Te Lolo ke Oko ki te Fakasaolotoga Mai Aikupito

E tokovalu fua a tino ne ‵sao i te Lolo, kae i te tekaga o taimi ne gasolo aka te aofaki o latou ki te fia o afe. Kae i te 352 tausaga mai tua ifo o te Lolo, ne fanau mai ei a Apelaamo. E tauloto tatou e uiga ki te auala ne fakataunu ei ne te Atua tena folafolaga mai te tukuatuga ki a Apelaamo o se tama tagata e igoa ki a Isaako. Oti aka i ei, ne filifili a Iakopo ne te Atua mai tama tāgata e tokolua a Isaako.

Ne lasi a te kāiga o Iakopo telā e aofia i ei a tama tāgata e toko 12 mo nisi tama fāfine. Ne takalia‵lia a tama tāgata e toko 10 a Iakopo ki te lotou taina foliki ko Iosefa kae ne ‵togi atu ne latou a ia e pelā me se pologa ki Aikupito. Fakamuli ifo, ne fai a Iosefa mo fai se pule tāua o Aikupito. I te taimi ne poko ei a te ogegā meakai, ne tofotofo ne Iosefa ana taina ke iloa aka me ko oti ne salamō latou io me ikai. Fakamuli loa, ne olo atu a te kāiga kātoa o Iakopo, te kau Isalaelu, ki Aikupito. Ne tupu te mea tenei i tausaga e 290 mai tua o te fanauga a Apelaamo.

Mō tausaga e 215 mai tua ifo i ei ne ‵nofo a tino Isalaelu i Aikupito. I te matega a Iosefa, ne fai latou mo fai ne pologa i konā. Fakamuli loa, ne fanau mai ei a Mose, kae ne fakaaogā a ia ne te Atua ke fakasaoloto ei a tino Isalaelu mai Aikupito. E ‵tusa mo te 857 tausaga o tala fakasolopito e fakamatala mai i te Vaega e LUA.