Ko se Gasuesue te La

KILO atu ki a Iosua. Ne fai atu a ia penei: ‘Te la, tu ke mau!’ Kae ne seki gasue te la. Ne tu eiloa i te kogāloto o te lagi i te aso kātoa. Ne fai ne Ieova ke fai penā! Kae ke onoono aka tatou me kaia ne manako ei a Iosua ke tumau eiloa a te maina mai o te la.

I te taimi ne kamata ei o taua atu a tupu e tokolima i te fenua o Kanana ki te kau Kipeona, ne uga atu ne te kau Kipeona se tagata ke fakamolemole atu ki a Iosua mō se fesoasoani. ‘O‵mai fakavave ki a matou!’ ne fai atu tou tagata. ‘Fakasao mai matou! A tupu katoa i fenua maugā ko oti ne o‵mai o taua mai ki au tavini.’

I konā foki eiloa ne olo atu ei a Iosua mo ana tāgata taua. Ne māti atu latou i te po kātoa. I te taimi ne oko atu ei latou ki Kipeona, ne ma‵taku a sotia a tupu e tokolima kae ne kamata o ‵tele kea‵tea. Telā ne fai ei ne Ieova a vaiua fatu ‵lasi ke ‵to mai te lagi, kae ne uke atu a sotia ne ‵mate i te ‵pokoga i te vaiua fatu i lō tino kolā ne tamate ne tāgata taua a Iosua.

Ne iloa ne Iosua me e se leva kae ka fanaifo a te mata o te la ki lalo. Ka pouli, kae ka tokouke a sotia a tupu e tokolima ka ‵tele kea‵tea. Tenā eiloa a te pogai ne ‵talo atu ei a Iosua ki a Ieova kae ne fai atu: ‘Te la, tu ke mau!’ Kae i te taimi ne tumau ei a te maina mai o te la, ne mafai ei ne te kau Isalaelu o fakaoti te lotou manumalo i te taua.

E uke aka foki a nisi tupu ma‵sei i Kanana kolā ne takalia‵lia ki tino o te Atua. I loto i te ono tausaga ne fakatakavale ne Iosua mo tena kautau a tupu e toko 31 i te fenua. I te otiga o te mea tenā, ne vaevae aka ne Iosua te fenua o Kanana ki matakāiga kolā e seki maua ne latou olotou kogā laukele.

Ko ‵teka atu a tausaga e uke, ne mate atu a Iosua kae ko 110 ana tausaga. I te taimi ne ola ei a ia mo ana taugasoa, ne faka‵logo a tino ki a Ieova. Kae i te taimi ne ‵mate ei a tāgata ‵lei konei, ne kamata o fai ne tino a mea ma‵sei kae ne aofia latou i fakalavelave. I vaegā taimi eiloa penā ne ma‵nako malosi ei latou ki te fesoasoani o te Atua.