Fakatalofa Faka‵lei Atu ki ‵Tou Mālō

I a Mati po 23, e fakamoe‵moe loa me ka nofo loa ki te toko 12 miliona io me e sili atu o tino asiasi ka ‵kau mai ki te Fakamanatuga e pelā me ko ‵tou mālō. Ko se faka‵tau eiloa te lasi o te molimau ka maua ne latou i te taimi e fakamatala mai ei ne te failauga a te meaalofa a Ieova ko te togiola mo nisi fakamanuiaga i aso mai mua kolā ka maua ne tino! (Isa 11:6-9; 35:5, 6; 65:21-23; Ioa 3:16) Kae ko te failauga e se ko te tino fua e tokotasi ka tuku atu ne ia se molimau i te taimi fakapito tenei. E mafai foki ne tatou katoa o aofia i te tukuatuga o se molimau mai te fakatalofa faka‵lei atu ki ‵tou mālō. (Lo 15:7) Konei a nisi manatu fesoasoani.

• I lō te fanatu ki tou nofoga kae faka‵tali ke kamata te polokalame, ke fakatalofa, fakamisikata kae mata fiafia ki tino ‵fou mo tino kolā ko ‵mate i te feitu faka-te-agaga

• E tiga eiloa e saga fakapito atu koe ki taugasoa kolā ne ‵kami mai ne koe, ke matapulapula ki nisi tino kolā e ‵kau mai ona ko te galuega ki te ‵kamiga o tino. ‵Kami atu a tino ‵fou ke saga‵saga fakatasi mo koe. Fakaaoga tasi ne koutou tau Tusi Tapu mo te tusi pese

• Mai tua o te lāuga, taumafai ke avanoa koe o tali a fesili. Kafai e se lava te taimi ona ko tau fakapotopotoga e ‵tau o olo vave atu keatea ko te mea ke fakaavanoa mō te suā fakapotopotoga, fai a fakatokaga ke asi atu ki te tino mai tua o nai aso. Kafai e se iloa ne koe te auala ke fesokotaki atu ki a ia, e mafai ne koe o fai atu: “E fia iloa ne au me ne a ou mafaufauga e uiga ki te polokalame. E a, e isi se auala e mafai o fesokotaki atu au ki a koe?”