Ke mo a ma Fakatalave Koe —Mai i te ‵Teke Atu ki te Manatu Māmā ki a Koe Eiloa
1. Kaia e taofi aka ei ne nisi taina a te ofoatuga o se akoga faka-te-Tusi Tapu ki tino?
1 E mata, e taofi aka ne koe a te ofoatuga o se akoga faka-te-Tusi Tapu ona ko te sē lava o te loto talitonu ki tou atamai? I nisi taimi, ne maua foki ne tavini fakamaoni i aso mua, e pelā mo Mose mo Ielemia, a lagonaga me e se lava te lā atamai ke fakataunu lā galuega. (Eso. 3:10, 11; 4:10; Iele. 1:4-6) Tela la, e sē se mea fou a vaegā lagonaga penā. E mafai pefea o ‵teke atu ki ei?
2. Kaia e se ‵tau ei o lotoma‵lie tatou ke lava fua ‵tou taviniga i te galuega talai mai fale ki fale kae tuku atu ki nisi tino ke fai ne latou a akoga faka-te-Tusi Tapu?
2 E ‵tau o masaua ne tatou me e se mafai eiloa o fakamolemole mai a Ieova ke fai ne tatou se mea telā e se mafai ne tatou o fai. (Sala. 103:14) Tela la, a te ‵tou galuega ke ‘fai a tino mo soko,’ “te akoako atu latou,” se mea telā e mafai o fai ne tatou. (Mata. 28:19, 20) A te mea tenei e sē se tauliaga telā e tuku atu fua ne Ieova ki toe tino ata‵mai io me ko toe tino ‵poto i a tatou. (1 Koli. 1:26, 27) Tela la, e se ‵tau mo tatou o lotoma‵lie ke lava fua ‵tou taviniga i te galuega talai mai fale ki fale kae tuku atu ki nisi tino ke fai ne latou a akoga faka-te-Tusi Tapu.
3. E fai pefea ne Ieova ke fetaui ‵lei tatou mō te galuega ko te faiga o akoga faka-te-Tusi Tapu?
3 E Fai Eiloa ne Ieova ke Fetaui ‵Lei Tatou: A te fetaui ‵lei o tatou ke fai a soko ne aumai loa mai i a Ieova. (2 Koli. 3:5) Ko oti eiloa ne akoako mai ne ia e auala i tena fakapotopotoga a muna‵tonu i te Tusi Tapu kolā e se iloa lele eiloa ne toe tino a‵koga ma‵luga i te lalolagi tenei. (1 Koli. 2:7, 8) Ko oti eiloa ne tausi ne ia se fakasologa o auala ne akoako atu ei a te Faiakoga Sili, ko Iesu, ke fakaakoako tatou ki ei, kae e tuku mai faeloa ne ia a akoakoga e auala i te fakapotopotoga. E se gata i ei, ne tuku mai foki ne Ieova a tusi e manakogina ne tatou ke akoako atu ei te Tusi Tapu. Ko oti ne tuku mai ne ia a mea faigaluega, e pelā mo te tusi ko te Akoakoga a te Tusi Tapu, telā e akoako mai ei te munatonu i se auala tonu kae faigofie ke malamalama i ei. A te faiga o se akoga faka-te-Tusi Tapu e mafai o faigofie atu i lō te mea e mafau‵fau tatou ki ei.
4. Kaia e mafai ei o maua ne tatou a te loto talitonu me ka fesoasoani mai a Ieova ki a tatou?
4 Ne mafai o fai ne Mose mo Ielemia lā galuega ona ko te fesoasoani o Ieova. (Eso. 4:11, 12; Iele. 1:7, 8) E mafai foki ne tatou o akai atu ki a Ieova ke fesoasoani mai ki a tatou. A te ‵tonuga loa, kafai ko fai ne tatou se akoga faka-te-Tusi Tapu, ko akoako ne tatou ki se tino a te munatonu e uiga ki a Ieova, telā e fai mo fai se mea fakafiafia ki te Atua. (1 Ioa. 3:22) Tela la, ke na taumafai eiloa koe o kau atu ki te galuega ko te faiga o akoga faka-te-Tusi Tapu, se vaega fakafiafia kae gali o te galuega talai.