Fakatakitakiga ke Maua a Va Filemu

Ke Loto Fakamagalo

“Fakatau fakamagalo atu [faeloa] te suā tino ki te suā tino māfai e isi se pogai e fameo ei se tino ki te suā tino.”—KOLOSE 3:13.

E fai ne tatou katoa a mea ‵se. E mafai o fai ei ke kaitaua a nisi tino io me kaitaua tatou. Kae e ‵tau eiloa o fakamagalo ne tatou a nisi tino io me e fakamagalo ne nisi tino a tatou. Kafai e fakamagalo ne tatou se tino, ko seai se loto kaitaua i a tatou ki a ia. E se ‵tau mo tatou o “taui atu te masei ki te masei,” kae e se fakamasaua atu faeloa ne tatou ki te tino ana mea ‵se io me ko ana vāivāiga. (Loma 12:17) Kae e a māfai ne logo‵mae malosi tatou kae e se mafai o taofi aka te mafau‵fau faeloa ki te mea ne tupu? Tenā ko ‵tau ei mo tatou o fai‵pati atu fua mo te āva ki te tino tenā e uiga ki ei. E fakamoe‵moe tatou ke maua te filemu kae e se ko te manumalo i te kinauga.—Loma 12:18.

Ke Loto Maulalo Kae Āva

“Kae i te loto maulalo mo te manatu me e tāua atu a nisi tino i a koutou.”—FILIPI 2:3.

Kafai tatou e loto maulalo kae āva, e fia‵fia a tino ki a tatou. E iloa ne latou me e atafai tatou kae ka se mafai o fakalogo‵mae ne tatou a latou. Kae kafai e maua ne tatou se kilokiloga me e sili atu tatou i nisi tino io me e faimalo atu faeloa ‵tou manatu, e fakamalosi aka ei ne tatou a kinauga mo va sē ‵lei. Ka ‵kalo keatea a tino mai i a tatou, kae ka se tokouke ‵tou taugasoa.

Ke se Fakailoga Tino

“Te Atua e se fakailoga tino, kae ko te tino mai so se fenua telā e mataku ki a ia kae fai mea tonu e talia eiloa ne ia.”—GALUEGA 10:34, 35.

A te ‵tou Mafuaga e se fapito ki tino ona ko te lotou fenua, ‵gana, tulaga i te olaga, io me ko ‵lanu. “Ne faite ne ia mai i te tagata e tokotasi a itukāiga o tino i fenua katoa.” (Galuega 17:26) Tela la, a tino katoa ne taina mo tuagane. Kafai e fakaasi atu ne tatou ki tino katoa a te āva mo te atafai, e fai ne tatou ke fia‵fia latou, ka fia‵fia tatou, kae ka fiafia foki te ‵tou Mafuaga.

Ke Agamalu

“Ke fakapei ki luga i a koutou a te . . . agamalu.”—KOLOSE 3:12.

Kafai e agamalu tatou, e fai ei a nisi tino ke mo a ma ma‵taku. Ka se ma‵taku latou o fai‵pati mai io me e fakatonu mai me e iloa ne latou me ka se kaitaua tatou. Kae kafai ko kaitaua se tino ki a tatou, a te tali atu mo te agamalu ka fai ei ke filemu a ia. “A te tali atu mo te filemu e fai ei ke galo te kaitaua, kae ko pati ‵mafa e fakamalosi aka i ei te kaitaua,” ko pati i te Faataoto 15:1.

Ke Kaimalie Kae Loto Fakafetai

“E sili atu te fiafia o te tino telā e tuku atu ana mea i lō te maua ne ia.”—GALUEGA 20:35.

E kaima‵nako a tino e tokouke i aso nei kae mafau‵fau fua ki a latou eiloa. Kae ko te fiafia tonu e maua ne latou kolā e kaima‵lie. (Luka 6:38) A tino kaima‵lie e fia‵fia me e a‵lofa latou ki tino i lō kope. Ko te alofa foki tenā e fakamalosi atu ki a latou ke loto fakafetai māfai ne fakaasi atu ne se tino a te uiga kaimalie. (Kolose 3:15) Fesili ifo, ‘Ko oi a tino e fiafia au ki ei—ko latou kolā e kaiū kae se loto fakafetai io me ko tino kaima‵lie kae loto fakafetai?’ Se a te manatu tāua? Ke fakaasi atu a uiga kolā e manako koe ke fakaasi atu ne nisi tino.—Mataio 7:12.