Te Tamā Pulumakau Aulo

OI AUE! Ne a mea ko fai nei ne tino? Ko ‵talo atu latou ki se tamā pulumakau! Kaia ko fai ei ne latou a te mea tenei?

I te taimi ne nofo atu ei a Mose i luga i te mauga i se vaitaimi leva, ne fai atu a tino penei: ‘E se iloa ne tatou me se a te mea ko tupu ki a Mose. Ke na faite aka ne tatou se atua ke takitaki ne ia tatou kea‵tea mai i te fenua tenei.’

‘Ko ‵lei la,’ ne fai atu a te taina o Mose ko Alona. ‘Tapale mai otou ligi aulo, kae aumai ki a au.’ I te taimi ne fai ei ne tino penā, ne ‵sunu ne Alona ke liu vai a mea konā kae faite ne ia se tamā pulumakau aulo. Kae ne fai atu a tino: ‘Tenei te ‵tou Atua, telā ne takitaki mai ne ia tatou kea‵tea mai Aikupito!’ Telā ne fai ei ne te kau Isalaelu se ‵kaiga lasi, kae tapuaki atu ki te tamā pulumakau aulo.

I te taimi ne lavea ei ne Ieova a te mea tenei, ne kaitaua malosi a ia. Ne fai atu a ia ki a Mose: ‘Fakavave o fano ki lalo. Ko fai ne tino se mea masei ‵ki. Ko oti ne puli i a latou aku tulafono kae ko ifo atu ki se tamā pulumakau aulo.’

Ne fakavave ifo a Mose ki lalo mo te mauga. Kae i te taimi ko pili ei o oko mai tou tagata, tenei eiloa te mea ne lavea ne ia. Ne usu ne tino a pese kae ‵saka fakatamilo i te tamā pulumakau aulo! Ne kaitaua malosi a Mose, telā ne ‵pei ei ne ia ki lalo a papa fatu e lua mo tulafono i luga i ei, kae ne maofa likiliki a mea konā ki vaega e uke. I konā loa ne puke ei ne ia a te tamā pulumakau aulo kae ne ‵sunu ne ia ke liu vai. Telā ne tukituki ei ne ia ke fai pelā me se pauta.

Ko oti ne fai ne tino se mea masei ‵ki. Telā ne fai atu ei a Mose ki nisi tāgata o latou ke puke olotou pelu. ‘A tino ma‵sei kolā ne tapuaki atu ki te pulumakau aulo e ‵tau o ‵mate,’ ne fai atu a Mose. Kae ne tamate ei ne tāgata konā a tino e toko 3,000! E mata, e se fakaasi mai i ei me e ‵tau mo tatou o fakaeteete ke tapuaki atu fua ki a Ieova, kae e se ki so se atua ‵se?