Moemiti a Falao

KO ‵TEKA atu a tausaga e lua, kae koi nofo eiloa a Iosefa i te falepuipui. Ne seki toe masaua ne te tino fakatoka uaina a ia. Kae i te po e tasi ne fai ne Falao ne moemiti fakapito e lua, kae ne fia iloa ne ia a uiga o moemiti konā. E lavea ne koe a ia e moe i konei? I te suā tafataeao ne kalaga atu a Falao ki ana tāgata ‵poto kae ne fakamatala atu ki a latou a mea kolā ne moemiti a ia ki ei. Kae ne seki mafai ne latou o fakamatala atu ki a ia a te uiga o ana moemiti.

I te taimi tenā ko fatoā masaua ne te tino fakatoka uaina a Iosefa. Ne fai atu a ia ki a Falao: ‘I te taimi ne nofo ei au i te falepuipui e isi se tagata i konā telā ne mafai ne ia o fakamatala mai a te uiga o moemiti.’ Ne aumai ne Falao a Iosefa ki tua mo te falepuipui i te taimi eiloa tenā.

Ne fakaasi atu ne Falao ki a Iosefa ana moemiti: ‘Ne lavea ne au a pulumakau e fitu kolā e puta‵puta kae gali. Oti aka ne lavea ne au a pulumakau pa‵kā e fitu. Kae ne folo ne pulumakau pa‵kā a pulumakau puta‵puta.

‘I te lua o aku moemiti ne lavea ne au a fuagā saito e fitu, ko ‵lasi kae sulu gali aka eiloa i luga i te kau saito e tasi. Oti aka ne lavea ne au a fuagā saito e fitu e pa‵kā kae mage‵mage. Kae ne kamata o folo ne fuagā saito pa‵kā a fuagā saito ‵lei.’

Ne fai atu a Iosefa ki a Falao: ‘E fakauiga eiloa a moemiti e lua konā ki se mea e tasi. A pulumakau puta‵puta e fitu mo fuagā saito e fitu e fakauiga ki tausaga e fitu, kae ko pulumakau pa‵kā mo fuagā saito pa‵kā e fakauiga ki te suā fitu tausaga. Ka isi ne tausaga e fitu kolā ka uke ‵ki eiloa a mea‵kai ka maua i Aikupito. Oti aka, ka isi ne tausaga e fitu ka mu‵tana ei a mea‵kai e ola aka.’

Telā ne fai atu ei a Iosefa ki a Falao: ‘Filifili aka se tagata poto ke takitaki ne ia a te fakaputuga o mea‵kai i tausaga ‵lei e fitu. Ka fai ei a tino ke se fia‵kai i te suā fitu tausaga ma‵sei māfai ko mu‵tana fua a mea‵kai e maua.’

Ne fiafia a Falao ki te manatu. Kae ne filifili ne ia a Iosefa ke fakaputu ne ia a meakai, kae ke tausi ki ei. I tafa o Falao, ne fai a Iosefa mo fai te ‵toe tagata tāua i Aikupito.

I te valu tausaga mai tua ifo i ei, i te taimi o te ogegā meakai, ne lavea ne Iosefa a nisi tāgata kolā ne o‵mai. E iloa ne koe me ko oi latou? Ia, a latou konā ko ana taina ma‵tua e toko 10! Ne uga mai latou ne te lotou tamana ko Iakopo me ko pili o palele olotou mea‵kai i Kanana. Ne iloa ne Iosefa ana taina, kae ne seki iloa ne latou a ia. E iloa ne koe me kaia? Ona ko Iosefa ko matua, kae ne pei foki a ia ki vaegā gatu kolā e ‵kese ‵ki eiloa.

Ne masaua ne Iosefa me i te taimi koi foliki ei a ia ne moemiti a ia e uiga ki ana taina e ifo mai ki a ia. E mata, e masaua ne koe i tau faitauga e uiga ki te mea tenā? Telā ne mafai ei o lavea ne Iosefa me ko te Atua telā ne uga mai ne ia a ia ki Aikupito, mō se pogai ‵lei. Se a tau faka‵tau me se a te mea ne fai ne Iosefa? Ke onoono aka tatou.