3 | Te Fesoasoani o Tala Mai i te Tusi Tapu

E FAKAMATALA MAI I TE TUSI TAPU . . . A tala o tāgata mo fāfine fakamaoni kolā e isi ne olotou “lagonaga e penei mo tatou.”—IAKOPO 5:17.

Te Uiga o te Mea Tenā

E ‵fonu te Tusi Tapu i tala ‵tonu o tāgata mo fāfine kolā e kese‵kese olotou lagonaga. Kafai e fai‵tau tatou ki olotou tala, e mafai loa o isi se tino i te Tusi Tapu ne ‵pau tena fakalavelave mo tatou.

Te Aoga o te Mea Tenei

E ‵tau o iloa ne tatou me e malamalama a nisi tino i ‵tou lagonaga. Kae maise loa māfai ko pokotia tatou i se fakalavelave tau te ola ‵lei o te mafaufau. Kafai e fai‵tau ki tala ‵tonu o tino i te Tusi Tapu, e mafai o iloa ne tatou a nisi tino kolā e ‵pau olotou mafaufauga mo lagonaga mo tatou. Tenā ko iloa ei ne tatou me e se ko tatou fua e logo‵mae kae isi foki ne tino e ‵pau mo tatou māfai ko fakafesagai ki te manava‵se mo lagonaga sē ‵lei.

E fakamau i te Tusi Tapu a lagonaga e uke o tino kolā ne maua ne latou a lagonaga se aogā mo te manava‵se. Kai maua aka loa ne koe a lagonaga konei, ‘Ko se toe ‵kafi loa ne au’? Konā loa lagonaga o Mose, Elia mo Tavita.—Numela 11:14; 1 Tupu 19:4; Salamo 55:4.
E fakamatala mai i te Tusi Tapu te tala o se fafine e igoa ki a Hana telā “ko oko eiloa i te mafatia” me i a ia e se fanafanau kae fakaitaita faeloa ne te suā avaga a tena avaga.—1 Samuelu 1:6, 10.
E fakamatala mai i te Tusi Tapu te tala o se tagata e igoa ki a Iopu telā e tai ‵pau tatou. E tiga loa a ia se tagata e malosi tena fakatuanaki, ne logo‵mae a ia i te lasi o tena mafatia kae tasi te taimi ne fai ifo penei: “Au e takalialia ki toku ola; e se manako au ke tumau i te ola.”—Iopu 7:16.

A te sukesuke ki te auala ne fakafesagai atu mo te manuia a tino i te Tusi Tapu konei i olotou mafaufauga sē aoga, e mafai foki o maua ne tatou te malosi ke fakafesagai atu ki ‵tou tulaga fakalogo‵mae.

Te Auala e Fesoasoani Atu te Tusi Tapu ki a Kevin

Pokotiaga o te Bipolar ki Luga i a Au

“Ne fakailoa mai me pokotia au i se vaegā masaki o te mafaufau ko te bipolar kae ko fasefulu tupu ei oku tausaga. E isi ne taimi e oko mai te lagonaga me mafai o fai ne au a mea katoa e fakafesagai mo au i te olaga. Kae i nisi taimi, ko maua ne au a lagonaga me seai se aoga o te olaga.”

Te Fesoasoani o te Tusi Tapu ki a Au

“E tokotasi te tino i te Tusi Tapu e tai ‵pau mo au ko te apositolo ko Petelu. Ne fai ne ia a mea ‵se kolā ne fai ei ke maua ne ia lagonaga me ko seai sena aoga. Kae i lō i te tumau i te mafaufau faeloa penā, ne ‵sala Petelu ki ana taugasoa ke ‵kau fakatasi mo latou me atafai latou ki a ia. Kafai ko pokotia malosi au i te bipolar i se aso, e mafaufau faeloa au ki oku vāivāiga totino kae fai ei ke maua a lagonaga me seai eiloa soku aoga. E pelā mo Petelu, ne tauloto au ke ‵kau fakatasi faeloa mo oku taugasoa kolā e ma‵nako o fesoasoani mai ke mo a ma ‵fiu vave au i toku masaki.

“A te suā tino i te Tusi Tapu telā ne fakamalosi mai ki a au ko te tupu ko Tavita. Ne maua sāle ne ia lagonaga mafatia mo te salamō ki ana mea ‵se ne fai. E ‵pau māua me i nisi taimi e faipati atu io me fai ne au a mea kolā e salamō fakamuli au i ei. E fakamafanafana mai eiloa ki a au a pati a Tavita i te Salamo 51. I te fuaiupu e 3, e fai mai a Tavita: ‘Me iloa ‵lei ne au aku amioga solitulafono, kae e tu faeloa taku agasala i oku mua.’ E fakamatala faka‵lei mai i konei oku lagonaga māfai ko mafatia malosi au, me ko faigata ke ulu se mafaufauga ‵lei ki toku mafaufau e uiga ki a au. E ‵gali foki ki a au a pati a Tavita i te fuaiupu e 10: ‘Faite i loto i a au se loto ‵ma, e te Atua, kae tuku ki loto i a au se agaga fou, telā e ‵mautakitaki.’ E fai ne au se mea tai ‵pau penā kae akai atu ki te Atua ke fesoasoani mai ke maua ne au a mafaufauga aoga e uiga ki a au. Kae ko te ‵toe mea, e fakamafanafana mai eiloa te fuaiupu e 17 ki a au. E fai mai: ‘A te loto telā ko fatifati kae tuki palapala, e te Atua, ka se ‵teke ne koe.’ E fakamautinoa mai i te fuaiupu tenei me i te Atua e alofa mai ki a au.

“Mai te saga tonu atu ki tala i te Tusi Tapu mo mea ko maua nei ne au mai te Atua, e fakamalosi aka ei toku fakamoemoega mō aso mai mua. Ki a au loa, a folafolaga i te Tusi Tapu ne mea ‵tonu eiloa kae fesoasoani malosi mai ke mo a ma ‵fiu vave au.”