauloto ne tatou mai te tala fakatusa a Iesu e uiga ki te tupu mo pologa? (e) Kafai ko oti ne mafaufau ‵loto ki te tala fakatusa a Iesu, se a te mea ka fakaiku aka ke fai ne koe?

¹⁶ Ne fakamatala mai ne Iesu te auala ne fakamagalo ei ne te tupu te kaitalafu lasi a tena pologa telā se 10,000 taleni, io me se 60,000,000 tenali. Kae ko te pologa telā ne fakamagalo ne te tupu, ne seki fakamagalo ne ia tena taina pologa telā ne kaitalafu ne ia se aofaki foliki e 100 tenali. Ne kaitaua ‵ki a te tupu i te taimi ne iloa ne ia te loto makeke o te pologa telā ne fakamagalo ne ia. Ne fai atu ei te tupu: “ ‘A koe se pologa masei, ne fakamagalo ne au tau kaitalafu, i a koe ne tagi mai ki a au. E a, e se ‵tau o fakamagalo foki ne koe tou taina pologa, e pelā mo koe ne fakamagalo ne au?’” (Mata. 18:23-35) E tonu, a te lasi o te alofa fakamagalo o te tupu ne ‵tau o fakamalosi atu ki te pologa tenā ke fakamagalo ne ia tena taina pologa. I se auala tai ‵pau, se a te mea e ‵tau o fakamalosi ne ia koe ke fakaasi atu te alofa o Ieova mo tena alofa fakamagalo?

¹⁷ E maua eiloa ne tatou te avanoaga i te vaitau o te Fakamanatuga ke mafau‵fau tatou māfai e tausi ne tatou i ‵tou loto a te ita fakamoemoe ki se taina io me se tuagane. Kafai e fai penā, se taimi gali eiloa ke fakaakoako tatou ki a Ieova, telā e “loto fakamagalo.” (Nee. 9:17; Sala. 86:5) Kafai e loto fakafetai tatou ki mea ne fai ne Ieova mō tatou mai te fakamagalo ne ia ‵tou agasala, ka ma‵nako foki tatou o fakamagalo a nisi tino mai ‵tou loto. E se mafai o maua ne tatou te alofa mo te loto fakamagalo o te Atua vaganā e a‵lofa kae fakamagalo ne tatou a nisi tino. (Mata. 6:14, 15) Faitalia me e se mafai ne te loto fakamagalo o ‵fuli a mea kolā ne ‵tupu i aso ko ‵teka, kae e mautinoa eiloa me ka fesoasoani mai ke maua ne tatou se olaga fiafia i aso mai mua.

18. Ne fesoasoani atu pefea a te alofa ki te Atua ki se tuagane telā ne fa‵ki i vāivāiga o te suā tuagane?

¹⁸ Mō te tokoukega o tatou, se mea faigata ke “fakatau fa‵ki” ne tatou a vāivāiga o ‵tou taina mo tuagane. (Faitau te Kolose 3:13, 14; Efeso 4:32.) E pelā me se fakaakoakoga, a Lily se tuagane taka i te fakapotopotoga telā ne loto fiafia o fesoasoani atu ki a Carol^[1] telā ko mate tena avaga. Ne ave ne Lily a Carol ki so se koga e fia fano a ia ki ei, kae ne fakaasi atu ne ia te atafai mai te fesoasoani atu ki tou fafine i auala e uke. Faitalia te uke o mea ne fai ne Lily, kae ne tumau eiloa a Carol i te fakamasei ne ia tou fafine kae uiga faigata. Kae ui i ei, ne saga atu faeloa a Lily ki uiga ‵gali o Carol. Ne tumau eiloa tou fafine i te fesoasoani atu ki a Carol mō se fia o tausaga ke oko loa ki te taimi ne masaki malosi ei a Carol kae mate atu. Ne fai mai a Lily, “Faitalia loa a mea kolā ne ‵tupu, kae e olioli eiloa au ke fetaui mo Carol māfai ko toe fakatu mai. E fia iloa faka‵lei ne au a tou fafine māfai ko ‵lei katoatoa a ia.” E tonu, e mafai o fakamalosi tatou ne te alofa ki te Atua ke fa‵ki i vāivāiga o ‵tou taina mo tuagane kae olioli tatou ki te taimi telā ka fakaseai ei te tulaga sē ‵lei katoatoa ki te se-gata-mai.

19. Ka fakamalosi aka pefea koe ne te “meaalofa faivasaga telā e se mafai o fakamatalagina” a te Atua?

¹⁹ Ko maua tonu ne tatou a te “meaalofa faivasaga telā e se mafai o fakamatalagina” mai i a Ieova. Ke mo a ma manatu mā‵ma tatou ki te meaalofa tāua tenei. I lō te fai penā, i te vaitau o te Fakamanatuga tenei, ke na mafaufau ‵loto tatou ki mea katoa kolā ne fai ne Ieova mo Iesu mō tatou. E tonu, ke na fakamalosi aka tatou ne te lā a‵lofa ke tau‵tali fakapilipili atu tatou ki a Iesu, ke fakalauefa kae fakaasi atu ‵tou a‵lofa ki ‵tou taina tali‵tonu, kae ke fakamagalo atu foki latou mai ‵tou loto.