Te Auala ke Kamata a Sau‵talaga ki Tamā Pepa

Talu mai i a Ianuali 2018, ne ‵sae mai sāle a manatu fesoasoani mō sau‵talaga i te ‵kava o te Tusi mō Fakatasiga ko te ‵Tou Olaga Kelisiano mo te Galuega Talai. Ne fakamalosi mai ki a tatou ke ‵saga tonu atu o sau‵tala mo tino kae ke se tuku atu fua a tusi ki a latou. Ko te mea ke fesoasoani atu ki tino talai ke fakamafuli‵fuli olotou pati fakatomua, a vitio o manatu fesoasoani mō sau‵talaga e fakaasi mai ei a auala ke kamata a sau‵talaga mai te fakaaogaga o te Tusi Tapu. E mata, e fakauiga i ei me ko se mafai o fakaaoga ne tatou a tusi i te ‵tou galuega talai mai fale ki fale? E sē penā loa! E pelā me se fakaakoakoga, a te fakaaogaga o tamā pepa se auala magoi ke kamata ki ei a sau‵talaga. E mafai o fakaaoga ne tatou te auala tenei i te fakaaogaga o tamā pepa:

1. Ke ‵sili atu te fesili mo tali i te ‵kava o te tamā pepa.

2. Ko fakaasi atu ei te tali mai te Tusi Tapu i te vaega ki luga o te itulau e lua. Kafai e lava te taimi, ke fai‵tau kae sau‵tala ki nisi fakamatalaga i loto i te tamā pepa.

3. Tuku atu te tamā pepa ki te tino i te fale, kae fakamalosi atu ki ei ke faitau ki vaega katoa i ei i te taimi e avanoa kae ‵lei ki a ia.

4. Koi tuai o fakaoti, ke fakaasi atu te vaega tenei “Se Fesili ke Mafau‵fau ki ei” kae fai se fakatokaga ke sau‵tala ki te tali mai loto i te Tusi Tapu i te suā taimi.

Kafai e toe āsi atu ki ei, ke sau‵tala ki te tali kae toe tuku atu se suā fesili ke toe sau‵tala ki ei i te suā taimi. E mafai o filifili aka ne koe se fesili mai te ‵tou fakatuatusi i te itaneti io me mai te tusi telā e fakaasi mai tua o te tamā pepa tenā. Kafai e ‵lei, ke fakaasi atu te polosiua ko te ‵Tala ‵Lei Mai te Atua! io me suā tusi aka mo fai a akoga mai te ‵tou Pusa o Mea Faigaluega mo Fai Akoakoga.