Te Auala e Fakaasi Mai ne te ‵Tou Mafuaga Ana Tautoga A‵lofa

Talu mai te faitega o tino, ne fesokotaki faeloa te ‵tou Mafuaga mo tino e auala i agelu mo pelofeta. E se gata i ei, ne manako a ia ke fakamau ki lalo a tena fekau mo ana fakamanuiaga. A tautoga konei mai te Atua, ka aoga eiloa ki tou olaga. Tela la, e maua ne koe mai fea a tautoga a te Atua i aso nei?

E maua ne tatou te fekau a te Atua i te Tusi Tapu. (2 Timoteo 3:16) Ne fakaaoga pefea ne te Atua a pelofeta ke tusi ki lalo a tena fekau? (2 Petelu 1:21) Ne faulu atu ne te Atua ki mafaufau o tino tusitala konei a ana mafaufauga, kae ke tusi ne latou ki lalo. E tai ‵pau loa mo aso nei. Kafai e fakaaoga ne se tagata faipisinisi se failautusi ke tusi se fekau a ia, e iloa ne tatou me i te fekau tenā i a te tagata faipisinisi. E penā foki loa te Atua, e tiga loa ne fakaaoga ne ia a tāgata ke tusi tena fekau, kae ko ia loa te Tino ne māfua mai i ei a Tusitusiga Tapu konā.

KO SALALAU A TE MUNA A TE ATUA

E tāua ‵ki te fekau a Atua me e manako a ia ko tino katoa ke fai‵tau kae ke malamalama i ei. I aso nei, ko salalau atu eiloa tena “tala ‵lei se-gata-mai” ki “atufenua mo matakāiga mo ‵gana.” (Fakaasiga 14:6) Mai te fakamanuiaga a te Atua, ko avanoa nei a te Tusi Tapu kātoa io me se vaega o ia i ‵gana e sili atu mo te 3,000, e uke fakafia atu i lō so se tusi ne ‵lomi i te lalolagi nei.