Ke Momea Aka Faeloa ‵Tou Atamai i te Galuega Talai—Ke Fakamasani Faka‵lei a Tino Talai ‵Fou

Te Pogai e Tāua i ei: Ne ‵tau mo soko ‵fou o Iesu o tauloto a “mea katoa” kolā ne fakatonu atu ne ia e aofia i ei a te akoako atu o te munatonu ki nisi tino. (Mata. 28:19, 20) E tokouke a tino ‵fou ko ‵kau atu ki te Akoga mō Tino Talai kae ko oti foki ne talai atu i taimi seki fuafuagina ki olotou kāiga mo taugasoa. I te taimi e gasolo aka ei o loto fakafetai latou ki mea ne tauloto mo te iloaga me e manako a Ieova ke lagona ne tino katoa a te tala ‵lei, e fai ei ke momea aka te lotou ma‵nako o fai te galuega talai. (Loma 10:13, 14) Kafai ko oti ne talia a tino ‵fou ke fai mo tino talai seki papatiso, ka fesoasoani malosi atu ki a latou a polokalame fakamasani i te faiga o te galuega talai ke momea aka te lotou loto tali‵tonu i te taimi e gasolo aka ei latou ki mua i te feitu faka-te-agaga.—Luka 6:40.