“Fai ke se Fakalotolotolua Toku Loto ko te Mea ke Mataku Au ki Tou Igoa”

1. Se a te mataku ki te Atua, kae kaia e tāua ei te mea tenā ki tino kolā e a‵lofa ki a Ieova?

A KELISIANO e a‵lofa ki te Atua, kae e ma‵taku foki latou ki a ia. E mafau‵fau a nisi tino me e se fetaui te avā mea konei. Kae e se fakauiga loa tatou ki te vaegā mataku telā e fai ne ia koe ke polepole i te mataku. Ka sau‵tala loa tatou ki se vaegā mataku telā e tu ‵kese. A tino kolā e isi i a latou te mataku tenei e āva malosi latou ki te Atua. E se ma‵nako latou o fakafanoanoa te lotou Tamana faka-te-lagi me e se ma‵nako latou o fakamasei te lotou va fakataugasoa mo ia.—Sala. 111:10; Faata. 8:13.

2. E ‵tusa mo pati a te tupu ko Tavita i te Salamo 86:11, ne a mea e lua ka sau‵tala tatou ki ei?

² Faitau te Salamo 86:11. Kafai e mafaufau koe ki pati konā, e mafai o iloa ne koe me ne malamalama te tupu fakamaoni ko Tavita i te tāua o te mataku ki te Atua. Ke mafau‵fau tatou ki auala e mafai o fakagalue ne tatou a pati fakaosofia a Tavita. Muamua la, ka onoono tatou ki nisi pogai e ‵tau ei o āva malosi tatou ki te igoa o te Atua. Te lua, ka sau‵tala tatou ki te auala ke fakaasi atu me āva malosi tatou ki te igoa o te Atua i ‵tou olaga i aso takitasi.

KAIA E ‵TAU EI O ĀVA MALOSI TATOU KI TE IGOA O IEOVA?

3. Se a te mea ne tupu telā ne fesoasoani atu ki a Mose ke āva malosi ki te igoa o te Atua?

³ Mafaufau ki lagonaga o Mose i te taimi ne moe fakapikipiki ei a ia i loto i se pūga o se kaupapa kae lavea ne ia se fakaasiga o te ‵malu o Ieova e fakaseke i ana tafa. E se taumate tenei eiloa te ‵toe mea fakaofoofogia ne lavea ne se tagata mai mua o vau a Iesu Keliso ki te lalolagi. Konei a pati ne lagona ne Mose e fai atu ne se agelu: “Ieova, Ieova, te Atua alofa fakamagalo kae alofa atafai, e tuai o ita kae ‵fonu i te alofa fakamaoni mo te munatonu, e fakaasi ne ia te alofa fakamaoni ki te fia afe o tino, kae fakamagalo ne ia a mea ‵se mo amioga solitulafono mo agasala.” (Eso. 33:17-23; 34:5-7) Kāti ne masaua faeloa ne Mose a te mea tenā ne tupu māfai e fakaaoga ne ia te igoa o Ieova. E se tioa eiloa o fai fakamuli atu a Mose ki tino o te Atua, telā ko tino Isalaelu, ke ‘ma‵taku ki te igoa ‵malu kae fakaofoofogia tenei.’—Teu. 28:58.

4. Ne a uiga kolā ka mafai o fai ei ke āva malosi tatou ki a Ieova māfai e mafaufau ‵loto tatou ki ei?

⁴ Kafai e mafau‵fau tatou ki te igoa Ieova, se mea ‵lei foki ke mafau‵fau ‵loto tatou ki te tino i o ia te igoa tenā. E ‵tau o masaua ne tatou ana uiga, e pelā mo tena malosi, tena poto, tena fai mea tonu, mo tena alofa. A te mafaufau ‵loto ki uiga konā mo ana nisi uiga aka ka fai ei ke āva malosi tatou ki a ia.—Sala. 77:11-15.

5-6. (a) Se a te uiga o te igoa o te Atua? (e) E ‵tusa mo te Esoto 3:13, 14 mo te Isaia 64:8, i auala fea e fai ei ne Ieova ke taunu so se mea?

⁵ Ne a ‵tou mea e iloa e uiga ki te uiga o te igoa o te Atua? E lotoma‵lie a tino ‵poto e tokouke me kāti tenei te uiga o te igoa ko Ieova “E Fai ne Ia so se Mea.” E fakamasaua mai ei ki a tatou me seai se mea e mafai o taofi ne ia te faiga o te loto o Ieova, kae e fakataunu ne ia so se mea. E pefea la?

⁶ E mafai ne Ieova o fakataunu a mea me fai a ia mo fai so se mea e manakogina ke fakataunu ei tena fuafuaga. (Faitau te Esoto 3:13, 14.) Ko oti ne fakamalosi mai ki a tatou ke taumafai o mafaufau ‵loto faeloa ki te uiga fakaofoofogia tenā o te Atua. E mafai foki o fai ne Ieova ana tavini sē ‵lei katoatoa ke fai ne latou so se mea e manakogina ke tavini atu ki a ia kae ke fakataunu tena fuafuaga. (Faitau te Isaia 64:8.) Konā a auala e fai ei ne Ieova ke fakataunu te faiga o tena loto. E seai se mea e mafai o taofi aka ei a ia mai te fakataunuga o tena fuafuaga.—Isa. 46:10, 11.

7. E ati aka pefea ne tatou te lasi o te ‵tou loto fakafetai ki te ‵tou Tamana faka-te-lagi?

⁷ E mafai o ati aka ne tatou te lasi o te ‵tou loto fakafetai ki ‵tou Tamana faka-te-lagi māfai e mafaufau ‵loto tatou ki ana mea ne fai mo mea ne mafai o fai ne tatou ona ko ia. Pelā mo se mea e tasi, kafai e mafaufau ‵loto tatou ki mea katoa ne faite ne ia, e ofo eiloa tatou i mea katoa kolā ko oti ne fai ne Ieova. (Sala. 8:3, 4) Kae kafai e mafaufau ‵loto tatou ki te auala ne fesoasoani mai a Ieova ke fai ne tatou a tena loto, ka fai ei ke āva malosi tatou ki a ia. A te igoa ko Ieova se igoa fakaofoofogia ‵ki eiloa! E fakamatala mai i ei a mea katoa e uiga ki te ‵tou Tamana, mea katoa ko oti ne fai ne ia, mo mea katoa kolā ka fai ne ia.—Sala. 89:7, 8.

“KA FOLAFOLA ATU NE AU TE IGOA O IEOVA”

8. Se a te mea e fakaasi mai i te Teutelonome 32:2, 3 e uiga ki te kilokiloga a Ieova ki tena igoa?

⁸ Mai mua malie eiloa o ulu atu te kau Isalaelu ki loto i te Fenua o te Folafolaga, ne akoako ne Ieova a Mose ki pati o se pese. (Teu. 31:19) Ne ‵tau mo Mose o akoako ne ia te pese tenā ki tino. (Faitau te Teutelonome 32:2, 3.) Kafai e mafaufau ‵loto tatou ki te fuaiupu e 2 mo te 3, e manino ‵lei me e se manako a Ieova ke ‵funa aka a tena igoa, io me ‵kilo ki ei pelā me ko tō ‵malu ke fakaleo aka. E manako a ia ke iloa ne tino katoa a tena igoa! Se tauliaga gali eiloa ki tino ke fakalogo‵logo ki a Mose e akoako ne ia latou ki mea e uiga ki a Ieova mo Tena igoa ‵malu! A mea kolā ne akoako atu ne Mose ne fai pelā me ne fakamalosiga ki a latou, e pelā eiloa mo se vaiua e motimoti ki luga i lakau. E fakamautinoa aka pefea ne tatou me e akoako atu tatou i se auala tai ‵pau?

9. E mafai pefea o fesoasoani tatou ki te fakama‵luga o te igoa o Ieova?

⁹ Kafai e olo atu tatou i te galuega talai mai fale ki fale io me talai i koga e tokouke a tino i ei, e mafai o fakaaoga ne tatou a te ‵tou Tusi Tapu ke fakaasi atu ki tino a te igoa totino o te Atua, telā ko Ieova. E mafai o tuku atu ki a latou a tusi mo ata vitio ‵gali, mo tusi mai ‵tou fakatuatusi i te itaneti kolā e faka‵malu ei a Ieova. E mafai o maua ne tatou i te galuega, i te akoga, io me i taimi e faima‵laga ei a avanoaga ke fai‵pati e uiga ki te ‵tou Atua pele mo mea e uiga ki a ia. Kafai e fakailoa ne tatou ki tino e fetaui tatou a mea e uiga ki te fuafuaga alofa a Ieova mō tino mo te lalolagi, ko fai ne tatou ke ‵kese te lotou kilokiloga e uiga ki a Ieova, se kilokiloga telā e fou ‵ki ki a latou. Kafai e fakailoa ne tatou ki tino a te munatonu e uiga ki te ‵tou Tamana alofa, ko fesoasoani atu tatou ki te fakama‵luga o te igoa o te Atua. Ko fakaasi faka‵sau atu i ei ne tatou ki tino me ne akoakogina latou ki loi mo fakamaseiga e uiga ki a Ieova. A akoakoga e fai ne tatou ki tino ko toe akoakoga fakamalosi loto eiloa.—Isa. 65:13, 14.

10. Kafai e fai ne tatou a akoga faka-te-Tusi Tapu, kaia e ‵tau o uke atu ‵tou mea e ‵tau o fai i tafa o te akoako atu fua a tulafono amio‵tonu a te Atua?

¹⁰ Kafai e fai ne tatou a akoga faka-te-Tusi Tapu, e ma‵nako tatou o fesoasoani ki ‵tou tino a‵koga ke iloa ne latou te igoa o Ieova kae ke fakaaoga foki ne latou. E se gata i ei, e fia fesoasoani foki tatou ke iloa faka‵lei ne latou te uiga o tena igoa. E mata, ka fai ne tatou te mea tenā māfai e akoako ne tatou ki a latou a fakatonuga, tulaga o te Atua, mo tulafono ki mea tau amioga? A te tamaliki akoga ‵lei e mafai o tauloto ne ia a tulafono a te Atua, kae fiafia ki ei. Kae e mata, ka fakalogo te tino akoga ki a Ieova me alofa a ia ki a Ieova? Masaua la me ne iloa ne Eva te tulafono a te Atua, kae ne seki alofa tonu tou fafine ki te Tino ne māfua mai i ei te tulafono tenā; kae penā foki a Atamu. (Kene. 3:1-6) Tela la, e uke atu a mea e ‵tau o fai ne tatou i tafa o te akoako atu fua ki nisi tino e uiga ki tulafono amio‵tonu a te Atua.

11. Kafai e akoako ne tatou a mea e uiga ki tulafono mo tulaga o te Atua, e mafai pefea o fesoasoani tatou ki ‵tou tino a‵koga ke a‵lofa ki te Tino ne māfua mai i ei a tulafono konā?

¹¹ A tulaga o Ieova mo ana tulafono e ‵gali kae aoga ki a tatou. (Sala. 119:97, 111, 112) Kae e mafai o se lavea ne ‵tou tino a‵koga te mea tenā seiloga ke malamalama latou me ne fai ne Ieova a tulafono konā ona ko tena alofa ki a tatou. Tela la, e mafai o fesili atu tatou ki ‵tou tino a‵koga: “Se a tau faka‵tau kaia ne fai atu ei a te Atua ki ana tavini ke fai te mea tenei io me ke kalo kea‵tea mai te faiga o te mea tenei? Se a te mea e fakaasi mai i ei ki a tatou e uiga ki a Ieova?” Kafai e fesoasoani tatou ki ‵tou tino a‵koga ke mafaufau ki mea e uiga ki a Ieova kae ke ati aka te alofa tonu ki tena igoa ‵malu, ka mafai eiloa o ‵goto tonu a mea konā ki olotou loto. Ka se fia‵fia fua a ‵tou tino a‵koga ki tulafono kae ka a‵lofa foki latou ki te Tino ne māfua mai i ei a tulafono konā. (Sala. 119:68) Ka gasolo aka o lasi te lotou fakatuanaki kae maua ne latou te fesoasoani e manakogina ke manumalo i tofotofoga faiga‵ta kolā ka fe‵paki mo latou i aso mai mua.—1 Koli. 3:12-15.

“KA SA‵SALE TATOU I TE IGOA O IEOVA”

12. Ne fakatamala pefea a Tavita i se taimi e tasi o fai ke mo a ma vaelua tena loto, kae ne a mea ne iku mai i ei?

¹² E tāua ‵ki te tugapati tenei i te Salamo 86:11 “fai ke se fakalotolotolua toku loto.” Ne fakaosofia te Tupu ko Tavita ke tusi ne ia a pati konā. Ne lavea ne ia i tena olaga a te faigofie ke vaelua a te loto o se tino. I se taimi e tasi, ne lavea ne ia mai te tuafale o tena fale a te avaga a te suā tagata e koukou. I te taimi eiloa tenā ne vaelua i ei te loto o Tavita. Ne iloa ‵lei ne ia te tulafono a Ieova: “E se ‵tau mo koe o manako ki te avaga a tou tuakoi.” (Eso. 20:17) Kae ne tumau loa a ia i te kilokilo atu ki ei. Ne vaelua tena loto, ne manako a ia ki te fafine tenei ko Patisepa, kae ne manako foki a ia o fakafiafia a Ieova. Faitalia me ne alofa kae mataku a Tavita ki a Ieova i se taimi leva ‵ki, kae ne takavale a ia i tena manakoga kaimanako tenei. I te taimi eiloa tenā, ne fai ne Tavita se mea matagā. Ne fakamasiasi ne ia te igoa o Ieova. Ne aumai foki ne Tavita a mea fakalogo‵mae ki tino ‵lei, e aofia ei a tino o tena kāiga.—2 Samu. 11:1-5, 14-17; 12:7-12.

13. E iloa pefea ne tatou me ne mafai o toe katoatoa te loto o Tavita?

¹³ Ne polopoloki ne Ieova a Tavita, kae ne toe maua ne ia se fesokotakiga ‵lei mo Ieova. (2 Samu. 12:13; Sala. 51:2-4, 17) Ne masaua ne Tavita a fakalavelave mo mea fakalogo‵mae kolā ne iku mai i te taimi ne talia ne ia ke vaelua tena loto. E mafai foki o ‵fuli penei ana pati i te Salamo 86:11: “Tuku mai ki a au se loto telā e se mafai o vaelua.” E mata, ne fesoasoani atu a Ieova ki a Tavita ke fai tena loto ke katoatoa, io me ke mo a ma vaelua? Ao, me fakamuli ifo ne fakasino atu te Muna a Ieova me i a Tavita se tagata telā e “katoatoa tena loto ki a Ieova tena Atua.”—1 Tupu 11:4; 15:3.

14. Se a te fesili e ‵tau o ‵sili ifo ne tatou, kae kaia?

¹⁴ A te tala o Tavita se fakamalosiga kae se fakaakoakoga foki mō tatou. A te agasala matagā ne fai ne ia se mea e ‵tau o fakaeteete i ei a tavini a te Atua i aso nei. Faitalia me ne fatoa kamata tatou o tavini ki a Ieova io me ko leva ne fai penā i tausaga e uke, e ‵tau eiloa o fesili ifo tatou, ‘E mata, e ‵teke atu au ki taumafaiga a Satani ke vaelua ne ia toku loto?’

15. E mafai pefea ne te mataku ki te Atua o puipui tatou mai ata kolā e fakamalosi aka i ei a manakoga fakatauavaga sē ‵tau?

¹⁵ E pelā me se fakaakoakoga, kafai e lavea ne koe se ata i te TV io me i te Itaneti telā e fakamalosi aka i ei a manakoga fakatauavaga sē ‵tau, ne a au mea ka fai? Se mea faigofie fua ke mafaufau ifo me i te ata tenā e sē se ata masei. Kae e mata, e se ko taumafaiga a Satani konā ke fai ei ke vaelua tou loto? (2 Koli. 2:11) Te ata tenā e fai pelā me se takū e fakaaoga ne se tagata ke vaelua ki ei se potulakau lasi. Muamua la, e taumafai a ia ke ulu te mata ‵kai o te takū tenā ki loto i te potulakau lasi. Kae i te taimi e taumafai a ia o ‵tuki te feitu manifi o te takū tenā ke ulu ki loto, ko te potulakau lasi loa ko vaelua. E mata, a ata kolā e ‵sae mai i te TV io me i te Itaneti e mafai o fai pelā mo te feitu manifi o te takū tenā? A te mea telā e foliga mai me foliki kae e se masei e mafai o ‵taki fakavave ne ia se tino ke fai a agasala kolā ka vaelua i ei tena loto kae ofa ne ia tena fakamaoni. Tela la, ke mo a eiloa ma talia so se mea sē ‵lei ke ulu ki loto i tou loto! Fai ke mo a eiloa e fakalotolotolua tou loto ko te mea ke mataku ki te igoa o Ieova!

16. Kafai ko fepaki mo tofotofoga, ne a fesili e ‵tau o fesili ifo ne tatou eiloa?

¹⁶ I tafa o ata sē ‵lei, e fakaaoga ne Satani a nisi mea e uke atu ke tofotofo ei tatou ke fai a mea ma‵sei. Ka ‵saga atu pefea tatou ki ei? E faigofie fua ke mafau‵fau tatou me e se ma‵sei a mea konei. E pelā me se fakaakoakoga, e mafai o fai aka tatou: ‘Au e se mafai o fakatea māfai e fai ne au te mea tenei, tela la, kāti e se masei ‵ki.’ A fakamasakoga penā e ‵se ‵ki. Se mea ‵lei ke fesili ifo tatou penei: ‘E mata, e fakaaoga ne Satani te tofotofoga tenei ke vaelua ne ia toku loto? Kafai e talia ne au a manakoga sē ‵lei, e mata, ka fakamasiasi i ei ne au te igoa o Ieova? E mata, a te mea ka fai ne au ka fai ei ke pili malosi au ki toku Atua, io me faka‵mao ne ia au mai i a ia?’ Ke mafaufau ‵loto ki vaegā fesili penā. ‵Talo ke maua te poto ke tali aka a fesili konā mo te fakamaoni. (Iako. 1:5) A te faiga tenā e fai pelā me se puipuiga tonu eiloa. E mafai o fesoasoani atu ki a koe ke ‵teke atu a tofotofoga, pelā mo te mea ne fai ne Iesu i te faiatuga penei: “Fano kea‵tea e Satani!”—Mata. 4:10.

17. Kaia e se ‵lei ei māfai ko vaelua te loto? Fakamatala mai.

¹⁷ E sē se mea ‵lei māfai ko vaelua te loto. Fakaataata i tou mafaufau se tīmu tafao telā e se loto tasi a tino ta‵fao i ei. Nisi tino e ma‵nako ke maua ne latou a tavaega, a nisi tino e se tau‵tali ki tulafono, kae ko nisi tino e ‵kilo fatauva ki te lotou tino fakatonutonu. E se mafai o sili se vaegā tīmu penā i se tafaoga. Kae ko te tīmu telā e loto tasi a tino i ei ka manuia eiloa. E mafai o fai tou loto pelā mo te tīmu manuia tenā, māfai ou mafaufauga, ou manakoga, mo ou lagonaga e tuku katoatoa ki te taviniga a Ieova. Masaua, e manako a Satani ke vaelua ne ia tou loto. E manako a ia ko ou mafaufauga, ou manakoga, mo ou lagonaga ke ‵teke atu ki tulaga o Ieova. Kae e ‵tau mo koe o fai ke katoatoa tou loto ke tavini atu ki a Ieova. (Mata. 22:36-38) Ke mo a loa ma talia ne koe ke vaelua ne Satani a tou loto!

18. E ‵tusa mo pati i te Mika 4:5, se a te mea ka fakaiku aka ne koe ke fai?

¹⁸ ‵Talo ki a Ieova e pelā mo Tavita: “Fai ke se fakalotolotolua toku loto ko te mea ke mataku au ki tou igoa.” Taumafai ke ola koe e ‵tusa mo tau ‵talo. I aso takitasi, ke fakamautinoa me i fakaikuga e fai ne koe, mai mea fo‵liki ke oko ki mea ‵lasi, e fakaasi atu i ei me e faka‵malu ne koe te igoa tapu o Ieova. Mai te fai penā, ka tuku atu eiloa ne koe, e pelā me se Molimau a Ieova, se ata ‵lei ki te igoa tenā. (Faata. 27:11) Kae ka mafai o fai atu ne tatou katoa a pati foki ne fai atu ne te pelofeta ko Mika: “Ka sa‵sale tatou i te igoa o Ieova te ‵tou Atua ki te se-gata-mai, se-gata-mai eiloa.”—Mika 4:5.