MEA E MAFAI O FAI ONA KO TE ˋTOGI ˋMAFA O MEA

Ke Kaimalie

Kafai e faigata ki a koe ke fakafesagai atu ki te ˋtogi ˋmafa o mea, kāti ka mafaufau koe me e se mafai o fakaasi atu ne koe te kaimalie. Kae kafai e kaimalie koe o tuku atu au mea ki nisi tino, ka fesoasoani atu eiloa te mea tenā ke iloa ne koe o fakafesagai atu ki mea faigaˋta i mea tau tupe. E mafai eiloa ne koe o fakaaoga fakaˋlei au tupe kae kaimalie i nisi tino.

POGAI E TĀUA EI

A te kaimalie e fai ei tatou ke fiaˋfia kae maua ne tatou a lagonaga ˋlei faitalia te foliki o te mea ne tuku atu ne tatou. A te ˋtonuga loa, e fakaasi mai i sukesukega ne fai ne tino me i te tuku atu o mea, e mafai o aoga ki te ola ˋlei o tatou. E pelā me se fakaakoakoga, e mafai o fakafeoloolo ne ia te manavase, te mafatia, te toto maluga, ke oko foki loa ki logoˋmaega o tatou. E mafai foki o fai ei ke ˋto fakaˋlei ˋtou ˋmoe.

“E sili atu te fiafia o te tino telā e tuku atu ana mea i lō te maua ne ia.”—Galuega 20:35.

Kafai e tuku atu ne tatou a mea ki nisi tino faitalia me ne tupe io me ne nisi mea aka, ka mafai o faigofie ki a tatou ke talia te fesoasoani i te taimi e manakogina ei ne tatou. Ne fai mai a Howard, telā e nofo i Egelani, penei: “Kafai e onoono māua ki auala ke fakaasi atu te kaimalie ki nisi tino kae fesoasoani atu ki a latou, e fai ei ke ˋlei a lagonaga o māua mo taku avaga māfai ko manakogina ne māua te fesoasoani.” E tonu, a tino kolā e uiga kaimaˋlie e se fakamoeˋmoe ke maua ne latou ne mea mai nisi tino. Kae ko mea kolā e mafai o maua ne latou, ko taugasoa ˋtonu kolā e toka o fesoasoani atu i taimi e maˋnako latou ki ei.

“Fakamasani o tuku atu ki nisi tino kae ka tuku atu ne tino ki a koutou.”—Luka 6:38.

MEA E MAFAI NE KOE O FAI

Tufa atu au mea. Kafai e se uke au mea e mafai o tuku atu, koi mafai eiloa o tuku atu ne koe se mea e pelā mo te fakatoka ne mu meaˋkai ke ˋkai fakatasi mo se tino. A Duncan mo tena kāiga kolā e ˋnofo i Uganda, e se mauˋmea kae e uiga kaimaˋlie latou. Ne fai mai a Duncan: “I Aso Sa e masani o ˋkami ne māua mo taku avaga se tino ki te mā fale ke ˋkai fakatasi mo ia i mu meakai kolā e mafai o maua. E fiaˋfia eiloa māua o fakatasitasi mo nisi tino.”

E tonu, e ˋtau o loto malamalama koe māfai e tuku atu au mea ki nisi tino. E se manako koe ke tuku atu a mea e uke ˋki kolā e faigata o maua ne te otou kāiga.—Iopu 17:5

ˋTofo te mea tenei: ˋKami mai se tino ke ˋkai koulua i au mu meakai io me inu tī fakatasi koulua. Kafai e isi ne ou kope kolā ko se fakaaoga ne koe, kaia e se avatu ei ne koe ki ou taugasoa io me ne tuakoi kolā e mafai o fakaaoga kae fakatāua ne latou?

Tuku atu i nisi auala. Nisi toe meaalofa ˋlei e se ˋtogi ki tupe. E pelā mo te tuku atu ne tatou a ˋtou taimi mo te ˋsaga tonu atu o fesoasoani ki nisi tino. Ke oko foki loa ki pati kolā e fai atu mo te aˋlofa e fai pelā me se meaalofa! Tela la, fai atu ki nisi tino a te lasi o tou loto fakafetai mo tou alofa mō latou.

ˋTofo te mea tenei: Fesoasoani atu o fai a galuega a nisi tino, te faitega o olotou fale, io me fai olotou fekau. Tusi se card ki tou taugasoa ke fakaasi atu te lasi o tou loto fakafetai, io me lafo atu se fekau ki a ia faitalia me fai atu fua koe me mafaufau koe e uiga ki a ia.

Kafai e onoono koe ki auala ke fakaasi atu te kaimalie, ko ˋtala eiloa ne koe te mataloa ki fakamanuiaga e uke.

“Ke mo a ma puli o fai a mea ˋlei kae tufa atu a mea kolā ko maua ne koutou ki nisi tino.”—Epelu 13:16.

Se tauavaga e fesoasoani atu ki se fafine matua i tua i te matāfale. E tuku atu ne tou fafine ne ipu ˋvela ki a lāua i te taimi e ˋteu kae fakaputu ne lāua a lau.