“Ke Fai ne Koe a te Galuega Telā ne Maua ne Koe Mai i te Aliki”

“Ke fai ne koe a te galuega telā ne maua ne koe mai i te Aliki.”—KOLOSE 4:17.

1, 2. Se a te tiute o Kelisiano ki luga i tino?

E ISI eiloa se tiute tāua e ‵tau o fai ne tatou ki tino i ‵tou tafa. Ka iku atu olotou fakaikuga e fai i te taimi nei ki te lotou ola io me ko te mate i te taimi o te ‘fakalavelave lasi.’ (Fakaasiga 7:14) Ne fai mai a te tino telā ne tusi ne ia te tusi ko Faataoto, penei: “Fakavave o fakasao te tino telā ka tamate i se feitu sē tonu. [“Io me ko tino kolā ko takasese atu ki te mate,” NW].” Ko oko loa te tāua o pati konei! A te fakatamala o fakailoa atu ki tino a te filifiliga e ‵tau o fai ne latou, e mafai o fai i ei ke pisipisia tatou i olotou toto. E toe fai mai foki te fuaiupu tenā: “E mafai koe o fai pelā me e seai sau fekau i te mea tenā, kae masaua i te Atua e iloa ne ia ou mafaufauga, kae fakamasino foki ne ia. E onoono faka‵lei eiloa a ia ki a koe; e iloa ne ia a mea katoa. Ka taui atu ne ia ki a koe e ‵tusa eiloa mo au mea ne fai.” E manino ‵lei, me e se mafai o fai atu a tavini a Ieova me e “seai” sena mea e iloa e uiga ki te fakamataku o te tulaga o te tino.—Faataoto 24:11, 12.

² E fakatāua ne Ieova a te ola. E fakamalosi ne ia ana tavini ke fai so se mea e mafai ke faka‵sao ei a ola o tino e tokouke. E ‵tau o fakailoa atu ne tavini taki tokotasi a te Atua a te fekau fakaola tino telā e maua i te Muna a te Atua. E tai ‵pau eiloa te ‵tou galuega mo te galuega a se tino leoleo telā e faka‵pula mai ne ia se fakalavelave telā ko pili o tupu. E se ma‵nako tatou ke pisipisia tatou i toto o tino kolā ko pili o fakaseai atu. (Esekielu 33:1-7) Tela la, se mea tāua ‵ki ke kufaki tatou i ‵tou taumafaiga ke ‘folafola atu te muna’!—Faitau te 2 Timoteo 4:1, 2, 5. 

3. Ne a mataupu ka faipati ki ei te mataupu tenei mo te avā mataupu mai tua?

³ Ka faipati a te mataupu tenei ki auala e mafai ei o manumalo koe i mea kolā e fakalavelave mai ki tau galuega fakaola tino, mo te auala e mafai ei o fesoasoani atu koe ki tino e tokouke. Ka faipati eiloa a te mataupu telā ka ‵soko mai ki te auala e ati aka ei ne koe te apo i te akoako atu o muna‵tonu tāua. Kae ka fakaasi mai i te tolu o mataupu a nisi ikuga fakamalosi loto kolā ko maua ne tino talai o te Malo i te lalolagi kātoa. Mai mua o sukesuke tatou ki mataupu konei, se mea ‵lei ke iloilo aka ne tatou te pogai ko faigata ‵ki ei a ‵tou taimi nei.

Te Pogai ko Seai ei se Fakamoemoega o Tino e Tokouke

4, 5. Ne a mea ko pokotia ei a tino, kae e ‵saga atu pefea a tino e tokouke ki ei?

⁴ E fakaasi mai i mea ‵tupu i te lalolagi me ko ola nei tatou i taimi o te “gataga o te lalolagi” kae ko pilipili mai eiloa te gataga. Ko fepaki nei a tino mo fakalavelave mo fakanofonofoga kolā ne faipati a Iesu mo ana soko ki ei me ko fakailoga o “aso fakaoti.” “A te kamataga o puapuagā,” e aofia i ei a taua, ogega meakai, mafuie, mo nisi fakalavelave kolā ko pokotia malosi i ei a tino. Ko ‵fonu a koga valevale i amioga ma‵sei, te kaimanako mo faifaiga sē amioatua. Ke oko foki eiloa ki tino kolā e kausaki ke ola e ‵tusa mo tulaga o te Tusi Tapu, e fai a taimi nei mo fai ne “taimi faiga‵ta.”—Mataio 24:3, 6-8, 12; 2 Timoteo 3:1-5.

⁵ Kae, e se iloa ne te tokoukega o tino a te tāua o fakalavelave ‵tupu i te lalolagi. Ona ko te mea tenā, e manava‵se a tino e tokouke ki te lotou ‵lei mo te ‵lei o olotou kāiga. A te galo atu o se tino pele i te mate io me ko nisi fakalavelave totino e fakalogo‵mae i ei a tino e tokouke. E aunoa mo te iloaga tonu e uiga ki pogai e ‵tupu i ei a mea konei mo te faka‵leiga ki ei, e fai ei ke seai eiloa se fakamoemoega mō tino konei.—Efeso 2:12.

6. Kaia e se mafai ei o fesoasoani atu a ‘Papelonia te Sili’ ki ana tino?

⁶ E foliki fua te fakamafanafanaga ne maua ne tino mai i ‘Papelonia te Sili,’ te emupaea o lotu ‵se i te lalolagi kātoa. E ‵kese mai i ei, e auala i “faifaiga sē ‵lei o tena fina lalolagi,” ko faka‵numi ne ia a tino e tokouke i te feitu faka-te-agaga. E se gata i ei, mai te fai pelā me se fafine talitāgata, ko oti ne takitaki ‵se kae pule atu a lotu ‵se ki “tupu o te lalolagi,” e auala i akoakoga ‵loi mo faifaiga faivailakau ke fakatumau aka ei te faka‵logo o tino e tokouke ki olotou pule fakapolitiki e aunoa mo te ‵teke atu. Tela la, ko lasi ‵ki loa te pulega mo te fakamalosiga a lotu ‵se, kae ko ‵teke katoatoa atu foki eiloa a ia i te taimi tenā ki muna‵tonu faka-te-lotu.—Fakaasiga 17:1, 2, 5; 18:23.

7. Se a te fakamoemoega mō te tokoukega o tino, kae ka maua pefea ne nisi tino se fesoasoani?

⁷ Ne akoako atu a Iesu me e faima‵laga atu nei a te tokoukega o tino i te auala lauefa telā e iku atu ki te fakaseaiga. (Mataio 7:13, 14) E olo atu nei a nisi tino i te auala lauefa tenā me ne ‵teke tonu atu latou ki akoakoga i te Tusi Tapu, kae e olo atu a nisi tino e tokouke i ei ona ko te mea ne takitaki‵segina latou, io me ‵nofo atu latou i te pouliga, me ne seki akoako atu ne olotou takitaki lotu a mea kolā e manako tonu a Ieova ke fai ne latou. Kāti ka ‵fuli ne nisi tino olotou olaga māfai ko lavea atu ne latou a pogai faka-te-Tusi Tapu ke fai penā. Kae ko tino kolā e tumau i Papelonia te Sili kae tumau i te ‵teke atu ki fakatakitakiga faka-te-Tusi Tapu, ka sē ‵sao eiloa i ‘te fakalavelave lasi.’—Fakaasiga 7:14.

Ke ‘se Gata’ te Talai Atu

8, 9. Ne ‵saga atu pefea a Kelisiano i te senitenali muamua ki ‵tekemaiga, kae kaia?

⁸ Ne fai mai a Iesu me ka talai atu ne ana soko a te tala ‵lei o te Malo kae fai a soko. (Mataio 28:19, 20) Tela la, e ‵kilo atu a Kelisiano ‵tonu ki te lotou ‵kau atu ki te galuega talai e pelā me se faifaiga o te lotou fakamaoni ki te Atua kae se manakoga tāua ‵ki o te lotou fakatuanaki. Ona ko te mea tenā, ne tumau eiloa a soko o Iesu i aso mua i te talai atu faitalia a ‵tekemaiga. Ne fakalago‵lago latou ki a Ieova ke maua mai i ei te malosi, kae ‵talo atu ko te mea ke mafai o tumau i te “faipati ne [latou tena] muna mo te loto toa.” E ‵tusa mo te mea tenā, ne faka‵fonu ne Ieova latou ki te agaga tapu, kae faipati atu ne latou te muna a te Atua mo te loto toa.—Galuega 4:18, 29, 31.

⁹ I te taimi ne ma‵fuli ei a ‵tekemaiga konā ki faifaiga fakasauā, e mata, ne taofi aka ne soko o Iesu a te talaiatuga o te tala ‵lei? Ikai. Ona ko te lotou ita ki te talaiga a apositolo, ne puke fakapagota ne takitaki lotu o Iutaia a te kau apositolo, fakamatakutaku atu latou, kae ‵kini foki latou. Kae, “e se mafai eiloa o gata te lotou akoako atu kae lauga atu ki tino e uiga ki a Iesu te Keliso.” Ne lavea ‵lei ne latou me “e ‵tau mo [latou] o faka‵logo ki te Atua i lō te faka‵logo ki tino.”—Galuega 5:28, 29, 40-42.

10. Ne a mea faiga‵ta e fepaki mo Kelisiano i aso nei, kae ne a ikuga e mafai o maua mai i olotou amioga ‵lei?

¹⁰ E seki fe‵paki eiloa a te tokoukega o tavini a te Atua i aso nei mo ‵kiniga io me ‵pei ki falepuipui ona ko te lotou galuega talai. Kae, e fe‵paki a Kelisiano ‵tonu katoa mo tofotofoga kese‵kese. Kāti ka fai ne tou loto lagona telā ko oti ne akoako faka‵lei ke tu ‵kese au amioga mai amioga kolā e fia‵fia ki ei te tokoukega o tino. Kāti ka mafau‵fau ou taugasoa, tino kolā e a‵koga tasi mo koe, io me ko ou tuakoi i a koe e fakavalevale ona ko te mea e fakavae au fakaikuga ki fakatakitakiga mai te Tusi Tapu. Kae, e se ‵tau o talia ne koe olotou manatu sē aogā konā ke fakalavelave atu ki a koe. Ko nofo atu te lalolagi tenei i te pouliga faka-te-agaga, kae e ‵tau mo Kelisiano o “maina atu . . . e pelā mo ne fetu.” (Filipi 2:15) Kāti ka lavea kae loto fakafetai a nisi tino loto fakamaoni ki au galuega ‵lei kae iku atu ei ki te avatuga o vikiga ki a Ieova.—Faitau te Mataio 5:16.

11. (a) E ‵saga atu pefea a nisi tino ki te faiga o te galuega talai? (e) Ne a vaegā ‵tekemaiga ne fepaki mo te apositolo ko Paulo, kae ne saga atu pefea a ia ki ei?

¹¹ E manakogina te loto toa ke tumau tatou i te talai atu a te fekau o te Malo. Kāti ka fakatauemu atu io me taumafai a nisi tino, ke oko foki eiloa ki ou kāiga o faka‵tuka koe i nisi auala. (Mataio 10:36) Ne ‵kini fakafia a te apositolo ko Paulo ona ko tena fakamaoni o fai tena galuega talai. Ke mafaufau ki te auala ne saga atu ei a ia ki ‵tekemaiga konā: “E iloa foki ne koutou me ne sōna fai matou, kae muna maseigina foki,” ko ana pati, “ka ko te motou Atua, ne aumai eiloa ne ia te loto malosi o taku atu ki a koutou a te Tala ‵Lei mai i a ia, kae tonu me e tokouke a tino e ‵teke ki a matou.” (1 Tesalonia 2:2) E tonu, e se se mea faigofie ke tumau eiloa a Paulo i te faipati atu e uiga ki te tala ‵lei mai tua o tena pukega o saisai, saesae ona gatu, ‵kini fakamasei, kae ‵pei ki te falepuipui. (Galuega 16:19-24) Ne maua mai fea ne ia te loto toa ke tumau? Mai te lasi o tena manakoga ke fakataunu tena galuega mai te Atua.—1 Kolinito 9:16.

12, 13. Ne a fakalavelave e fe‵paki mo nisi tino, kae ne taumafai pefea o fakafesagai atu latou ki ei?

¹² E mafai foki o faigata ke fakatumau ne tatou te ‵tou loto finafinau i koga talai kolā e faigata o maua atu ne koe a tino i olotou fale, io me ko koga kolā e se fia ‵saga malosi mai ei a tino ki te fekau o te Malo. Ne a mea e mafai o fai ne tatou i vaegā tulaga penei? Kāti ka iloa ne tatou me e ‵tau o momea aka te lasi o te ‵tou loto toa ke fai‵pati atu ki tino i so se taimi. Kāti e ‵tau foki o fai ne tatou ne fakama‵fuliga ki ‵tou fakatokaga io me ‵saga tonu atu tatou o talai i koga kolā e mafai o maua i ei a tino e tokouke.—Fakatusa ki te Ioane 4:7-15; Galuega 16:13; 17:17.

¹³ A nisi fakalavelave kolā e fakafesagai atu ki ei a nisi tino e tokouke ko te tulaga matua mo masaki, kolā e mafai o fakafoliki aka i ei a olotou mea e fai i te galuega talai. Kafai e penā eiloa koe, ke se loto vāivāi koe. E iloa ‵lei ne Ieova ou tapulā kae loto fakafetai ki mea kolā e mafai o fai ne koe. (Faitau te 2 Kolinito 8:12.) Faitalia so se fakalavelave e mafai o fepaki mo koe—‵tekemaiga, te sē fia ‵saga mai o tino, io me ko masaki—ke fai so se mea telā e mafai o fai ne koe ke talai atu te tala ‵lei ki nisi tino.—Faataoto 3:27; fakatusa ki te Maleko 12:41-44.

‘Tumau i te Fai o Tau Galuega’

14. Se a te fakaakoakoga ne tuku mai ne te apositolo ko Paulo mō taina Kelisiano, kae se a te polopolokiga ne tuku mai ne ia?

¹⁴ Ne fakatāua ‵ki ne te apositolo ko Paulo a tena galuega, kae ne fakamalosi atu a ia ki ana soko tali‵tonu ke fai foki penā. (Galuega 20:20, 21; 1 Kolinito 11:1) E aofia i se tokotasi telā ne fakamalosi fakapito atu a Paulo ki ei, ko Akepasi, se Kelisiano i te senitenali muamua. I tena tusi ki tino Kolose, ne tusi atu a Paulo: “Fai atu ki a Akepasi penei, ‘Ke fai ne koe a te galuega telā ne maua ne koe mai i te Aliki.’” (Kolose 4:17) E se iloa ne tatou me ko oi a Akepasi io me ne a ana fakanofonofoga, kae e mautinoa me ne talia ke fai ne ia se galuega. Kafai koe se Kelisiano tukugina atu, ko oti foki ne talia ke fai ne koe se galuega. E mata, e tumau koe i te fakataunuga o te faiga o te galuega tenā?

15. Ne a mea e aofia i te tukuatuga faka-Kelisiano, kae ne a fesili e ‵sae aka i ei?

¹⁵ Mai mua o ‵tou papatisoga, ne tuku atu ne tatou a ‵tou ola ki a Ieova e auala i te ‵talo atu mo te loto kātoa. Ko tena uiga, ne loto fia‵fia tatou o fai tena loto. Tela la, se mea ‵lei ke fesili ifo tatou i te taimi nei ki a tatou eiloa, ‘E mata, a te faiga o te loto o te Atua ko te ‵toe mea tāua eiloa i toku olaga?’ Kāti e isi ne nisi tiute o tatou kolā e fakamoemoe a Ieova ke fai ne tatou—e pelā mo te tausiga o ‵tou kāiga. (1 Timoteo 5:8) Kae e fakaaogā pefea ne tatou a te ukega o ‵tou taimi mo ‵tou malosi? Se a te mea telā e fakatāua ne tatou i ‵tou olaga?—Faitau te 2 Kolinito 5:14, 15.

16, 17. Ne a mea e mafai o fai ne talavou Kelisiano io me ko tino kolā e se uke olotou tiute e ‵tau o ‵saga ki ei?

¹⁶ E mata, a koe se talavou Kelisiano tukugina atu telā ne fatoā oti au akoakoga io me ko pili o palele au akoga? E se taumate, e se uke malosi ou tiute i te kāiga. Tela la, ne a au fuafuaga mō tou olaga? Ne a fakaikuga ka fai i ei ke fakataunu faka‵lei ne koe tau tautoga ke fai te loto o Ieova? Ko oti ne fai ne tino e tokouke olotou fakatokaga ko te mea ke paenia latou, kae ko oti ne tau ne latou a fuataga ‵lei o te fiafia mo te lotomalie ona ko te fai penā.—Salamo 110:3; Failauga 12:1.

¹⁷ Kāti a koe se talavou. E isi sau galuega ‵togi tumau kae e se uke a tiute e ‵tau o saga atu ki ei i tafa o te tausi ifo ki a koe eiloa. E mautinoa eiloa me ne fiafia koe o kau ki fakatokaga katoa a te fakapotopotoga kolā e mafai o kau atu ki ei. E mata, e mafai o fakalasi atu tou fiafia? E mata, ko oti ne mafaufau koe ke tai fakalauefa atu au mea e fai i te galuega talai? (Salamo 34:8; Faataoto 10:22) I nisi koga, e uke a galuega koi ‵tau o fai ke fakaoko atu ei te fekau fakaola tino o te munatonu ki tino katoa. E mata, e mafai o fai ne koe ne fakama‵fuliga ki tou olaga, kāti mai te tavini atu i se koga telā e manakogina i ei a tino talai o te Malo e tokouke?—Faitau te 1 Timoteo 6:6-8.

18. Ne a fakama‵fuliga ne fai ne se tauavaga, kae ne a mea ne iku mai i ei?

¹⁸ Ke mafaufau ki te tala o Kevin mo Elena mai te Iunaite Sitete.a E pelā mo te masani a tino fatoā fakaipoipo i te kogā koga tenā, e mafaufau faeloa me e ‵tau eiloa o ‵togi ne laua se fale. Ne ga‵lue tumau laua i lā galuega ‵togi kae ne maua foki ne laua se olaga gali. Kae, ona ko lā galuega ‵togi mo galuega e fai i te fale, ne seki lasi ei te lā taimi mō te galuega talai. Ne fatoā iloa aka ne laua me toeitiiti ko tuku katoatoa atu ne laua a lā taimi mo lā malosi ki te ‵salaga o lā kope. Kae i te taimi ne lavea ei ne laua te olaga faigofie o se tauavaga paenia fia‵fia, ne fakaiku aka ne Kevin mo Elena ke ‵fuli a mea kolā e ‵tau o fakamuamua ne laua i te lā olaga. Mai tua o te ‵sala atu ki te takitakiga a Ieova e auala i ‵talo, ne ‵togi atu ki tua te lā fale kae olo o ‵nofo i se fale tai foliki ifo. Ne fakamu‵tana ne Elena ana taimi galue i tena galuega ‵togi kae ne fai pelā me se paenia. Mai tala ‵gali a tena avaga e uiga ki tena galuega talai, ne fakamalosi atu ei ki a Kevin ke tiakina tena galuega ‵togi tumau kae ke paenia foki. Fakamuli ifo, ne olo atu laua ki se fenua i Amelika ki Saute o tavini i se koga telā e manakogina malosi i ei a tino talai o te Malo. “Ne fia‵fia faeloa maua i te ma olaga fakatauavaga,” ko pati a Kevin, “kae i te taimi ne gasue‵sue ei maua o fakataunu ma fakamoemoega faka-te-agaga, ne gasolo eiloa o lasi atu te ma fia‵fia.”—Faitau te Mataio 6:19-22.

19, 20. Kaia e fai ei a te talaiatuga o te tala ‵lei mo fai te ‵toe galuega tāua i aso nei?

¹⁹ A te faiga o te galuega talai ko te ‵toe galuega tāua eiloa telā e fai i te lalolagi i aso nei. (Fakaasiga 14:6, 7) E fesoasoani atu eiloa ki te fakamalugāga o te igoa o Ieova. (Mataio 6:9) E fakafeoloolo aka ne te fekau i te Tusi Tapu a ola o te fia afe o tino kolā e talia ne latou i tausaga takitasi, kae e mafai o iku atu a te mea tenei ki te lotou faka‵saoga. Kae, “ka pefea foki la o lagona ne latou manafai e seai se failauga?” ko te fesili a te apositolo ko Paulo. (Loma 10:14, 15) E tonu, i ne? Kaia e se na fakaiku aka ei ke fai ne koe so se mea e mafai o fai ke fakataunu ei tau galuega?

²⁰ A te suā auala telā e mafai o fesoasoani atu ei koe ki tino ke malamalama i te tāua o taimi faiga‵ta konei mo ikuga o olotou filifiliga e fai, ko te momea aka te ‵lei o tou apo i te akoako atu. Ka faipati a te suā mataupu ki te auala ke mafai ei ne koe o fai a te mea tenei.

[Fakamatalaga mai lalo]

Ka Tali Mai Koe Pefea?

• Se a te tiute e maua ne Kelisiano ki luga i tino?

• E ‵tau o fakafesagai atu pefea tatou ki mea kolā e fakalavelave mai ki ‵tou galuega talai?

• E mafai pefea o fakataunu ne tatou te galuega telā ko maua ne tatou?

[Ata i te itulau e 9]

E manakogina te loto toa ke mafai o talai atu faitalia a ‵tekemaiga

[Ata i te itulau e 11]

Ne a au mea e mafai o fai māfai e talai atu koe i koga kolā e faigata o maua a tino i olotou fale?