Ko Olo Atu a te Kāiga ki Aikupito

NE SEKI toe mafai o fa‵ki a Iosefa i ana lagonaga. Ne fai atu a ia ki ana tavini katoa ke olo keatea mo te potu. I te taimi ne ‵nofo aka ei a ia mo ana taina, ne kamata o tagi a Iosefa. E mafai o fakaataata ne tatou a te ofo malosi o ana taina, me e se iloa ne latou a te pogai e tagi ei a ia. Oti aka loa ne fai mai tou tagata: ‘Au ko Iosefa. E a, koi ola toku tamana?’

Ne ofo malosi ana taina, telā ne seki mafai ei ne latou o fai‵pati. Ko ma‵taku latou. Kae ne fai atu penei a Iosefa: ‘Fakamolemole, fakapilipili mai.’ Ko fai latou penā, kae ne fai atu a ia: ‘Au ko te otou taina ko Iosefa, telā ne ‵togi atu ne koutou ki Aikupito.’

Ne tumau eiloa a Iosefa i te faipati atu i te alofa: ‘Sa losi atu ne koutou ki a koutou eiloa me ne ‵togi mai ne koutou au ki konei. Ko te Atua eiloa telā ne uga mai ne ia au ki Aikupito ke faka‵sao ei a ola o tino. Ko oti au ne fai ne Falao mo fai te pule o te fenua kātoa. Tela la, olo fakavave nei ki toku tamana kae fai atu ki ei a te mea tenei. Kae fai atu ki a ia ke vau kae ke nofo i konei.’

Oti aka, ne ‵sai ne Iosefa ana taina, kae uma atu ki a latou katoa. I te taimi ne lagona ei ne Falao me ko oti ne o‵mai a taina o Iosefa, ne fai atu a ia ki a Iosefa: ‘Tuku atu ki a latou ne kā e ‵taki ne solofanua ke olo o puke mai te lotou tamana mo olotou kāiga kae ke ‵foki mai ki konei. Ka tuku atu ne au ki a latou a te ‵toe laukele ‵lei i Aikupito kātoa.’

Tenā eiloa a te mea ne fai ne latou. E lavea atu ne koe i konei a te fetauiga a Iosefa mo tena tamana i te taimi ne o‵mai ei a ia mo tena kāiga kātoa ki Aikupito.

Ko oti ne gasolo aka o tokouke a te kāiga o Iakopo. E toko 70 katoa latou i te taimi ne o‵mai ei ki Aikupito, e aofia i ei a Iakopo mo ana tama‵liki mo ana mokopuna. Kae e isi foki ne olotou avaga, kae kāti mo tavini foki e tokouke. Ne ‵nofo katoa latou i Aikupito. Ne fakaigoa latou ko te kau Isalaelu, me ko oti ne sui ne te Atua a te igoa o Iakopo ki a Isalaelu. Ne fai te kau Isalaelu pelā me ne tino fakapito ki te Atua, e pelā mo te mea ka lavea atu ne tatou fakamuli.