‘Kalaga Atu ki Toeaina’

1. Ne fakaasi mai pefea ne Ieova me tāua malosi ki a ia ana mamoe?

E TĀUA ˋki ki a Ieova ana mamoe. Ne ˋtogi ne ia latou ki te toto o Iesu kae ˋtofi a toeaina o te fakapotopotoga ke tausi atu ki Tena lafu mamoe. (Galu. 20:28) E manako a te Atua ke atafai fakaˋlei ana mamoe. Mai lalo i te takitakiga a Keliso, e fakamalosi ne toeaina a mamoe kae puipui latou mai tulaga fakamaˋtaku i te feitu faka-te-agaga.—Isa. 32:​1, 2.

2. Ko oi a tino e manako tonu a Ieova o fesoasoani atu ki a latou? (Esekielu 34:​15, 16)

² E saga tonu a Ieova ki ana mamoe katoa, kae manako malosi a ia o fesoasoani ki a latou kolā e logoˋmae. E fakaaoga ne ia a toeaina ke fesoasoani ki a latou kolā e logoˋmae i te feitu faka-te-agaga. (Faitau te Esekielu 34:​15, 16.) Kae e manako a ia ke ˋsala tatou ki te fesoasoani māfai e manakogina ne tatou. I tafa o ˋtou ˋtalo kolā e fai atu ki te Atua mō se fesoasoani, e olo atu foki tatou o ˋsala ki te fesoasoani o “tausi mamoe mo faiakoga” i te fakapotopotoga i vaegā taimi penei.—Efe. 4:​11, 12.

3. E mafai pefea o maua ne tatou katoa a mea aoga mai te mafauˋfau ki te tiute o toeaina?

³ Ka onoono tatou i te mataupu tenei ki te fakatokaga a te Atua ke maua ne tatou te fesoasoani i te feitu faka-te-agaga mai toeaina. Konei a fesili ka tali aka ne tatou: Ko te taimi fea ka ˋsala atu ei tatou ki te fesoasoani o toeaina? Kaia e ˋtau ei o fai tatou penā? Kae e fesoasoani mai pefea a latou ki a tatou? Kafai foki loa e seai ne fakalavelave e feˋpaki mo tatou i te taimi nei, kae ko tali ki fesili konā ka fai ei ke momea aka te lasi o te ˋtou loto fakafetai ki te fakatokaga tenei a te Atua, kae ka mafai foki o fakaˋsao i ei a ˋtou ola i se aso.

KO TE TAIMI FEA E MAFAI EI O “KALAGA ATU KI TOEAINA”?

4. Kaia e iloa ei ne tatou me e faipati a te Iakopo 5:​14-16, 19, 20 ki te masaki i te feitu faka-te-agaga? (Onoono foki ki ata.)

⁴ Ne fakamatala mai ne te soko ko Iakopo a te fakatokaga a te Atua ke maua te fesoasoani i te feitu faka-te-agaga i ana pati: “E a, e isi se tino e masaki i a koutou? Ke kalaga atu a ia ki toeaina o te fakapotopotoga.” (Faitau te Iakopo 5:​14-16, 19, 20.) E fakaasi mai i te mataupu kātoa me faipati a Iakopo e uiga ki te masaki i te feitu faka-te-agaga. E pelā me se fakaakoakoga, e fai mai i konā ko te tino masaki ke kalaga ki toeaina, kae e se ki se tokita. E fakasino atu foki i konei ki te masaki faka-te-agaga me e faipati i ei ki te fakaˋleiga telā e aofia i ei te fakamagaloga o agasala. E tonu, a mea kolā e manakogina ke fai ke fakaˋlei aka i ei te masaki o se tino i te feitu faka-te-agaga e ˋpau mo mea kolā e manakogina māfai ko masaki se tino i te feitu faka-te-foitino. Kafai ko maˋsaki tatou i te feitu faka-te-foitino, e olo atu tatou ki se tokita, fakamatala atu ˋtou masaki, ko tauˋtali ei tatou ki ana fakatonuga. E penā foki loa māfai ko maˋsaki tatou i te feitu faka-te-agaga, e ˋtau o olo atu tatou ki se toeaina, fakamatala atu ˋtou tulaga, ko fakagalue ei ne tatou a manatu fakatonutonu mai te Tusi Tapu e maua ne tatou mai i a latou.

5. E mafai pefea o iloa ne tatou me ko kamata o maˋsaki tatou i te feitu faka-te-agaga?

⁵ A te fakatokaga ne fakamatala mai i te Iakopo mataupu e 5, e fakamalosi mai ki a tatou ke olo atu ki toeaina māfai ko iloa ne tatou me e manakogina ke toe fakamalosi aka te ˋtou fesokotakiga mo Ieova. Se mea poto eiloa ke na ˋsala tatou ki se fesoasoani mai mua o oko te ˋtou va fakataugasoa mo te Atua ki se tulaga masei ˋki! E ˋtau o fakamaoni tatou ki a tatou eiloa. E fai mai te Tusi Tapu me kafai e se fakaeteete tatou e mafai eiloa o mafauˋfau tatou me e maua ne tatou te taliaga a Ieova kae tela la, e se talia ne ia tatou. (Iako. 1:22) Tenā eiloa te mea ˋse ne fai ne nisi Kelisiano mua i te fakapotopotoga i Salataisa, kae ne fai atu a Iesu me ko se fiafia a Ieova ki a latou. (Faka. 3:​1, 2) A te auala e tasi e mafai ei o iloa ne tatou te ˋtou tulaga i te feitu faka-te-agaga ko te fakapauˋpau ne tatou te ˋtou fiaˋfia ki te tapuakiga i te taimi nei mo lagonaga o tatou ki ei i aso mua. (Faka. 2:​4, 5) E mafai o fesili ifo tatou penei: ‘E mata, koi fiafia au o faitau ki te Tusi Tapu kae mafaufau ˋloto ki mea ne faitau ne au e pelā mo aso mua? E mata, e kau atu fua au ki nai fakatasiga, kae e mata, e fakatoka fakaˋlei foki au ki ei? E mata, koi tāua ki a au a te faiga o te galuega talai? E mata, ko uke atu oku taimi e fakamāumāu ki mea e fiafia malosi au ki ei io me ko te ˋsala atu ki tupe e uke?’ Kafai a te tali ki se fesili i fesili konei ko te ao, e fakaasi mai ei me isi se vāivāiga o koe telā kafai e se saga koe ki ei, ka gasolo eiloa o masei atu. Kafai e se mafai o fakaˋlei aka ne tatou a te vāivāiga tenā i a tatou eiloa, io me kafai ne iku atu ki te soli ne tatou a tulafono a te Atua, e ˋtau mo tatou o ˋsala atu ki te fesoasoani o toeaina.

6. Se a te mea e ˋtau o fai ne latou kolā ne fai ne latou se agasala matagā?

⁶ E tonu, a latou kolā ne fai ne latou se agasala matagā telā e mafai o iku atu ki te tapale keaˋtea se tino mai te fakapotopotoga, e ˋtau o fanatu ki se toeaina. (1 Koli. 5:​11-13) So se tino telā ne fai ne ia se agasala matagā e manakogina ne ia te fesoasoani ke fakaˋlei aka tena fesokotakiga mo Ieova. Ko te mea ke maua te fakamagaloga a Ieova e auala i te togiola, e ˋtau mo tatou o fai a “galuega e fakaasi mai ei te salamō.” (Galu. 26:20) E aofia i galuega konā a te olo atu ki toeaina māfai ne fai ne tatou se agasala matagā.

7. Ko oi a nisi tino e manakogina ne latou te fesoasoani o toeaina?

⁷ A toeaina e se fesoasoani atu fua ki a latou kolā ne fai ne latou se agasala matagā kae e fesoasoani atu foki ki tino kolā ko vāiˋvai i te feitu faka-te-agaga. (Galu. 20:35) E pelā me se fakaakoakoga, kāti e manavase koe me ko se mafai ne koe o ˋteke atu ki ou manakoga maˋsei. Kāti e mafai o faigata atu ki a koe ke ˋteke a manakoga maˋsei māfai ne umiti sāle koe ki vailakau tapu, onoono ki ata maˋsei, io me ne aofia i amioga fakatauavaga sē ˋtau mai mua o iloa ne koe te munatonu. Sa mataku o ˋsala atu ki se fesoasoani. E mafai o faipati atu koe ki se toeaina telā ka fakalogologo ki ou manavasega, tuku atu a manatu fesoasoani aoga, kae fakamautinoa atu me mafai eiloa o fakafiafia ne koe a Ieova mai te ˋteke atu ki ou manakoga maˋsei. (Fai. 4:12) Kafai ne loto vāivāi koe ona ko ou vāivāiga konā, e mafai o fakamasaua atu a toeaina me i te mea ne fai ne koe ke ˋsala atu ki se fesoasoani, e fakaasi mai ei me manako koe o fakatāua tou va fakataugasoa mo Ieova kae kalo keaˋtea mai te tō talitonu ki a koe eiloa.—1 Koli. 10:12.

8. E mata, e ˋtau o faiˋpati tatou ki toeaina e uiga ki so se mea ˋse ne fai ne tatou? Fakamatala mai.

⁸ E se manakogina ke olo atu tatou ki toeaina o fakaasi atu so se mea ˋse ne fai ne tatou. E pelā me se fakaakoakoga, kāti ne fai atu ne koe ne pati kolā ne logoˋmae malosi i ei se taina io me se tuagane io me ne kaitaua malosi koe ki a ia. I lō te fanatu ki se toeaina, e mafai o fakagalue ne koe a pati fakatonutonu a Iesu ke taumafai o fakaˋlei te va o koe mo tou taina io me ko tou tuagane. (Mata. 5:​23, 24) E mafai o fai ne au sukesukega ki mataupu e pelā mo te agamalu, te kufaki mo te loto pulea ko te mea ke mafai o fakaasi fakaˋlei atu ne koe a uiga ˋlei konā fakamuli. Kae kafai loa e se mafai ne koe o fakaˋlei aka te fakalavelave tenā, e mafai eiloa o ˋsala atu koe ki se fesoasoani mai se toeaina. I tena tusi ki te kau i Filipi, ne fakamolemole atu te apositolo ko Paulo ki se taina telā e se taku mai tena igoa ke fesoasoani ki a Evotia mo Sunetui ke fakaˋlei aka te lā fakalavelave, kae e mafai foki o fesoasoani atu se toeaina i tau fakapotopotoga i te auala tenā.—Fili. 4:​2, 3.

KAIA E ˋTAU EI O KAˋLAGA KI TOEAINA?

9. Kaia e se ˋtau o taofi aka tatou ne te mā ke kaˋlaga atu ki toeaina? (Faataoto 28:13)

⁹ E manakogina te fakatuanaki mo te loto malosi ke olo atu o ˋsala ki se fesoasoani māfai ne fai ne tatou se agasala matagā, io me māfai e mafauˋfau tatou me ko se mafai o ˋteke atu ki se vāivāiga totino. E se ˋtau o taofi aka tatou ne te mā ke kaˋlaga atu ki toeaina. Kaia? A te tauˋtali atu i te fakatokaga a Ieova, e fakaasi atu ei me taliˋtonu tatou ki a ia e pelā foki mo ana fakatonuga kolā e fai ei ke malosi ˋtou fakatuanaki. E iloa ne tatou me e maˋnako tatou ki tena fesoasoani ke tumau i te faiga o te mea tonu. (Sala. 94:18) Kae kafai ne agasala tatou, ka maua eiloa ne tatou te fakamagaloga a te Atua māfai e fakaasi atu ne tatou a ˋtou agasala kae se toe fai.—Faitau te Faataoto 28:13.

10. Se a te mea e mafai o tupu māfai e taumafai tatou o ˋfuna a ˋtou agasala?

¹⁰ Kafai e olo atu tatou ki se toeaina mō se fesoasoani ka maua eiloa ne tatou a fakamanuiaga, kae ka gasolo o masei atu te ˋtou tulaga māfai e taumafai tatou o ˋfuna a ˋtou agasala. I te taimi ne taumafai te tupu ko Tavita o ˋfuna ana agasala, ne logoˋmae a ia i te feitu faka-te-agaga, feitu tau lagonaga, ke oko foki loa ki te feitu faka-te-foitino. (Sala. 32:​3-5) Kafai e se ˋsaga tatou o fakaˋlei te ˋtou fakalavelave i te feitu faka-te-agaga, ka gasolo fua o masei atu te ˋtou tulaga, e pelā eiloa mo tatou māfai ko maˋsaki faka-te-foitino io me paˋkia. E malamalama a Ieova i te mea tenei, tela la, e ˋkami ne ia “ke faka‵tonu aka ne tatou a mea ke ‵tonu” i te va o tatou mo ia e auala i te fakatokaga telā ko oti ne fai ne ia ke fakaˋlei ki ei te ˋtou tulaga i te feitu faka-te-agaga.—Isa. 1:​5, 6, 18.

11. E pokotia pefea a nisi tino māfai e ˋfuna ne tatou a ˋtou agasala matagā?

¹¹ Kafai e ˋfuna ne tatou a ˋtou agasala matagā, ka mafai o pokotia i ei a nisi tino. Ka taofi foki ei ne tatou a te agaga tapu o te Atua ke mo a ma maua ne te fakapotopotoga kātoa kae fai ei ke tu i se tulaga fakamataku a te va filemu o ˋtou taina mo tuagane. (Efe. 4:30) Kafai foki ko iloa ne tatou me ne fai ne se tino i te fakapotopotoga se agasala matagā, e ˋtau o fakamalosi ne tatou a ia ke fanatu o faipati ki toeaina e uiga ki te mea tenā.a Kafai e se fakaasi ne tatou a te agasala a te suā tino, ko agasala foki i ei tatou ki a Ieova. (Levi. 5:1) E ˋtau o fakamalosi aka tatou ne te ˋtou aˋlofa ki a Ieova ke olo atu o fakaasi a te mea tonu. Mai te fai penā, ko fesoasoani tatou ke tausi te fakapotopotoga ke ˋma kae ke mafai o toe fakaˋlei aka te fesokotakiga o tino agasala mo Ieova.

E FESOASOANI MAI PEFEA A TOEAINA KI A TATOU?

12. E fesoasoani atu pefea a toeaina ki a latou kolā ko vāiˋvai i te feitu faka-te-agaga?

¹² Ne fakatonu atu ki toeaina ke fesoasoani ki a latou kolā ko vāiˋvai i te feitu faka-te-agaga. (1 Tesa. 5:14) Kafai ne agasala koe, e mafai o fai atu ne latou ne fesili ke ‘aumai ki tua’ a mafaufauga mo lagonaga o koe. (Faata. 20:5) Ka mafai o fesoasoani koe ki a latou mai te fakaasi ˋtonu atu a mea katoa i tou loto faitalia me faigata ki a koe ke fai penā ona ko tuu mo aganuu, ou uiga, io me mā koe ona ko te fakalavelave ko fepaki mo koe. Ke mo a ma manavase māfai e mafaufau koe me ne “fai valevale” au pati. (Iopu 6:3) I lō te fai fakavave ne latou se fakaikuga, e taumafai malosi a toeaina o fakalogoˋlogo fakaˋlei ke maua ne latou a te ata kātoa mai mua o tuku atu a pati fakatonutonu ki a koe. (Faata. 18:13) E iloa ne latou me e manakogina a taimi e uke ke fakamalosi te lafu mamoe, tela la, e se fakamoeˋmoe latou ke fakaˋlei aka a fakalavelave faigaˋta i se taimi fua e tasi e faiˋpati ei koutou.

13. E mafai pefea o fesoasoani mai a toeaina ki a tatou e auala i olotou ˋtalo mo fakatakitakiga mai te Tusi Tapu? (Onoono foki ki ata.)

¹³ Kafai e kalaga atu koe ki toeaina, ka taumafai latou ke mo a ma fai ke maˋsei atu ou lagonaga. I lō te fai penā, ka ˋtalo latou mō koe. Kāti ka ofo malosi koe me “e malosi ‵ki kae magoi” a ˋtalo a latou. E aofia foki i te fesoasoani e tuku mai ne latou ko te “‵mili atu a te sinu ki a [koe] i te igoa o Ieova.” (Iako. 5:​14-16) A te “sinu” tenei e fakasino atu ki te munatonu i te Muna a te Atua. E auala i te fakaaogaga ne latou a te Tusi Tapu mo te atamai, e mafai ne toeaina o fakamafanafana kae fakamalosi koe kae fesoasoani atu foki ke toe fakaˋlei aka tou va fakataugasoa mo Ieova. (Isa. 57:18) A fakatakitakiga mai te Tusi Tapu kolā e fakaasi atu ne latou, e mafai o fakamalosi ei tau fakaikuga ke tumau i te faiga o te mea tonu. E auala i a latou, ko mafai ei o lagona ne koe a te leo o Ieova e fai atu ki a koe: “Tenei te auala. Sa‵sale i ei.”—Isa. 30:21.

14. E ˋtusa mo te Kalatia 6:​1, e fesoasoani atu pefea a toeaina ki so se tino telā ko “seke te auala” o ia? (Onoono foki ki ata.)

¹⁴ Faitau te Kalatia 6:1. A te Kelisiano telā ko “seke te auala” o ia ko se sasale i tulaga amioˋtonu o te Atua. Kāti ne fai ne ia se fakaikuga sē ˋlei io me se agasala matagā. E fakamalosi aka a toeaina Kelisiano ne te alofa ke “taumafai o fakatonutonu aka te tino tenā i te agaga o te agamalu.” A te pati Eleni telā ne ˋfuli ki te “fakatonutonu” e mafai foki o fakasino atu ki te auala e fakaˋtonu aka ei se ivi telā ne fati ke mafai o mafu fakaˋlei. E pelā eiloa mo taumafaiga a se tokita apo ke fakaˋtonu se ivi telā ne fati i se auala telā e se logoˋmae malosi i ei te tino, e ˋsaga tonu foki a toeaina o fakaˋlei te masaki o se tino i te feitu faka-te-agaga e aunoa mo te fakalogoˋmae malosi atu ki a ia. Ne fakatonu atu foki ki a latou “ke fakaeteete faeloa.” I te taimi e taumafai latou ke fakatonutonu ˋtou auala, e iloa ne toeaina i a latou foki ne tino sē ˋlei katoatoa kae e mafai foki o ˋseke olotou auala. I lō te fakaasi atu a te uiga fia sili, te fia amiotonu, mo te fia fakamasinosino tino, e taumafai latou ke fakaasi atu a te loto malamalama.—1 Pe. 3:8.

15. Ne a mea e mafai o fai ne tatou māfai e isi se ˋtou fakalavelave?

¹⁵ E mafai o taliˋtonu tatou ki toeaina i ˋtou fakapotopotoga. Ne akoako latou ke mo a ma fakaasi atu a mea ˋfuna ki nisi tino, ke fakavae olotou pati fakatonutonu ki te Tusi Tapu i lō olotou manatu totino, kae ke tumau i te fesoasoani mai ki a tatou i ˋtou fakalavelave. (Faata. 11:13; Kala. 6:2) E keseˋkese olotou uiga mo olotou atamai, kae e mafai o olo atu tatou ki so se toeaina o sauˋtala mo latou e uiga ki ˋtou fakalavelave. E tonu, e se olo tatou ki toeaina taki tokotasi, o ˋsala a manatu fakatonutonu, mo te fakamoemoega ke maua a manatu kolā e maˋnako tatou ki ei. Kafai e fai tatou penā, ko pelā eiloa tatou mo tino kolā e ˋsala ki mea e logoˋtonu ki olotou taliga i lō “akoakoga aoga” mai te Muna a te Atua. (2 Timo. 4:3) Kafai e olo atu tatou o faiˋpati ki se toeaina e uiga ki ˋtou fakalavelave, kāti ka fesili mai a ia me e mata, ne faiˋpati tatou mo nisi toeaina e uiga ki te mea tenā, kae ne a foki a pati fakatonutonu ne tuku atu ne latou. Kae ka mafai o fakamalosi aka a ia ne te loto maulalo ke fesili atu ki se suā toeaina mō ne manatu fakatonutonu.—Faata. 13:10.

TE ˋTOU TIUTE TOTINO

16. Se a te tiute totino e maua ne tatou?

¹⁶ E tiga loa e fesoasoani mai a toeaina ki mamoe a te Atua, kae e se fakatonu mai ne latou a mea e ˋtau o fai. E maua ne tatou se tiute totino ke ola i se olaga tapuaki fakamaoni ki te Atua. E ˋtau o avatu ne tatou se tali ki te Atua ona ko ˋtou pati mo ˋtou faifaiga. Ka fesoasoani mai a ia ke fai ne tatou a fakaikuga ˋpoto kae ke tumau i te fakamaoni ki a ia. (Loma 14:12) Tela la, i lō te fakatonu mai a mea e ˋtau o fai ne tatou, e takitaki ne toeaina tatou ke iloa ne tatou a mafaufauga o te Atua kolā e maua i tena Muna. Mai te tauˋtali ki olotou pati fakatonutonu mai te Tusi Tapu, ko mafai ei ne tatou o akoako a “te malosi o [ˋtou] mafaufau” ke fai a fakaikuga ˋpoto.—Epe. 5:14.

17. Se a te mea e ˋtau o fakaiku aka ne tatou?

¹⁷ Ko oko loa i te gali o te tauliaga ko maua ne tatou ke fai pelā me ne mamoe a Ieova! Ne uga mai ne Ieova a “te tausi mamoe ‵lei” ko Iesu ke ˋtogi ne ia te togiola mō tatou ko te mea ke mafai o maua ne tatou a te avanoaga ke ola ki te se-gata-mai. (Ioane 10:11) Kae e auala i toeaina i te fakapotopotoga Kelisiano, ne fakataunu ei ne Ieova a tena tautoga: “Ka tuku atu ne au ki a koutou ne tausi mamoe kolā e fai a mea e loto au ki ei, kae ka fagai ne latou koutou ki te iloaga mo te ‵loto o te malamalama.” (Iele. 3:15) Kafai e vāiˋvai io me maˋsaki tatou i te feitu faka-te-agaga, ke na kaˋlaga atu ki toeaina mō te lotou fesoasoani. Ke na fakaiku aka ke fakaaoga fakaˋlei ne tatou a mea aoga mai te fakatokaga a Ieova e uiga ki toeaina i te fakapotopotoga.