1922​—Selau Tauasga Ko ‵Teka

“SE MANATU GALI ‵KI”

Ne momea aka te manakoga mō tusi i te taimi ne fakalauefa atu ei te faiga o te galuega talai. A taina i te Peteli i Brooklyn ne ‵lomi ne latou a mekesini kae koi fakalago‵lago loa ki kamupane ‵lasi ke ‵lomi ne latou a tusi. Mai tua o nai masina ne seki lava i ei a tusi, ne kamata o fakatalave ei te faiga o te galuega talai, ne fesili atu a te Taina ko Rutherford ki a Robert Martin, te menetia o te fale ‵lomi tusi, e uiga ki te ‵lomiga mo te faitega o tusi.

“Se manatu gali ‵ki,” ko pati a te Taina ko Martin, “ko tena uiga, e ‵tau o fakatoka a mea katoa e manakogina mō te ‵lomiga mo te faitega o tusi.” Ne līsi ne taina se laumanafa i te 18 Concord Street i Brooklyn kae ‵togi mai ei ne latou a masini kolā e manakogina mō te galuega.

E se ko tino katoa ne fia‵fia ki te fakatokaga tenei. A te pelesitene o te kamupane telā ne ‵lomi kae faite sāle ne latou ‵tou tusi ne asi mai ki te fale fou tenā. Ana muna: “Ko maua ne koutou a toe masini ‵fou i te ‵lomiga o tusi, kae e seai eiloa se tino i konei e iloa ne ia o fakaaoga. I se ono masina mai mua nei, ka seai eiloa se aoga o mea katoa konei.”

“E foliga mai me ne tonu ‵ki eiloa te manatu tenā,” ko muna a te Taina ko Martin, “kae ne iloa ne matou me ka fesoasoani mai a Ieova; kae ne fai faeloa a ia penā.” Ne tonu eiloa a te Taina ko Martin. E seki leva kae ne ‵lomi a tusi e 2,000 i te aso i te masini fou tenā.

KO TALAI ATU KI SE FIA AFE E AUALA I LETIO

I tafa o te ‵lomiga ne latou o nisi tusi, ne kamata o fakaaoga ne tino o Ieova se auala fou ke fakasalalau atu te tala ‵lei—ko te leo fakasalalau i te letio. I te fakaafiafi o te Aso Sa, i a Fepuali 26, 1922, ne faipati atu a te Taina ko Rutherford mō te taimi muamua i te letio. Ne fai ne ia te lāuga “Millions Now Living Will Never Die” i se leo fakasalalau ko te KOG i Los Angeles, California, i Amelika.

Kāti e nofo ki se 25,000 o tino ne fakalogo‵logo ki te polokalame. Ne tusi mai a nisi tino o latou o fakafetai mai mō te fakasalalauga. E tasi mai i tusi konei, ko te tusi mai i a Willard Ashford, se tino telā ne nofo i Santa Ana, California. Ne fakamālō atu a ia ki te Taina ko Rutherford mō te lāuga “gali kae fakafiafia.” Ne toe fai mai a ia: “Ona ko te mea e tokotolu a tino ma‵saki i te fale, e seai eiloa se isi auala ne mafai o lagona ne matou a koe, faitalia me ne faipati mai foki koe i se kogā koga e pili mai ki a matou.”

Ne uke atu foki a nisi fakasalalauga i vaiaso mai tua ifo. I te fakaotiga o te tausaga tenā, ne fakatāutāu aka ne The Watch Tower me e “nofo ki se 300,000 o tino [ne] maua ne latou te fekau e auala i [letio].”

Ona ko fakamalosiga ne maua mai te fia‵fia o tino, ne fakaiku aka ne Tino A‵koga i te Tusi Tapu ke faite eiloa se lotou Leo Fakasalalau i se manafa i Staten Island, telā e se ‵mao mai te Peteli i Brooklyn. I nai tausaga mai tua ifo, ne fakaaoga ne Tino A‵koga a te leo fakasalalau tenei, ko te WBBR, ke fakasalalau atu te fekau o te Malo ki tino e tokouke.

“ADV”

I te lōmiga o The Watch Tower i a Iuni 15, 1922, ne faka‵pula atu i ei me ka isi se fono telā ka fai i Cedar Point, Ohio, mai i a Setema 5 ki te 13, 1922. Ne fia‵fia malosi a Tino A‵koga i te Tusi Tapu i te taimi ne oko atu ei latou ki Cedar Point.

I ana pati fakatalofa i te kamataga, ne fai atu a te Taina ko Rutherford ki te kau fakalogo‵logo: “Ne mafaufau au mo te loto talitonu katoatoa, me i te Aliki ka . . . fakamanuia ne ia a te fono tenei, kae tuku atu a te ‵toe molimau sili i te lalolagi nei.” A failauga o te fono tenā ne faka‵mafa atu faeloa ne latou a te galuega talai.

I te Aso Lima, i a Setema 8, ne ‵kau atu se toko 8,000 o tino ki te koga e fai i ei te fono, kae ne olioli malosi latou ki se lāuga a te Taina ko  Rutherford. Ne fakamoe‵moe latou me ka fakamatala atu ne ia a te uiga o te “ADV,” telā ne ‵lomi aka i olotou pepa ‵kami. I te taimi ne saga‵saga ifo latou, e mautinoa me ne lavea ne nisi o latou se kanivesi telā ne pelupelu aka mai luga o te tulaga. A Arthur Claus, telā ne faimalaga atu ki te fono mai Tulsa, Oklahoma, i Amelika, ne maua ne ia se nofoga telā ne mafai o lagona ‵lei ne ia, me ne faigata o lagona ‵lei atu i aso konā me e seai ne mea faka‵lasi ‵leo.

Ke fakamautinoa aka me e seai se mea e mafai o fakalavelave atu, ne faka‵pula atu ne te takitaki fono me e seai se tino talimuli e talia ke vau ki loto i te koga e fai ei te fono, i te taimi e fai ei ne te Taina ko Rutherford tena lāuga. I te 9:30 i te taeao, ne kamata ne te Taina ko Rutherford tena lāuga mai te siki atu ne ia o pati a Iesu i te Mataio 4:17: “Ko pili mai te Malo o te lagi.” (King James Version) I te taimi ne faipati mai ei a ia ki te auala ka lagona ne tino a mea e uiga ki te Malo tenei, ne fai mai a ia: “Ne folafola mai ne Iesu me i te taimi o tena fakatasi mai, ka takitaki ne ia te ‵katiga o saito, ko ana tino, ko te taimi telā ka fakamaopoopo mai ki a ia ana tino ‵tonu kae fakamaoni.”

A te Taina ko Arthur, telā ne sagasaga atu i te koga e fai ei te fono, ne fai mai: “Ne fakalogo‵logo faka‵lei matou ki pati katoa.” Kae e seki leva, ne masaki tou tagata, kae ne ‵tau o fanatu a ia ki tua. Ne fanatu eiloa a Arthur, mo te sē fiafia ona ko te mea ne iloa ne ia me ka se toe talia ke foki atu a ia ki loto.

E seki leva, kae ne toe kamata o ‵lei tou tagata. Ne fai mai tou tagata me i te taimi ne kamata o sasale atu a ia ki te koga e fai ei te fono, ne kamata o lagona faka‵lei ne ia. Ne gasolo aka tena fia fakalogologo! Ne fakaiku aka ne tou tagata me kafai e manakogina ke kake a ia ki luga i te tuafale ke lagona faka‵lei ne ia te ‵toega o te lāuga gali tenei, ka fai loa ne ia. A te Taina ko Arthur, telā se tamataene ko 23 ana tausaga i te taimi tenā, ne maua ne ia se auala ke kake aka ki luga i te tuafale! Ne ma‵tala a famalama i te tuafale, kae i te taimi ko pili atu a ia, ne iloa aka ne ia me “e lagona faka‵lei atu” i te koga tenā.

Kae e se ko Arthur tokotasi fua i konā. A nisi o ana taugasoa ne ‵nofo atu i te tuafale. E tasi mai i ei ko Frank Johnson, ne tele atu kae fesili atu, “E isi sau tamā naifi ‵fetu?”

“Ao, e isi,” ko muna a Arthur.

“A koe ko te tali ki te motou ‵talo,” ko te tali a Frank. “E lavea ne koe te kanivesi telā e pelupelu? Se fakailoga telā e ‵sai ki fao konei. Fakalogologo faka‵lei ki te Famasino.a Kafai ko fai atu a ia, ‘kae e ‵tau mo koutou o fakasalalau, fakasalalau,’ ‵kati ne koe a uka e fa konei.”

A Arthur, mo te naifi i tena lima, ne faka‵tali mo nisi tino ki te fakailoga. E seki leva kae ne oko atu a te Taina ko Rutherford ki te fakaotiga o tena lāuga. Ona ko te mea ne safe tena matagi mo tena loto finafinau, kāti ne pakalaga atu eiloa a te Taina ko Rutherford: “Ke fakamaoni kae fai mo molimau tonu ki te Aliki. Olo atu ki mua i te taua ke oko ki te taimi ko fakamaofa katoatoa i ei a loi fakapapelonia. Fakasalalau te fekau ki te lalolagi kātoa. E ‵tau o iloa ne te lalolagi me i a Ieova ko te Atua kae ko Iesu Keliso ko te Tupu o tupu mo te Aliki o aliki. Tenei te ‵toe aso tāua i aso katoa. Kiloke, ko pule mai te Tupu! A koutou ko ana avefekau. Tela la, fakasalalau, fakasalalau, fakasalalau, te Tupu mo tena Malo!”

Ne fai mai a Arthur me ne ‵kati ne latou mo nisi taina a uka kae ne matala faka‵lei a te kanivesi ki lalo e pelā eiloa mo te masani. E ‵tusa mo mataimanu konei “ADV,” ne tusi mai penei i te kanivesi tenā: “Advertise the King and Kingdom.”

SE GALUEGA AOGA

Ne fesoasoani atu a te fono i Cedar Point ki taina ke ‵saga tonu atu ki te galuega tāua, ko te talaiatuga o te Malo, kae ne ‵kau atu mo te fia‵fia ki ei a tino loto finafinau. Ne tusi mai se colporteur (telā ko te paenia i aso nei) mai Oklahoma, i Amelika, “A te koga ne talai matou i ei se koga e maua i ei a oela, kae ma‵tiva ‵ki a tino i ei.” Ne fai mai a ia me ne masani o fai‵tau a tino ki te fekau i te mekesini ko te Golden Age, kae “ne ‵tagi sāle latou i ei.” Ne fakamatala malie mai tou tagata, “Se fakamanuiaga eiloa ke fakamafanafana atu ki a latou.”

Ne lagona ne Tino A‵koga i te Tusi Tapu a te tāua o pati a Iesu i te Luka 10:2: “Ko oko eiloa i te uke o fuataga e ‵tau o ‵kati kae mu‵tana a tino ga‵lue.” I te fakaotiga o te tausaga tenā, ne momea aka te lotou loto finafinau i lō aso mua, ke fakasalalau atu te fekau o te Malo ki te lalolagi kātoa.