Ke Momea Aka Faeloa ‵Tou Atamai i te Galuega Talai —Auala ke Tali Atu ki se Tino Kaitaua i te Fale

Te Pogai e Tāua ei: A te tokoukega o tino e fetaui mo tatou i te galuega talai ne tino e ‵gali olotou uiga. Kae ui ei, ne ‵valo mai ne Iesu me ka takalia‵lia mai a tino ki a tatou. (Ioa.17:14) Tela la, e se ‵tau o ‵poi tatou māfai e fetaui tatou mo se tino kaitaua i te fale. Kafai ko fakafesagai tatou mo se tino penei, e ma‵nako eiloa tatou ke tali atu i se auala telā e fakafiafia atu ei ki te tino telā e sui ne tatou, ko Ieova. (Loma 12:17-21; 1 Pe. 3:15) I te faiga tenā, ka fakagata ei ne tatou te fakalavelave. Kae ka tuku atu foki ne tatou se molimau ‵lei ki te tino i te fale penā foki loa mo tino fakalogo‵logo, kae ka fai foki ei ke fia‵fia o faka‵logo mai māfai ko toe āsi atu ki ei a Molimau a Ieova.—2 Koli. 6:3.

Te Auala e Fai i ei:

Ke fakatumau te matafiafia i te auala e fakaasi atu ei ou foliga. I te auala tenei, e fesoasoani atu ei ke faka‵lei ne ia te fakalavelave. Ke mo a e saga atu koe ki faifaiga a te tino i te fale ki a koe. (Fai. 7:9) E mafai o ita latou i nisi taimi ona ko fakalavelave totino io me kāti ne āsi atu koe i se taimi ‵se. Kae e mafai foki loa o sē fiafia a ia ki te ‵tou fekau, ona me ko oti ne fakapouli olotou mafaufau. —2 Koli. 4:4.
Ke tali atu i se leo filemu mo pati ‵tagi gali. (Faata. 15:1) E mata, ne ‵fagu ne koe a ia io me e fakalavelave atu koe ki a ia? E tonu, e se fakatoese atu tatou ona ko ‵tou galuega, kae loto maulalo tatou o fakatoese atu māfai e ‵se te taimi ne olo atu ei tatou. E mata, e kaitaua a ia i se tala sē tonu telā ne logo ei a ia e uiga ki a tatou? Kafai e tenā loa, e mafai o fai atu koe: “E malamalama au i te pogai e kaitaua ei koe. Kae ko te mea tenā ne logo ei koe e uiga ki a matou se tala sē tonu. E mata, e fiafia koe ke fakamatala atu ne au?” E mata, e ‵teke a ia ki se akoakoga a tatou, e pelā mo te tino fakatea io me ko te toto? E mafai o fai atu koe: “Au e malamalama i te pogai e fai ei koe penā. Me e isi foki ne tino ko oti ne fakaasi mai ne latou ne manatu penā. E a, e ‵lei ki a koe ke fakaasi atu ne au te akoakoga fakavae tenā mai i te Tusi Tapu?”
Kafai te tino e kaitaua malosi, e ‵lei atu māfai e fano koe e aunoa mo te ‵toe faipati atu. Kafai e fai atu a ia me sē toe manako a ia ke āsi atu a Molimau a Ieova, e mafai o fai atu koe me ka amanaia tatou ki tena manakoga tenā.

Ke Tofotofo Aka ki te Mea Tenei i te Masina Kātoa:

Ke fai ne fakaakoakoga i taimi o tapuakiga a kāiga.
I taimi ko tiaki ne koulua te fale o te tino kaitaua, ke sau‵tala mo tou soa ki te auala e mafai ei ne koulua o tali atu i se auala tai ‵lei atu.