Ke Tumau te Gasolo ki Mua Pelā me se Tino Talai
1. Ne a fakaakoakoga i te senitenali muamua e fakaasi mai i ei me e ‵tau mo tatou o ga‵solo ki mua e pelā ne tino talai?
1 E ‵tau mo Kelisiano o ga‵solo ki mua pelā me ne tino talai. Tenā te pogai ne fakaakoako faka‵lei ei ne Iesu ana soko i te faiga o te galuega talai. (Luka 9:1-5; 10:1-11) Tenā foki te pogai ne puke ei ne Akuila mo Pisila a Apolo kae “fakamatala faka‵lei atu ki a ia a auala o te Atua.” (Galu.18: 24- 26) Ko te pogai foki loa tenā ne fakamalosi atu ei a Paulo ki te tino talai apo ko Timoteo ke tumau i te fakagalue aka ne ia a akoakoga ko te mea “ke lavea ‵lei ne tino katoa” a tena gasolo ki mua. (1 Timo. 4: 13- 15) Faitalia te leva ne po‵loga ei tatou ki te Aliki e pelā me ne tino talai o te tala ‵lei, e ‵tau eiloa o momea aka faeloa te ‵lei o ‵tou atamai i te talai atu.
2. E mafai pefea o tauloto tatou mai nisi tino?
2 Tauloto Mai Nisi Tino: E tasi te auala e momea aka ei ‵tou atamai ko te tauloto mai nisi tino. (Faata. 27:17) Tela la, saga tonu atu i te taimi e talai atu ei tou soa. Ke ‵sala atu ki ne manatu fesoasoani mai tino talai apo, kae fakalogologo faka‵lei ki te auala e talai ei latou. (Faata. 1:5) E mata, e fakalotolotolua koe ki te faiga o toe āsiga, akoga faka-te-Tusi Tapu, io me ko nisi vaega o te galuega talai? Ke mua o fesili atu koe ki te ovasia o tou potukau talai io me se tino talai apo ke akoako ne ia koe. Ke masaua foki, me e mafai ne te agaga tapu o fakalauefa aka ‵tou atamai, tela la ke ‵talo atu faeloa e uiga ki ei.—Luka 11:13.
3. E ‵tau o pefea ‵tou faifaiga māfai e maua ne tatou a manatu fesoasoani kolā e se ‵loto tatou ki ei?
3 Kafai e maua ne koe ne manatu fesoasoani, ke mo a e kaitaua koe māfai se mea telā e se loto koe ki ei. (Fai. 7:9) E pelā mo Apolo, e ‵tau mo tatou o talia a manatu fesoasoani i te loto maulalo mo te loto fakafetai. I te faiga tenā, e fakaasi atu ei ne tatou a te poto.—Faata. 12:15.
4. Se a te fakamalosiga ne tuku mai ne Iesu ke gasolo ki mua e pelā me se tino talai?
4 ‵Tou Ga‵solo ki Mua e Faka‵malu ei te Atua: E auala i se fakaakoakoga, ne fakamalosi ne Iesu ana soko ke ga‵solo ki mua e pelā me ne tino talai. Ne fakatusa ne ia a ia eiloa ki te vine, kae ko ana soko fakaekegina ki kaulā. Ne fai mai a ia me e faka‵ma ne te Tamana a kaulā takitasi kolā e ‵fua mai “ko te mea ke ‵fua malosi mai.” (Ioa. 15:2) E pelā loa mo te manako malosi te pule o te togavine ko kaulā ke ‵fua malosi mai, e manako foki a Ieova ke momea aka foki ‵tou atamai ke ‵fua mai e auala i “fuataga o ‵tou gutu.” (Epe. 13:15) Ne a ikuga fakafiafia e maua mai i te gasolo ki mua e pelā me se tino talai? E tuku mai ne Iesu te tali: “E faka‵malugina toku Tamana i te mea tenei, māfai e ‵fua malosi mai faeloa koutou.”—Ioa. 15:8.