Kaia ko se Āva ei a Tino ki Nisi Tino?

TE POGAI E TĀUA EI KE ĀVA KI NISI TINO

Kafai e āva tatou ki nisi tino, ka fakafeoloolo aka ne tatou te tulaga masei tenā ke mo a e gasolo o masei atu.

E fai mai penei se faigamuna i te Tusi Tapu: “A te tali atu mo te filemu e fai ei ke galo te kaitaua, kae ko pati ‵mafa e fakamalosi aka i ei te kaitaua.” (Faataoto 15:1) A pati mo faifaiga sē āva ko pelā loa me se fiuolo e faka‵ka ne ia te afi, kae maua faeloa mai i ei a ikuga sē ‵lei.
Ne fai mai a Iesu: “E faipati mai ne te gutu a mea kolā e ‵fonu i te loto.” (Mataio 12:34) Kafai tatou e se āva, e fakaasi atu i ei ne tatou a ‵tou lagonaga ‵tonu e uiga ki tino kolā e ‵kese olotou telega, itukāiga, fenua io me ko olotou tulaga i te olaga mo tatou.

I se savea fakamuli nei telā ne aofia i ei a tino e toko 32,000 mai fenua e 28, ne fai mai se 65 pasene o tino konā, me ko siliga atu te sē āva o tino i aso nei i lō aso mua.

MEA E MAFAI NE KOE O FAI

Ke āva ki tino katoa i te akoga io me i te koga ga‵lue faitalia me e se ‵lago koe ki olotou kilokiloga. Onoono ki mea kolā e mafai o lotomalie koe ki ei. Ka fesoasoani atu ke kalo kea‵tea koe mai te fakatauemu io me fakamasinosino tino.

“Sa fakamasino atu ko te mea ke se fakamasinogina koutou.”—Mataio 7:1.

Fai ki tino a mea kolā e manako koe ke fai mai ne latou ki a koe. Kafai koe atafai kae fai faka‵lei ki tino, ka fai faka‵lei foki ne latou a koe.

“E pelā foki mo mea kolā e ma‵nako koutou ke fai atu ne tino ki a koutou, ke fai foki ne koutou ki a latou.”—Luka 6:31.

Ke loto fakamagalo. Talitonu me ne seki manako tonu eiloa a te tino tenā o fakafanoanoa koe.

“A te ‵loto o te malamalama o se tagata e fakatuai ei tena kaitaua, kae se mea gali ke se saga atu a ia ki se mea sē ‵lei ne fai ki a ia.”—Faataoto 19:11.

I loto i te Fale Tapuaki o Molimau a Ieova mai mua o kamata se fakatasiga a te fakapotopotoga. E fakatalofa kae sau‵tala fakatasi a tino mai kautama mo telega kese‵kese.

MEA E FAI NE MATOU

I fenua e ‵nofo kae ga‵lue i ei a Molimau a Ieova, e fakamalosi eiloa ne latou a te āva ki nisi tino.

E ofo atu ne matou a akoakoga sē ‵togi mai te Tusi Tapu ki tino katoa, kae e se faimālō ne matou a motou talitonuga io me ko manatu ki nisi tino. I lō te fai penā, e taumafai matou o fakagalue aka a pati fakatonutonu i te Tusi Tapu mai te fakaasi atu a te motou fekau “i te agamalu mo te āva lasi.”—1 Petelu 3:15; 2 Timoteo 2:24.

E se fakakese‵kese ne matou a tino kae ‵kami ne matou ki motou fakatasiga a tino mai telega kese‵kese kolā e ma‵nako o tauloto ki mea e akoako mai i te Tusi Tapu. E taumafai matou ke loto malama‵lama kae ke “fakaasi te āva ki vaegā tino katoa.”—1 Petelu 2:17.

E āva matou ki tino pule‵pule o te malo kolā e pule mai ki a matou. (Loma 13:1) E faka‵logo matou ki te tulafono kae ‵togi a motou lafoga. Kae tiga loa e se ‵kau matou ki se feitu i mea fakapolitiki, e āva matou ki te saolotoga o nisi tino ke fai olotou fakaikuga totino e uiga ki mea fakapolitiki.