Ne Faite ne Noa se Vaka

NE ISI se avaga o Noa kae ne isi foki ana tama tāgata e tokotolu. A igoa o ana tama tāgata ko Semu, Hamo, mo Iafeta. Kae ne isi foki ne avaga a tama tāgata e tokotolu konā. Tela la, ne tokovalu a tino i te kāiga o Noa.

I te taimi tenā ne fakatonu atu a te Atua ki a Noa ke fai ne ia se mea fakaatea. Ne fai atu a ia ki tou tagata ke faite se vaka lasi. A te vaka lasi tenei ne foliga mai pelā me se pokisi loa. ‘Faite ke tolu a fola,’ muna a te Atua, ‘kae fai foki ne potu i loto i ei.’ Ne fai a potu mō Noa mo tena kāiga, manu, mo mea‵kai katoa kolā ka ma‵nako latou ki ei.

Ne fai atu foki te Atua ki a Noa ke fai a te vaka ko te mea ke seai eiloa se vai e mafai o ulu ki loto. Ne fai atu penei te Atua: ‘Ka fakaoko mai ne au a te lolo ki te lalolagi ke ‵ta fakapalele ei a mea ola katoa. Ka mate atu so se tino telā e se nofo i loto i te vaka.’

Ne faka‵logo a Noa mo ana tama tāgata ki a Ieova kae ne kamata a te faitega. Kae ne ‵kata atu fua a nisi tino. Ne tumau eiloa te lotou fai amioga ma‵sei. Ne seki ai eiloa se tino ne talitonu ki a Noa i te taimi ne fai atu ei ne ia ki a latou a te mea telā ka fai ne te Atua.

Ne manakogina se taimi leva ke faite ei te vaka me se vaka lasi ‵ki. Fakamuli loa, i te fia tausaga mai tua ifo, ne oti atu i ei. I te taimi tenā ne fai atu te Atua ki a Noa ke aumai a manu ki loto i te vaka. Ne fai atu te Atua ke aumai e taki lua a nisi vaega o manu, se tagata mo se fafine. Kae ko nisi vaega o manu ne fai atu te Atua ki a Noa ke aumai e taki fitu. Ne fai atu foki te Atua ki a Noa ke aumai a vaega katoa o manu eva ki loto. Ne fai eiloa ne Noa a mea kolā ne fai atu ne te Atua.

I te otiga, ne ulu atu a Noa mo tena kāiga ki loto i te vaka. Kae ne ‵pono ne te Atua a te mataloa. I loto i ei, ne faka‵tali a Noa mo tena kāiga. Fakaataata i tou mafaufau me e nofo atu koe i loto i te vaka fakatasi mo latou, kae faka‵tali koutou. E mata, ka tupu eiloa se lolo e pelā mo pati a te Atua?