Iloiloga o Fetū mo te Fakamatalaga o Mea ‵Tupu i Aso Mai Mua​—E Mata, ne Auala ke Iloa Aka a Mea ka ‵Tupu i Aso Mai Mua?

ILOILOGA O FETŪ

A te iloiloga o fetū se vaega o mea fakataulaitu telā e fakavae ki te talitonuga me i fetū, te masina, mo te paneta e isi ne olotou ma‵losi ki olaga o tino i te lalolagi. E tali‵tonu a tino iloilo fetū me i te faka‵tuga o paneta konei i te lagi i te taimi e fanau mai ei se tino e mafai o fulifuli ki ei ana uiga mo tena olaga i aso mai mua.

E tiga eiloa ne māfua mai a te iloiloga o fetū mai Papelonia mua, kae koi lauiloa eiloa a te talitonuga tenā i aso nei. E ‵tusa mo se savea ne fai i te Iunaite Sitete i te 2012, e tasi vae tolu o tino kolā ne aofia i loto i te faiga o te savea, ne mafau‵fau i te iloiloga o fetū se vaega o mea “fakasaienisi,” kae e nofo ki se 10 pasene e fai mai “me ne poto ‵tonu fakasaenisi.” Kae e mata, e tonu? Ikai. Tenei te pogai.

• E se pokotia eiloa a olaga o tino mai malosi o paneta mo fetū konei e ‵tusa mo fakamatalaga a tino iloilo fetū.

• A mea kolā e ‵valo mai ne latou e mafai o se fakapatino fua ki se mea e tasi kae ki so se mea.

• A te iloiloga o fetū i aso nei ko fakavae ki talitonuga mua me i nisi paneta e fakatamilo ne latou a te lalolagi. Kae ko te ‵tonuga loa, a paneta e fakatamilo ne latou a te la.

• A fakaasiga kolā ne ‵valo mai ne tino iloilo fetū kese‵kese e uiga loa ki se tino tokotasi e se ‵pau.

• A fakailoaga konei mai i fetū e mafai o iloa i ei a mea e uiga ki te olaga o te tino tenā. Kae ko te ‵tonuga loa, a tino kolā e ‵pau olotou asofa‵nau, e se ‵pau olotou uiga, e se fakaasi mai ne po masina ne fanau i ei se tino a mea e uiga ki a ia.

I lō te ‵kilo atu ki te tino mo ana uiga, e fakamasino ne tino iloilo fetū a te tino mo ana faifaiga ki olotou mafaufauga totino eiloa. E mata, a te faifaiga tenei se faifaiga fakailoga tino?

FAKAMATALAGA O MEA ‵TUPU I ASO MAI MUA

Mai aso mua loa, ne fesokotaki sāle a tino mo tino fakamatala mea ‵tupu i aso mai mua. A nisi o latou e onoono ki mea i loto i foitino o manu mo tino io me ko te auala e siko i ei ne se moa tagata a kati saito. A ko nisi tino e fakavae olotou fakamatalaga mai i foliga o lau o lauti io me ko kōfe kolā ko liu pauta. I aso nei, ko fakaaoga ne latou a lāmī, pōlo kilasi, taisi, mo nisi mea aka i ei kolā e mafai o “fakamatala” ne latou te olaga o te tino i aso mai mua. E mata, tenei eiloa te ‵toe auala fakatalitonugina ke mafai o iloa ne tatou a mea e uiga ki ‵tou olaga i aso mai mua? Ikai, e se tonu. Ke onoono aka tatou ki pogai.

Ka onoono nei tatou ki te ‵pau mo te ‵tonu o olotou fakamatalaga. A te ‵kese o fakamatalaga a te suā tino mai te suā tino e fakafesiligina i ei a te fakamaoni o fakaasiga kolā e fakaasi mai ne tino fakamatala mea ‵tupu i aso mai mua. Faitalia eiloa me ‵pau a vaegā auala ne fakaaoga, kae e ‵kese eiloa e mea kolā e fakaasi mai me ka ‵tupu. E pelā mo te mea tenei, kafai e fesili atu ne se tino ki se tokolua fakamatala mea ‵tupu i aso mai mua ke fakaasi mai a mea seki ‵tupu e ‵tusa mo te “fakamatalaga” i te lāmī, e manino ‵lei me e ‵tau o ‵pau a lā tali e uiga ki ei. Kae ko te ukega o taimi e se fai eiloa penā.

A auala mo gasuesuega e fai ne tino fakamatala mea ‵tupu i aso mai mua ko se fakatalitonugina eiloa. E fai mai a nisi tino i lāmī mo pōlo kilasi ne mea lavea fua kolā e fakaloiloi ki ei a tino kae e iloilo ne te tino fakamatala mea ‵tupu i aso mai mua a faifaiga a se tino kae e se ko mea kolā e fakaaoga ne ia. E pelā mo te fakaakoakoga tenei, a te tino apo i te fakaasi ne ia a mea seki ‵tupu, ka uke a vaegā fesili e fakaaoga ne ia kae fakalogologo faka‵lei loa a ia ki fakamatalaga kolā e tuku atu ne te tino mo nisi mea aka i ei kolā e puke fua ne ia i fakamatalaga a te tino telā e mafai o fakaasi mai se mea e uiga loa ki a ia telā e fakasau‵tala ne ia. Ko nofo atu ei a te tino fakamatala mea ‵tupu i aso mai mua mo fakamatalaga ‵tonu e uiga ki te tino tenā mo ana fakanofonofoga, telā e se masaua ne te tino telā ne fakasau‵tala me ko oti ne tuku atu ne ia a fakamatalaga e uiga ki a ia. Ona ko te talitonu katoatoa o te tino tenei ki te tino fakamatala mea seki ‵tupu, ne mafai ei ne nisi o latou konei o maua a tupe e uke mai i tino kolā e olo atu sāle ki a latou mō se fesoasoani.

TE MEA TELĀ E FAI MAI NE TE TUSI TAPU KI A TATOU

A te fakaaoga o mea iloilo fetū mo te fakamatala a mea ‵tupu i aso mai mua se fakaasiga me ko oti eiloa ne iloa ne tatou a mea ka ‵tupu ki a tatou i aso mai mua. Kae e mata, e tonu te mea tenei? E fai mai te Tusi Tapu me e mafai ne tatou o filifili aka a te mea e tali‵tonu tatou ki ei io me ko te mea e ma‵nako tatou ke fai, kae ka pokotia eiloa a ‵tou olaga i aso mai mua i ‵tou filifiliga e fai.—Iosua 24:15.

E isi eiloa ne pogai e ‵teke atu ei a tino tapuaki o te Atua ki te iloiloga o fetū mo te fakamatalaga o mea ‵tupu i aso mai mua—me e taku fakamasei ne te Atua so se faifaiga fakataulaitu. E maua ne tatou i te Tusi Tapu a pati konei: “E se ‵tau o maua atu i a koutou se tino telā e . . . fai mea fakataulaitu, io me faivailakau, io me salasala ki fakailoga o mea ka ‵tupu, se tino fai tapune, se tino fai pati ‵lau, se tino telā e fesokotaki ki agaga, se tino fakamatala mea ‵tupu i aso mai mua, io me se tino e ‵sala se fesoasoani mai i tino ‵mate. So se tino e fai ne ia a mea konei ka takalialia ki ei a Ieova.”a—Teutelonome 18:10-12.