Toe Auala ˋLei ke ˋSaga Atu ki Faifaiga sē ˋTonu

1-2. E ˋsaga atu pefea a tino e tokouke ki faifaiga sē ˋtonu, kae ne a mea e mafai o mafauˋfau tatou ki ei?

KO OLA nei tatou i se lalolagi fai mea sē tonu. E tokouke a tino i aso nei e fakafesagai mo faifaiga sē ˋtonu ona ko te mativa, koga ne auˋmai ei latou, olotou foliga io me ko nisi pogai aka. E logoˋmae latou i ikuga o fakalavelave i mea tau enivalomene kolā e fakamāfua aka ne tino fai pisinisi kaimaˋnako mo malo. E pokotia katoa tatou io me ko tino kolā e iloa ne tatou i faifaiga sē ˋtonu.

² E sē se mea fou ke lavea atu me e tokouke a tino e kaitāua ki faifaiga sē ˋtonu e lavea ne latou i te lalolagi i aso nei. E maˋnako a tino katoa ke se fai fakamasei latou kae ke maua te filemu. E taumafai a nisi tino ke fakaˋlei aka a fakalavelave e lavea ne latou i te lalolagi io me i olotou fenua. E fai ne latou a māti ˋteke ki malo mo te tulafono io me palota latou ki takitaki fakapolitiki kolā e tauto atu me ka fakaˋlei ne latou a fakalavelave. Kae e pelā me ne Kelisiano, ko oti ne akoakogina tatou ke se fai mo “vaega o te lalolagi” kae ke fakaˋtali ki te Malo o te Atua telā ka fakaseai ne ia a faifaiga sē ˋtonu katoa. (Ioa. 17:16) Kae koi fanoaˋnoa eiloa tatou—kae kaitāua foki—māfai e lavea ne tatou a faifaiga sē ˋtonu e fai ki nisi tino. E mafai o mafauˋfau ifo tatou penei: ‘Ne a mea e mafai ne au o fai māfai ko ˋtupu a mea konā? E mata, e isi se mea e mafai ne au o fai ki faifaiga sē ˋtonu e lavea ne au i te taimi nei?’ Ke tali aka a fesili konei, ke onoono nei tatou ki lagonaga o Ieova mo Iesu e uiga ki faifaiga sē ˋtonu.

E TAKALIAˋLIA A IEOVA MO IESU KI FAIFAIGA SĒ ˋTONU

3. Kaia e se fiaˋfia ei tatou ki faifaiga sē ˋtonu? (Isaia 5:7)

³ E fakaasi mai i te Tusi Tapu a te pogai e se fiaˋfia tatou māfai e lavea ne tatou a faifaiga sē ˋtonu. E fakamatala mai i ei me ne faite ne Ieova tatou ki ana foliga, kae e “fiafia a ia ki te amiotonu mo te fakamasinoga tonu.” (Sala. 33:5; Kene. 1:26) E se fai fakamasei ne ia a tino kae e se manako foki a ia ke fai tatou penā! (Teu. 32:​3, 4; Mika 6:8; Saka. 7:9) E pelā me se fakaakoakoga, i taimi o te pelofeta ko Isaia, ne lagona ne Ieova te “ˋtagi o te puapuaga” mai tino Isalaelu e tokouke kolā ne fai fakamasei ne nisi tino Isalaelu. (Faitau te Isaia 5:7.) Ne gasue a Ieova o fakasala a latou kolā ne ˋteke faeloa ki ana Tulafono kae fai fakamasei ne latou a nisi tino.—Isa. 5:​5, 13.

4. Se a te mea ne tupu telā e fakaasi mai i Tusi Evagelia e uiga ki te kilokiloga a Iesu ki faifaiga sē ˋtonu? (Onoono foki ki te ata.)

⁴ E pelā mo Ieova, e fiafia a Iesu ki te fai mea tonu kae takalialia ki fai mea sē tonu. I se taimi e tasi ne fai ei tena galuega talai i te lalolagi nei, ne lavea ne ia se tagata sē katoatoa ˋlei—e ˋmate tena lima. Ne alofa a Iesu ki te tagata tenā, telā ne fakaˋlei ne ia tena lima, kae i te laveaga ne takitaki lotu a te mea tenei, ne kaitāua malosi latou. Ne fai atu latou me ne soli ne Iesu a te tulafono e uiga ki te Sapati, kae ne seki fia ˋsaga atu latou ki te tagata telā ko se toe logoˋmae. Ne pefea a lagonaga o Iesu e uiga ki a latou? Ne “fanoanoa malosi a ia i te maˋkeke o olotou loto.”—Male. 3:​1-6.

5. Se a te mea e ˋtau o masaua ne tatou e uiga ki lagonaga kaitaua ki se faifaiga sē tonu?

⁵ A Ieova mo Iesu e kaitāua ki faifaiga sē ˋtonu. Tela la, e sē se mea masei māfai e fai foki tatou penā. (Efe. 4:26 mo te manatu mō sukesukega ko te “Be wrathful”) Kae e ˋtau o pule fakaˋlei atu tatou ki te kaitaua kae ke masaua me e se mafai o fakaseai ne tatou a faifaiga sē ˋtonu. A te ˋtonuga loa, kafai e nofo koe mo tou kaitaua i se taimi leva io me e se mafai o pule fakaˋlei atu ki ei, e mafai eiloa o logoˋmae tatou i mea tau lagonaga mo te feitu faka-te-foitino. (Sala. 37:​1, 8; Iako. 1:20) Tela la, e ˋtau o ˋsaga atu pefea tatou ki faifaiga sē ˋtonu? Ka tauloto tatou mai te fakaakoakoga a Iesu.

TE AUALA NE SAGA ATU A IESU KI FAIFAIGA SĒ ˋTONU

6. Ne a faifaiga sē ˋtonu ne fai ne tino i te taimi ne nofo ei a Iesu i te lalolagi nei? (Onoono foki ki te ata.)

⁶ Ne lavea ne Iesu te uke o faifaiga sē ˋtonu e fai ki tino i tena nofoga i te lalolagi. Ne molimau ne ia a te logoˋmae o tino ona ko fakatonuga e fai atu ne takitaki lotu. (Mata. 23:​2-4) Ne iloa foki ne ia a faifaiga sē ˋtonu ne fai ne takitaki Loma ki tino. Ne maˋnako a tino Iutaia e tokouke ke saoloto latou mai te kau Loma. Ne fakaˋtu aka foki ne nisi tino a potukau ˋteke ke taua atu ki te kau Loma. Kae ne seki manako a Iesu ke aofia i so se potukau telā e taua atu ke ˋfuli a te malo. I te iloaga ne ia me ne maˋnako a tino ke fai a ia mo tupu, ne fano keaˋtea a Iesu mai i a latou.—Ioa. 6:15.

7-8. Kaia ne seki taumafai ei a Iesu o fakaseai atu a faifaiga sē ˋtonu i tena nofoga i te lalolagi nei? (Ioane 18:36)

⁷ I tena nofoga i te lalolagi, ne seki taumafai a Iesu o gaˋlue fakatasi mo malo fakapolitiki i aso konā ko te mea ke fakaseai atu ei a faifaiga sē ˋtonu. Kaia? Ne iloa ne ia me e seai se aiā o tino ke pule atu ki nisi tino. (Sala. 146:3; Iele. 10:23) E se mafai foki ne latou o fakaseai atu a te māfuaga o faifaiga sē ˋtonu. A te lalolagi e pulegina ne Satani te Tiapolo, se tino faka-te-agaga tatino telā e fakaaoga ne ia tena tulaga pule ke fakamalosi aka ei a faifaiga sē ˋtonu. (Ioa. 8:44; Efe. 2:2) Kae ona ko te tulaga sē ˋlei katoatoa, e se mafai foki ne tino ˋlei o fakaˋlei aka a fakalavelave kolā e māfua mai i faifaiga sē ˋtonu.—Fai. 7:20.

⁸ Ne iloa ne Iesu me ko te Malo fua o te Atua ka fakaseai atu ne ia a te māfuaga o faifaiga sē ˋtonu katoa. Ona ko te pogai tenā, ne fakamāumāu ei ne ia ana taimi mo tena malosi o “talai kae folafola atu te tala ˋlei e uiga ki te Malo o te Atua.” (Luka 8:1) Ne fakatalitonu atu a ia ki a “latou kolā e fiaˋkai kae fiainu ki te amiotonu” me ko pili o fakaseai atu a faifaiga sē ˋtonu kae sē fakamaoni katoa. (Mata. 5:6 mo te manatu mō sukesukega; Luka 18:​7, 8) Ka seai eiloa se malo o tāgata ka mafai ne ia o fai a ˋfuliga konā, kae ko te Malo fua o te Atua, telā “e sē se vaega o te lalolagi tenei,” ka fakataunu ne ia te mea tenā.—Faitau te Ioane 18:36.

FAKAAKOAKO KI A IESU MĀFAI E FAKAFESAGAI ATU KI FAIFAIGA SĒ ˋTONU

9. Kaia e talitonu ei koe me ko te Malo fua o te Atua ka fakaseai atu ne ia a faifaiga sē ˋtonu katoa?

⁹ I aso nei, ko uke atu a faifaiga sē ˋtonu e lavea ne tatou i lō te taimi ne nofo ei a Iesu i te lalolagi nei. Kae koi fai eiloa a Satani e pelā foki mo tino sē ˋlei katoatoa kolā e fakamalosi ne ia, e pelā me ko te māfuaga o faifaiga sē ˋtonu i “aso fakaoti konei.” (2 Timo. 3:​1-5, 13; Faka. 12:12) E pelā mo Iesu, e iloa ne tatou me ko te Malo fua o te Atua ka fakaseai atu ne ia te māfuaga o faifaiga sē ˋtonu katoa. Ona ko te mea e ˋlago katoatoa tatou ki te Malo tenā, e se maˋnako tatou ke aofia i māti ˋteke mo nisi taumafaiga ke fakaseai a faifaiga sē ˋtonu. Mafaufau ki te tala o te tuagane e igoa ki a Stacy.a Mai mua o tauloto a ia ki te munatonu, ne aofia faeloa a ia i potukau kolā ne fai a māti ˋteke ki te malo ke fakaseai atu a faifaiga sē ˋtonu. Kae ne kamata o fakalotolotolua a ia ki ana mea ne fai. Ana muna: “Kafai ko fanatu au i māti ˋteke, e mafaufau au me e mata, e tonu eiloa te feitu e kau au ki ei. Nei la, ko ˋlago atu au ki te Malo o te Atua, ko mautinoa eiloa i a au, me ko kau au ki te feitu tonu. Ko iloa ne au me ka fakaseai atu eiloa ne Ieova a faifaiga sē ˋtonu katoa kolā e se mafai ne au o fai.”—Sala. 72:​1, 4.

10. I te auala fea e se fetaui ei a mea e fai ne potukau o tino kolā e ˋteke ki te malo mo pati fakatonutonu a Iesu i te Mataio 5:​43-48? (Onoono foki ki te ata.)

¹⁰ A potukau o tino i te lalolagi tenei kolā e masani o ˋteke atu ki te malo, e maua sāle ne latou te uiga fia tu tokotasi kae kaitāua telā e ˋkese ˋki eiloa mai te fakaakoakoga mo akoakoga a Iesu. (Efe. 4:31) Ne fai mai se taina e igoa ki a Jeffrey, penei: “E iloa ne au me i māti ˋteke kolā e fai mo te filemu, e mafai fua o ˋfuli fakavave ki faifaiga fakasaua mo te kaisoa.” Kae e akoako mai a Iesu ki a tatou ke aˋlofa ki tino katoa ke oko foki ki tino kolā e ˋteke kae fakasaua mai ki a tatou. (Faitau te Mataio 5:​43-48.) E pelā me ne Kelisiano, e fai ne tatou te ˋtoe mea e mafai ke ˋkalo keaˋtea mai so se mea telā e se fetaui mo te fakaakoakoga ne tuku mai ne Iesu ki a tatou.

11. Se a te mea e mafai o tofotofo aka i ei te ˋtou fakaikuga ke se ˋlago atu ki potukau ˋteke kolā e taumafai o ˋfuli te malo?

¹¹ E tiga e iloa ne tatou me ka fakaˋlei katoatoa ne te Malo o te Atua a faifaiga sē ˋtonu, e mafai o faigata ki a tatou ke fakaakoako ki a Iesu māfai ko fakafesagai tatou ki faifaiga sē ˋtonu. Mafaufau ki te mea ne tupu ki a Janiya, telā ne fai fakamaseigina ona ko tena ˋkala. Ne fai ˋtonu mai a ia: “Ne kaitaua malosi au. Ne logoˋmae kae manako foki au o taui atu a te mea tenā. Tenā ne mafaufau ei au o kau atu ki se potukau o tino ˋteke ki faifaiga fakailoga tino mo te fakakeseˋkesega o ˋkala. Ne mafaufau au me i te faiga tenā se auala ˋlei ke fakaasi atu ei a toku kaitaua.” Kae fakamuli loa, ne iloa aka ne Janiya, me e ˋtau o fai ne ia a ˋfuliga. Ne fai mai a ia: “Ne iloa aka ne au, me i lō te talitonu ki a Ieova, ne kamata o talitonu au ki pati a tino. Ne fakaiku aka ei ne au ke se kau atu ki te potukau ˋteke tenā.” E tiga eiloa e kaitāua tatou māfai ko fai fakamaseigina, io me lavea ne tatou a tino e fai fakamasei, e ˋtau o fakaeteete tatou ke pule fakaˋlei atu ki te kaitaua kae ke tumau i te sē fai mo fai se vaega o te lalolagi i taimi katoa.—Ioa. 15:19.

12. Kaia e fai ei pelā me se faiga poto ke filifili fakaˋlei a fakamatalaga kolā e faiˋtau, fakalogoˋlogo io me onoono tatou ki ei?

¹² Se a te mea e mafai o fesoasoani mai ke pule fakaˋlei atu tatou ki lagonaga kaitāua ona ko faifaiga sē ˋtonu? Ne maua ne tino a fesoasoani aoga mai te filifili fakaˋlei a mea e faiˋtau, fakalogoˋlogo kae onoono latou ki ei. A nisi tala i te itaneti e fakaasi mai i ei a fakamatalaga kolā e fai ei ke ˋpoi a tino kae fakamasei ei a te malo. E masani o fai ne tino fakasalalau a olotou manatu totino i lō a fakamatalaga ˋtonu ki se mea ne tupu. Kafai foki loa e ˋtonu a fakamatalaga ki se tala, e mata, e aoga ke tumau i te faiˋtau faeloa ki ei? A te ˋtonuga loa, kafai e fakamāumāu ne tatou a taimi e uke ke fakalogoˋlogo io me faiˋtau ki vaegā tala penā, ka fai fua i ei ke manavaˋse malosi tatou, fanoaˋnoa kae kaitāua foki. (Faata. 24:10) Kae sili atu i te masei, ka mafai o puli i a tatou me i te fakaˋleiga ki faifaiga sē ˋtonu katoa ko te Malo o te Atua.

13. E mafai pefea o fesoasoani mai te faiga o se polokalame ˋlei ke faitau ki te Tusi Tapu ke fakatumau ei ne tatou se kilokiloga ˋlei ki faifaiga sē ˋtonu?

¹³ E mafai o fesoasoani mai a te faiga o se polokalame ˋlei ke faitau ki te Tusi Tapu kae mafaufau ˋloto ki ei, ke mafai o fakafesagai atu tatou ki faifaiga sē ˋtonu. Ne fanoanoa malosi se tuagane e igoa ki a Alia ki te auala ne fai fakamasei ei a tino i tena fakai. Ne foliga mai me ne seki fakasala a tino kolā ne fai ne latou a mea konā. Ana muna: “Ne ˋtau mo au o sagasaga ki lalo kae fesili ifo penei, ‘E mata, e talitonu au me ka fakaˋlei aka ne Ieova a fakalavelave konei?’ Ko te taimi eiloa tenā ne faitau ei au ki te Iopu 34:​22-29. E fakamasaua mai i fuaiupu konā me e seai se tino e mafai o ˋmuni mai i a Ieova. Ko ia fua e ˋlei katoatoa a tena fai mea tonu, kae ko ia fua ka fakaˋlei katoatoa ne ia a mea.” Kae i te taimi koi fakataliˋtali ei tatou ke aumai ne te Malo o te Atua a te fakamasinoga tonu, e ˋtau eiloa mo tatou o fakafesagai atu ki faifaiga sē ˋtonu i te taimi nei. E pefea la?

MEA E MAFAI NE TATOU O FAI KI FAIFAIGA SĒ ˋTONU I TE TAIMI NEI

14. Se a te mea e mafai ne tatou o fai ke ˋkalo keaˋtea mai te fakamalosi aka a faifaiga sē ˋtonu i te lalolagi tenei? (Kolose 3:​10, 11)

¹⁴ Kāti e se mafai o pule fakaˋlei atu tatou ki faifaiga sē ˋtonu a nisi tino kae e mafai o pule atu tatou ki ˋtou faifaiga. E pelā mo mea ko oti ne sauˋtala tatou ki ei, e mafai o fakaakoako tatou ki a Iesu mai te fakaasi atu o te alofa. E mafai o fakamalosi aka tatou ne te alofa tenā ke fai fakaˋlei ki nisi tino mo te āva ke oko foki loa ki a latou kolā e fai fakamasei ne latou a tatou. (Mata. 7:12; Loma 12:17) E fiafia a Ieova māfai e fakaasi atu ne tatou a te alofa mo te sē fakailoga tino ki nisi tino.—Faitau te Kolose 3:​10, 11.

15. E fesoasoani atu pefea tatou ki tino mai te fakaasi atu ki a latou a mea e akoako mai i te Tusi Tapu?

¹⁵ A te ˋtoe auala tāua ke ˋsaga atu tatou ki faifaiga sē ˋtonu, ko te fakaasi atu o munaˋtonu i te Tusi Tapu ki nisi tino. Kaia e fai atu ei tatou penā? Me e mafai ne “te iloaga o Ieova” o ˋfuli se tino telā ne uiga kaitaua kae amio fakasaua muamua ki se tino alofa kae uiga filemu. (Isa. 11:​6, 7, 9) A koi tuai o tauloto ki te munatonu, ne kau atu se tagata e igoa ki a Jemal ki se potukau ˋteke telā e taumafai o ˋfuli a te malo telā ne mafaufau a ia me e se ˋlei. Ana muna: “E se mafai o faimalō ne koe a tino ke ˋfuli. Ne seki faimalō au ke ˋfuli, kae ne ˋfuli eiloa au ne te munatonu i te Tusi Tapu telā ne tauloto ne au.” A mea kolā ne tauloto ne Jemal ne fakamalosi atu ki a ia ke fakagata te taua atu. Ko te uke o tino kolā e ˋfuli ne te munatonu i te Tusi Tapu, ko te muˋtana foki o tino e fai ne latou a faifaiga sē ˋtonu.

16. Kaia e manako koe o fakailoa atu ki tino a te fakamoemoega e uiga ki te Malo?

¹⁶ E pelā mo Iesu, e maˋnako malosi tatou o fakailoa atu ki tino me ka aumai ne te Malo o te Atua a te fakaˋleiga tumau ki faifaiga sē ˋtonu. A te fakamoemoega tenā e mafai o fakamalosi atu ki tino kolā ne fai fakamaseigina. (Iele. 29:11) A Stacy, telā ne taku mai muamua, ne fai mai penei: “A te tauloto ki te munatonu ne fesoasoani mai ke kufaki au i faifaiga sē ˋtonu ne lavea ne au io me ne fakafesagai mo au. E fakaaoga ne Ieova a te fekau i te Tusi Tapu ke tuku mai ei a fakamafanafanaga.” Ke fakailoa atu a te fekau fakamafanafana i te Tusi Tapu e uiga ki te fakaˋleiga ki faifaiga sē ˋtonu, e ˋtau eiloa mo koe o fakatoka fakaˋlei. Ko te lasi o tou loto talitonu ki te ˋtonu o manatu faka-te-Tusi Tapu kolā ne sauˋtala ki ei i te mataupu tenei, ko te toka ˋlei foki o koe ke fakamatala atu a te mataupu tenei mo te poto māfai e sae aka i te akoga io me i te koga gaˋlue.b

17. E fesoasoani mai pefea a Ieova ke kufaki tatou i faifaiga sē ˋtonu i te taimi nei?

¹⁷ E iloa ne tatou me i te taimi koi pule mai a Satani, te “pule o te lalolagi tenei,” ka feˋpaki eiloa tatou mo faifaiga sē ˋtonu. Kae ka maua eiloa ne tatou te fesoasoani mo se fakamoemoega i te taimi e fakaˋtali ei tatou ke “ˋtuli keaˋtea” a ia. (Ioa. 12:31) E auala i te Tusi Tapu, e fakaasi mai ne Ieova a te pogai ko uke i ei a faifaiga sē ˋtonu e penā foki loa mo ana lagonaga e uiga ki puapuaga kolā e pokotia i ei tatou. (Sala. 34:​17-19) E auala i tena Tama, e akoako mai ne Ieova te auala e ˋtau o ˋsaga atu tatou ki faifaiga sē ˋtonu i te taimi nei, mo te auala ka fakaseai katoatoa atu ei ne tena Malo i se taimi pili mai mua a faifaiga sē ˋtonu. (2 Pe. 3:13) Tela la, ke na tumau i te talai atu ne tatou te tala ˋlei o te Malo tenā mo te loto finafinau, kae olioli ki te taimi ka fakaˋfonu ei te lalolagi ki te “fakamasinoga tonu mo te amiotonu.”—Isa. 9:7.