‘A te Tala ‵Lei Tenei o te Malo ka Fakamatala Atu!’

1. E iloa pefea ne tatou me e seai se mea e mafai o taofi ne ia a te galuega talai?

¹ E tonu, e seai eiloa se mea e mafai o taofi aka ne ia a Ieova mai te fakataunuga o tena loto. (Isa. 14:24) E tiga eiloa e foliga mai me ko se mafai ne te famasino ko Kitiona mo ana tagata e toko 300 o fakatakavale ne latou a te kautau a Mitiana kolā e toko 135,000, ne fai atu a Ieova ki a ia: “Fano o faka‵sao Isalaelu mai tino Mitiana i tou malosi kātoa. Ko au tenei e uga atu ne au a koe.” (Fama. 6:14) Se a te galuega e ‵lago atu ki ei a Ieova i aso nei? Ne fai mai a Iesu: “A te Tala ‵Lei tenei e uiga ki te Malo, e fakamatala atu ki te lalolagi kātoa.” (Mata. 24:14) E seai eiloa se tino e mafai o taofi ne ia a te fakataunuga o te galuega tenei!

2. Kaia e mafai ei o fakamoe‵moe tatou ke fesoasoani mai a Ieova ki a tatou taki tokotasi i te faiga o te galuega talai?

² E Fesoasoani Mai a Ieova ki a Tatou Taki Tokotasi: E tiga eiloa e tali‵tonu tatou me e mafai ne Ieova o fai ne ia ke manuia ana Molimau e pelā me se potukau, e mata, e mafai o fakamoe‵moe tatou me e mafai ne Ieova o fesoasoani mai ki a tatou taki tokotasi? I te taimi ne manako malosi a ia ki se fesoasoani, ne lagona eiloa ne te apositolo ko Paulo a te ‵lago tonu mai o Ieova e auala i tena Tama, ko Iesu. (2 Timo. 4:17) E mafai eiloa o tali‵tonu tatou me ka fakamanuia foki ne Ieova a taumafaiga a tatou taki tokotasi ke fakataunu tena loto.​—1 Ioane 5:14.

3. I tulaga fea e fesoasoani mai ei a Ieova ki a tatou?

³ E mata, e se lava tou malosi e ‵toe mō te faiga o te galuega talai ona ko mea e manavase ki ei i te olaga? “E fakamalosi ne ia a latou kolā ko vāi‵vai kae fi‵ta.” (Isa. 40:29-31) E mata, e fakafesagai atu nei koe ki fakasauaga io me ko ‵tekemaiga? “Tuku atu ki te Aliki a mea e manavase koe ki ei, me ka fesoasoani a ia ki a koe.” (Sala. 55:22) E mata, e galo sāle i a koe a te loto talitonu i nisi taimi? “Vau o fano, ka fesoasoani atu au ki tau faipati.” (Eso. 4:11, 12) E mata, e fakamasakisaki sāle koe kae ko se uke au mea e mafai o fai i te galuega talai? E fakatāua kae e fakaaoga ne Ieova au taumafaiga kolā e fai mo te loto kātoa, faitalia te mu‵tana o au mea e mafai o fai.​—1 Koli. 3:6, 9.

4. E pokotia pefea tatou ona ko te ‵tou loto tali‵tonu ki a Ieova?

⁴ A Ieova e “fakaoko atu tena lima . . . kae e seai eiloa se tino e mafai o taofi ne ia.” (Isa. 14:27) Kafai e loto tali‵tonu tatou me ka fakamanuia ne Ieova a ‵tou galuega talai, ke na tumau eiloa tatou i te talai atu “mo te loto toa e uiga ki te Aliki.”​—Galu. 14:3.