2. E Mata, e ‵Tau o ‵Losi ki a Tatou Eiloa a ‵Tou Logo‵maega?

Te Pogai e Tāua ke Iloa ne Tatou

Kafai te tali ko te ao, ko tena uiga, kāti e mafai ne tatou i ‵tou malosi eiloa o fakafeoloolo aka a logo‵maega.

Ke Mafau‵fau ki ei

Kaia e ‵losi atu ei ki tino a fakalavelave konei mai lalo kolā e māfua mai i ei a logo‵maega?

• 

  Amioga Ma‵sei.

  E tuku taumate ne te World Health Organization (WHO) me e nofo ki te toko 1 mai te toko 4 tino ma‵tua e logo‵mae ona ko amioga fakasaua mai te folikiga kae toko 1 mai te toko  3 fāfine e logo‵mae ona ko amioga fakasaua io me ko amioga fakatauavaga sē ‵tau (io me ko te avā mea konei) i nisi taimi i olotou olaga.

• 

  Te ‵Galo Atu o ‵Tou Tino Pele.

  “E tuku taumate me e nofo ki se 477,000 tino ne tamate i te lalolagi kātoa i te 2016,” ko pati i te World Health Statistics 2018, telā ne ‵lomi ne te WHO. E fakaopoopo atu ki ei ko te toko 180,000 tino kolā ne fakatautau me ne ‵mate i taua i te tausaga tenā.

• 

  Masaki.

  I se mataupu i te mekesini ko te National Geographic, ne tusi mai a Fran Smith me e silia atu mo te piliona o tino e ‵pusi, kae ko te paka e aofia i nisi mea kolā e fakamāfua aka i ei a te ‵mate o tino, e pelā mo te fatu vāivāi, ‵mate te foitino, gaegae, mo te kenisa o te māmā.

• 

  Fakailoga Tino.

  “A te mativa, te fakailoga tino, te fakakese‵kesega i tulaga o tāgata mo fāfine, te faiga o tino ke ‵sola ki nisi koga mo fakatau‵faiga i mea tau tuu a fenua, e fakamāfua aka ne latou a logo‵maega i mea tau te mafaufau,” ko pati a Jay Watts, se tokita o te mafaufau.

  KE TAULOTO KI MEA E TAI UKE ATU

  Onoono ki te vitio Kaia ne Faite ne te Atua te Lalolagi? i te jw.org.

Pati a te Tusi Tapu

E māfua mai i tino a te ukega o logo‵maega.

A te ukega o logo‵maega konā ne māfua mai i malo ‵teke kolā ne fakafaigata ne latou a olaga o tino kolā e ‵nofo mai lalo i olotou pulega.

‘Ne pule te tagata ki te suā tagata kae logo‵mae i ei.’—FAILAUGA 8:9.

E mafai o fakafeoloolo aka a logo‵maega.

E fakamalosi aka ne fakatakitakiga i te Tusi Tapu se olaga tai ‵lei atu mo fesokotakiga ‵lei mo nisi tino.

“A te loto telā e filemu e tuku mai i ei te ola ki te foitino, kae ko te loto masei e fai pelā me ne ivi ‵pala.”—FAATAOTO 14:30.

“Ke ave kea‵tea mai i a koutou a vaega katoa o te loto masei, te loto ita, te kaitaua, te paka‵laga valevale, mo pati faka‵mae loto, e pelā foki mo mea katoa kolā e logo‵mae ei a tino.”—EFESO 4:31.