Māfai ko sē Fakamaoni Tau Avaga

“Au ne fia mate i te taimi ne fai mai taku avaga me ka tiakina ne ia au kae ‵nofo mo se tamafine. Ko oko loa i te sē fakamaoni, maise loa māfai e mafaufau au ki mea e uke ne fai ne au mō ia.”—Maria, Sepania.

“I te taimi ne tiaki fakavave ei au ne taku avaga, e pelā eiloa me isi se vaega i loto i a au ne mate. A mea ne mafau‵fau ke fai ne māua, mā fakamoemoega, mo mā palani ko fakaseai atu katoa. E isi ne aso ko mafaufau au me ko seai ne mea e manavase au ki ei, kae oti aka ko toe fanoanoa malosi au.”—Bill, Sepania.

A TE sē fakamaoni o se tino avaga se mea fakafanoanoa ‵ki. E tonu, nisi tino a‵vaga ne mafai ne latou o fakamagalo a olotou avaga kolā ne seki fakamaoni ki a latou kae toe ati aka olotou fesokotakiga ‵pili.a Kae faitalia me ‵tala te avaga io me ikai, kae ko latou kolā ne iloa aka ne latou me ne seki fakamaoni olotou avaga ki a latou e logo‵mae ‵ki loa i olotou loto. E mafai pefea o kufaki ne latou olotou lagonaga logo‵mae konā?

TUSI FAI‵TAU MAI TE TUSI TAPU KOLĀ E MAFAI O FESOASOANI ATU KI A KOE

Faitalia te logo‵mae i te loto, a avaga kolā ne seki fai ne latou a mea ‵se ne maua eiloa ne latou a fakamafanafanaga mai i te Tusi Tapu. Ne iloa aka ne latou me atafai atu eiloa te Atua ki olotou lagonaga logo‵mae.—Malaki 2:13-16.

“Kafai ko uke a mea e manavase au ki ei,e fakamafanafana kae fakafiafia ne koe au.”—Salamo 94:19.

“I te taimi ne faitau ne au te fuaiupu tenā, ne fakaataata ne au a Ieova e fakamafanafana ne ia toku logo‵mae, e pelā eiloa me se tamana alofa atafai,” ko pati a Bill.

“A koe e alofa tumau ki te tino telā e alofa tumau ki a koe.”—Salamo 18:25.

“A taku avaga tagata ne seki fakamaoni mai ki a au,” ko pati a Carmen, telā tena avaga ne amio penā mō se fia masina. “Kae ko au ne talitonu ki te fakamaoni o Ieova. E se mafai o fakafanoanoa ne ia au.”

“Ke mo a ma manava‵se ki so se mea, kae ke tuku atu a mea katoa kolā e ma‵nako koutou ki te Atua . . . e auala i otou talosaga; kae ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto.”—Filipi 4:6, 7.

“E faitau faeloa ne au te fuaiupu tenei fakafia taimi,” ko pati a Sasha. “I taimi e fai faeloa ne au aku ‵talo, e tuku mai eiloa ne te Atua a te filemu ki toku olaga.”

A latou konei ne fakamatala atu mai luga toeitiiti kae ‵fiu latou. Kae ko latou ne tali‵tonu eiloa ki a Ieova te Atua kae maua a fakamalosiga mai i a ia e auala i tena Muna. Ne fai mai a Bill, penei: “Ne aoga eiloa toku olaga ona ko toku fakatuanaki faitalia me ko sē aoga a mea katoa. E tiga eiloa e sasale au ‘i te vanu pouli kae ‵poko,’ ne fakatasi mai eiloa te Atua ki a au.”—Salamo 23:4.

a E uiga ki fakamatalaga me e mata e ‵tau o fakamagalo atu io me ikai, ke onoono ki te lōmiga o te Awake! i a Apelila 22, 1999, “When a Mate Is Unfaithful.”

Te Auala ne Kufaki ei a Nisi Tino

Mafaufau ‵loto ki tusi fai‵tau fakamafanafana loto.

“Ne faitau au ki te tusi o Iopu mo te Salamo,” e fai mai a Bill, “ka ne māka ne au a fuaiupu katoa kolā ne fetaui ‵tonu mo oku fakanofonofoga. Ne iloa aka ne au me i tino tusitala konei o te Tusi Tapu ne fakafesagai foki mo logo‵maega mo te manavase telā ne pokotia au i ei.”

‵Sala atu ki fakamafanafanaga e auala i pese fakatagi‵tagi.

“Kafai e se mafai o moe au i te po, ne fakalogologo au ki pese fakatagi‵tagi,” ko pati a Carmen. “A te mea tenei se tasi o fakamafanafanaga gali.” Ne fai mai a Daniel: “Ne tauloto au ke iloa o tātā i te kitala kae ne fesoasoani mai te mea tenā ke maua ne au te filemu o te mafaufau.”

Sau‵tala e uiga ki ou lagonaga.

“Au e se masani o faipati sāle e uiga ki oku lagonaga,” ne fai mai a Daniel. “Kae e isi ne oku taugasoa ‵lei, kae ne sau‵tala ne au ki a latou i aso katoa. Ne fakaasi katoa au oku lagonaga ki a latou, e auala i tusi io me sau‵tala mo latou. Ne fesoasoani mai eiloa te mea tenā.” Ne fai mai a Sasha: “Ne tāua ‵ki eiloa ki a au a te fesoasoani o oku kāiga. Ne toka faeloa toku mātua o fesoasoani mai. Kafai ne manako au o faipati, ne fakalogologo mai eiloa a ia ki a au. Ne alofa kae puipui ne toku tamana a au, kae fesoasoani mai.”

Tumau faeloa i te ‵talo.

“Ne ‵talo faeloa au,” ko pati a Carmen. “Ne iloa ne au me i te Atua ne pili mai ki a au, fakalogologo mai, kae fesoasoani mai. I te taimi faigata tenei, ne fakapilipili eiloa au ki te Atua.”