AUALA KE MANUMALO I LAGONAGA TAKALIALIA

Ke mo a ma Taui ma Sui

Akoakoga i te Tusi Tapu:

“Sa taui atu te masei ki te masei. . . . Fai te mea e mafai o fai ne koutou ke tausi te filemu i te va o koutou mo tino katoa. . . . Sa taui ma sui, . . . me ne tusi mai penei: ‘I a aku te taui ma sui. Ka toe ‵togi atu ne au, ko muna a Ieova.’”—LOMA 12:17-19.

Tena Uiga:

E tiga loa e se masei a te kaitaua māfai ne fai ne se tino se mea ‵se ki a tatou, e se talia ne te Atua ke taui atu ne tatou te mea tenā. E fakamalosi mai a ia ke faka‵tali tatou ki a ia me ko pili o faka‵tonu ne ia a mea ‵se katoa.—Salamo 37:7, 10.

Mea e Mafai o Fai ne Koe:

Kafai ko taui ma sui atu a tino sē ‵lei katoatoa, ko fai i ei ke na fakamalosi aka a lagonaga takalialia. Tela la, kafai ne fai ne se tino ke kaitaua koe io me logo‵mae, ke mo a ma taui ma sui. Taumafai o fa‵ki ou lagonaga kae saga atu ki ei i se auala filemu. I nisi taimi, e sē se mea fakalogo‵mae ke fakapuli atu fua te mea tenā. (Faataoto 19:11) Kae kafai e gasolo aka o masei te tulaga tenā, e mafai o lipoti atu ne koe te fakalavelave. E pelā mo nisi taimi, kafai ne pokotia koe i se amioga solitulafono, e mafai o fakaiku aka ne koe ke lipoti atu te amioga solitulafono tenā ki pulisimani io me ko nisi tino pule.

E iku atu faeloa a te taui ma sui ki fakalavelave e uke

Kae e a, māfai e seai se auala filemu ke faka‵lei aka te fakalavelave? Io me e a, māfai ko oti ne fai ne koe a mea katoa ke faka‵lei te fakalavelave i se auala filemu? Ke mo a ma taui ma sui. Kāti ka fai fua i ei ke gasolo o masei atu te tulaga tenā. I lō te fai penā, taumafai o fakagata a lagonaga takalialia. Ke na talitonu koe ki te auala e faka‵lei aka ei ne te Atua a fakalavelave o tino. “Fakalagolago ki a ia, kae ka gasue a ia mō koe.”—Salamo 37:3-5.

Tala Tonu—ADRIÁN

Ne Manumalo i Ana Lagonaga Taui ma Sui

I te taimi koi talavou ei, ona ko lagonaga takalialia ne taua sāle a Adrián i auala ke taui atu a mea ‵se ne fai ki a ia. Ne fai mai a ia: “Ne aofia sāle au i taua kolā e fakaaoga i ei a fana, kae uke taimi ne iku atu au ki te takato i te auala mo toku foitino e ‵fonu i toto pelā me se tino ko pili o mate.”

Ne kamata o sukesuke a Adrián ki te Tusi Tapu i te taimi ko 16 ei ana tausaga. Ne toe fai mai a ia: “I te taimi ne gasolo ki mua taku akoga faka-te-Tusi Tapu, ne iloa ne au me ne ‵tau o fai ne au a ‵fuliga ki oku uiga.” Ne ‵tau o fakagata ne ia ana lagonaga takalialia mo ana amioga fakasaua. Ne fiafia malosi a ia ki ana mea ne tauloto i te Loma 12:17-19 ke mo a ma taui ma sui. Ana muna: “Ne kamata o talia ne au te manatu me ka fakaseai ne Ieova a faifaiga sē fakamaoni i te auala mo te taimi e ‵lei ki a ia. Ne gasolo malielie eiloa o manumalo au i aku amioga fakasaua.”

I te afiafi e tasi, ne taua atu se potukau kolā ne fai fili ki a Adrián. Ne kalaga atu te lotou takitaki: “‵Tou ‵fusu!” Ne fai ‵tonu mai a Adrián: “Ne manako malosi au o fusu atu i te taimi tenā.” Kae i lō te fai penā, ne fai fakavave ne ia se ‵talo ki a Ieova kae fano kea‵tea.

Ne toe fai mai a Adrián: “I te suā aso ne fetaui au mo te takitaki o te potukau tenā. Ne ‵sae aka oku lagonaga kaitaua, kae ne toe fai lēmū taku ‵talo ki a Ieova ke fesoasoani mai ke fa‵ki oku lagonaga konā. Ne poi au, me ne vau te talavou tenā ki a au kae fai mai: ‘Fakato ese atu mō te mea ne tupu i te po. A te ‵tonuga loa, e manako au ke fai penā mo koe. E fia sukesuke au ki te Tusi Tapu.’ Ko oko eiloa i toku fiafia me ne mafai o pule atu au ki toku kaitaua! E fakafetai au me nei la, ko kamata o suke‵suke fakatasi māua ki te Tusi Tapu.”