Ko Takalia‵lia a Taina o Iosefa ki a Ia

ONOONO atu ki te fanoanoa mo te seai o se fakamoemoega o te tamaliki tagata tenei. Ko Iosefa tenei. Ne fatoā ‵togi atu a ia ne ana taina ki tāgata konei ne o‵mai i te lotou auala ki Aikupito. I konā ka fai ei a Iosefa mo fai se pologa. Kaia ne fai ei ne ana āfa taina a te mea masei tenei? Ona ko te mea ne loto ma‵sei latou ki a Iosefa.

Ne fiafia malosi te lotou tamana ko Iakopo ki a Iosefa. Ne fakaasi atu tena fiafia ki a ia mai i te avatuga o se gatu gali kae ‵loa telā ne ‵sui mō tou tagata. I te laveaga ne ana taina ma‵tua e toko 10 a te lasi o te alofa o Iakopo ki a Iosefa, ne kamata o loto ma‵sei kae takalia‵lia latou ki a Iosefa. Kae e isi aka foki se isi pogai ne takalia‵lia ei latou ki a ia.

Ne isi ne moemiti e lua a Iosefa. I moemiti e lua konā a Iosefa, ne ifo atu ana taina ki a ia. I te taimi ne fai atu ei ne Iosefa ki ana taina a moemiti konā, ne gasolo aka eiloa o takalia‵lia latou ki a ia.

I te aso eiloa e tasi i te taimi ne tausi ei ne taina ma‵tua o Iosefa a mamoe a te lotou tamana, ne fakamolemole atu a Iakopo ki a Iosefa ke fano o onoono me e pefea latou. I te taimi ne lavea ei ne taina o Iosefa me ko vau a ia, ne fai aka a nisi tino i a latou: ‘Ke na tamate ne tatou a ia!’ Kae fai mai a Leupena, te taina matua: ‘Ikai, sa fai penā!’ Tela la, i lō te fai penā, ne puke ne latou a Iosefa kae ‵pei atu ki loto i se vaikeli e seai ne vai i ei. Oti aka ne saga‵saga latou ki lalo o mafau‵fau me se a te mea ka fai ne latou ki a ia.

I te taimi eiloa tenā ne o‵mai ei a nisi tino Isamaeli. Ne fai atu a Iuta ki ana āfa taina: ‘Ke na ‵togi atu ne tatou a ia ki te kau Isamaeli.’ Kae tenā eiloa a te mea ne fai ne latou. Ne ‵togi atu ne latou a Iosefa ki tupe siliva e 20. Ko tafaga la te uiga kaiū mo te sē alofa o te mea tenā!

Se a te tala ka fai atu ne ana taina ki te lotou tamana? Ne tamate ne latou se kouti kae ne ufi fakafia ne latou a te gatu gali o Iosefa ki loto i te toto o te kouti. I te otiga ne ave ne latou a te gatu ki te fale ki te lotou tamana ko Iakopo kae ne fai atu penei: ‘Ne maua ne matou a te mea tenei. Kilo atu ki ei, kae onoono aka me i te mea tenā ko te gatu o Iosefa.’

Ne lavea ne Iakopo me ko ia eiloa. Ne tagi tou tagata kae fai atu: ‘E se taumate ne tamate ne se manu fekai a Iosefa.’ Kae tenā eiloa te mea ne ma‵nako a taina o Iosefa ke mafaufau te lotou tamana ki ei. Ne fanoanoa malosi a Iakopo. Ne tagi tou tagata i te fia o aso. Kae ne seki mate a Iosefa. Ke onoono aka tatou me se a te mea ne tupu ki a ia i te koga ne ave a ia ki ei.