Te Auala e Fakaasi Atu ei a te Loto Fakafetai mō te Meaalofa Sili a te Atua
1. Kaia e ‵tau ei o loto fakafetai tatou ki a Ieova?
1 Mai i ‘meaalofa ‵lei,’ katoa e uke a Ieova mō tatou, e fai eiloa a te togiola a tena Tama fagasele e pelā me ko te ‵toe meaalofa sili. (Iako. 1:17) E maua mai i ei a fakamanuiaga e uke, e aofia i ei a te fakamagaloga o ‵tou agasala. (Efe. 1:7) E loto fakafetai faeloa tatou mō te mea tenei. I te vaitaimi o te Fakamanatuga, e fakaaoga eiloa ‵tou taimi ke mafau‵fau ‵loto ki te meaalofa sili tenei.
2. E mafai pefea o ati aka ne tatou a te loto fakafetai mō te togiola i ‵tou kāiga mo tatou taki tokotasi?
2 Ke Ati Aka te Loto Fakafetai: Ko te mea ke ati aka ne tou kāiga a te loto fakafetai, kaia e se fakaaoga ei ne koe a vaiaso mai mua o te Fakamanatuga i te po 30 o Mati, ke onoono fakatasi koutou i te Tapuakiga a Kāiga i afiafi ki fakamatalaga e uiga ki te togiola? Kae onooono foki ki te faitauga fakapito ki te Tusi Tapu i te taimi o te Fakamanatuga e pelā me se kāiga i aso takitasi. Mafaufau ki te auala ne aoga ei a te togiola ki a koe mo tau kilokiloga e uiga ki a Ieova, ki a koe eiloa, ki nisi tino, mo aso mai mua. Ka lavea foki ne koe a te aoga ke fakaakoako ki te usuga o pese ‵fou e lua kolā ka fakaaoga i te Fakamanatuga, te pese napa 8 mo te 109.—Sala 77:12.
3. E mafai pefea ne tatou o fakaasi atu ‵tou loto fakafetai?
3 Fakaasiga o te Loto Fakafetai: A te loto fakafetai mō te togiola e fai ei tatou ke gasue‵sue o fakaasi atu ki nisi tino a mea e uiga ki a Ieova mo tena alofa sili i te ugamaiga o tena Tama. (Sala. 145:2-7) I te masina o Mati, Apelila, mo Me, ka fakaasi atu ne nisi kāiga a te loto fakafetai mai i te faiga o se tino e tokotasi i te kāiga e pelā me se paenia lagolago. Kafai e se mafai o fai a te mea tenei, e mafai ne koe o ‘fakaaoga so se avanoaga’ ke fakalauefa atu tau galuega talai? (Efe. 5:16) Ka fakamalosi aka tatou ne te loto fakafetai ke fesoasoani atu ki nisi tino ke ‵kau fakatasi tatou ki te Fakamanatuga. (Faka. 22:17) Ke na kamata o fakamau ki lalo se fakasologa o au toe asiga, a‵koga faka-te-Tusi Tapu, tino ga‵lue, mo tuakoi, kae ke na kau katoatoa atu ki te galuega fakapito mō te Fakamanatuga.
4. I auala fea e mafai ei o fakaaoga faka‵lei ne tatou a te vaitaimi o te Fakamanatuga?
4 Ka maua ne tatou a avanoaga ‵fou i te vaitaimi o te Fakamanatuga ke fakaasi atu ki a Ieova a te lasi o te ‵tou loto fakafetai ki tena meaalofa ki tino katoa. Ke na fakaaoga ne tatou a te taimi tenei ke ati aka kae fakaasi atu a te ‵tou loto fakafetai mō te togiola mo “koloa tumau o Keliso.”—Efe. 3:8.