Ke na Papatiso e Aunoa mo te Fakatalave

1. Ne a nisi pogai ‵lei e ‵tau ei o papatiso se tino?

E MATA, e alofa koe ki a Ieova te Atua, telā ne tuku atu ne ia a meaalofa ‵lei katoa, e aofia foki ei te ola? E mata, e manako koe o fakaasi atu tou alofa mō ia? A te ‵toe auala ‵lei ke fai penā ko te faiga o tau tukuatuga ki a ia, ko papatiso ei ke fakaasi atu ki tino me ko oti ne fai tau tukuatuga. Kafai e fai ne koe a mea konei, ko aofia eiloa koe i tino o te kāiga o Ieova. Ona ko te mea tenā, ka takitaki kae tausi eiloa koe ne tou Tamana mo tou Taugasoa me ko aofia koe i ana tino. (Sala. 73:24; Isa. 43:​1, 2) A te faiga o tau tukuatuga kae papatiso e tuku mai foki i ei se fakamoemoega ke maua te ola se-gata-mai.—1 Pe. 3:21.

2. Ne a mea ka sau‵tala tatou ki ei i te mataupu tenei?

² E mata, e isi se mea e taofi ne ia koe ke mo a ma papatiso? Kafai e isi, e se ko koe fua e fai penā. E lau i miliona o tino i aso mua ne ‵fuli olotou amioga mo te auala e mafau‵fau ei latou ko te mea ke mafai o papatiso latou. Ko tavini atu nei latou ki a Ieova mo te fia‵fia mo te loto finafinau. Ne a au mea e mafai o tauloto mai i nisi tino kolā ne papatiso i te senitenali muamua? Ke sau‵tala nei tatou ki fakalavelave ne fe‵paki mo latou kae onoono ki mea e mafai o tauloto mai i olotou fakaakoakoga.

NE PAPATISO A TINO SAMALIA

3. Ne a mea faiga‵ta e uiga ki te papatiso ne fe‵paki mo nisi tino Samalia?

³ Ne ‵kau atu a tino Samalia i aso o Iesu ki se potukau fakalotu kolā a te tokoukega o latou ne ‵nofo i fakai mua ko Sekema mo Samalia, i te feitu ki mātū o Iuta. Mai mua o papatiso a tino Samalia, ne ‵tau o iloa faka‵lei ne latou a akoakoga ‵tonu e uiga ki te Muna a te Atua. Ne fakaaoga fua ne tino Samalia a tusi fakaosofia muamua e lima o tusi o te Tusi Tapu—Kenese ke oko ki te Teutelonome—kae kāti mo te tusi foki ko Iosua. Ne ‵nofo fakatali‵tali a tino Samalia ki te oko mai o te Mesia, e ‵tusa mo te folafolaga a te Atua i te Teutelonome 18:​18, 19. (Ioa. 4:25) Ko te mea ke papatiso, ne ‵tau o talia ne latou a Iesu e pelā me ko te Mesia telā ne folafola mai. “E tokouke a tino Samalia” ne fai eiloa ne latou te mea tenā. (Ioa. 4:39) A nisi tino kāti ne ‵tau o ga‵lue malosi ke ‵fuli te lotou kilokiloga ki te fakailoga tino i te va o tino Samalia mo tino Iutaia.—Luka 9:​52-54.

4. E ‵tusa mo te Galuega 8:​5, 6, 14, ne ‵saga atu pefea a nisi tino Samalia ki te talaiga a Filipo?

⁴ Ne a mea ne fesoasoani atu ki tino Samalia ke papatiso? I te taimi ne talai atu a Filipo ki tino Samalia e tokouke “e uiga ki te Keliso,” ne ‘talia ne nisi tino Samalia te muna a te Atua.’ (Faitau te Galuega 8:​5, 6, 14.) A Filipo e isi sena gafa Iuta, tenā ne seki ‵teke latou ki a ia. Kāti ne masaua ne latou a fuaiupu mai te Penitatiuka kolā e fai mai me i te Atua e se fakailoga tino. (Teu. 10:​17-19) “Ne ‵saga tonu atu [latou] ki pati a Filipo” e uiga ki te Keliso, kae ne lavea ne latou a fakamaoniga ma‵nino o te ‵lago atu o te Atua ki a Filipo. Ne fai foki ne ia a galuega fakaofoofogia e uke, e aofia i ei te faka‵leiga o tino ma‵saki mo te ‵tuliga kea‵tea o temoni.—Galu. 8:7.

5. Ne a akoakoga e mafai o tauloto ne koe mai i tino Samalia?

⁵ Ne mafai fua o talia ne tino Samalia konā a te fakailoga tino io me ko te sē lava o te lotou iloa ke taofi ei latou mai te ga‵solo ki mua. Kae ne seki talia ne latou ke fai penā. Ne seki fakatalave a tino Samalia o papatiso fakavave i te otiga ne fakatalitonu aka ne latou me ne akoako atu ne Filipo a te munatonu ki a latou. E fai mai te Tusi Tapu penei: “I te taimi ne tali‵tonu ei latou ki a Filipo, telā ne folafola atu ne ia te tala ‵lei o te Malo o te Atua mo te igoa o Iesu Keliso, ne papatiso ei a tāgata mo fāfine.” (Galu. 8:12) E mata, e mautinoa i a koe me i te Muna a te Atua ko te munatonu kae ko Molimau a Ieova e se fakailoga tino kae taumafai o fakatau fakaasi atu te alofa tonu—telā ko te fakailoga o Kelisiano ‵tonu? (Ioa. 13:35) Ke na fai nei tau fakaikuga mo te talitonu me ka fakamanuia koe ne Ieova.

6. E mafai pefea o aoga ki a koe te tala o Ruben?

⁶ A Ruben, mai Siamani, ne tupu aka i se kāiga Molimau. Kae i te taimi koi talavou ei a ia, ne seki mautinoa i a ia me ko Ieova se tino tonu io me ikai. Se a te mea ne fesoasoani atu ki a ia? I te iloaga ne ia me e se lava tena iloa, ne gasue ei a ia o fai se mea. Ana muna: “Ne fai aku sukesukega totino ko te mea ke fakamautinoa aka ne au te mea tonu. Ne sukesuke fakafia au ki te mataupu ko te evolusione.” Ne faitau ne ia te tusi ko te Is There a Creator Who Cares About You? Ne aoga ‵ki eiloa te tusi tenā ki a Ruben. Ne mafaufau ifo a ia penei: ‘Tapa! A Ieova se tino tonu eiloa.’ Kae i tena asiatuga ki te ‵tou laumua, ne momea aka te lasi o te loto fakafetai o Ruben ki te ‵kau fakatasi e lavea ne ia i te ‵tou kautaina i te lalolagi kātoa. I tena fokiatuga ki Siamani, ne papatiso a Ruben kae ko 17 ana tausaga. Kafai e isi ne ou manatu fakalotolotolua ki au mea ne tauloto, ke fakamautinoa ne koe mai te sukesuke ki ei i ‵tou tusi. E mafai fua o fakaseai atu a ‵tou manatu fakalotolotolua ne te “iloaga tonu.” (Efe. 4:​13, 14) Kae kafai e logo koe i tala e uiga ki te a‵lofa mo te ‵kau fakatasi o tino o Ieova i nisi koga o te lalolagi kae fakamaoni aka ne koe te mea tenā i tau fakapotopotoga eiloa, ka gasolo aka eiloa o alofa malosi koe ki ‵tou kautaina i te lalolagi kātoa.

NE PAPATISO A SAULO MAI TASO

7. Se a te mafaufauga o Saulo telā ne ‵tau o faka‵tonu aka?

⁷ Mafaufau ki te tala o Saulo mai Taso. Ne akoga faka‵lei a ia ki tulafono a te kau Iutaia kae ne takutakua foki a ia. (Kala. 1:​13, 14; Fili. 3:5) I te taimi tenā, ne tali‵tonu a tino Iutaia e tokouke me i Kelisiano ne tino ‵teke, tenā ne fakasaua malosi ei ne Saulo a latou. Ne mafaufau a ia me e fai ne ia te loto o te Atua kae e se tonu te mea tenā. (Galu. 8:3; 9:​1, 2; 26:​9-11) Ke talia ne ia a Iesu kae papatiso e pelā me se Kelisiano, e ‵tau o talia ne Saulo ke fakasauagina a ia.

8. (a) Se a te mea ne fesoasoani atu ki a Saulo ke papatiso? (e) E ‵tusa mo te Galuega 22:​12-16, ne fesoasoani atu pefea a Anania ki a Saulo? (Onoono foki ki te ata.)

⁸ Se a te mea ne fesoasoani atu ki a Saulo ke papatiso? I te taimi ne faipati atu a te Aliki ‵malu ko Iesu ki a Saulo, ne maina atu se mainaga ki a ia kae ne ‵kivi i ei tou tagata. (Galu. 9:​3-9) E tolu aso ne fakalikiliki ei a ia, kae mautinoa eiloa me ne mafaufau ‵loto a ia ki mea ne ‵tupu ki a ia. E tonu, ne talitonu a Saulo me i a Iesu ko te Mesia kae e ‵kau atu ana soko ki te lotu tonu. E se taumate ne salamō ‵ki a Saulo me ne aofia a ia i te tamatega o Setefano! (Galu. 22:20) Mai tua o aso e tolu, ne fanatu te soko ko Anania ki a Saulo o faka‵lei ana mata, kae fakamalosi atu ki a ia ke na papatiso. (Faitau te Galuega 22:​12-16.) Ne talia mo te loto maulalo ne Saulo te fesoasoani tenā kae ne papatiso a ia.—Galu. 9:​17, 18.

9. Ne a akoakoga e mafai o tauloto ne tatou mai i a Saulo?

⁹ E isi ne akoakoga e tauloto ne tatou mai i a Saulo. Ne mafai fua o talia ne ia te uiga fakamatamata io me ko te mataku ki tino ke se papatiso a ia. Kae ne seki fai a ia penā. Ne loto maulalo a Saulo o ‵fuli tena olaga i te taimi ne talia ne ia te munatonu e uiga ki te Keliso. (Galu. 26:​14, 19) Ne loto fiafia a Saulo ke fai a ia pelā me se Kelisiano faitalia me ne iloa ne ia me e mafai o fakasauagina a ia. (Galu. 9:​15, 16; 20:​22, 23) Mai tua o tena papatisoga, ne tumau a ia i te fakalagolago ki a Ieova ke fesoasoani atu ke kufaki a ia i tofotofoga kese‵kese. (2 Koli. 4:​7-10) Ka mafai eiloa o tofotofogina a tou fakatuanaki io me fepaki mo fakalavelave māfai ko papatiso koe e pelā me se Molimau a Ieova, kae ka maua eiloa ne koe se fesoasoani. Ke na talitonu eiloa koe me ka fesoasoani atu a te Atua mo Keliso.—Fili. 4:13.

10. Ne a mea aoga e mafai o tauloto ne koe mai te tala o Anna?

¹⁰ Ne tupu aka a Anna i se kāiga Kurdish i Eulopa ki Saegala. Mai tua o te papatisoga o tena mātua, ne talia ne te tamana o Anna ke fai te akoga faka-te-Tusi Tapu a tou fafine kae ko 9 ana tausaga. Kae ne uke a fakalavelave ne ‵tupu i te va o ia mo ana kāiga kolā e ‵nofo tasi katoa mo te kāiga o Anna. Ne mafau‵fau ana kāiga me se mea fakamasiasi ke tiaki ne se tino a te lotu a ana tupuga. I te taimi ko 12 tausaga o Anna, ne fakamolemole a ia ki te taliaga a tena tamana ke papatiso a ia. Ne fia iloa ne tou tagata me ko te mea tenā se manakoga totino o ia io me ne fakamalosi fua tou fafine ne se tino ke papatiso. Ne tali atu tou fafine, “Au e alofa ki a Ieova.” Ne talia ei ne tena tamana ke papatiso tou fafine. Mai tua ifo, ne fakatauemu kae fai fakamasei a Anna ne nisi tino. Ne fai atu sena kāiga e tokotasi: “E sili atu te ‵lei ki a koe ke ola i se olaga fai valevale kae ‵pusi i lō te fai pelā me se Molimau a Ieova.” Ne fakafesagai atu pefea a Anna ki ei? Ana muna, “Ne fesoasoani mai a Ieova ke maua ne au te malosi, kae ne ‵lago malosi mai toku mātua mo toku tamana ki a au.” Ne fakamau ne Anna a taimi takitasi ne lavea ne ia te fesoasoani o Ieova i tena olaga. Ne mafaufau faeloa a ia ki ei ko te mea ke mo a ma puli i a ia a taimi ne fesoasoani atu ei a Ieova. Kafai e manavase koe me fepaki koe mo ‵tekemaiga, ke masaua me ka fesoasoani atu foki a Ieova ki a koe.—Epe. 13:6.

NE PAPATISO A KONELIO

11. Ne a fakanofonofoga o Konelio ne mafai o fai ei ke se fia papatiso a ia?

¹¹ E ‵gali foki a akoakoga e tauloto ne tatou mai te tala o Konelio i te Tusi Tapu. A ia se takitaki kautau o sotia Loma e toko 100. (Galu. 10:1) Ona ko tena tulaga tenā, kāti ne lauiloa a ia i tino o te fenua penā foki mo tino o te kautau. Ne “avatu ne ia ki tino a meaalofa e uke.” (Galu. 10:2) Ne uga atu ne Ieova te apositolo ko Petelu ke folafola atu te tala ‵lei ki a ia. E mata, ne fakatalave ne Konelio a tena papatiso ona ko tena tulaga?

12. Ne a mea ne fesoasoani atu ki a Konelio ke papatiso?

¹² Ne a mea ne fesoasoani atu ki a Konelio ke papatiso? E fai mai me i a ia se “tagata lotu telā e mataku ki te Atua e pelā foki mo tena kāiga kātoa.” Kae ne ‵talo atu faeloa a Konelio ki te Atua i taimi katoa. (Galu. 10:2) I te taimi ne folafola atu ne Petelu te tala ‵lei ki a Konelio, ne talia ne ia mo tena kāiga a Keliso, papatiso foki loa i konā. (Galu. 10:​47, 48) E mautinoa me ne loto fiafia a Konelio o fai so se fakamafuliga ko te mea ke mafai o tapuaki atu a ia ki a Ieova fakatasi mo tena kāiga.—Iosu. 24:15; Galu. 10:​24, 33.

13. Ne a akoakoga e mafai o tauloto ne koe mai i a Konelio?

¹³ E pelā mo Saulo, ne mafai fua ne Konelio o fakaiku aka ke se fai a ia pelā me se Kelisiano. Kae ne seki talia ne ia ke fai penā. E mata, e uke a fakama‵fuliga e ‵tau o fai ne koe i tou olaga ko te mea ke talia ne koe te munatonu? Kafai e penā loa, ka fesoasoani atu eiloa a Ieova. Ka fakamanuia ne ia tou loto finafinau ke tavini atu ki a ia e ‵tusa mo fakatakitakiga i te Tusi Tapu.

14. E mafai pefea o aoga ki a koe a te tala o Tsuyoshi?

¹⁴ A Tsuyoshi, mai Tiapani, ne ‵tau o ‵sala sena suā galuega ‵togi ko te mea ke fetaui ‵lei a ia ke papatiso. A ia ko te tokolua pule o te akoga fai pulalakau ko Ikenobo. Kafai ko se mafai o fanatu te pule o te akoga ki se mate, ko Tsuyoshi e sui ne ia tou tagata ke fai a faifaiga fakalotu a te lotu Puta. Kae i te taimi ne iloa ei ne Tsuyoshi te munatonu e uiga ki tino ‵mate, ne fakalavelave atu a te faifaiga tenā ki tena gasolo ki mua ki te papatisoga. Ne fai tena fakaikuga totino ke mo a ma kau atu ki faifaiga fakalotu a te lotu Puta. (2 Koli. 6:​15, 16) Ne faipati atu a Tsuyoshi ki te pule o te akoga e uiga ki te mea tenā. Se a te ikuga? Ne tumau loa a Tsuyoshi i tena galuega kae ko talia ke mo a ma kau atu ki faifaiga fakalotu. Ne papatiso a ia i se tausaga mai tua o te kamataga o tena akoga faka-te-Tusi Tapu.a Kafai e manakogina ke fai ne fakama‵fuliga ki tau galuega ‵togi ko te mea ke fakafiafia te Atua, ke masaua me ka tausi atu eiloa a ia ki a koe mo tou kāiga.—Sala. 127:2; Mata. 6:33.

NE PAPATISO A TE KAU KOLINITO

15. Ne a tulaga faiga‵ta ne fe‵paki mo te kau Kolinito e uiga ki te papatisoga?

¹⁵ Ne lauiloa a tino Kolinito mua i te fia mau‵mea mo te ola i se olaga fai valevale. Ne fai ne tino e tokouke i konā a mea kolā e se fiafia ki ei te Atua. E manino ‵lei me ne fai i ei ke faigata ki tino i konā ke talia ne latou te tala ‵lei. Kae i te fanatuga a Paulo ki te fakai tenā kae talai ne ia te tala ‵lei e uiga ki te Keliso, “e tokouke a tino Kolinito kolā ne lagona ne latou a te muna ne tali‵tonu kae papatiso.” (Galu. 18:​7-11) Kae ne fakasae atu a te Aliki ko Iesu Keliso ki a Paulo i se fakaasiga kae fai atu: “E tokouke oku tino i te fakai tenei.” Tenā ne tumau ei a Paulo i te talai atu i konā mō se tasi mo te āfa tausaga.

16. Ne a mea ne fesoasoani atu ki nisi tino Kolinito ke manumalo i mea kolā ne fakalavelave atu ki te lotou papatisoga? (2 Kolinito 10:​4, 5)

¹⁶ Ne a mea ne fesoasoani atu ki te kau Kolinito ke papatiso? (Faitau te 2 Kolinito 10:​4, 5.) Ne fesoasoani atu a te Muna a te Atua mo te ‵mana o tena agaga tapu ki a latou ke fai a ‵fuliga ‵lasi i olotou olaga. (Epe. 4:12) A tino i Kolinito kolā ne talia ne latou te tala ‵lei e uiga ki te Keliso, ne mafai o tiaki ne latou olotou amioga e pelā mo te inu kava, kaisoa mo amioga fakasotoma.—1 Koli. 6:​9-11.b

17. Ne a au mea e mafai o tauloto mai te kau Kolinito?

¹⁷ Ke masaua la me e tiga loa e isi ne tino i Kolinito ne ‵tau o fai ne latou a ‵fuliga ‵lasi ki olotou olaga, ne seki tō faigata ki a latou ke ‵fuli ke fai pelā me ne Kelisiano. Ne fai ne latou te ‵toe mea e mafai ke sa‵sale atu i te auala lauliki telā e tau atu ki te ola se-gata-mai. (Mata. 7:​13, 14) E mata, e faigata ki a koe ke tiaki se faifaiga masei ko te mea ke mafai koe o papatiso? Ke mo a ma ‵fiu vave koe! Akai atu ki a Ieova mō tena agaga tapu ke fesoasoani atu ke ‵teke te manakoga i a koe ke fai te mea masei.

18. E aoga pefea ki a koe a te tala o Monika?

¹⁸ A Monika, mai te fenua ko Georgia, ne galue malosi ke tiaki tena gutu pati masei mo te onoono ki ata sē ‵lei ko te mea ke mafai a ia o papatiso. Ana muna: “I te taimi koi talavou ei au, ne maua ne au te malosi mai i ‵talo. Ne iloa ne Ieova me manako au o fai te mea tonu, kae ne fesoasoani kae takitaki faeloa ne ia au.” Ne papatisa a Monika kae ko 16 ana tausaga. E mata, e isi ne faifaiga e ‵tau o tiaki ne koe ko te mea ke talia ne Ieova tau taviniga? Tumau i te akai atu ki a ia ke maua te malosi ke fai ne koe a ‵fuliga. E tuku mai eiloa ne Ieova mo te kaimalie a tena agaga tapu.—Ioa. 3:34.

TOU FAKATUANAKI E MAFAI O FAI I EI KE MA‵SIKI A MAUGA

19. Se a te mea e mafai o fesoasoani atu ki a koe ke manumalo i fakalavelave kolā e fai pelā me ne mauga? (Onoono foki ki te ata.)

¹⁹ Ke masaua me e alofa a Ieova ki a koe kae manako ke aofia koe i tena kāiga. Se mea tonu eiloa te mea tenā faitalia me ne a mea kolā e fakalavelave atu ki tau papatisoga. Ne fai atu a Iesu ki se potukau o ana soko i te senitenali muamua: “Kafai e fai te otou fakatuanaki e pelā mo te lasi o te fuaga o te sinapi, ka fai atu koutou ki te mauga tenei, ‘Masiki mai i konei ki te koga telā,’ ko te mea eiloa ko masiki, kae ka seai eiloa se mea e se mafai ne koutou o fai.” (Mata. 17:20) A tino kolā ne ‵nofo atu i konā kae lagona ne latou a pati konei ne ‵nofo tasi mo Iesu mō ne nai tausaga fua, tela la, koi manakogina loa ke fakamalosi aka te lotou fakatuanaki. Kae ne fakamautinoa atu a Iesu me kafai ko ma‵losi ‵lei olotou fakatuanaki, ka fesoasoani atu a Ieova ki a latou ke fakama‵siki a fakalavelave kolā e fai pelā me ne mauga ki a latou. Kae ka fesoasoani atu foki a Ieova ki a koe ke fai foki penā!

20. Ne fakamalosi atu pefea a fakaakoakoga a Kelisiano i te senitenali muamua mo aso nei ki a koe?

²⁰ Kafai e isi ne mea e fakalavelave atu ki tau papatisoga, ke na gasue o tapale fakavave kea‵tea. Onoono ki tala o Kelisiano i te senitenali muamua mo aso nei ke maua mai ei se fakamalosiga. Ke fakamalosi atu eiloa olotou fakaakoakoga ki a koe ke fai tau tukuatuga ki a Ieova kae papatiso. Tenā eiloa te ‵toe fakaikuga ‵lei e mafai ne koe o fai!