E ‵Tau mo Faifeau Kelisiano o ‵Talo
1. Se a te mea e manakogina ke fakataunu ei te ‵tou galuega talai?
1 E se mafai eiloa o fakataunu ne tatou te faiga o te galuega talai i a tatou eiloa. E tuku mai ne Ieova te malosi ke fai ne tatou te galuega. (Fili. 4:13) E fakaaoga ne ia ana agelu ke fesoasoani mai ki a tatou i te ‵salaga o tino e pelā me ne mamoe kae faka‵logo. (Faka. 14:6, 7) Ko Ieova eiloa telā e fakaolaola ne ia a fuaga o te munatonu kolā ne ‵toki kae fakasiusiu ne tatou. (1 Koli. 3:6, 9) E pefea te tāua ke fakalagolago eiloa a faifeau Kelisiano ki te ‵tou Tamana faka-te-lagi e auala i te faiga o ‵talo!
2. Ne a nisi mea e mafai o ‵talo atu tatou e uiga ki ei?
2 Mō Tatou: E ‵tau mo tatou o ‵talo i taimi katoa e olo atu ei tatou o talai. (Efe. 6:18) Ne a nisi mea e ‵tau o ‵talo atu e uiga ki ei? E mafai o ‵talo atu tatou ke maua se kilokiloga ‵lei ki te ‵tou koga talai kae ke maua foki te loto toa. (Galu. 4:29) E mafai o fakamolemole atu tatou ki a Ieova ke takitaki ne ia tatou ki tino loto ‵lei taki tokotasi kolā e mafai o sukesuke fakatasi mo tatou ki te Tusi Tapu. Kafai e fesili mai se fesili a te tino i te fale, e mafai o fai fakavave ne tatou se ‵talo toetoe o fakamolemole atu ki a Ieova ke fesoasoani mai ke fai atu ne tatou se tali ‵lei. (Nee. 2:4) E mafai foki o fakamolemole atu tatou ke tuku mai te poto ko te mea ke mafai o fakamuamua faeloa ne tatou a te galuega talai. (Iako. 1:5) E se gata i ei, e fiafia foki a Ieova māfai e fakaasi atu ‵tou loto fakafetai mō te tauliaga ke fai pelā me ne ana faifeau.—Kolose 3:15.
3. E mafai pefea ne ‵talo kolā e fai mō nisi tino o fakalauefa atu a te faiga o te galuega talai?
3 Mō Nisi Tino: E ‵tau foki o ‵talo atu tatou “mō te suā tino,” kae taku atu foki ne tatou olotou igoa māfai e fetaui ‵lei. (Iako. 5:16; Galu. 12:5) E mata, e se uke au mea e fai i te galuega talai ona ko te fakamasakisaki? E mafai ne koe o ‵talo mō nisi taina faifeau kolā e ma‵losi ‵lei. Ke mo a eiloa e manatu māmā koe ki au ‵talo kolā e fai mō nisi tino! E ‵lei foki māfai e ‵talo atu tatou mō pule o malo ko te mea ke talia ne latou te faiga o te galuega talai, ko te mea ke mafai ne ‵tou taina o ola i se “olaga filemu mo te ‵lei.”—1 Timo. 2:1, 2.
4. Kaia e ‵tau ei mo tatou o “‵talo i taimi katoa”?
4 A te folafolaatuga o te tala ‵lei i te lalolagi kātoa se galuega ‵lasi ‵ki. Kafai tatou e “‵talo i taimi katoa,” ka fakataunu eiloa ne tatou a te galuega i te fesoasoani o Ieova.—Loma 12:12.