Fesoasoani Atu ki Tino ‵Kivi ke Iloa ne Latou a Ieova
1. Ne fakaasi atu pefea ne Iesu te atafa ki tino ‵kivi?
1 Ko toe fia fua aso kae mate atu a Iesu. I te taimi ne tiakina ei ne ia te fakai o Ieliko, e tokolua tagata ‵kivi ne ka‵laga atu ki a ia: “Te Aliki. . .ke alofa mai koe ki a māua!” E tiga loa ne ‵mafa te mafaufau o Iesu i mea faiga‵ta kolā ka fe‵paki mo ia, ne tu atu loa a ia, kalaga atu ki tagata konei ke olo atu ki a ia kae faka‵lei ne ia laua. (Mata. 20:29-34) E mafai pefea o fakaakoako atu tatou ki te atafai o Iesu ki tino ‵kivi?
2. E mafai pefea o tuku atu se molimau ki se tino ‵kivi ne fetaui mo tatou i koga kolā e tokouke a tino i ei?
2 Ke Loto Fesoasoani: Kafai e fetaui koe mo se tino ‵kivi, kaati i se koga telā e masani o tokouke a tino i ei, faipati atu ki ei e uiga ki a koe, kae fai atu me mafai ne koe o fesoasoani atu ki a ia. Ona ko te mea e se ti ‵lei sāle a faifaiga e fai ki vaegā tino penei, e mafai eiloa o fakalotolotolua latou i te taimi muamua. Tela la, a te fakaasi atu o te alofa mo te fiafia tonu e mafai ei o maua ne latou se fakatapūga. Ke tuku i ‵tou mafaufau me kese‵kese a tulaga o tino ‵kivi, kae fai ne te mea tenei ke iloa ne tatou me pefea te lasi o te fesoasoani e ‵tau o tuku atu ki a latou. Mai tua o te tukuatuga o se fesoasoani, kaati e mafai o fakaasi atu ne koe me aofia koe i se galuega i te faiga o akoga faka-te-Tusi Tapu. Ke faitau atu se tusi faitau pelā mo te Salamo 146:8 io me ko te Isaia 35:5, 6. Kafai e mafai ne ia o faitau ki tusi mō tino ‵kivi, fesili atu me manako a ia ki ne tusi mō tino ‵kivi kolā e mafai o fesoasoani atu ke tauloto a ia ki mea e uke atu e uiga ki te Tusi Tapu. E mafai foki o fesoasoani atu koe ki a ia ke maua ne ia polokalame fakalogo‵logo mai i te jw.org. Kafai e isi se polokalame faitau i tena komupiuta telā e faitau mai loa ne ia te pati, kaati ka fiafia atu a ia ki tusi i luga i te jw.org fakatasi mo tusi kolā e mafai o ‵kopi mai i te RTF (Rich Text Format).—Ke onoono ki te pokisi “Kafai e Fesoasoani Atu Koe ki se Tino ‵Kivi. . . ”
3. E mafai pefea o ‵sala atu tatou ki tino ‵kivi i ‵tou koga talai?
3 ‵Sala Atu ki Tino ‵Kivi: E faigatā sāle ke fetaui tatou mo tino ‵kivi i te galuega talai mai fale ki fale, ona ko te mea e se ti ma‵nako latou o fai‵pati ki tino fou kolā e olo atu ki olotou fale. Tela la, e manakogina a taumafaiga ke “sala atu” ki tino penā ke mafai o talai atu ki a latou. (Mata. 10:11) E mata, e isi sou taugasoa i te galuega io me i te akoga e ‵kivi? Ke mua koe o faipati ki ei. Kafai e isi se akoga mō tino ‵kivi i te koga talai o koe, ke tuku atu ne tusi mō tino ‵kivi ki te fale tusi a te akoga. E mata, e iloa ne koe se tino telā e isi se tino ‵kivi i tena kāiga? E mata, e isi se fakapotopotoga i tau koga talai tela e tuku atu ne latou a fesoasoani ki tino ‵kivi io me isi ne fale e tausi ei a tino ‵kivi? Ke fakamatala atu ki te kāiga o te tino ‵kivi tenā, te tino galue telā e fesokotaki atu ki nisi tino io me ko te pule o te koga tenā me i Molimau a Ieova e fia‵fia malosi o fesoasoani ki tino ‵kivi, kae ofo ke tuku atu ne tusi mō tino ‵kivi io me ne polokalame fakalogologo. Fakaasi atu foki ki ei me tauto mai te Tusi Tapu me ko pili o fakaseai katoatoa ne te Atua te ‵kivi. E mafai foki o fakaasi atu te vitio ko te “Without It, I Would Feel Lost” i te jw.org, e uiga ki te ‵tala o te tagata ‵kivi telā ne aoga ki a ia te Tusi Tapu mō tino ‵kivi. A te fakamatala faka‵lei atu o te pogai o tau asiga, ka ‵tala mai ei te auala ke mafai o fesokotaki atu koe ki tino ‵kivi taki tokotasi.
4. Se a te akoakoga e maua mai i te ‵tala o Janet?
4 Ne āsi atu se tuagane ‵kivi ko Janet, ki se fale telā e isi ne tino ‵kivi i ei. Ne kamata aka ei ne ia se sau‵talaga mo se talavou fafine. Ne fai atu a Janet ki tou fafine, “Ne faka‵lei ne Iesu a tino ‵kivi ke fakaasi atu ne ia a mea ko pili o fai ne ia ki tino ‵kivi katoa.” Ne onoono fakatasi lāua ki te Fakaasiga 21:3, 4, kae fakamatala atu faka‵lei ne Janet te auala ka fakataunu ei ne te Malo o te Atua a te folafolaga tenei. Ne nofo ‵mu malie te fafine kae fai atu: “E seki lagona aka loa ne au te mea tenei mai i se tino ‵kivi. E tali‵tonu a tino kolā e se ‵kivi, me i tino e ‵kivi ona ko olotou mea ne fai io me ko mea a olotou tupuga ne fai.” Ne meli-iti atu ne Janet ki te fafine tenā a te koga telā e mafai o maua ei ne ia te tusi ko te Akoakoga Mai i te Tusi Tapu, kae nei la ko a‵koga laua ki te Tusi Tapu fakalua taimi i te vaiaso.
5. E tiga loa e se maua ne tatou o faka‵lei a tino ‵kivi e pelā mo Iesu, ne a fakamanuiaga e maua ne tatou mafai e fakaasi atu te fiafia ki tino ‵kivi?
5 E tonu, e se mafai ne tatou o faka‵lei aka a tino ‵kivi e pelā mo te mea ne fai ne Iesu, kae e mafai ne tatou o fesoasoani atu ki a latou katoa kolā ko oti ne faka‵kivi olotou mata ne te atua masei o te lalolagi nei, e aofia ei a tino ‵kivi, ke iloa ne latou te munatonu mai i te muna a te Atua. (2 Koli. 4:4) Ne faka‵lei ne Iesu a tagata tokolua i tafa o Ieliko “ona ko tena alofa” ki a laua. (Mata. 20:34) Kafai e fakaasi atu foki ne tatou te fiafia penā ki tino ‵kivi, e mafai eiloa o fia‵fia tatou ki te tauliaga ke fesoasoani atu ke iloa ne tino a Ieova, ko ia telā ka fakaseai katoatoa ne ia te ‵kivi.