Ko Tofotofo ne Iosefa Ana Taina

NE FIA iloa ne Iosefa me koi uiga kaiū kae sē a‵lofa ana taina ma‵tua e toko 10. Telā ne fai atu ei a ia penei: ‘A koutou ne sipai. E o‵mai koutou o ‵sala aka a te mea e vāivāi ei te motou fenua.’

‘Ikai, e se fai matou penā,’ ko olotou muna. ‘A matou ne tino fakamaoni. Matou ne taina katoa. E toko 12 matou. Kae e tokotasi te motou taina ko oti ne mate, kae ko te motou taina foliki e ‵nofo mo te motou tamana.’

Ne fakafoliga atu a Iosefa me e se talitonu a ia ki a latou. Ne taofi ne ia tena taina ko Simeona i te falepuipui, kae talia atu a nisi taina ke ave ne latou a mea‵kai kae toe ‵foki atu ki te lotou fenua. Kae ne fai atu a ia penei: ‘Kafai e ‵foki mai koutou, e ‵tau o aumai ne koutou te otou taina foliki.’

I te taimi ne ‵foki atu ei latou ki Kanana, ne fai atu ne taina konei ki te lotou tamana ko Iakopo a mea katoa kolā ne ‵tupu. Ne fanoanoa malosi a Iakopo. ‘Ko oti ne mate a Iosefa,’ ne tagi mai a ia, ‘kae nei ko galo atu foki a Simeona. Ka se talia lele eiloa ne au ke ave ne koutou taku tama tagata foliki ko Peniamina.’ Kae i te taimi ko kamata ei o palele olotou mea‵kai, ne ‵tau o talia ne Iakopo ke ave ne latou a Peniamina ki Aikupito ko te mea ke toe maua mai ne mea‵kai.

I te taimi tenā ko lavea atu ne Iosefa ana taina ko o‵mai. Ko oko eiloa i tena fiafia ke lavea atu tena taina foliki ko Peniamina. E pelā mo te mea e iloa ne tatou, ne seki ai se tino i a latou ne iloa ne ia me i te tagata tāua tenei ko Iosefa. Nei la ko fai ne Iosefa se mea ke tofotofo aka ei ana āfa taina e toko 10.

Ne fai atu a ia ki ana tavini ke faka‵fonu olotou taga ki mea‵kai. Kae e aunoa mo te iloa ne latou, ne fai atu foki a ia ke tuku tena ipu siliva fakapito ki loto i te taga a Peniamina. I te ‵fokiatuga a latou katoa kae seki ‵mao malosi latou i te auala, ne uga atu ne Iosefa ana tavini ki a latou. I te taimi ne maua aka ei ne latou a ou tāgata, ne fai atu ana tavini: ‘Kaia ne kaisoa ei ne koutou a te ipu siliva a te motou pule?’

‘Ne seki kaisoa ne matou tena ipu,’ ne fai mai a taina katoa. ‘Kafai e maua ne koutou a te ipu i se tino e tokotasi o matou, ke tamate la a te tino tenā.’

Telā ne ‵sala atu ei a tavini i olotou taga katoa, kae ne maua aka ne latou a te ipu i te taga a Peniamina, e pelā mo te mea e lavea ne koe i konei. Ne fai mai a tavini: ‘Ko mafai ne koutou katoa o olo, kae ko Peniamina e ‵tau o olo mo matou.’ Ne a mea ka fai nei ne taina e toko 10 konei?

Ne ‵foki katoa atu latou mo Peniamina ki te fale o Iosefa. Ne fai atu a Iosefa ki ana taina: ‘E mafai ne koutou katoa o olo, kae e ‵tau mo Peniamina o nofo i konei ke fai pelā me ko taku pologa.’

Ne faipati aka a Iuta i te taimi tenā, kae fai atu penei: ‘Kafai e foki atu au ki te fale kae galo te tamaliki, ka mate toku tamana ona ko te mea e alofa malosi a ia ki tou tagata. Tela la, fakamolemole tuku au i konei ke fai mo fai tau pologa, kae tuku a te tamaliki ke foki ki te fale.’

Ko mafai ne Iosefa o lavea atu me ko oti ne ‵fuli ana taina. Ko se toe uiga kaiū kae sē a‵lofa latou. Ke onoono aka tatou me ne a mea ka fai nei ne Iosefa.