E Mafai o Fakaasi Atu a te Loto Fakafetai i te Vaitaimi o te Fakamanatuga

1. Se a te avanoaga fakapito e tuku mai ne te Fakamanatuga?

¹ E tuku mai ne te Fakamanatuga i a Apelila po 14, se avanoaga tu ‵kese ke ati aka kae fakaasi atu a te loto fakafetai ki te ‵lei o Ieova. E fakaasi mai ne te tala i te Luka 17:11-18 a te kilokiloga a Ieova mo Iesu ki te loto fakafetai. Se mea fakafanoanoa, me e tokotasi fua a te tino lepela mai i te toko sefulu ne fakaaoga faka‵lei ne ia te avanoaga ke fakafetai atu. I aso mai mua, a te meaalofa ko te togiola ka faka‵lei katoatoa aka ki ei a fakalavelave katoa, telā ka fakataunu tonu mai i ei a te ola se-gata-mai! E seai se fakalotolotolua, me ka fakafetai atu tatou ki a Ieova i aso katoa mō vaegā fakamanuiaga penā. Kae e mafai pefea o fakaasi atu ne tatou a te loto fakafetai i vaiaso mai mua nei?

2. E mafai pefea o fakamalosi aka ne tatou a te loto fakafetai ki te togiola?

² Ke Ati Aka te Loto Fakafetai: E fakamalosi aka ne mafaufauga a te loto fakafetai. Ke fesoasoani mai i te atiakaga o te loto fakafetai ki te togiola, e mafai o maua atu a te fakasologa o te faitauga fakapito ki te Tusi Tapu mō te Fakamanatuga i koga e uke, e pelā mo te appendix B12 i te New World Translation fou, te kalena, mo te tamā tusi ko te Ke Sukesuke ki te Tusi Tapu i Aso Katoa. Kaia e se mafau‵fau ei ki fakamatalaga konei e pelā me se kāiga? Mai te faiga penā, ka momea aka eiloa ki luga a te ‵tou loto fakafetai ki te togiola. Ka mafai eiloa o momea aka te ‵lei o ‵tou amioga.​—2 Koli. 5:14, 15; 1 Ioa. 4:11.

3. Ne a auala e mafai ei ne tatou o fakaasi atu te ‵tou loto fakafetai i te vaitaimi o te Fakamanatuga?

³ Ke Fakaasi Atu te Loto Fakafetai: E fakamaoni mai i faifaiga a te loto fakafetai. (Kol. 3:15) Ne taumafai a te lepela loto fakafetai o ‵sala atu ki a Iesu ke fakafetai atu ki a ia. E seai foki se fakalotolotolua me ne faipati atu eiloa a ia ki nisi tino mo te loto finafinau e uiga ki tena faka‵leiga fakavavega. (Luka 6:45) E mata, ka fakamalosi aka tatou ne te togiola ke ‵kau atu mo te loto finafinau ki te galuega ko te fakailoaatuga o te Fakamanatuga? A te suā auala ‵lei e fakaasi atu ei te ‵tou loto fakafetai ko te paenia lagolago io me ko te momea aka o ‵tou ‵kau atu ki te galuega talai i te vaitaimi o te Fakamanatuga. I te afiafi po o te Fakamanatuga, e fakamalosi aka tatou ne ‵tou loto fakafetai ke fakatalofa atu ki tino kolā e ‵kau mai kae fakaavanoa foki ne tatou a tatou eiloa ke tali aka olotou fesili.

4. E mafai pefea o fai ne tatou a te Fakamanatuga tenei e aunoa mo te salamō?

⁴ E mata, tenei eiloa te ‵toe Fakamanatuga? (1 Koli. 11:26) E se iloa ne tatou. Kae e iloa ne tatou me kafai ko seke atu te taimi tenā, ka galo atu foki i ei te avanoaga tu ‵kese ke fakaasi atu te loto fakafetai. E mata, ka fakaaoga faka‵lei ne koe te avanoaga tenā? Ke na fakafiafia atu ‵tou pati mo ‵tou mafaufauga ki a Ieova, te Tino kaimalie telā ne fakatoka ne ia te togiola.​—Sala. 19:14.