Te Ola ‵Lei o te Mafaufau se Fakalavelave i te Lalolagi Kātoa
“E isi faeloa se manava‵se i a au faitalia me nofo tokotasi eiloa au i toku potu.”
“Kafai e malosi ‵lei au, oti aka ko au loa ko manava‵se. Ko iloa ne au me kafai e ‘fiafia malosi’ au, e se leva ko au loa ko ‘fanoanoa.’”
“E taumafai au o saga fua ki mea ‵tupu i te aso, kae i nisi taimi e manava‵se valevale fua au ki mea e uke.”
Konā a pati mai tino kolā e fakafesagai atu ki te fakalavelave e uiga ki te ola ‵lei o te mafaufau. E mata, e fakafesagai koe—io me se tino e alofa koe ki ei—mo se tulaga tai ‵pau penā?
Ke masaua me e se koe tokotasi fua e fepaki mo te tulaga tenā. E tokouke a tino i aso nei e pokotia ne fakalavelave e uiga ki te ola ‵lei o te mafaufau io me ko olotou tino pele.
E seai se fakalotolotolua me ko ola tatou i “toe taimi faiga‵ta” kolā e fai ei ke manava‵se malosi tatou. (2 Timoteo 3:1) E ‵tusa mo se sukesukega ne fai i te lalolagi kātoa, e nofo ki se tasi-vae-valu a tino e pokotia ne se vaegā masaki tau te ola ‵lei o te mafaufau. I te 2020, ona ko te COVID-19 ne gasolo aka te aofaki o tino kolā ne pokotia ne te manava‵se ki te 26 pasene kae gasolo aka ki te 28 pasene a tino ne pokotia ne te loto mafatia.
E tāua ke iloa ne tatou a te tokouke o tino e pokotia ne fakalavelave tau te ola ‵lei o te mafaufau. Kae sili atu i te tāua ke iloa ne koe ou lagonaga mo lagonaga o ou tino pele mo te auala e ola ei koutou.
Se a te ola ‵lei o te mafaufau?
A te ola ‵lei o te mafaufau ko te tulaga telā e ‵lei ou lagonaga kae malosi foki. E mafai ne koe o fakafesagai atu ki fakalavelave masani o te olaga, galue malosi, kae maua se lagonaga lotomalie ki te olaga.
A te masaki o te mafaufau . . .
E SE māfua mai i vāivāiga o te tino.
KAE SE masaki telā e fai ei ke mafatia malosi se tino ko se mafai ei ne ia o mafaufau io me pule faka‵lei ki ana lagonaga mo ana faifaiga.
E masani o fai ei ke faigata ki se tino ke fai taugasoa ki nisi tino io me fakafesagai atu ki tulaga faiga‵ta o te olaga i aso takitasi.
E mafai o pokotia i ei so se tino faitalia tena matua, tuu mo aganuu, fenua, matakāiga, lotu, akoakoga, io me ko tena tulaga i mea tau tupe.
‵Sala ki se fesoasoani ki fakalavelave tau te ola ‵lei o te mafaufau
Kafai ko isi ne ‵fuliga ‵lasi i a koe io me ko sou tino pele ki uiga, te sē lava te moe, io me ko te sē kai faka‵lei, te lasi te loto mafatia, manava‵se io me fanoanoa, kāti e manakogina ke maua ne koe se fesoasoani mai tino ‵poto ke iloa kae ke faka‵lei aka a te pogai o ‵fuliga konā. Kae maua ne koe i fea te fesoasoani?
Ne fai mai te ‵toe tagata poto telā ne ola ko Iesu Keliso, penei: “A tino kolā e malosi ‵lei e se ma‵nako ki se tokita, kae ko tino fua kolā e ma‵saki.” (Mataio 9:12) A tino ma‵saki kolā ne maua ne latou a togafiti fakatokita mo vailakau, ne mafai o fakafeoloolo aka i ei olotou masaki kae ke toe ola i se olaga aoga kae fakafiafia. Se mea poto ke talavai fakavave latou maise māfai se masaki fakamataku kae ave ‵loa.a
E tiga loa te Tusi Tapu e sē se tusi fakatokita, kae e aoga a mea i ei ki te ola ‵lei o ‵tou mafaufau. Ko ‵kami atu ke faitau koe ki mataupu ka ‵soko mai kolā e fakamatala mai ei te auala e fesoasoani mai te Tusi Tapu ke iloa ne tatou o fakafesagai atu ki fakalavelave tau te ola ‵lei o te mafaufau.
a E se fai mai i Te Faleleoleo Maluga a te faka‵leiga telā e ‵lei. E ‵tau mo tino taki tokotasi o iloilo faka‵lei a mea e mafai o fai ne ia koi tuai o fai tena fakaikuga.