Te Auala ke Akoako ei a Tino ‵Fou ke Talai

1. E pefea ou lagonaga i te taimi muamua ne fano ei koe i te galuega talai?

¹ E masaua ne koe a te taimi muamua ne fano ei koe i te galuega mai fale ki fale? E se taumate, ne polepole valevale koe. Kafai koe ne ga‵lue fakatasi mo tou faiakoga io me se isi tino talai aka, kāti ne fiafia malosi eiloa koe ki te fesoasoani o te tino tenā. Kae nei la, ko fai nei koe e pelā me se tino talai apo, ko tu koe i se tulaga telā ko mafai ne koe o fesoasoani atu o akoako a tino fou ke talai .

2. Ne a mea e ‵tau o tauloto ne tino talai ‵fou?

² E ‵tau o akoako ki tino talai ‵fou te auala ke kamata ei ne latou a sautalaga mo tino i te fale, te fakaaogaga o te Tusi Tapu i te galuega talai, te faiga o toe asiga, e pelā foki mo te kamataga mo te faiga o akoga faka-te-Tusi Tapu. E ‵tau foki o akoako latou ki te talai atu i auala kese‵kese, e pelā mo te talai atu i auala mo te asi atu ki tino i olotou koga ga‵lue. E mafai o fesoasoani atu koe ke momea aka te lotou apo i feitu konei e auala i tau fakaakoakoga mo ou manatu fesoasoani.

3. E mafai pefea o fesoasoani atu tatou ki nisi tino e auala i ‵tou fakaakoakoga?

³ Akoako Atu e Auala i Tau Fakaakoakoga: Ne fakaasi atu ne Iesu ki ana soko a te auala ke talai atu ei latou. (Luka 8:1; 1 Pe. 2:21) Kafai e fakatoka koe ke ga‵lue mo se tino talai fou, ke fakatoka ne koe se fakamatalaga faigofie telā e mafai o fakaakoako ki ei te tino talai, kāti mai te fakaaogaga o se manatu i loto i ‵tou tusi. Ko ofo atu ei ke fai ne koe te fale muamua io me ko te avā fale muamua ko te mea ke fakalogologo a te tino talai ki au pati e fai atu. Mai mua o oko atu ki te suā fale, e mafai o fesili atu koe ki te tino talai me ne a ana manatu fesoasoani ki tau fakamatalaga. Ka fesoasoani atu a te mea tenei ke lavea ne ia a te tāua o te ga‵lue fakatasi mo nisi tino i te galuega talai kae ka fai ei ke faigofie o talia ne ia a manatu fesoasoani kolā e fai atu ne koe māfai ko oti ne fai tena fakamatalaga i te fale.

4. E mafai pefea o fesoasoani atu tatou ki se tino talai fou māfai ko oti ne fakalogo‵logo tatou ki tena fakamatalaga?

⁴ Tuku Atu a Manatu Fesoasoani: Ne tuku atu foki ne Iesu ki ana soko a fakatonuga e uiga ki te talai atu. (Mata. 10:5-14) E mafai foki o fesoasoani atu koe ki se tino talai fou i se auala tai ‵pau. Kafai ko faipati a ia, ke fakalogologo faka‵lei koe ki ana pati. Kafai ko tiakina ne koulua te fale, ke fakamālō atu ki a ia, faitalia me lavea ne koe me e isi aka foki ne mea kolā koi manakogina ke galue ki ei. Koi tuai o tuku atu ne manatu fesoasoani, kāti e mafai o faka‵tali malie koe ke oti tena suā fale kae ke onoono koe me e mata ko tai lei i te feitu tenā io me ikai. Kāti ne polepole fua a ia i te taimi muamua. Ke masaua la, me e kese‵kese a mea e mafai o fai ne tino talai, kae e uke a nisi auala ke fakatonu aka ei se mea.​—1 Koli. 12:4-7.

5. Ne a pati e mafai o fai atu māfai ko ga‵sue muamua tatou o tuku atu a manatu fesoasoani?

⁵ I nisi taimi, kāti ka fesili mai se tino talai fou ki ne manatu fesoasoani mai i a koe. Kae kafai e se fai penā, ke na gasue muamua koe o fesoasoani atu ki a ia. E mafai pefea o fai a te mea tenei mo te atamai? E fesili atu sāle penei a nisi tino talai apo, “E mafai o fai atu ne au se manatu fesoasoani?” io me, “E a, se a tau faka‵tau ki te mea tenā?” A te suā auala ko te fai atu penei, “I te taimi ne fatoa fai ei au mo fai se tino talai, ne faigata ki a au ke . . . , kae ne fesoasoani mai ki a au a te mea tenei. . . . ” Ko te mea ke mo a ma fakamanavase ne koe a ia, tuku atu a manatu fesoasoani ki se vaega fua e tasi o tena fakamatalaga.

6. E uiga ki te faiga o te galuega talai, i te auala fea e ‘fakamata ei ne te fiti a te fiti’?

⁶ A te Fiti e Fakamata Eiloa ki te Fiti: Ne fakamalosi atu a Paulo ki a Timoteo, se tino talai apo, ko te mea ke tumau faeloa a ia i te akoako mo te gasolo atu ki mua. (1 Timo. 4:13, 15) E tiga eiloa ko fia tausaga ko ‵teka talu mai te taimi muamua ne fano ei koe i te galuega talai, e se ‵tau eiloa o fakagata ne koe au taumafaiga ke momea aka tou apo i te galuega talai. Ke tauloto ne koe a mea e uke mai tino talai kolā e talai fakatasi mo koe, ke oko foki eiloa ki tino kolā e se apo malosi i te galuega talai, kae ke matapulapula ki auala ke fesoasoani atu mo te alofa ki nisi tino, maise eiloa ko tino ‵fou ko te mea ke fai latou e pelā me ne faifeau apo o te tala ‵lei.​—Faata. 27:17.