Ke Tauloto Mai Tino Talai Apo

E fakatāua tonu eiloa ne tatou a tino talai apo i loto i ‵tou fakapotopotoga. E isi ne nisi o latou ne tavini fakamaoni atu ki a Ieova i se fia o tausaga. Kae ko nisi tino ko lasi atu nei te atamai i te galuega talai fakamuli nei. Ko oti ne lavea faka‵lei atu ne tino talai konei a te takitakiga ne Iesu te fakapotopotoga Kelisiano e auala i te fakalauefaatuga o te galuega talai mo te faiga o soko. (Mata. 28:19, 20) I te faiga ne latou o te galuga talai tenei, ne maua eiloa ne latou te “malosi telā e sili atu i te malosi masani” i taimi e fe‵paki ei latou mo mea faiga‵ta mo fakalavelave. (2 Koli. 4:7) E uke ‵ki a mea e mafai o tauloto ne tatou mai tino talai apo konei. E fiafia ‵ki eiloa māfai e maua ne latou ne avanoaga ke akoako atu ki nisi tino a mea kolā ne tauloto ne latou. (Sala. 71:18) Tela la, e ‵tau eiloa mo tatou o ‵sala ki ne avanoaga ke tauloto mai i a latou. E mafai pefea o fai ne tatou te mea tenei?

I te Galuega Talai. Ke magoi te faiga o te galuega talai, e manakogina ke akoako a tino talai ‵fou mo latou kolā seki apo malosi. A te auala magoi e tasi ko te tauloto ki te auala e fai ei ne tino talai apo a te galuega talai. (Ke onoono ki te mataupu i te Faleleoleo Maluga o Fepuali 15, 2015, “Fakatumau Tou Loto Finafinau mō te Galuega Talai,” i te tolu o palakalafa mai lalo i te ulutala ko te “Fesoasoani Atu ki Tino Talai ‵Fou.”) Ne a mea aoga e maua ne koe mai te ga‵lue fakatasi mo tino talai apo i te galuega talai?

E mata, e mafai ne koe o ‵kami atu se tino talai apo ke ga‵lue fakatasi mo koe i te galuega talai? Kafai e masaki a te tino talai apo, e mafai o fakatoka ke olo atu koe mo tau akoga faka-te-Tusi Tapu ke fai te akoga i tena fale. Kafai ko oti te akoga, e mafai o fakamolemole atu koe ki ne pati fesoasoani mai i te tino talai apo.

Fakamāumāu Fakatasi a Taimi mo Latou: Ke fakamāumāu fakatasi a taimi mo tino talai apo ko te mea ke iloa faka‵lei ne koe latou. E mafai o ‵kami mai se tokotasi o latou ki te otou tapuakiga a kāiga i afiafi kae ke fakasau‵tala aka. Kafai a te tino talai apo e masaki, e mata, e mafai o fai a fakatokaga ke fai a te tapuakiga a kāiga i tena fale? Fesili atu me ne maua pefea ne ia te munatonu. Ne a fakamanuiaga ne maua ne ia? I feitu fea ne lavea atu ne iate gasolo ki mua o te fakapotopotoga? Ne a mea fakafia‵fia ne maua ne ia i tena taviniga ki a Ieova?

Ke loto malamalama kae ke paleni ‵lei i ‵tou kilokiloga. E pelā mo tatou, e aofia i ei a tino talai leva, e kese‵kese a meaalofa e mafai o fakagalue ne tatou i te galuega talai. (Loma 12:6-8) E isi ne tino ko ma‵tua ‵ki kae ko se mafai foki o uke a taimi e mafai o fakamaumau fakatasi mo tatou. Kae tiga te feitu tenā, e uke ‵ki eiloa a mea e mafai o tauloto ne tatou mai i te lotou taviniga mo te fakamaoni ki a Ieova.