Te Kau Kipeona ‵Poto

KO UKE a fa‵kai i Kanana ne fakatokatoka i konā o taua atu ki te kau Isalaelu. Ne mafau‵fau latou me e mafai o manumalo latou. Kae ko tino i te fa‵kai pili mai ko Kipeona ne seki mafau‵fau penā. Ne tali‵tonu latou me e fesoasoani atu te Atua ki te kau Isalaelu, kae ne seki ma‵nako latou o ‵teke atu ki te Atua. Tela la, e iloa ne koe me se a te mea ne fai ne te kau Kipeona?

Ne fakaiku aka ne latou ke fakafoliga atu me ne o‵mai latou mai se koga ‵mao. Telā ne ‵pei ei a nisi tāgata ki gatu masae‵sae mo taka ko ma‵sae. Ne fakauta ne latou olotou asini ki taga masae‵sae kae ne ave ne latou a nāi falaoa ma‵lō ko leva. Tenā ne olo atu ei latou ki a Iosua kae ne fai atu: ‘Ne o‵mai matou mai se fenua ‵mao, me ne lagona ne matou a mea e uiga ki te otou Atua takutakua, ko Ieova. Ne lagona ne matou a mea katoa kolā ne fai ne ia mō koutou i Aikupito. Tela la, ne fai mai omotou takitaki ki a matou ke fakatoka ne mea‵kai mō te motou malaga kae ke olo atu o fai atu ki a koutou penei: “Matou ko otou tavini. Tauto mai me ka se taua mai koutou ki a matou.” E mafai o lavea ne koutou me i omotou gatu ko masae‵sae mai te omotou malaga loa mo omotou falaoa ko leva kae ko ma‵lō aka eiloa.’

Ne tali‵tonu a Iosua mo nisi takitaki ki te kau Kipeona. Telā ne fai ei ne latou se tautoga me ka se taua atu latou ki te kau Kipeona. Kae i te tolu o aso mai tua ifo i ei ne iloa aka ne latou me e ‵nofo ‵pili mai fua a te kau Kipeona.

‘Kaia ne fai mai ei koutou me ne o‵mai koutou mai se fenua ‵mao?’ ko te fesili a Iosua ki a latou.

Ne tali atu a te kau Kipeona: ‘Ne fai atu matou penā ona ko te mea ne ‵logo matou me ko oti ne tauto atu a te otou Atua ko Ieova ke tuku atu a te fenua kātoa tenei o Kanana ki a koutou. Tela la, matou ne ma‵taku i te mea ma tamate matou ne koutou.’ Kae ne tausi eiloa ne te kau Isalaelu te lotou tautoga, kae ne seki tamate ne latou a tino Kipeona. I lō te fai penā, ne fai latou mo fai olotou tavini.

Ne kaitaua te tupu o Ielusalema me ne fai ne te kau Kipeona se va filemu mo tino Isalaelu. Telā ne fai atu ei a ia ki nisi tupu e tokofa: ‘O‵mai o fesoasoani mai ki a au ke taua atu ki te kau Kipeona.’ Kae tenā eiloa a te mea ne fai ne tupu e tokolima konā. E mata, ne ‵poto a te kau Kipeona ke fai se va filemu mo tino Isalaelu, telā ko fai ei a tupu e tokolima konā ke olo atu o taua ki a latou? Ke onoono aka tatou.