Ko Aofia Tina i se Fakalavelave

E LAVEA ne koe me ko oi e fanatu a Tina o āsi ki ei? E fanatu a ia o āsi ki nisi fāfine kolā e ‵nofo i te fenua o Kanana. E mata, ka fiafia tena tamana ko Iakopo e uiga ki te mea tenei? Ke fesoasoani mai ke tali te fesili tenei, taumafai ke masaua a mafaufauga o Apelaamo mo Isaako e uiga ki fāfine i Kanana.

E mata, ne manako Apelaamo ke avaga tena tama ko Isaako ki se fafine mai Kanana? Ikai, ne seki manako tou tagata ki ei. E mata, ne ma‵nako a Isaako mo Lepeka ke avaga te lā tama ko Iakopo ki se fafine Kanana? Ikai, ne seki ma‵nako laua ki ei. E iloa ne koe me kaia?

Ona ko tino konā i Kanana ne tapuaki atu ki atua ‵se. A latou e se ne tino ‵lei ke fai pelā me ne avaga tāgata mo avaga fāfine, kae e se ne tino ‵lei foki ke fai taugasoa ki ei. Tela la, e mafai o fakamautinoa aka ne tatou me ka se fiafia a Iakopo me ne fai taugasoa tena tama fafine ki fāfine Kanana konā.

Kae ne aofia tonu eiloa Tina i se fakalavelave. E lavea ne koe a te tagata Kanana i te ata telā e kilokilo atu ki a Tina? A tena igoa ko Sekema. I te aso e tasi ne āsi atu a Tina, ne puke ne Sekema a Tina kae faimālō ne ia ke ‵moe laua. A te mea tenei se mea ‵se, me ko tāgata mo fāfine a‵vaga fua e ‵tau o ‵moe tasi. Ne iku atu a te mea masei tenei ne fai ne Sekema ki fakalavelave e uke.

I te taimi ne ‵logo ei a tuagane o Tina e uiga ki te mea ne tupu, ne kaitaūa malosi latou. E tokolua i a latou, ko Simeona mo Levi, ko oko eiloa te lasi o te lā kaitaūa kae ne puke ne laua lā pelu kae ne olo atu ki loto i te fa‵kai kae ne taua fakapoi atu ki tāgata i ei. Ne tamate ne laua mo lā taina a Sekema mo nisi tāgata katoa. Ne kaitaua a Iakopo ona ko te mea masei tenā ne fai ne ana tama tāgata.

Ne kamata aka pefea a te fakalavelave kātoa tenei? Ona ko te fai taugasoa o Tina mo tino kolā ne seki faka‵logo ki tulafono a te Atua. E se ma‵nako tatou ke maua a vaegā taugasoa penā, i ne?