Ke‵sala Atu Ki Te Puipuiga Mai I Tino O Te Atua

“Au e fakafetai ki a koe i mua o te fakapotopotoga o ou tino.”​—SALAMO 35:18.

1-3. (a) Se a te mea e mafai o takitaki ne ia a nisi Kelisiano ke iku atu ki se tulaga fakamataku i te feitu faka-te-agaga? (e) Tefea te koga e mafai o maua i ei ne tino o te Atua se puipuiga?

TE taimi o te malōlōga, ne olo atu a Joe mo tena avaga o ukuuku i se akau telā e mumu ki ei a ika ‵lasi mo ika fo‵liki kolā e ‵lanu valevale. Ne ‵kau atu lāua ki tai ko te mea ke lavea ‵lei ne lāua a te akau mai lalo. I te taimi ne ‵kau atu ei lāua ki se koga telā e tai ‵poko, ne fai atu te avaga a Joe, penei, “I taku faka‵tau, ko tō ‵mao te koga tenei ko ‵nofo ei tāua.” “Sa manavase,” ko te tali a Joe. “E iloa ne au aku mea e fai.” Mai tua malie, ne fai atu a Joe mo te manavase, ‘Tefea te koga ko olo katoa ki ei a ika?’ Ne lavea ne ia te pogai, kae ko oko loa i ana mataku. I te koga ‵poko tenā, ne lavea ne ia se magō e tele ‵tonu atu ki a ia. Kae ne seai eiloa sena mea e mafai o fai. I te taimi ko pili atu ei te magō ki a ia, ne toe ‵fuli tenā tua kae tele atu keatea.

² E mafai eiloa o faka‵segina se Kelisiano ne te gali o te lalolagi a Satani​—e auala i fakafiafiaga, galuega, mo koloa—⁠telā ko seiloa ei ne ia me ko takitaki atu a ia ki se tulaga fakamataku. “Ne fai ne te mea tenei ne tupu ke toe mafaufau faka‵lei au ki tino kolā e ‵tau o fai taugasoa au ki ei,” ko pati a Joe, telā se toeaina Kelisiano. “Ke ‵kau atu ki te koga telā e maua i ei se puipuiga mo te ‵lei​—i loto i te fakapotopotoga!” Ke mo a ma talia ne tatou a te gali o te lalolagi ke fai ei tatou ke ‵mao mai te fakapotopotoga, telā e mafai o iku atu ki se tulaga fakamataku. Kafai ko iloa ne tatou me ko ‵mao tatou mai te fakapotopotoga i nisi mea, e ‵tau o toe ‵foki mai tatou. Kafai e se fai penā, ka tu atu i se tulaga fakamataku a te ‵tou fesokotakiga mo Ieova.

³ I aso nei, e fai a te lalolagi e pelā me se koga telā e fakamataku ki Kelisiano. (2 Timoteo 3:1-5) E iloa ne Satani me ko se leva ana aso, kae e fano eiloa a ia o salasala a tino sē matapula‵pula ke kai ne ia. (1 Petelu 5:8; Fakaasiga 12:12, 17) E tiga te feitu tenā, e maua eiloa ne tatou a te puipuiga. Ne fakatoka ne Ieova se koga faka-te-agaga ke puipui ei tatou​—telā ko te fakapotopotoga Kelisiano.

4, 5. E pefea a lagonaga o tino e tokouke e uiga ki olotou olaga i aso mai mua, kae kaia?

⁴ E tuku mai fua ne fakapotopotoga kolā e se ‵kau ki mea tau lotu se puipuiga telā e se taitai o lava​—i te feitu faka-te-foitino io me ko mea tau lagonaga. E tali‵tonu a tino e tokouke me i te lotou puipuiga i te feitu faka-te-foitino ne fakamaseigina ne amioga ma‵sei, amioga fakasaua, te ‵togi ‵mafa o mea, ke oko foki loa ki fakalavelave e uiga ki te ‵tu ‵mā. E fakafesagai atu a tino katoa mo te tulaga matua mo ma‵saki. Kae e mafau‵fau eiloa a tino kolā e isi ne olotou galuega, fale, tupe e uke, kae e ola ‵lei, ki te leva o te taimi ka gata atu i ei a mea konei.

⁵ E tokouke a tino e seki mafai o maua tonu ne latou se puipuiga i mea tau lagonaga. Se mea fakafanoanoa, me ne fatoa iloa aka ne te tokoukega o tino me e se mafai o fakataunu a olotou fakamoemoega ke maua a te filemu māfai ko a‵vaga latou kae fai olotou kāiga. Ko ‵numi valevale a te tokoukega o tino kolā e olo atu ki lotu e uiga ki te puipuiga faka-te-agaga, kae fakafesili ne latou a te tāua o te takitakiga telā ne maua ne latou. Ona ko te se ‵tonu o amioga mo akoakoga a olotou takitaki lotu, kolā e se fakavae ki te Tusi Tapu, tenā eiloa te pogai ko oko atu ei ki nisi tino ‵lotu a mafaufauga penā. Tela la, ko tali‵tonu fua latou ki mea fakasaienisi io me ko poto faka-te-foitino. Kae e mautinoa eiloa me e tokouke a tino i ‵tou tafa e se tokagamalie io me ko se mafaufau ‵mafa foki ki olotou olaga i aso mai mua.

6, 7. (a) Se a te ‵kese i te kilokiloga a tino kolā e tavini atu ki te Atua mo latou kolā e se fai penā? (e) Se a te mea ka mafau‵fau tatou ki ei?

⁶ Ko oko eiloa i te ‵kese a te kilokiloga e uiga ki tino kolā e aofia i te fakapotopotoga Kelisiano mo latou kolā e se aofia i ei! E tiga eiloa e ‵tau o fakafesagai atu a tino o Ieova ki fakalavelave kolā e fe‵paki mo ‵tou tuakoi, kae e ‵kese eiloa a ‵tou kilokiloga e uiga ki ei. (Faitau te Isaia 65:13, 14; Malaki 3:18.) Kaia? Me e maua ne tatou i te Tusi Tapu se fakamatalaga fakamalie loto e uiga ki te tulaga tenei ko oko ki ei a tagata ola, kae ko toka foki tatou o fakafesagai atu ki mea faiga‵ta mo fakalavelave o te olaga nei. Tela la, e se manava‵se malosi tatou e uiga ki aso mai mua. E tuku mai ne Ieova ki a tatou ana tino tapuaki a te puipuiga mai manatu sē ‵lei kae sē fakavae mai loto i te Tusi Tapu, amioga ma‵sei, mo ikuga o vaegā mea penā. Tela la, e maua ne tino i te fakapotopotoga Kelisiano a te filemu o te mafaufau telā e se iloa ne nisi tino.​—Isaia 48:17, 18; Filipi 4:6, 7.

⁷ E isi ne fakaakoakoga e mafai o fesoasoani mai ke lavea ne tatou a te ‵kese o te puipuiga e maua ne tino kolā e tavini ki a Ieova mo tino kolā e se tavini atu ki a ia. E fai ne fakaakoakoga konei ke gasue‵sue tatou o iloilo a ‵tou manatu mo faifaiga kae ke mafau‵fau me e mata, e fakagalue katoatoa ne tatou a fakatakitakiga a te Atua, kolā ne fakatoka ke puipui ei tatou io me ikai.​—Isaia 30:21.

“Toku Talitonu Foki ko Tai Galo Atu Eiloa”

8. Se a te mea e ‵tau o fai faeloa ne tavini a Ieova?

⁸ Mai te kamataga i tala fakasolopito o tino, ne ma‵nako eiloa a tino kolā ne filifili ke faka‵logo ki a Ieova ke ‵kalo keatea mai te fai taugasoa mo tino kolā e se fai penā. E tonu, ne fakaasi mai ne Ieova me ka fai fili ana tino tapuaki mo tino kolā e tau‵tali atu i a Satani. (Kenese 3:15) Ona ko te lotou taofi ‵mau ki fakatakitakiga mai te Atua, e tu ‵kese eiloa a tino o te Atua mai i tino i olotou tafa. (Ioane 17:15, 16; 1 Ioane 2:15-17) E se faigofie faeloa ke taofi ‵mau ki ei. E tonu, e fakafesili ne nisi tino a tavini a Ieova i nisi taimi e uiga ki te poto ke talia a mea faiga‵ta.

9. Fakamatala mai a te mea faigata telā ne fakafesagai atu ki ei a te tino tusitala o te Salamo 73.

⁹ Ne kamata o mafaufau se tokotasi o tavini a Ieova telā ne tusi ne ia te Salamo 73, kae e vau i te gafa o Asafo, me e mata ne fai ne ia se filifiliga poto io me ikai. Ne fakafesili ne te faisalamo a te pogai e masani faeloa o manuia, fia‵fia, kae takutakua a tino amio ma‵sei, kae e logo‵mae a tino kolā e taumafai malosi o tapuaki atu ki te Atua i mea faiga‵ta mo fakalavelave.​—Faitau te Salamo 73:1- 13.

10. Kaia e tāua ei ki a koe a manatu kolā ne faka‵sae aka ne te faisalamo?

¹⁰ E mata kai ‵sili aka eiloa ne koe ne vaegā fesili tai ‵pau e pelā mo mea ne fakamau ki lalo ne te faisalamo? Kafai e penā loa, ke mo a ma mafaufau me fai ne koe se matuga mea ‵se io me ke mafaufau koe me ko galo atu tou fakatuanaki. A te tonuga loa, e tokouke a tavini a Ieova, e aofia i ei a latou kolā ne fakaaoga ne Ieova ke tusi te Tusi Tapu, ne mafau‵fau foki penā. (Iopu 21:7- 13; Salamo 37:1; Ielemia 12:1; Sapakuka 1:1-4, 13) E tonu, a latou katoa kolā e ma‵nako o tavini ki a Ieova e ‵tau o mafaufau faka‵lei kae talia ne latou a te tali ki te fakalavelave tenei: E mata, a te tavini atu mo te fakalogo ki te Atua ko te ‵toe mea tāua e ‵tau o fai ne tatou? E fakaata mai ne te mea tenei a te fakalavelave telā ne fakasae aka ne Satani i te fatoaga o Etena. E fakavae eiloa ki te fesili e uiga ki te pulega sili a te Atua i te lagi mo te lalolagi. (Kenese 3:4, 5) Tela la, e ‵tau mo tatou katoa o mafaufau faka‵lei ki te manatu telā ne fakasae aka ne te faisalamo. E mata, e ‵tau o loto ma‵sei tatou ki tino amio ma‵sei kolā e foliga mai me e ola e aunoa mo fakalavelave? E mata, e ‵tau mo tatou o ‘fulitua’ atu keatea mai te tavini atu ki a Ieova kae tau‵tali atu i vaegā tino penā? E tonu, tenā eiloa te mea e manako ‵tonu a Satani ki ei ke fai ne tatou.

11, 12. (a) Ne mafai pefea o manumalo a te faisalamo i ana manatu fakalotolotolua, kae se a te mea e akoako mai i ei ki a tatou? (e) Se a te mea ne fesoasoani atu ki a koe ke ‵pau tau kilokiloga mo te faisalamo?

¹¹ Se a te mea ne fesoasoani atu ki te faisalamo ke manumalo i ana manatu fakalotolotolua? E tiga eiloa e fakaasi tonu mai ne ia me e toeitiiti ko fulitua atu a ia ki te amiotonu, ne ‵fuli tena kilokiloga tenā i te taimi ne ulu atu ei a ia ki te ‘Faletapu o te Atua’​—telā ne ‵kau fakatasi ei a ia mo tino faka-te-agaga i te faleie o te Atua io me ko te faletapu kae ne fakaasi mai i ei a te fuafuaga a te Atua. Kae, ne fakaasi manino mai ki te faisalamo me e se manako a ia ki te ikuga telā e maua ne tino amio ma‵sei. E lavea ne ia me i auala mo filifiliga e fai ne latou i olotou olaga e tuku atu ei ne latou a latou eiloa ki “koga mole‵mole.” Ne folafola mai a te faisalamo me i tino ma‵sei katoa kolā e tiaki ne latou a Ieova, ka oko mai eiloa te lotou fakaotiga telā ko te lotou “ikuga fakamataku,” kae ka ‵lago atu a Ieova ki tino kolā e tavini atu ki a ia. (Faitau te Salamo 73:16- 19, 27, 28.) E mautinoa eiloa me ko oti ne lavea ne koe a te ‵tonu o te fakamatalaga tenā. A te fia tu tokotasi e aunoa mo te fia saga atu ki tulafono a Ieova e mafai o foliga gali atu ki tino e tokouke, kae e se mafai eiloa koe o sao mai i ikuga ma‵sei o mea konā.​—Kalatia 6:7-9.

¹² Ne a foki a nisi mea e tauloto ne tatou mai te tala o te faisalamo? Ne maua ne ia te puipuiga mo te poto mai i tino o Ieova. Ne kamata o fakasakosako atu a ia i se auala manino kae tonu i te taimi ne fano ei a ia ki te fale tapuaki o Ieova. E penā foki loa i aso nei, e mafai o maua ne tatou a fakatakitakiga aoga mo meakai faka-te-agaga kolā e maua i fakatasiga a te fakapotopotoga. Kae ne fakatonu ne Ieova a ana tavini mō se pogai ‵lei ke ‵kau ki fakatasiga faka-Kelisiano. I te faiga tenā, ka maua ei ne latou a fakamalosiga kae fakamalosi atu foki ke fai a mea ‵lei.​—Isaia 32:1, 2; Epelu 10:24, 25.

Filifili Faka‵lei ou Taugasoa

13-15. (a) Se a te mea ne tupu ki a Tina, kae se a te mea e fakaasi mai e uiga ki ei? (e) Kaia e fai ei a te ‵kau fakatasi mo taina Kelisiano e pelā me se puipuiga?

¹³ A te tala o te tamaliki fafine a Iakopo ko Tina, se fakaakoakoga e tasi telā ne masei ‵ki ona ko te fai taugasoa mo tino o te lalolagi. E fakamatala mai a te tala i te Kenese me e masani tou fafine o fai taugasoa mo tamafine Kanana i te koga telā e ‵nofo ei tena kāiga. E se ‵pau a te tulaga maluga o te kau Kanana i mea tau amioga e pelā mo tino tapuaki o Ieova. E ‵kese mai i ei, e fakaasi mai i mea ne maua aka ne tino sukesuke ki mea mua me ne aofia a te fenua o Kanana i faifaiga ifo ki tupua, amioga ma‵sei, amioga fakatauavaga sē ‵tau, mo amioga fakasaua. (Esoto 23:23; Levitiko 18:2-​25; Teutelonome 18:9-​12) Ke masaua a te ikuga o te fai taugasoa o Tina ki tino konei.

¹⁴ Ne lavea ne Sekema telā e fakamatala mai me “ko te aliki o te koga tena,” a Tina, telā “ave ei ne ia o puke malō.” (Kenese 34:1, 2, 19) Ko oko eiloa te matagā o te mea tenā! E mata, e talitonu koe me ka iloa ne Tina me mafai o tupu se vaegā mea penā ki a ia? Kāti ne ‵sala atu fua a ia ki taugasoa talavou, telā ne mafaufau a ia me e se masei. Kae ne faka‵segina eiloa a Tina.

¹⁵ Se a te mea e tauloto ne tatou mai i te tala tenei? Me e se mafai o fai taugasoa tatou mo tino sē tali‵tonu kae fakamoe‵moe me ka seai ne ikuga fakalogo‵mae e maua ne tatou mai i ei. E fai mai a te Tusi Tapu me i “taugasoa ma‵sei e fakamasei ne latou te amio ‵lei.” (1 Kolinito 15:33) Kae i te sua feitu, a te fai taugasoa mo tino kolā e ‵pau otou talitonuga, e ‵lei olotou amioga, kae a‵lofa ki a Ieova e fai eiloa e pelā me se puipuiga. A te vaegā fai taugasoa tenei ka fakamalosi ne ia koe ke gasuesue i se auala poto.​—Faataoto 13:20.

“Ko Oti Koutou ne Faka‵ma Mai Otou Agasala”

16. Ne a pati a te apositolo ko Paulo e uiga ki nisi tino i te fakapotopotoga i Kolinito?

¹⁶ Ko oti ne fesoasoani atu a te fakapotopotoga Kelisiano ki tino taki tokotasi ke faka‵ma latou mai faifaiga lai‵lai. I te taimi ne tusi ei ne te apositolo ko Paulo a tena tusi muamua ki te fakapotopotoga i Kolinito, ne fai atu ne ia a ‵fuliga ne fai ne Kelisiano i konā ko te mea ke ola e ‵tusa mo fakatakitakiga a te Atua. A nisi o latou ne tino finalalolagi, ifo ki tupua, mulilua, amio fakasotoma, kaisoa, konā mo nisi mea aka. Ne fai atu a Paulo ki a latou: “Ko oti koutou ne faka‵ma mai otou agasala.”​—Faitau te 1 Kolinito 6:9-11.

17. Ne mafai pefea ne te ola e ‵tusa mo fakatakitakiga a te Tusi Tapu o ‵fuli ne ia a olaga o tino e tokouke?

¹⁷ A tino kolā e seai se lotou fakatuanaki, e fakaasi mai i ei me e se lava a fakatakitakiga mo te puipuiga e maua ne latou. E fai ne latou a mea e ma‵nako latou ki ei, io me tau‵tali atu latou i faifaiga a tino i olotou tafa, kae ne fakasino tonu eiloa a te mea tenā ki nisi tino Kolinito i aso mua, a koi tuai o fai latou mo fai ne tino tali‵tonu. (Efeso 4:14) Kae e isi eiloa se malosi o te poto tonu o te Muna a te Atua mo ana fuafuaga, ke ‵fuli ne ia ke ‵lei a olaga o tino katoa kolā e fakagalue ne latou a fakatakitakiga i te Tusi Tapu. (Kolose 3:5-​10; Epelu 4:12) E mafai o fakamatala atu ne te tokoukega o tino i te fakapotopotoga Kelisiano a te olaga ne ola muamua latou i ei a koi tuai o tauloto kae fakamasani latou ki tulaga amio‵tonu o Ieova. Kae ne seki lotoma‵lie kae se fiafia latou. Ne fatoā maua ne latou a te filemu tonu i te taimi ne kamata ei latou o ‵kau fakatasi mo tino o te Atua kae ola e ‵tusa mo ana fakatakitakiga kolā e tuku mai i tena Tusi Tapu.

18. Se a te tala ne fakaasi mai ne se talavou, kae se a te mea e fakamaoni mai i ei?

¹⁸ E ‵kese mai ei, a nisi tino kolā ne tiaki ne latou te ‘toe koga ‵lei’ telā ko te fakapotopotoga Kelisiano i taimi mua, ko oko eiloa nei i te sala‵mo i te filifiliga ne fai ne latou. Ne fakamatala mai ne se tuagane e tokotasi telā ko Tanya, me ne “tupu aka a ia i te munatonu,” kae i te taimi ko 16 ei ana tausaga, ne tiaki ne ia te fakapotopotoga ko te mea ke “fakamuamua ne ia ana manakoga faka-te-lalolagi.” Tela la, ne iku atu a ia ki te faitama kae fakato tena pepe. E fai mai nei a ia, penei: “I te tolu tausaga telā ne tiaki ei ne au a te fakapotopotoga, ne pakia‵kia valevale oku lagonaga kae ne fai eiloa pelā me ne ‵pulaga kolā ko se toe mafai o ‵galo. A te mea telā e se mafai o fakapuli i toku mafaufau ko te tamatega ne au o taku pepe. . . . Au e manako o fakailoa atu ki talavou katoa kolā e ma‵nako o ‘tami’ ki te gali o te lalolagi mō se vaitaimi toetoe fua, ‘Sa fai penā!’ E tonu e mafai o gali i te taimi muamua, kae e iku atu fakamuli ki te masei. E seai se mea ‵lei e mafai o tuku mai ne te lalolagi kae nā ko fakalavelave fua e tuku mai ne ia. E iloa ne au. Ko oti ne tami au ki ei. Ke tumau i loto i te fakapotopotoga a Ieova! Ko te koga fua e tasi i te olaga nei e mafai o maua ei ne koe a te fiafia.”

19, 20. Se a te puipuiga e mafai o tuku mai ne te fakapotopotoga Kelisiano, kae pefea la?

¹⁹ Mafaufau moi fai ko koe telā ko tiaki ne koe a te fakapotopotoga Kelisiano telā e fai e pelā me se puipuiga. E tokouke a tino kolā ne ola muamua i se olaga sē aoga a koi tuai o maua ne latou te munatonu, ko se toe ma‵nako eiloa ke ‵toe mafau‵fau latou ki te vaegā olaga tenā. (Ioane 6:68, 69) E mafai eiloa o maua ne koe a te puipuiga mai i fakalavelave mo puapuaga kolā e lauiloa nei i te lalolagi a Satani, mai i te ‵kau fakatasi mo ou taina mo tuagane Kelisiano. A te fai taugasoa mo latou mo te ‵kau faeloa ki fakatasiga a te fakapotopotoga ka fai ei ke masaua faeloa ne koe a te ‵tonu o tulaga amio‵tonu o Ieova kae ka fakamalosi atu foki ke ola koe e ‵tusa mo mea konā. E uke a pogai e fai ei ke ‘fakafetai atu ki a Ieova i mua o te fakapotopotoga,’ e pelā mo te mea ne fai ne te faisalamo.​—Salamo 35:18.

²⁰ Se mea tonu, me e uke ‵ki a pogai e fe‵paki ei a Kelisiano katoa mo mea faiga‵ta, telā ko ala ei o faigata ke fakatumau a te lotou fakamaoni faka-Kelisiano. E mafai o ma‵nako latou ki se fesoasoani mai se tino ke fakaasi atu ki a latou a te auala tonu e ‵tau o olo latou i ei. Ne a mea e ‵tau o fai ne koe​—e penā foki mo te fakapotopotoga—​ko te mea ke fesoasoani atu ki taina tali‵tonu i vaegā taimi penā? Ka suke‵suke tatou i te suā mataupu ki te auala e mafai ei o ‘fakamafanafana kae fakamalosi aka’ a ‵tou taina tali‵tonu.​—1 Tesalonia 5:11.

Ka Tali Mai Pefea ne Koe?

• Se a te mea e tauloto ne tatou mai te mea ne tupu ki te tino tusitala o te Salamo 73?

• Se a te akoakoga e maua ne tatou mai i te tala o Tina?

• Kaia e mafai ei o maua ne koe se puipuiga mai i te fakapotopotoga Kelisiano?

[Ata i te itulau e 11]

‵Kau ki te koga telā e fai e pelā me se puipuiga; nofo i loto i te fakapotopotoga!