Kaia e Āva ei Tatou ki Pulega?

1, 2. (a) I a ai te takitakiga e ‵tau mo tatou o faka‵logo ki ei? (e) Ne a fesili ka sau‵tala ki ei i te mataupu tenei?

I TE taimi koi foliki i ei koe, kāti e isi ne taimi ne fai atu ou mātua ke fai ne koe se mea telā e se fiafia koe o fai. E alofa koe ki ou mātua kae iloa ne koe me ‵tau o fakalogo koe ki a lāua. Kae masani sāle o se manako koe o fakalogo ki a lāua.

² E iloa ne tatou i a Ieova, te ‵tou Tamana, e alofa mai ki a tatou. E tausi mai a ia ki a tatou kae fakamautinoa aka me maua ne tatou a mea katoa kolā e manakogina i te olaga, ke fia‵fia tatou. E tuku mai ne ia te takitakiga telā e manakogina ke manuia i ei tatou. I nisi taimi e fakaaoga ne ia a nisi tino ke tuku mai ne latou a takitakiga. E ‵tau mo tatou o āva ki te pulega a Ieova. (Faataoto 24:21) Kae kaia i nisi taimi e faigata i ei ke talia ne tatou a takitakiga? Kaia ne fai mai a Ieova ke faka‵logo tatou ki takitakiga? Kae fakaasi atu pefea ne tatou me āva tatou ki tena pulega?—Onoono ki te Fakamatalaga Fakaopoopo i te 9.

KAIA E FAIGATA I EI?

3, 4. Ne maua pefea ne tino te tulaga sē ‵lei katoatoa? Kaia e faigata ei ki a tatou ke talia a te takitakiga mai i nisi tino?

³ A tatou tino ola, e isi faleoa se uiga ‵teke i a tatou. Ko oti ne fakatalitonugina te mea tenei talu mai i te tagata mo te fafine muamua, ko Atamu mo Eva kolā ne agasala. E tiga eiloa ne faite lāua ke ‵lei katoatoa, ne ‵teke atu lāua ki te pulega a te Atua. Tela la, ko agasala ei a tino katoa. A te ‵tou tulaga sē ‵lei katoatoa ko te pogai e tasi e faigata ei ki a tatou ke talia a te takitakiga mai i a Ieova mo tāgata. A te suā pogai, ko latou kolā e fakaaoga ne Ieova ke fai ne latou te takitakiga ne tino sē ‵lei katoatoa.—Kenese 2:15-17; 3:1-7; Salamo 51:5; Loma 5:12.

⁴ Ona ko tatou e se ‵lei katoatoa, e maua ne tatou te uiga fakamatamata. E fai ne te fakamatamata ke faigata i a tatou o talia a takitakiga. E pelā mo tino Isalaelu i aso mua, ne fili ne Ieova a Mose ke takitaki ne ia Ana tino. E isi se tagata e fakaigoa ki a Kola, telā ne tavini ki a Ieova i tausaga e uke, ne fakamatamata a ia kae fakaasi atu ne ia te sē āva ki a Mose. E ui eiloa ne takitaki ne Mose a tino o te Atua, kae ko ia e sē se tagata fakamatamata. Ne taku a ia e pelā me ko te ‵toe tagata loto maulalo ne ola i aso konā. Kae ne seki talia ne Kola te takitakiga a Mose. Ne fakamalosi aka foki ne ia a nisi tino e tokouke ke ‵teke tasi atu latou ki a Mose. Se a te mea ne tupu ki a Kola mo tino ‵teke? Ne tamate latou. (Numela 12:3; 16:1-3, 31-35) E maua ne tatou i te Tusi Tapu a fakaakoakoga e uke kolā e akoako mai ki a tatou a te fakamataku o te fakamatamata.—2 Nofoaiga Tupu 26:16-21; onoono ki te Fakamatalaga Fakaopoopo i te 10.

5. Ne fakaaoga ‵se pefea ne nisi tino olotou malosi pule?

⁵ Kāti ko oti ne lagona ne koe te tugapati, “Te malosi pule e fakamasei tino.” Talu mai tala fakasolopito, e tokouke a tino ne fakaaoga ‵se olotou malosi pule. (Faitau te Failauga 8:9.) E pelā mo Saulo, se tagata ‵lei kae loto maulalo i te taimi ne fili ei ne Ieova ke fai mo tupu o Isalaelu. Kae ne talia ne ia te fakamatamata mo te loto masei ke tupu aka i loto i tena loto, telā ne fakasaua ne ia a Tavita, se tagata e seai sena mea ‵se. (1 Samuelu 9:20, 21; 10:20-22; 18:7-11) Fakamuli ifo, ne fai a Tavita mo tupu, kae se tokotasi foki o toe tupu ‵lei i Isalaelu. Kae fakamuli ifo, ne fakaaoga ‵se ne ia tena malosi pule. Ne ‵moe fakatauavaga lāua mo Patisepa, te avaga a Ulia, kae ne taumafai o ‵funa tena agasala mai te ugaatuga o Ulia ke mate i te taua.—2 Samuelu 11:1-17.

KAIA E ĀVA EI TATOU KI TE PULEGA A IEOVA

6, 7. (a) Se a te mea ka fakamalosi aka ne te ‵tou alofa ki a Ieova ke fai ne tatou? (e) Se a te mea ka fesoasoani mai ke faka‵logo tatou faitalia te sē faigofie ke fai penā?

⁶ E āva tatou ki te takitakiga a Ieova ona ko tatou e a‵lofa ki a ia. Ona ko tatou e a‵lofa ki a Ieova i lō so se mea io me so se tino, e ma‵nako tatou ke fakafiafia atu ki a ia. (Faitau te Faataoto 27:11; Maleko 12:29, 30.) Talu mai i te taimi ne ola ei te tauavaga muamua i te fatoaga o Etena, ne manako a Satani ke fakafesili ne tino te pulega a Ieova. E manako te Tiapolo ke mafau‵fau tatou me seai se aiā o Ieova ke fai mai te mea e ‵tau o fai ne tatou. Kae e iloa ne tatou a te mea tenā se loi. E lotoma‵lie tatou ki pati konei: “E ‵tau eiloa o maua ne koe e Ieova, te motou Atua, te vikiga mo te ‵malu mo te malosi, me ne faite ne koe a mea katoa.”—Fakaasiga 4:11.

⁷ I te taimi koi foliki ei koe, kāti ne akoako koe ke fakalogo ki ou mātua e tiga eiloa e se manako koe o fai penā. I se auala tai ‵pau, i nisi taimi e faigata foki ki a tatou tavini a Ieova ke faka‵logo. Kae ko tatou e a‵lofa kae āva ki a Ieova, tela la, e fai eiloa ne tatou so se mea e mafai ne tatou o fai ke faka‵logo ki a ia. Ne tuku mai ne Iesu se fakaakoakoga mō tatou. Ne fakalogo a ia ki a Ieova faitalia te sē faigofie io me e se ‵lei ki a ia ke fai penā. Tenā te mea ne mafai ei o fai atu a ia ki tena Tamana: “Ke se fai la toku loto, kae ko tou loto.”—Luka 22:42; onoono ki te Fakamatalaga Fakaopoopo i te 11.

8. Ne a nisi auala e takitaki ei tatou ne Ieova? (Onoono ki te pokisi “Faka‵logo ki Manatu Fesoasoani.”)

⁸ I aso nei, e takitaki tatou ne Ieova i auala kese‵kese. E pelā me se fakaakoakoga, ne tuku mai ne ia a te Tusi Tapu. Ne tuku mai foki ne ia a toeaina i te fakapotopotoga. E fakaasi atu ne tatou te āva ki a Ieova māfai e āva tatou ki tino kolā e fakaaoga ne ia ke takitaki tatou. Kafai e ‵teke atu tatou ki te lotou fesoasoani, ko pelā eiloa me ‵teke atu tatou ki a Ieova. I te taimi ne ‵teke atu a tino Isalaelu ki a Mose, ne matagā ‵ki te mea tenā ki a Ieova. Ne kilo atu a Ieova ki ei e pelā eiloa me ‵teke atu ki a ia.—Numela 14:26, 27; onoono ki te Fakamatalaga Fakaopoopo i te 12.

9. E fakamalosi aka pefea ne te alofa ke faka‵logo tatou ki te takitakiga?

⁹ Kafai e āva tatou ki pulega, e fakaasi atu i ei me e a‵lofa foki tatou ki ‵tou taina mo tuagane. Mafaufau ki te auala tenei. Kafai e isi se fakalavelave o te natula, e masani o ga‵lue fakatasi se tīmu ke faka‵sao a tino. Ko te mea ke ga‵lue faka‵lei, e manakogina se tino ke fakatoka ne ia te galuega, kae ko tino takitasi o te tīmu e ‵tau o faka‵logo ki te takitakiga. Kae e a, māfai se tino ko sē fakalogo ki te takitakiga kae fai loa ne ia te mea e manako a ia ki ei? Faitalia me ne fai ne ia mo te mafaufau ‵lei, a te sē talia ne ia o fakalogo e mafai o pokotia ei a nisi tino o te tīmu, kāti e mafai o pa‵kia latou i ei. I se auala tai ‵pau, ka fai e se faka‵logo tatou ki te takitakiga mai i a Ieova mo tino kolā ne tuku ne ia ke fai te takitakiga, ka mafai eiloa o pokotia a nisi tino. Kae kafai e faka‵logo tatou ki a Ieova, e fakaasi atu eiloa ne tatou te a‵lofa ki ‵tou taina kae āva ki te fakatokaga a Ieova.—1 Kolinito 12:14, 25, 26.

10, 11. Ne a mea ka sau‵tala tatou ki ei?

¹⁰ So se mea e fai mai ne Ieova ke fai ne tatou, e fai eiloa mō te ‵lei o tatou. Kafai e fakaasi atu ne tatou te āva i ‵tou kāiga, i te fakapotopotoga, ki tino ga‵lue o te malo, ka aoga eiloa ki a tatou.—Teutelonome 5:16; Loma 13:4; Efeso 6:2, 3; Epelu 13:17.

¹¹ Kafai e malama‵lama tatou i te pogai e manako ei a Ieova ke fakaasi atu te āva ki nisi tino, ka fesoasoani mai eiloa ke fai tatou penā. Ke na sau‵tala tatou ki te auala e mafai ei o fakaasi atu te āva i feitu e tolu o te olaga.

KE FAKAASI ATU TE ĀVA I TE KĀIGA

12. E fakaasi atu pefea ne te tagata avaga a te āva ki pulega?

¹² Ne māfua mai i a Ieova te kāiga kae tuku atu ne ia a tiute ki tino takitasi i loto i ei. Kafai e maina ‵lei a tino taki tokotasi i loto i te kāiga i mea e manako a Ieova ke fai ne latou, ka fanofano ‵lei a mea i te kāiga kae ka maua ne te kāiga kātoa a mea aoga. (1 Kolinito 14:33) Ne fai ne Ieova ko te tagata ke fai mo ulu o te kāiga. Ko tena uiga e manako a Ieova ke tausi kae alofa a ia ki tena avaga mo tama‵liki. Tela la, ka tuku atu eiloa ne te avaga tagata se tali ki a Ieova e uiga ki te auala ne tausi ei a ia ki tena kāiga. A te tagata avaga Kelisiano, e atafai kae alofa ki tena kāiga e pelā eiloa mo faifaiga a Iesu ki te fakapotopotoga. Kafai e fai penā te tagata avaga, e fakaasi atu eiloa ne ia te āva ki a Ieova.—Efeso 5:23; onoono ki te Fakamatalaga Fakaopoopo i te 13.

13. E fakaasi atu pefea ne se fafine avaga i a ia e āva ki pulega?

¹³ A te fafine avaga Kelisiano e isi foki sena tiute tāua kae fakaaloalogina. E ‵lago a ia ki tena avaga i te galue malosi ke fai pelā me se ulu o te kāiga ‵lei. E maua ne lāua fakatasi te tiute ke akoako lā tama‵liki. E tasi te auala e akoako ei ne ia ana tama‵liki ke āva, e auala eiloa i tena fakaakoakoga. (Faataoto 1:8) E āva a ia ki tena avaga kae ga‵lue tasi ki fakaikuga e fai ne lāua. Kafai e se fiafia a ia ki se fakaikuga a tena avaga e uiga ki se mea, e fakamatala atu eiloa ne ia ana lagonaga i se auala atafai kae āva. Kafai se fafine Kelisiano e avaga ki se tagata e sē se Molimau, e ‵kese foki eiloa a fakalavelave e fe‵paki mo ia. Kae kafai e tumau tou fafine i te fakaasi atu te āva mo te alofa ki tena avaga i ana faifaiga, kāti fakamuli ka fia iloa ne tena avaga a Ieova kae fia tapuaki atu foki ki a ia.—Faitau te 1 Petelu 3:1.

14. E fakaasi atu pefea ne tama‵liki te āva ki pulega?

¹⁴ A tama‵liki e tāua ki a Ieova, kae manakogina malosi ne latou se puipuiga mo se takitakiga. Kafai e faka‵logo a tama‵liki ki olotou mātua, ka fai ei ki fia‵fia olotou mātua. Kae ko te mea telā e tāua atu, me kafai e faka‵logo latou e fakaasi atu eiloa ne latou te āva ki a Ieova kae fai foki ei ke fiafia a ia. (Faataoto 10:1) I te ukega o kāiga, a tama‵liki e puti aka fua ne se mātua e tokotasi. E faigata a te mea tenei ki te mātua mo tama‵liki. Kae kafai a tama‵liki e faka‵logo kae ‵lago atu ki te lotou mātua io me ko te tamana, ka mafai ei o ‵lei atu te olaga o te kāiga. Faitalia te fakanofonofoga i te kāiga, e seai eiloa se kāiga e ‵lei katoatoa. Kae mafai o fia‵fia a kāiga katoa māfai a tino taki tokotasi i te kāiga e tau‵tali i fakatakitakiga a Ieova. Ka avatu ei ne te mea tenei te fakaaloalo ki a Ieova te Mafuaga o kāiga katoa.—Efeso 3:14, 15.

KE FAKAASI ATU TE ĀVA I TE FAKAPOTOPOTOGA

15. E fakaasi atu pefea ne tatou te āva ki pulega i te fakapotopotoga?

¹⁵ E takitaki tatou ne Ieova e auala i te fakapotopotoga Kelisiano, kae ne tuku ne ia ki a Iesu ke pule kātoa ki ei. (Kolose 1:18) Kae ne tuku atu ne Iesu ki te “tavini fakamaoni kae poto” a te tiute ke tausi atu ki tino o te Atua i te lalolagi. (Mataio 24:45-47) I aso nei, a te “tavini fakamaoni kae poto” ko te Potukau Pule. E tuku mai ne te Potukau Pule a mea e manakogina ne tatou i te taimi tonu ke fakatumau i ei te malosi o te ‵tou fakatuanaki. E ‵lago atu a toeaina, tavini fesoasoani, mo ovasia faima‵laga ki fakapotopotoga i te lalolagi kātoa kae maua ne latou te takitakiga mai i te Potukau Pule. E maua ne taina konei te tiute ke tausi mai ki a tatou. E tali atu eiloa latou ki a Ieova ki te auala ne fakagalue ei ne latou olotou tiute. Tela la, kafai e āva tatou ki tāgata konei, e fakaasi atu eiloa ne tatou te āva ki a Ieova.—Faitau te 1 Tesalonia 5:12; Epelu 13:17; onoono ki te Fakamatalaga Fakaopoopo i te 14.

16. Kaia e mafai ei o fai atu tatou me i toeaina mo tavini fesoasoani e ‵tofi aka e auala i te agaga tapu?

¹⁶ E fesoasoani atu a toeaina mo tavini fesoasoani ki te fakapotopotoga ke tumau i te fakatuanaki mo te ‵kau fakatasi. E tonu, a latou e se ‵lei katoatoa penei eiloa mo tatou. Kae fili aka pefea a latou? E ‵tau o fetaui ‵lei a taina konei mo mea e manakogina ke fai ne latou kolā e fakaasi mai i te Tusi Tapu. (1 Timoteo 3:1-7, 12; Tito 1:5-9) Ne fakaaoga ne Ieova te agaga tapu ke fesoasoani atu ki tino ne tusi ne latou te Tusi Tapu ke fakamatala mai a mea e manakogina mō taina konei. E ‵talo a toeaina ki a Ieova mō tena agaga tapu ke fesoasoani atu i te taimi e sau‵tala ei latou ki tino kolā ka ‵tofi aka ke fai pelā me ne toeaina io me ne tavini fesoasoani. Tela la, e manino ‵lei i te fakapotopotoga e nofo mai lalo i te takitakiga a Iesu mo Ieova. (Galuega 20:28) E fai eiloa a tāgata konei ne fili ke ‵lago kae tausi mai ki a tatou e pelā me ne meaalofa mai te Atua.—Efeso 4:8.

17. Ke fakaasi atu te āva, ne a mea e mafai o fai ne se tuagane i nisi taimi?

¹⁷ I nisi taimi, e mafai o seai ne toeaina io me ne tavini fesoasoani e avanoa ke fai ne latou se tōfiga i te fakapotopotoga. E masani sāle o fesoasoani atu ki ei a nisi taina papatiso, kae kafai e seai ne taina e avanoa, e mafai o fai ne se tuagane se tōfiga telā e masani o fai ne se taina papatiso. Kafai e penā loa, e ‵tau o fakaaoga ne ia se laugatu mo pulou tena ulu io me se pulou. (1 Kolinito 11:3-10) I te auala tenei e fakaasi atu eiloa ne ia te āva ki te fakatokaga a Ieova e uiga ki pulega, i loto i te kāiga pelā foki mo te fakapotopotoga.—Onoono ki te Fakamatalaga Fakaopoopo i te 15.

KE FAKAASI ATU TE ĀVA KI TINO GA‵LUE O TE MALO

18, 19. (a) Ne a mea e tauloto ne tatou mai te Loma 13:1-7? (e) E fakaasi atu pefea ne tatou te āva ki malo?

¹⁸ I aso nei, e talia ne Ieova a malo ke fai olotou pulega, kae ‵tau mo tatou o āva ki a latou. E fakatoka faka‵lei ne latou a atufenua mo fakapotopotoga ko te mea ke teletele ‵lei kae ke tuku atu foki ki tino a mea e manakogina. E faka‵logo a Kelisiano ki fakatonuga e maua i te Loma 13:1-7. (Faitau.) E āva tatou ki “pulega ma‵luga” kae faka‵logo ki tulafono o te fenua io me ko fakapotopotoga i koga e ‵nofo i ei tatou. E mafai o pokotia a ‵tou kāiga, pisinisi, io me ko ‵tou kope totino i tulafono konei. E pelā me se fakaakoakoga, e ‵togi ne tatou a lafoga kae tuku atu foki ne tatou a fakamatalaga kolā e manakogina ne te malo. Kae e a, māfai ko manako mai te malo ke fai ne tatou se mea telā e se fetaui mo tulafono a te Atua? Ne fai mai te apositolo ko Petelu: “E ‵tau mo matou o faka‵logo ki te Atua e pelā me ko te pule i lō tāgata.”—Galuega 5:28, 29.

¹⁹ Kafai e isi ne mea e ‵tau o fai ne tatou mo se tino galue o te malo, e pelā mo te famasino io me se pulisimani, e ‵tau faeloa o fai‵pati atu tatou mo te āva. E fakaasi atu ne Kelisiano talavou te āva ki olotou faiakoga mo nisi tino ga‵lue i te akoga. I ‵tou koga ga‵lue, e fakaasi atu ne tatou te āva ki ‵tou pule, faitalia me e se fai penā a nisi tino ga‵lue. Kafai e fai tatou penā, e fakaakoako atu eiloa tatou ki te apositolo ko Paulo, telā ne fakalogo ki tino pule faitalia te faigata. (Galuega 26:2, 25) Kafai foki e se fai faka‵lei mai a nisi tino ki a tatou, e tumau loa tatou i te fakaasi o te āva ki a latou.—Faitau te Loma 12:17, 18; 1 Petelu 3:15.

20, 21. Ne a mea ‵lei e mafai o ‵tupu māfai e fakaasi atu ne tatou te āva ki nisi tino?

²⁰ I te lalolagi kātoa, e se lasi te fakaasi atu te āva o tino ki nisi tino. Kae ‵kese a tino o Ieova. E taumafai tatou ke fakaasi atu te āva ki so se tino. E tau‵tali tatou ki te fakatakitakiga a Petelu: “Āva ki vaegā tino katoa.” (1 Petelu 2:17) Kafai e āva tatou ki tino, e laveagofie ne latou te mea tenā. Ne fai mai a Iesu: “Ke penā foki o maina atu te otou mainaga ki tino, ko te mea ke mafai o matea ne latou otou galuega ‵lei kae ‵viki atu ei ki te otou Tamana.”—Mataio 5:16.

²¹ Kafai e fakaasi atu ne tatou te āva i ‵tou kāiga, i te fakapotopotoga, io me ko nisi koga, ka fai eiloa ne ‵tou fakaakoakoga ‵lei ke fia tauloto a nisi tino ki a Ieova. Kae kafai e fakaasi atu ne tatou te āva ki nisi tino, e fakaasi atu foki ne tatou te āva ki a Ieova. Ka fai ei ke fiafia a Ieova kae fakaasi atu foki ne tatou me a‵lofa tatou ki a ia.